Ịjọọnụ 21

Ijeesu ộ sị ẹngụ zụ̀ ezirẹma ịhịmba

1Ọ mẹ̀ rẹ da kù chee, Ijeesu ọ rẹ sị ẹngụ anị zụ̀ ezirẹma anị ụtọ irehu Itiberiyasi. Aanị ọ mẹmẹ sị ẹngụ zụ̀ wa nị: 2Ịsayịmọnị Ipita ọnịrị Ịtọmọsị ana aā hị́ Ejima, beri Inatanẹrị Anikana ịnị ẹtẹ Igariri, ọnịrị ezi Izebedi beri ezirẹma Ijeesu ẹẹva ọsa ệ kụ́ gụ. 3#Irk 5.5Dị Ịsayịmọnị Ipita kà a yị wa ka, “Mee nee be ivovo.” Dị ẹnịnị ẹnị rẹ ka, “Yaa saasa wụụ na.” Dị ẹ na ngụ ẹpa aa na nị. Pooro ịnị avaba ịrahụ ịhị ọnọọ, ẹ yị nyị ịsị ẹ za.

4Éyi mẹ̀ sị nị, di Ijeesu jẹẹ ụtọ irehu nị. Ama ẹnịnị ẹ yị yẹ ka Ijeesu yọ nị. 5Dị Ijeesu kà a yị wa ka, “Ezi ẹnẹnị, wáá nyị ivovo nịnị?” Dị ẹnịnị ka eyiye nị. 6#Irk 5.6Dị Ijeesu kà a yị wa ka, “Maanị ne ọha awụ nịnị ngụ eyi ụvọrị ẹpa ọnọọ ka u vee re ivovoo za nịnị!” Ịzẹyịza, di e ne ọha ẹnịnị ngụ eyi ọnọọ nị. Ọha ẹnịnị ộ kụ́ ivovo rụrụ pooro ana ahịka, ẹnịnị e yi zụ tura a. 7Di ozirẹma oni Ijeesu sì ịrẹyị anị kà a yị Ipita ka, “Ananyị yịị yọ nọ!” Ịjị Ịsayịmọnị Ipita wụ́ ka Ananyị yịị yọ nị, ộ sị ịta anị, dị ọ sị sụ ọtẹ, di o ji ngụ enyi nị.

8Di ezirẹma ana vọ ẹnị sị ẹpa oweyi ọnọọ vẹ nị. Ẹnịnị e yi noze rịrị ụtọ irehu, ẹnịnị vị ẹhụụ ahụ ẹchẹhị avọọ rịrị abobo. Di eyee tura ọha ọnọọ oni ivovo hi ịnị anị nị. 9Ẹ mẹ̀ yị va sị ngụ ụtọ abobo kẹnẹ, di e re akịna ịra ịzọọ nị. Di e re ivovo ị́rẹsụ ịra ọnọọ, di re Ịbụrẹẹdị ịzọọ nị. 10Di Ijeesu kà a yị wa ka, “Sị ini ivovo ọnị ụ za nịnị ịsọọnị vẹ!” 11Dị Ịsayịmọnị Ipita nọ ịnị ẹpa, di o ne tura ọha ohihi ivovo ẹbanyị-ẹbanyị va tụ́ ụtọ irehu nị. Ivovo ene hi ịnị anị vị ẹchịhịmba tụra ẹwụrẹta (153); dị ẹ daka vavọọ yị rụrụ, ọha ọnọọ ọ yị yị na. 12Dị Ijeesu kà a yị wa ka, “Va rị ịsa nịnị!” Ẹ yị nyị ọnya ini ezirẹma anị ana nyayịnẹ ẹ họ̀ ọ ka ẹnẹ ọ vị, agụvị ka ẹnịnị ệ yẹ ka Ananyị yịị yọ nị. 13Dị Ijeesu na sị Ịbụrẹẹdị, dị ọ sị yị wa nị. Dị ọ rẹ sị ivovo yị wa nị.

14Ọnọọ ọ tụ́ ọọ ụpẹ ọhụta oni Ijeesu sị ẹngụ zụ̀ ezirẹma anị, ọ mẹ̀ ha hụụnị isu nị.

Ijeesu ộ sị Ipita va nọ udi anị

15Ịjị ẹ sị ịsa rị, dị Ijeesu kà a yị Ịsayịmọnị Ipita ka, “Ịsayịmọnị, ozi Ijona, wéé sì ịrẹyị amị huna ẹsẹnị?” Dị Ịsayịmọnị ka, “Hịịn, Ananyị yị, wâ yẹ ka mê sì ịrẹyị awụ de.” Dị Ijeesu kà a yọ ka, “Waa tẹsị ezi atẹmẹ amị o!” (Ọnọọ vị ka ‘aza Ohomorihi’.) 16Dị Ijeesu rẹ kà a yọ ụpẹ ọhụva ka, “Ịsayịmọnị, ozi Ijona, wéé sì ịrẹyị amị?” Dị Ipita rẹ ka, “Hịịn, Ananyị yị, wâ yẹ ka mê sì ịrẹyị awụ de.” Dị Ijeesu rẹ kà a yọ ka, “Waa tẹsị ezi atẹmẹ amị o!” 17Dị Ijeesu rẹ họ̀ ọ ụpẹ ọhụta ka, “Ịsayịmọnị, ozi Ijona, wéé sì ịrẹyị amị?” Ayị Ipita o si du, agụvị ka Ijeesu ọ rẹ họ̀ ọ ụpẹ ọhụta ka óó sì ịrẹyị anị. Dị Ipita kụkụ kà a yọ ka, “Ananyị yị, wâ yẹ avaba ịsa, wa rẹ yẹ ka mê sì ịrẹyị awụ.” Dị Ijeesu rẹ kà a yọ ka, “Waa tẹsị ezi atẹmẹ amị! 18Ịzẹyịza m maa kà a wụ nị, ịjị ụ vị ozweyi, ụụ̄ sị ịsaa sụ́ ọtẹ, dị ụ waa nọ ịzị èe zé wu eyi. Ama Ịjị u wèe si bo, ụ vaa tana ụvọ awụ, dị ọza ẹnẹsa sụ́ wụ, dị ọ sị wụ aa nọ ịzị ụ wẹ̀ yị yaanị sì ka wa nọ.” 19Ịrẹyị ọnọọ vị oni Ijeesu kà, dị aa sịị zụ̀ ẹngụ isu oni Ipita vee sú, dị ọ̀ sị sị igirima yị Ohomorihi. Ịjị Ijeesu vavọọ sị kà, dị ọ rẹ ka, “Waa dụ mị ịrẹma!”

Ijeesu ọnịrị ozirẹma ọsa

20 # Ịjọ 13.25 Ipita ộ kana eyi, di o re ozirẹma ọnọọ oni Ijeesu sì ịrẹyị anị, ọ màa dụ wa ịrẹma nị. Ọnị ọ rẹ yaayịtẹ gụrị Ijeesu aha ịsọyịrị di ee họ̀ use ka: Ananyị yị, ẹnẹ vaa sị wụụ chire ọnịvị awụụ ụvọ nị? 21Ípita mèe re e, dị ọ kà a yị Ijeesu ka, “Ananyị yị, ọza ọnọnịị yọ?” 22Dị Ijeesu tụ́ ọ ohi, dị ọ ka, “Mèe sì ka ọ̀ yàra dị ma vavẹ, ịzị ọnọọ gẹ wụ? Ẹwàa dụ mị ịrẹma!” 23Dị ọ kụkụ sị ngụ ịrẹyị yị ọdọwụ nịnị ka ozirẹma ọnọọ o yi vee sú nị. Ama Ijeesu ọ yị kà a ka, “O yi vee sú”, ọ ka, “Mèe sì ka ọ̀ yàra dị ma vavẹ, ịzị ọnọọ gẹ wụ?”

Ịrẹyị ọdịrẹma

24Ozirẹma ọnọọ ọ kà ịrẹyị ọnọnị, dị ọ rẹ chẹrẹ iwe ọnọnị tịtẹ nị. Yâ yẹ ka ịrẹyị ọnọọ kà vị ịzẹyịza 25A rẹ nyị ịsa ọrụrụ-ọrụrụ ana vọ oni Ijeesu mẹ. Àa ka à chẹrẹ avaba ẹnịnị, me yi ro ka avaba ẹhẹ ộ hyakụ dọ iwe ana a vaa sị chẹrẹ ẹ.

Currently Selected:

Ịjọọnụ 21: EBTP

Highlight

Copy