Ịjọọnụ 6

Ijeesu ộ sị ịsọyịrị pá aza ọrụrụ-ọrụrụ

(Imt 14.13-21; Ịmk 6.30-44; Irk 9.10-17)

1Ẹkụhị ọnya, Ijeesu ộ nọ akẹnẹ irehu Igariri, ana a rẹẹ̄ hị́ irehu Itiberiyasi. 2Ọkọnị aza ệ saasa a na, agụvị ka ẹnịnị ê vịdị re ụkọrọ apọtẹrẹwa ọnị ọ mẹ ịnị ẹngụ ọnịkụ nịnị. 3Dị Ijeesu hịrẹ nọ ịnị ataba, dị ọnịrị ezirẹma anị yaayịtẹ ịzọọ nị. 4Ụmẹ ọnọọ, ọ sị vọ chee di Aniju nịnị ẹ̀ rị Eche Ọyịparahu.

5Íjeesu mẹ̀ kana eyi, di o re ọkọnị aza ana aa vẹ ịdị anị; dị ọ kà a yị Ihwiripi ka, “Ịzị ị va naa hị́ ịsaa hụrẹ vaa yị aza ẹnẹnị aanị?” 6Ijeesu vị ana vavọọ kà kẹnẹ ka ọnị ọ̀ sị zama Ihwiripi re, agụvị ka ọnị ụvọta ộ yẹ ịsị ọ vaa mẹ. 7Dị Ihwiripi tụ́ o ohi, dị ọ ka, “Yàa daka hị́ Ịbụrẹẹdị achuchu ẹẹva, dị a ka ọzọza ọ̀ dà rị kiiki nị, ẹ yị hyakụ nyị ịzị o tù wa.” 8Dị ozirẹma anị ọnya ana aā hị́ Andụrụ, ọyịnyara Ịsayịmọnị Ipita, kà a yị Ijeesu ka: 9“Â nyị ozi ọnọrụ ọnya ịzẹnị ana nyị Ịbụrẹẹdị ẹẹhị beri ivovo ẹẹva. Ama ịzị ẹsẹnị daka tù ịnị ọkọnị aza ẹnẹnị?”

10Dị Ijeesu ka, “Kà a ka aza ẹnẹẹ ẹ̀ yaayịtẹ!” Â nyị avị ịzọọ ẹtẹẹtẹrẹ, dị avaba aza ẹnẹẹ yaayịtẹ nị. Ẹnịnị anọrụ kẹnẹ vị ẹhụụ akahị-akahị oze ẹẹhị (5,000) avọọ. 11Dị Ijeesu sị Ịbụrẹẹdị ẹnẹẹ, dị ọ kụ́ Ohomorihi avọ tụ́ ọọ, dị ọ ka à gà ẹ yị aza ana yaayịtẹ ịzọọ nị. Dị ọ ka à rẹ vavọọ gà ivovo ẹnẹ yị wa nị. Ọzọza ộ nyị, o mè sì. 12Ịjị ịnẹ sị wa há, dị Ijeesu kà a yị ezirẹma anị ka, “Kụ́ ana vọ gụ nịnị, agụvị asị a nyị ene du ha!” 13Agụvị avọọ dị ẹ kụ́ ana vọ gụ nị. Ana vọ ịnị Ịbụrẹẹdị ẹẹhị ana aza ẹnẹẹ rị, vị ohihi uji ẹwụrẹva.

14Ịjị aza ẹnẹẹ re ụkọrọ apọtẹrẹwa oni Ijeesu mẹ, dị ẹ ka, “Ịzẹyịza, ọza ọnọnị ọ vị Ọnịsẹ ọnọọ ana a vịdị kà a ka ọ vaa vẹ ẹhẹ nị.” 15Ijeesu ọ sị yẹ ka ẹyaa vaa sị ụkataa za ọnị ka ọnị ọ̀ vị ohinọyị ẹnịnị; dị ọ hụụ ịzọọ, dị ọnị ịnyara raa nọ ịnị ataba nị.

Ijeesu ộ zị ụsẹ ị́rẹsụ enyi

(Imt 14.22-33; Ịmk 6.45-52)

16Ịjị oruva si tù, dị ezirẹma Ijeesu ee chíi nọ ini irehu nị. 17Ẹ́ na ngụ ẹpa, dị ẹyaa jịnẹ irehuu nọ Ikapanawumi nị. Ẹtẹ o si hozi. Ijeesu ô yi ve tù wa. 18Ô tù ụpẹ ọnya, dị ahị ọbanyị ọnyara aa tụ́, dị aa dà enyi nị. 19Ezirẹma Ijeesu ệ họ̀ ẹpa, ẹ́ zị ụsẹ ẹhụụ ịmẹẹrị ẹẹta na ngụ ẹhụụ ẹẹna avọọ, di e vene re ka Ijeesu aa zị ụsẹ ị́rẹsụ enyi, dị aa ká ẹpa ẹnịnị vẹ nị. Angwa ô hí wa ẹtẹẹtẹrẹ. 20Dị Ijeesu kà a yị wa ka, “Ẹmịị yọ nị, asị u rè hí angwa nịnị!” 21Ẹnịnị kuku ee sì ka ẹnị ẹ̀ sị ịrajẹ sị Ijeesu tụ́ ịnị ẹpa, dị ẹpa ẹnịnị vana sị ngụ ịzị eyee sì ka ẹnị ẹ̀ nọ nị.

Aza ê sì Ijeesu

22Eyinẹhẹ anị, ọkọnị aza ana yị yà akẹnẹ irehu, ệ yẹ ka ẹpa ọnya kẹnẹ ọ vịdị yà ịzọọ nị. Ệ yẹ ka Ijeesu ọ yị ngụ ẹpa ọnọọ beri ezirẹma anị; ezirẹma anị ịnya kẹnẹ ẹ na nị. 23Ama â nyị ẹpa ọsa ana hụrẹ Itiberiyasi vẹ, di e hi ọgụrị ịzị nị. 24Ịjị ọkọnị aza ẹnẹẹ re ka Ijeesu ọnịrị ezirẹma anị ẹ yị kụkụ yà ịzọọ, dị ẹ ngụ ẹpa, dị ẹ nọ Ikapanawumi ne ee sì Ijeesu nị.

Ijeesu vị ịsọyịrị anaā mẹ ka ọza ọ̀ yàra

25Ịjị aza ẹnẹẹ si Ijeesu re ákẹnẹ irehu, dị ẹ kà a yọ ka, “Ho! Ọga, ye re ụmẹ ọnị ụ sị vẹ ịzẹnị?” 26Dị Ijeesu kà a yị wa ka, “Ịzẹyịza m maa kà nị, mâ yẹ ịsị ẹ vẹ di u wee sì mi nịnị. Wee sì mi nịnị agụvị ịsa ọnị ụ rị dị ịnẹ há wụ nịnị; ama ẹ yị vị, agụvị ka wâ yẹ ụkọrọ apọtẹrẹwa ọnị mị mẹ nịnị. 27Asị ụ rẹ̀ dụ ịsọyịrị eneē du nịnị! Ama waa dụ ịsọyịrị ene è yi mē du nịnị, dị ọọ̄ mẹ̀ ka ọza ọ̀ yàra ị́dị Ohomorihi pooro zịna-zịna. Ẹngụ ịsọyịrị ọnọọ ẹ́mị Ozi ọza onigirima vaa sịị wụ nịnị nị. Ẹmị Ozi ọza onigirima Óhomorihi sị ụvọ tụ́ ọọ ka ọ̀ vavọọ mẹ nị.”

28Dị ẹnịnị va họ̀ ọ use ka, “Sị a vọrọ ka ya mẹ, dị ya zụ mẹ̀ ịsa oni Ohomorihi sì?” 29Dị Ijeesu kà a yị wa ka, “Ịsa oni Ohomorihi ee sì ka wa mẹ nịnị, yị: Sị ayị tụra ọza ọnị ọ tụ́ vẹ ẹhẹ nịnị!” 30Dị ẹnịnị tụ́ ohi, dị ẹ ka, “Sị ẹ vị apọtẹrẹwa ọnị ụ nyẹngụ sị zụ̀ yị, di ye re e, dị ya rẹ dọ wụ wụ́? Sị ụ vaa mẹ? 31#Kụra 16.4,15; Ahẹ 78.24Ohiku ayị nịnị ệ rị ịmana ịnị ụnọmị ịyẹẹyẹ. Â vavọọ chẹrẹ ẹ tụ́ ini Iwe Ohomorihi ka: ‘Ộ sị ịsọyịrị hụrẹ ẹbẹẹba va yị wa ka ẹ̀ rị ọọ.’ ” 32Dị Ijeesu kà a yị wa ka, “Ịzẹyịza m maa kà a wụ nịnị nị: Ịsọyịrị oni Imosiisi sị va yị wụ nịnị, ẹ yị vị ịsa obooro ana hụrẹ ẹbẹẹba vẹ. Ama Ada amị ọ sị ịsọyịrị obooro hụrẹ ẹbẹẹba va yị wụ nịnị nị. 33Ịsọyịrị oni Ohomorihi sị yị aza, ọ vị ọza ana hụrẹ ẹbẹẹba vẹ ẹhẹ, dị ọ va mẹ ka anẹhẹ ẹ̀ zụ yàra nị.” 34Dị ẹnịnị ka, “Ọga, aarịhịnị, waa sị ịsọyịrị ọnọọ yị pooro de!” 35Dị Ijeesu ka, “Ẹma vị ịsọyịrị anaā mẹ ka ọza ọ̀ yàra booro nị. Ọza ana àa ká mị vẹ, ụngwẹ ọ mā vana kụ̀ ọ paa. Ọza ana àa sị ayị tụra mị, enyi ọ mā rẹ vana kụ̀ ọ paa.

36“Wâ yẹ ka mâ vịdị sị ọọ kà wụ nịnị ka we si mi re nịnị, ama wẹ yị yị sị ayị tụra mị nịnị. 37Avaba aza ana Ada amị ọ̀ọ raà sị chire mi ụvọ, ẹ vaa ká mịị vẹ. Avaba aza ana àa ká mị vẹ, mẹ yị vaa dị waa varẹma; 38agụvị ka mị hụrẹ ẹbẹẹba vẹ ẹhẹ ka ma va mẹ̀ ịsa ọnị ọza ana tụ́ mị vẹ ẹhẹ sì nị. Mẹ yị vẹ ka ma va mẹ̀ ịsa ene zé mi eyi. 39Ịsị ọza ana tụ́ mị vẹ ẹhẹ sì ka ma mẹ, yị: ka avaba aza ọnị ọnị kụ́ chire mi ụvọ, asa a nyị ikonya oni mi vú; ama dị ma ha wa hụụnị isu ịnị ẹkụhị ọdịrẹma. 40Ịsị Ada amị ee sì, yị: Ee sì ka avaba aza ene èe re Ozi anị, dị ẹ rẹ sị ayị tụra a nị, ẹ̀ zụ yàra pooro zịna-zịna; mị rẹ vaa ha waa hụụnị isu ịnị ẹkụhị ọdịrẹma.”

41Dị Aniju nịnị nyima aa rị ihuhuu hi Ijeesu nị, agụvị ka ộ kà a ka ọnị ọ vị ịsọyịrị ana hụrẹ ẹbẹẹba vẹ nị. 42Dị ẹnịnị ka, “Aanịka ẹ yị vị Ijeesu yị, ana ada anị rị Ijosẹẹhụ? Yâ yẹ ada anị ọnịrị ọnyị anị, ọ! Sị ẹ va mẹ ka ọ̀ọ kà a booro aanị ka ẹbẹẹba ọ́nị hụrẹ vẹ nị?” 43Dị Ijeesu kà a yị wa ka, “Asị ụ rẹ̀ rị ihuhu ịnị akakana ẹngụ awụ nịnị! 44Ẹ yị nyị ọza ana nyẹngụ ká mị vẹ, ẹ̀ yị vị Ada amị ana tụ́ mị vẹ ẹhẹ tura a vẹ. Ọ̀ọ vẹ, dị mị haa hụụnị isu ịnị ẹkụhị ọdịrẹma. 45#Ayị 54.13Ọnịsẹ nịnị ệ chẹrẹ ẹ tịtẹ ịyẹẹyẹ ka: ‘Ohomorihi ọ vaa zụ̀ avaba aza ịsa nị.’ Avaba ọza ana àa wụ́ ịrẹyị Ada amị, dị ẹ rẹ kọsẹ ị́dị anị nị, ẹ vaa ká mịị vẹ. 46Ọnọọ ọ yị vị ka â nyị ọza ene re Ada amị tụ́ eyi da, oo! Ẹmị ana hụụ ịdị Ohomorihi vẹ ịnya kẹnẹ, o re Ada amị nị.

47“Ịzẹyịza m maa kà a wụ nị, ọza ana àa sị ayị tụra mị, Ohomorihi ọ raà mẹ ka ọ̀ yàra pooro zịna-zịna da. 48Ẹma vị ịsọyịrị anaā mẹ ka ọza ọ̀ yàra booro nị. 49Ohiku awụ nịnị ệ rị ịmana ịnị ụnọmị, ama e yi wusu. 50Ẹmị ọnọnị ọ vị ịsọyịrị ana hụrẹ ẹbẹẹba vẹ nị, ọza ana àa rị ịsọyịrị ọnọnị, o mē vene sú paa. 51Ẹma vị ịsọyịrị anaā mẹ ka ọza ọ̀ yàra booro nị. Ẹbẹẹba mị hụrẹ vẹ nị. Ọza ana àa rị ịsa ọnọọ, vaa yàra pooro zịna-zịna. Ọchẹngụ amị ọ vị ịsọyịrị ọnị mị vaa sị yị aza nị. Maa sịị yị anẹhẹ ka ẹ̀ zụ yàra obooro.”

52Ọsọnị ộ mẹ̀ ka Aniju nịnị è nyima ee pe ẹngụụ nyị ahankata ẹtẹẹtẹrẹ. Ẹnịnị ka, “Ọ́nọrụ ọnọnị mẹmẹ nyẹngụ sị ọchẹngụ anịị yị ka ya rị ọọ?” 53Dị Ijeesu va kà a yị wa ka, “Ịzẹyịza m maa kà a wụ nị, wẹ̀ yị rị ọchẹngụ ẹmị Ozi ọza onigirima, di u we re hú anya amị nịnị, wẹ yị va zụụ yara obooro nịnị. 54Ọza tụra ọza ana àa rị ọchẹngụ amị, di o re hú anya amị nị, ọnọọ ọ raà mẹ ka ọ̀ yàra pooro zịna-zịna. Mị vaa haa hụụnị isu ịnị ẹkụhị ọdịrẹma, 55agụvị ka ọchẹngụ amị ọ vị ịsọyịrị obooro nị, dị anya amị ọnị rẹ vị ịsa obooro ana a vọrọ ka ọza ò hù nị. 56Ọza ana àa rị ọchẹngụ amị, di o re hú anya amị nị, ọnọọ vị ka ẹmị rị ọọ ọ sị vị ọnya, ẹmị rị ọọ ọ sị vabẹ. 57Ada amị ana yàra pooro zịna-zịna ọ tụ́ mị vẹ ẹhẹ nị. Ini oze anị ẹ́mị rẹ zị yàra pooro zịna-zịna nị. Avọọ gẹdẹ-gẹdẹ, ọza ana àa rị ọchẹngụ amị, ọnị rẹ vaa yàra pooro zịna-zịna ini oze amị. 58Agụvị avọọ, ẹmị ọnọnị ọ vị ịsọyịrị ọnọọ ana hụrẹ ẹbẹẹba vẹ nị. O yi véné ịsọyịrị oni ohiku awụ nịnị rị ịyẹẹyẹ, di e yi wusu. Àa vị ịsọyịrị ọnọnịị yọ, ọza tụra ọza ana àa rị ọọ, vaa yàra pooro zịna-zịna.”

59Ịrẹyị ẹnẹnị vị oni Ijeesu kà, ọ màa zụ̀ aza ịsa ini irehi Ohomorihi Aniju nịnị ẹkụra Ikapanawumi.

Ịrẹyị anaā mẹ ka ọza ọ̀ yàra pooro zịna-zịna

(Imt 16.13-20; Ịmk 8.27-30; Irk 9.18-21)

60Ezirẹma Ijeesu ọrụrụ-ọrụrụ ệ wụ́ ịrẹyị ẹnẹẹ, dị ẹ ka, “Ịrẹyị ẹnẹnị ẹ sị katẹngụ, ẹnẹ vana zụ wụ́ ẹngụ ịrẹyị ẹnẹnị da?” 61Ijeesu ọ sị yẹ ịnị ayị anị ka ezirẹma anị vavọọ aa rị ihuhu agụvị ịrẹyị ẹnẹẹ. Di Ijeesu kà a yị wa ka, “Vị ọsọnị wéé si wu nịnị du ayị nị? 62Wèe ve re ka ẹmị Ozi ọza onigirima aa varẹma hịrẹẹ nọ ịzị mị vịdị yà yọ? 63Ụhwẹ Ọnịnị ọọ̄ mẹ̀ ka ọza ọ̀ yàra nị; ịrẹyị ọza vị osusu kẹnẹ-kẹnẹ. Ịrẹyị ọnị maa kà a wụ nịnị aanị vị Ụhwẹ Ọnịnị, ọ rẹ zụ mẹ ka aza ẹ̀ yàra. 64Ama â nyị aza ẹnyị awụ nịnị, ẹnẹ ẹ̀ yị dọ wụ́.” Ijeesu ộ vịdị sị yẹ hụrẹ ụmọrụmọ aza ẹnẹ ẹ̀ yị dọ ọnị wụ́ ọnịrị ọza ana vaa sị ọnịị chire ọnịvị anị ụvọ. 65Dị Ijeesu rẹ kà a yị wa ka, “Agụvị avọọ mị vịdị kà a wụ nịnị ka ẹ yị nyị ọza ana zụ ká mị vẹ, ẹ̀ yị vị Ada amị o si oze yọ.”

66Agụvị ịrẹyị ọnọnị, ezirẹma anị ọrụrụ-ọrụrụ ẹ sị và, ẹ yị kụkụ zẹẹ ka ẹnị ẹ̀ kụkụụ dụ ọọ zị. 67Dị Ijeesu va kà a yị ezirẹma anị ẹwụrẹva ana vọ ka, “Vị ẹwụ nịnị wáá rẹ ka ẹwụ nịnị raa na nị?” 68#Imt 16.16; Ịmk 8.29; Irk 9.20Dị Ịsayịmọnị Ipita tụ́ ohi, dị ọ ka, “Ananyị yị, ẹnẹ ẹyị kụkụ aa káa na? Ẹwa nyị ịrẹyị ana zụ mẹ ka ọza ọ̀ yàra pooro zịna-zịna nị. 69Ya sị dọ wụ́, ya rẹ sị yẹ ka ẹwa vị Ọza Ọnịnị Ohomorihi nị.” 70Dị Ijeesu tụ́ ohi, dị ọ ka, “Wâ yẹ ka ẹma nyị ẹwụ nịnị ẹwụrẹva nị. Ama ọza ịnyara awụ nịnị vị echu.” 71Ịjọnọọ, Ijeesu aa kà ịrẹyị Ijudasi Isikarịyọtị, ana vị ozi Ịsayịmọnị; agụvị ka ịzẹyịza, Ijudasi vị ọnya ini ezirẹma ẹwụrẹva, ama ọnị ọ vaa sị Ijeesu chire ọnịvị anị ụvọ nị.

Currently Selected:

Ịjọọnụ 6: EBTP

Highlight

Copy