Ịjọọnụ 8

Â za ọsẹrẹka ọnya vẹ ịdị Ijeesu

1Ijeesu ọnị ộ nọ ịnị Ataba Orivi. 2Ẹnẹnẹ viri-viri eyinẹhẹ anị, dị ọ rẹ vavẹ ini irehi Ohomorihi nị. Dị aza rẹ wara ve tù ọọ nị. Dị Ijeesu yaayịtẹ, dị aa zụ̀ wa ịsa nị. 3Ọzwọzọda nịnị ọnịrị Anihwarisi nịnị ệ sị ọnẹẹ ọnya aanị vẹ. Ọnẹẹ ọnọọ vị ẹnẹ ẹ za, e mè ne tù ka aa sẹ̀ ịrẹka. Dị ẹnịnị za a va jẹẹ ịnị akakana ẹnịnị nị. 4Dị ẹ kà a yị Ijeesu ka, “Ọga, ọnẹẹ ọnọnị vị ọnị ị za, ọ màa yịị sẹ̀ ịrẹka. 5#Ire 20.10; Ọda 22.22-24Anka ọda ayị, Imosiisi vị ana kà a ka ẹngụ ọnẹẹ ọnọnị, asị ịrẹta-ịrẹta wụ ọ. Sị ẹwụ kà tụ̀ ọọ?”

6Ịrẹyị ọnọnị vị ene eyee sii be Ijeesu, agụvị di è zụ re ịrẹyị ẹnẹ ẹnị vaa sị za a. Ama di Ijeesu nyima nẹtẹ, dị aa sị igegee chẹrẹ ịsa tụ́ ini eteesu nị. 7Ẹ màa yịị họ̀ ọ use, dị Ijeesu kwẹẹtẹ jẹẹ nị, dị ọ ka, “Ọza ana àa yẹ ka ọnị ọọ̀ yị mẹ ịvị ịnị ẹngụ awụ nịnị da, ọ̀ vịdị sị ịrẹta, di ò nee nya a.” 8Di o re nyima nẹtẹ, dị ọ raa chẹrẹ ịsaa tụ́ ini eteesu nị. 9Ịjị ẹnịnị vavọọ wụ́, di e nyima hụụnị ọzọkụ ẹnịnị, dị ẹyaa tụ̀ ọnya-ọnya nị. Dị ọ kụkụ sị vọ Ijeesu ọnịnya beri ọnẹẹ ọnọọ ana yị jẹẹ ọvịdị anị nị. 10Dị Ijeesu kwẹẹtẹ jẹẹ, dị ọ kà a yị ọnẹẹ ọnọọ ka, “Ọnẹẹ ọnọnị, ịzị ẹ yà? Ẹ yị nyị ọza ana jị ịvị wụụ?” 11Dị ọnẹẹ ọnọọ ka, “Ọga, ẹ yị nyị, ọ!” Dị Ijeesu kà a yọ ka, “Ẹmị ẹ yị rẹ jị ịvị wụ; waa na, asị ụ kụkụ vana mẹ ịvị!”

Ijeesu ọ vị ẹtohweyi ẹhẹ nị.]

12 # Imt 5.14; Ịjọ 9.5 Dị Ijeesu rẹ kà a yị aza, dị ọ ka, “Ẹma vị ẹtohweyi yị anẹhẹ nị. Ọza ana àa dụ mị ịrẹma, o vee re ẹtohweyi anaā mẹ ka ọza ọ̀ yàra obooro. Ọza ọnọọ ọ yị kụkụ vaa zị ụsẹ ịrahụ.” 13#Ịjọ 5.31Dị Anihwarisi nịnị kà a yị Ijeesu ka, “Ẹwụ ụvọta aa dọ ivenu ẹngụ awụ aanị nọ! Ivenu awụ ọ yị nyị ahụ jẹẹ.” 14Dị Ijeesu va kà a yị wa ka, “Ịrẹyị ọnị maa kà vị ịzẹyịza, màa daka aa dọ ivenu ẹngụ amị, agụvị ka mâ yẹ ịzị mị hụrẹ vẹ, ma rẹ yẹ ịzị maa nọ. Ama ẹwụ nịnị ọ yị yẹ ịzị mị hụrẹ vẹ, wẹ yị rẹ yẹ ịzị maa nọ nịnị. 15Ẹwụ nịnị vị ana aa mẹ̀ ọkarẹyị anka ọza kẹnẹ. Ama ẹmị ẹ yị mẹ̀ ọkarẹyị yị ọzọnyị-ọzọnyị. 16Màa daka aa mẹ̀ ọkarẹyị, ọkarẹyị ẹmị vị ịzẹyịza, agụvị ka ẹ yị vị ẹmị ịnya aa mẹ̀ ẹ. Ẹmịrị Ada amị ana tụ́ mị vẹ ẹhẹẹ yọ nị. 17#Ọda 19.15Ini iwe ọda awụ nịnị, â chẹrẹ ẹ tụ́ ọọ ka: ‘Aza ẹnị ẹẹva ẹ̀ẹ dọ ivenu tụ́ ịnị ịrẹyị, ịrẹyị ọnọọ vị ịzẹyịza.’ 18Ẹmị aa dọ ivenu ẹngụ amị, dị Ada amị ana tụ́ mị vẹ ẹhẹ, ọnị raa dọ ivenuu tụ́ ịnị ịrẹyị amị nị.” 19Dị ẹnịnị va họ̀ Ijeesu use ka, “Ịzị ada awụ yà?” Dị Ijeesu tụ́ wa ohi, dị ọ ka, “Wẹ yị yẹ mị nịnị, wẹ yị rẹ yẹ Ada amị nịnị. Wàa yaanị yẹ mị nịnị, ụ yaanị rẹ sị Ada amị yẹ nịnị bẹẹ.”

20Ịrẹyị ẹnẹnị vị oni Ijeesu kà, ọ mẹ yà ịzị aā tụ́ ẹkẹhịị tụ́ ini irehi Ohomorihi dị aa zụ̀ aza. Ẹ yị nyị ọza ana sị ụvọ kanyị ọọ, agụvị ka ụmẹ anị oò yi tù.

Ijeesu ka ọnị vaa vàa nọ ịdị Ohomorihi

21Dị Ijeesu rẹ kà a yị wa ka, “Maa vaa na nịnị, u vee sì mi nịnị, ama di u sú tụ́ ịnị ịvị awụ nịnị. Ịzị maa nọ, wẹ yị va zụụ vẹ ịzọọ nịnị.” 22Dị Aniju nịnị ka, “Vị ọ́ọ́ vana vaa wụ̀ ẹngụ anị nị, dị ọ maanị aa kà a ka ịzị ọnị aa nọ, ẹyị ẹ yị va zụụ nọ ịzọọ nị?” 23Dị Ijeesu kà a yị wa ka, “Ịnị ẹhẹ ọnọnị ụ hụrẹ vẹ nịnị nị, ẹmị vị ana hụrẹ ẹbẹẹba vẹ, ẹ yị vị ẹhẹ ọnọnị ẹmị hụrẹ vẹ. 24Agụvị avọọ, mị kà a wụ nịnị ka u vee súu tụ́ ịnị ịvị awụ nịnị. Wẹ̀ yị dọ mị wụ́ nịnị ka ‘Ẹma vị Ẹmị’ nị, vi u vee súu tụ́ ịnị ịvị awụ nịnị nị.” 25Dị ẹnịnị rẹ họ̀ ọ ka, “Ẹwụ ẹnẹ ọ vị?” Dị Ijeesu ka, “M mẹ̀ yị kà a wụ nịnị hụrẹ ụmọrụmọ avọọ, mị vị nị. 26Â nyị ịsa ọrụrụ-ọrụrụ ọnị mị zụ kà, dị ma rẹ sị jị ịvị wụ nịnị. Ama Ọza ana tụ́ mị vẹ ẹhẹ vị ọnịzẹyịza. Ịrẹyị anị ọnị mị wụ́, m maa kà a yị anẹhẹ nị.”

27Ẹnịnị ẹ yị yẹ ka ini oze Ohomorihi Ada ayị aa kà a yị ẹnị nị. 28Dị Ijeesu rẹ kà a yị wa ka, “Ịhị wàa raà sị ẹmị Ozi ọza onigirima tụ́ ẹba, ụ vaa yẹ nịnị ịhị ọnọọ ka ‘Ẹma vị Ẹmị’ nị. Ụ rẹ vaa yẹ nịnị ka mẹ yị dà ịsọnyị-ịsọnyị mẹ yị ẹngụ amị, ama ka ịrẹyị ana Ada amị sị zụ̀ mị, m maa kà nị. 29Ọza ana tụ́ mị vẹ ẹhẹ yàa mị ịrẹma. Ọ yị navọ ẹmị ịnya tịtẹ, agụvị ka ịsa ene zé e eyi mịị̄ mẹ pooro nị.” 30Íjeesu mẹ̀ maanị aa kà ịrẹyị ọnọnị, aza ọrụrụ-ọrụrụ ệ sị ayị tụra a.

Ẹnẹ vị ada Aniju nịnị?

31Dị Ijeesu kà a yị Aniju nịnị ana sị ayị tụra a ka, “Wàa yịị sị ụvọọ za ịrẹyị amị nịnị, ịjọnọọ ụ vaa vị ezirẹma amị obooro nịnị. 32Ụ vaa yẹ ịzẹyịza nịnị; ịzẹyịza ọnọọ ọ vaa sị wụ nịnịị hụụnị ọrịhị nị.” 33#Imt 3.9; Irk 3.8Dị ẹnịnị tụ́ Ijeesu ohi, dị ẹ ka, “Ezi Abụrahamị ị vị nọ! Yẹẹ̀ yị vị ọrịhị ọzọnyị-ọzọnyị da. Sị ẹ vẹ dị ụ waa kà a ka: ị vaa hụụnị ọrịhị?”

34Dị Ijeesu va kà a yị wa ka, “Ịzẹyịza m maa kà a wụ nịnị nị, ọza tụra ọza ana àaā mẹ ịvị, vị ọrịhị ịvị. 35Wâ yẹ nịnị ka ọrịhị ọ yị vaa yà ini eehi pooro. Ozi ọọ̄ yà ini eehi pooro nị. 36Ama àa vị ẹmị Ozi Ada amị ọ mẹ ka wa nyị ẹngụ awụ nịnị nị, ịjọnọọ ụ vaa nyị ẹngụ awụ nịnị obooro ịnị ịzẹyịza. 37Mâ yẹ ka ezi Abụrahamị ụ vị nịnị nị; ama wee yii sì ka wa wụ̀ mị nịnị, agụvị ka ịrẹyị amị o yi re aha yà ịnị ayị awụ nịnị. 38Maa kà ịrẹyị oni mi re ị́dị Ada amị, ama ẹwụ nịnị aa mẹ̀ ịsa ana ada ẹwụ nịnị kà wụ nịnị.”

39Dị ẹnịnị tụ́ ohi, dị ẹ ka, “Abụrahamị ọ vị ada ayị nị.” Dị Ijeesu kà a yị wa ka, “Àa vị ezi Abụrahamị ụ yaanị vị nịnị obooro nị, ụ yaanị aa mẹ̀ ịsa ana Abụrahamị mẹ nịnị. 40Ẹmị vị anaā kà a wụ nịnị ịsa oni Ohomorihi kà mị; ama wee sì ka wa wụ̀ mị nịnị. Abụrahamị ọ yị vavọọ mẹ. 41Ịsị ada awụ nịnịị̄ mẹ, ụ waa mẹ nịnị nị.” Dị ẹnịnị rẹ ka, “Yẹ yị vị ozi ọta, Ohomorihi ọnịnya ọ vị Ada ọnị ị nyị nị.”

42Dị Ijeesu kà a yị wa ka, “Àa vị Ohomorihi ọ yaanị vị Ada awụ nịnị nị, ụ yaanị sì ịrẹyị amị nịnị, agụvị ka ịdị Ohomorihi mị hụrẹ vẹ ịzẹnị nị. Ẹ yị vị ẹmị ụvọta ọ tụ́ ẹngụ amị vẹ; ọnị ọ tụ́ mị vẹ ẹhẹ nị. 43Wáá yẹ ịsị ẹ vẹ dị ụ wẹ̀ yị yẹ ịrẹyị amị nịnị? Ịsị ẹ vẹ ọ vị ka wẹ yị dọ ka wa wụ́ ịrẹyị amị nịnị. 44Ezi ada awụ nịnị ụ vị nịnị nị; ada awụ nịnị ọnọọ ọ vị Echu nị. Ịsa ana ada awụ nịnịị̄ sì kẹnẹ, ụ waa mẹ nịnị nị. Ọwọza ọ vị hụrẹ ụmọrụmọ nị. Ọ mā rẹ saasa ịzẹyịza, agụvị ka ẹ yị nyị ịzẹyịza ikonya ịnịnẹ anị. Èe cheeche, ebira anị aa mẹ avọọ nị, agụvị ka onireche ọ vị nị. Ọnị nyẹmba ọ vị ada ireche nị. 45Ẹmị vị anaā kà ịzẹyịza wụ nịnị, agụvị avọọ ụ wẹ̀ yị dọ mị wụ́ nị. 46Ẹnẹ zụ sị zụ̀ ịnị awụ nịnị ka mâ mẹ ịvị da? Ịrẹyị ẹnẹ ẹmị aa kà vị ịzẹyịza, sị ẹ vavẹ dị ụ wẹ̀ yị dọ mị wụ́ nịnị? 47Ọza ana àa vị ozi Ohomorihi vị anaā wụ́ ịrẹyị Ohomorihi; ama ẹwụ nịnị ọ mā wụ́ ịrẹyị Ohomorihi, agụvị ka ẹ yị vị ezi Ohomorihi ụ vị nịnị.”

Ijeesu ọnịrị Abụrahamị

48Dị Aniju nịnị tụ́ Ijeesu ohi, dị ẹ ka, “Aanịka yẹ yị vịdị yị kà a ka Anịsamarịya ụ vị nị, ka wâ nyị ụhwẹ echu?” 49Dị Ijeesu tụ́ ohi, dị ọ ka, “Mẹ yị nyị ụhwẹ echu, ama maa sị ụbanyịị yị Ada amị, dị ẹwụ nịnị ọ̀ yị sị ụbanyị mị nị. 50Ẹ yị vị ụbanyị ẹngụ amị m mee sì. Â nyị ọza enee si ụbanyịị yị mị, ọnị ọ rẹ vị ọmọkarẹyị nị. 51Ịzẹyịza m maa kà a wụ nịnị nị, ọza ana àa sị ụvọ za ịrẹyị amị, o yi kuku vee sú paa.” 52Dị Aniju nịnị tụ́ ọọ ohi, dị ẹ ka, “Ya sị yẹ ka wâ nyị ụhwẹ echu. Abụrahamị ô wusu, ọnịsẹ nịnị ẹnị e re wusu; dị ẹwụ kụkụ va ka ọza ana àa sị ụvọ za ịrẹyị awụ, oyi kuku vee sú paa! 53Ewéé kuku ve huna Abụrahamị ada ayị, ene sú nị? Ọnịsẹ nịnị ẹnị e re wusu. Sị ụ vị ana sị ẹngụ awụ hị́ ka wáa vị?”

54Dị Ijeesu ka, “Àa vị ẹmị ụvọta aa sị ụbanyịị yị ẹngụ amị nị, ẹngụ ụbanyị ọnọọ vị ịyẹyẹ. Ada amị aa sị ụbanyịị yị mị nị. Ada amị ọnọọ ụ ka ộ vị Ohomorihi awụ nịnị nị. 55Ama wẹ yị yẹ ẹ nịnị, ẹmị â yẹ ẹ. Màa na kà a ka mẹ yị yẹ ẹ, ẹmị rẹ sị vị onireche anka ẹwụ nịnị. Ama ẹmị â yẹ ẹ, ma rẹ sị ụvọ za ịrẹyị anị. 56Abụrahamị ada awụ nịnị ọnị ộ jẹ ịrajẹ ka oni vee re ụmẹ amị. Ịzẹyịza ô re e, ịnẹ anị ô hine.” 57Dị Aniju nịnị kà a yọ ka, “Wẹẹ̀ yị va gụ ịrayị ẹvarẹwụ, dị ụ ka wê re Abụrahamị?” 58Dị Ijeesu kà a yị wa ka, “Ịzẹyịza m maa kà a wụ nịnị nị, dị a va yẹ ka aa ma Abụrahamị, mị hụrẹ yà ịzọọ nị.” 59Dị ẹ kụ́ ụvọ kụ́ ịrẹta, ka eni è ne e hi Ijeesu nị, ama dị Ijeesu sị ẹngụ anị tẹ yị wa, di o hụụnị irehi Ohomorihi nị.

Currently Selected:

Ịjọọnụ 8: EBTP

Highlight

Copy