Iruuku 1

Iruvo ọnị Iruuku sị chẹrẹ iwe ọnịnị

1Aza ọrụrụ-ọrụrụ ẹ raà sị vụrị ka ẹnị ẹ̀ chẹrẹ ẹ ahụ-ahụ avaba ịsa ana mẹ ịnị akakana ẹ yị. 2Aza ana sị eyi re ịrẹyị ẹnẹẹ hụrẹ ụmọrụmọ, dị ẹ rẹ yaa kà enube ọyịzaa zị, ẹ kà a yị nị. 3Itiyohwịrọsị ada ayị, me reè sì iruvo avaba ịsa ẹnẹẹ chẹrẹkẹ hụrẹ ịzị e nyima hụrẹ. Agụvị avọọ mee ro ka â vọrọ ka ma chẹrẹ ẹ ahụ-ahụ tụ́ hi wu bẹẹ. 4Mị vavọọ aa chẹrẹ ẹ, agụvị wa zụ yẹ avaba ịzẹyịza ịrẹyị ana vịdị raà sị zụ̀ wụ.

Â kà a ka a vaa ma Ịjọọnụ ọhwọzenyi

5 # 1 Ịtọ 24.10 Ịnị ụmẹ ọnya aanị ọnị Ịhẹrọdị vị ohinọyị Ijudiya, â nyị ohirẹsụ irehi Ohomorihi ọnya ana aā hị́ Ịzakaraya. Ini ogu Abija Ízakaraya yà nị. Ose anị vị ozi Eerọnị, ịrẹha anị ọ rị Erizabẹẹtị nị. 6Ẹnị ẹyịva vị ọnịzẹyịza ini eyi Ohomorihi, dị ẹ rẹ yaa saasa avaba ọda Ohomorihi nị. Ẹnịnị ẹ yị sị ahụ jị ọchị nyee vụrụ-vụrụ. 7Ẹnịnị ẹ yị ma ozi agụvị ka Erizabẹẹtị vị ọbọrị. Ẹnị ẹyịva ệ da vịra ẹtẹẹtẹrẹ. 8Ẹkụhị ọnya, o si tù ka ogu Ịzakaraya ọ̀ na mẹ̀ ụkọrọ. Dị Ịzakaraya aa mẹ̀ ụkọrọ anị anka ohirẹsụ irehi Ohomorihi ọ́vịdị Ohomorihi nị. 9Anka ohirẹsụ irehi Ohomorihi nịnịī mẹẹ mẹ̀, ọnị ọ́ za ka ọ̀ ngụ ini irehi Ohomorihi na rị eturare ịra hi Ohomorihi nị. 10Ịnị ụmẹ ana aā sịị rị eturare ịraa hi Ohomorihi, dị ọkọnị aza ana vọ ẹnị hi ẹhẹ aa mẹ̀ aduwa nị. 11Dị anggẹẹrị Ohomorihi sị ẹngụ zụ̀ ọọ ịzọọ nị. Dị anggẹẹrị ọnọọ jẹẹ eyi ụvọrị ụta ịzị a yàā rị eturare ịra nị. 12Ízakaraya mè ree, ayị anị ọ sị vazi, dị angwahi sị ngụ ọọ ẹngụ nị 13Dị anggẹẹrị ọnọọ kà a yọ ka, “Ịzakaraya, asị u hí angwa agụvị ka Ohomorihi ọ raà wụ́ aduwa awụ. Erizabẹẹtị ose ewu vaa ma ozi ọnọrụ ọnyaa yị wụ, Ịjọọnụ ụ vaa yị ọ nị. 14Àa sị ọọ ma, ịnẹ awụ vee hine ẹtẹẹtẹrẹ. Aza ọrụrụ-ọrụrụ rẹ vaa jẹ bẹẹ. 15#Ịrị 6.3Ọzọbanyị ọ vaa vị ini eyi Ananyị yị nị. Ọ yị va nyayịnẹ ẹ hú eche vụrụ-vụrụ, ọ̀ daka vị eche ọkatẹngụ. Hụụnị ịnị ịnẹ ọnyị anị Ụ́hwẹ Ọnịnị vaa dọ avaba ayị anịị hụrẹẹ vẹ nị. 16Ọ vaa kụ́ Anisirẹrị ọrụrụ-ọrụrụ vaavẹ ịdị Ananyị yị ana vị Ohomorihi ẹnịnị. 17#Ịma 4.5,6Ụkata Erija ọnịrị ebira anị ọ vaa nyị nị. Ọnị ọ vaa dọ ọvịdị Ananyị yị nị. Ọ vaa mẹ ka ada ọnịrị ezi è ze. Dị ọ rẹ mẹ ka anakamawụ nịnị ẹ̀ varẹma va zị oze ọnịrẹyịzẹyịza. Dị ọ re tenyi aza ẹngụ tịtẹ yị Ananyị yị.” 18Dị Ịzakaraya kà a yị anggẹẹrị ọnọọ, dị ọ ka, “Sị mị zụ sị yẹ ka ịrẹyị ọnọnị vaa mẹ? Me si bo, ose emi oni o re si bo bẹẹ.” 19#Ịda 8.16; 9.21Dị anggẹẹrị tụ́ ọọ ohi dị ọ ka, “Ẹma vị Igebirẹẹrị nị. Ọvịdị Ohomorihi mịị̄ jẹẹ nị. Ộ tụ́ mị ka ma va kà ịrẹyị yị wụ, dị ma sị enube ịrajẹ ọnọnị va yị wụ nị. 20Ama ụ wẹ yị mẹ dọ ịrẹyị amị wụ́ aanị, u vee gu irenu ne tu ịhịịhị aa sị ozi ọnọọ ma, agụvị ka ịrẹyị ọnị mị kà vaa sẹ.” 21Dị aza ene hi ẹhẹ, ẹnị yị jẹẹ ee zí Ịzakaraya nị. Di e yee ro o ka sị ẹ vẹ dị ọ vavọọ ee kù ini irehi Ohomorihi nị. 22Ịjị ọ jịnẹ vẹ, ọ yị zụ kà ịrẹyị yị wa. Dị ẹ sị yẹ ka vi o re ẹtẹ ini irehi Ohomorihi nị, agụvị ka ụvọ ee sii jị uwe yị wa nị, ọ yị zụ há irenu kà ịrẹyị. 23Ộ da kù chee ẹ́kụhị ụkọrọ anị mẹ̀ ta, di o si hu aa nọ eehi anị nị. 24Ịjị ọ da kù, dị Erizabẹẹtị ose anị ee zyẹẹ nị. Dị ọ tẹ mẹ ụhwẹ ẹẹhị nị. Dị ọ ka: 25“Aa, ịsị Ohomorihi mẹ mị yọ! Ananyị yị o reè nyị mị iyi. Ọ raà sị ụhị ana aa nyị mị ịnị akakana aza kwooze!”

Â kà a ka à vaa ma Ijeesu

26Ịnị ụhwẹ ịhịnọnyị ọnị Erizabẹẹtị ee zyẹẹ, Ohomorihi ọ rẹ tụ́ anggẹẹrị ana aā hị́ Igebirẹẹrị nọ ẹkụra ọnya ịnị ẹtẹ Igariri ana aā hị́ Ịnazarẹtị. 27#Imt 1.18Ộ tụ́ ọọ hi ozwoorihi ọnya aanị ịzọọ ẹnẹ ẹ̀ẹẹ̀ yị yẹ ọnọrụ. Ịrẹha ozwoorihi ọnọọ ọ rị Imeri nị. Ijosẹẹhụ ana vị anovwoovu Idevidi ọ nyị ozwoorihi ọnọọ tụ́ oze nị. 28Dị anggẹẹrị ọnọọ ve tù ọọ nị, dị ọ ka, “Tangwa o! Ohomorihi ô re wu eyi, ọ rẹ yà pe wụ.” 29Ịjị Imeri vavọọ wụ́ ịrẹyị ọnọọ, ayị anị ọ sị vazi, di ee ro o ka ẹngụ ụkụ́ ịsị ẹ vị ọnọnị kẹ. 30Dị anggẹẹrị ọnọọ kà a yọ ka, “Imeri, asị u rè hí angwa, Ohomorihi ọ sị wụ re eyi. 31#Imt 1.21U vee zyẹẹ dị ụ ma ozi ọnọrụ ọnya, Ijeesu ụ vaa hị́ ịrẹha anị nị. 32#2 Ịsa 7.12,13,16; Ayị 9.7Ọzọbanyị ọ vaa vị nị, Ozi Ohomorihi ene hu keekere a vaa hị́ ọ nị. Ohomorihi Ananyị yị vaa mẹ̀ ẹ ohinọyị tụ́ udi Idevidi ohiku anị. 33Ọnị ọ vaa vị ohinọyị ovwoovu Ijekọvụ pooro nị. Ohinọyị ọnị ọ vaa rị, ọ yị vaa nyị ẹzẹtẹ.” 34Dị Imeri kà a yị anggẹẹrị ọnọọ dị ọ ka, “Mẹẹ̀ yị yẹ ọnọrụ, ị́sa ẹnẹnị mẹmẹ zụ vavọọ yà?” 35Dị anggẹẹrị ọnọọ kà a yọ ka, “Ụhwẹ Ọnịnị vaa vàa kú wu, dị ụkata Ohomorihi và kú wu, agụvị avọọ ozi ọnị ụ vaa ma avọọ, ọnịnị a vaa hị́ ọ nị, Ozi Ohomorihi a rẹ vaa hị́ ọ nị. 36Tamayị Erizabẹẹtị ana vị anda awụ nịnị, oni ree zyẹẹ ozi ọnọrụ, ọ mẹ̀ daka yị sị vị ọzọkụ. Ụhwẹ ọhụhịnọnyị ịrẹẹ anị yị; wâ yẹ ka ọbọrị a vịdị aa hị́ ọọ nị. 37#Oyn 18.14Ẹ yị nyị ịsa ọnya oni Ohomorihi ọ yị zụ mẹ.” 38Dị Imeri ka, “Ozida Ohomorihi mị vị nị, ịsị ụ kà aanị, ọ̀ vavọọ yà mị!” Dị anggẹẹrị ọnọọ hụụ ịdị anị nị.

Imeri o ne hee Erizabẹẹtị

39Ẹkụhị ọnya, dị Imeri kwẹẹtẹ, dị ọ wụsẹ hịrẹ nọ Ijuda ana yà ịrẹsụ ataba nị. 40Dị ọ na ngụ ini eehi Ịzakaraya, dị ọ kụ́ Erizabẹẹtị nị. 41Érizabẹẹtị mẹ̀ wụ́ ka Imeri ộ kụ́ ọnị, di ozi ana yà ịnị ịnẹ Erizabẹẹtị henyi nị, dị Ụhwẹ Ọnịnị dọ avaba ayị Erizabẹẹtị nị. 42Di o nowu tụ́ ẹba kà ịrẹyị, ka, “Ẹwụ Óhomorihi re eyi hu keekere ịnị avaba anyẹnẹẹ nị. Ozi ewu vị oni Ohomorihi re re eyi bẹẹ. 43Ẹnẹ vị ẹmị, ọnị ọnyị Ananyị yị ee vee heyi? 44M mẹ̀ yị wụ́ ka wâ kụ́ mị kẹnẹ, di ozi emi henyi ịnị ịnẹ amị, ọ màa jẹ nị. 45Wâ da jẹ kẹnẹ, agụvị ka wâ dọ wụ́ ka Ohomorihi vaa mẹ ịrẹyị ọnọọ kà wụ.”

Ịrẹyị oni Imeri kà

46Di Imeri ka, “Mâ sị ụga yị Ohomorihi Ananyị yị. 47Mâ da jẹ agụvị Ohomorihi Ọdọzaha amị, 48#1 Ịsa 1.11agụvị ka ẹmị ozida anị ẹnẹ ẹ̀ yị nyị ịsị mị vị, o reè re mi eyi. Hụrẹ ọyaanị na, avaba aza vị ana aa vanaa hị́ mị ọnịrajẹ, 49agụvị ịsa ọbanyị oni Ohomorihi ọnị ụkata mẹ yị mị. Ọnịnị ị́rẹha anị rị nị. 50Ọọ̄ vayị aza ana nyị angwahi anị pooro nị. 51Ộ sị ụvọ anị mẹ̀ ụkọrọ ẹbanyị-ẹbanyị, dị ọ gara aza ana aa sị ẹngụụ tụ́ ẹbaa ha nị, ọnịrị avaba ariro ẹnịnị. 52#Ijov 5.11; 12.19Ọ sị aza ana nyị ọda jị hụrẹ udi ẹnịnị. Dị ọ kụkụ sị aza ẹnẹ ẹ̀ yị nyị ịsị ẹ vị, dị ọ kà wa hịrẹ nị. 53Ộ sị ịsa ozoza yị aza ọnị ụngwẹ aa kụ̀, dị ọ dụ opisa nịnị aa nọ eehi avosusu nị. 54Ộ gụ Anisirẹrị ezida anị ụvọ, agụvị ka ộ tamayị ka ọnị vaa vayị ẹnịnị, 55#Oyn 17.7#1 Ịsa 2.1-10anka ọ mẹ̀ kà a yị ohiku ayị nịnị, ana vị Abụrahamị, ọnịrị ezi anị ka ọnị vaa vayị ẹnịnị pooro zịna-zịna.” 56Dị Imeri yà ịzọọ mẹ ụhwẹ ẹẹta, dị ọ va varẹma nọ eehi anị nị.

A mẹmẹ ma Ịjọọnụ ọhwọzenyi

57Ụhwẹ ọ sị gụ Erizabẹẹtị ana vọrọ ka ọ̀ sị ma ozi. Dị ọ ma ozi ọnọrụ ọnya nị. 58Aza ọnị ọnịrịị ra beri anda ẹnịnị ệ wụ́, Óhomorihi mẹmẹ vayị anị; di e pe e jẹ nị. 59#Ire 12.3Ịjị ẹkụhị ịhịnta si tù, dị ẹ na jị ọ ụvẹvẹnẹ nị, dị ẹ ka ẹnị aa yị ọ Ịzakaraya, ana rẹ vị ịrẹha ada anị nị. 60Dị ọnyị anị ka, “Eyiye de, Ịjọọnụ ị́rẹha anị vaa rị nị.” 61Dị ẹ kà a yọ ka, “Ẹ yị nyị anda awụ nịnị ana vịdị rị Ịjọọnụ da.” 62Dị ẹ sị ụvọ họ̀ ada anị ka ye re ịrẹha ana vọrọ ka à yị ọ nị. 63Dị Ịzakaraya ka à sị ọparị yị ọnị nị. Â sị ọ yọ, dị ọ chẹrẹ ịrẹha anị ka, “Ịjọọnụ ị́rẹha anị rị nị.” Di o hí avaba ẹnịnị irenu nị. 64Ịjọnọọ gẹdẹ-gẹdẹ, di irenu Ịzakaraya wụsẹ sị há, dị ọ kụkụ aa kà ịrẹyị, dị aa ga Ohomorihi nị. 65Angwa ee hí aza ana ra kara wa, dị ịrẹyị ọnọọ sị ngụ ịrẹyị ngụ avaba ẹkụra ịnị ataba ịnị ẹtẹ Ijudiya zịịzị nị. 66Avaba aza ana wụ́ ọọ, ệ sị tụ́ ịnị ayị, dị ẹyaa kà a ka, “Ẹngụ ozi ịsị ọsọnị vaa vị kẹ?” Ọzọza ô re e ka ụkata Ohomorihi yà rị ọ.

Ịsẹ oni Ịzakaraya kà

67Ụhwẹ Ọnịnị ộ dọ avaba ayị Ịzakaraya, ada Ịjọọnụ, dị aa kà ịsẹ nị, dị ọ ka: 68“À vẹ ya sị ụga yị Ananyị yị ana vị Ohomorihi Anisirẹrị! Agụvị ka ọ va raà gụ aza anị ụvọ, ọ sị wa hị́ varẹma. 69Ọ raà sị Ọdọzaha ọbanyị ọnya hụrẹ ini ovwoovu Idevidi ozi ahụ anị yị yị. 70Ịnị ịyẹẹyẹ, ộ zị oze ịnị ụvọ ọnịsẹ ọnịnị anị kà a ka: 71A vaa dọ yịị ha hụụnị ụvọ ọnịvị ayị nịnị ọnịrị hụụnị avaba aza ana aa kụ́ ayị ayị. 72Ọ kà ọnị vaa vayị ohiku ayị, dị ọnị rẹ tamayị oto ọnịnị ọnị ọnị wo yị wa. 73Ộ hị́ eku yị Abụrahamị ada ayị 74ka ọnị vaa dọ yịị háa hụụnị ụvọ ọnịvị ayị, dị yaa hẹkẹ ọnị, dị asị i hí angwa; 75dị ya vị aza ọnịnị ọnịrị ọnịrẹyịzẹyịza ini eyi anị ịnị avaba ẹhẹ ayị. 76#Ịma 3.1Ẹwụ ozi emi, ọnịsẹ Ohomorihi ana yà ẹbẹẹba keekere a vaa hị́ wụ nị. Ẹwa vaa dọ ọvịdị Ananyị yị, di u we ne tenyi oze tịtẹ zí ọọ nị; 77dị ụ wa rẹ na sị zụ̀ aza anị ka ọ vaa dọ waa há, agụvị ka ọ vaa vagu wa ịnị ịvị ẹnịnị. 78Ohomorihi ayịị̄ vayị ọza ẹtẹẹtẹrẹ, agụvị avọọ ọ vaa mẹ ka ẹtohweyi ana sị mẹẹ anka ọyị anaa tụ̀ụ vẹ avọọ ọ̀ và ọpa tụra ayị. 79#Ayị 9.2Ọ vaa sị ẹtohweyi yị aza ene hi ịnị ịrahụ, dị ẹ yà ịnị ụvọ isu. Ọ vaa zụ̀ yị oze ẹngwọọrọ.” 80Ozi ọnọọ aa hụ, dị ọ raa vịra ini oze Ohomorihi nị. Dị ọ na yà ịnị ụnọmị pooro ne tù ẹkụhị ọnị ọ va sị sị ẹngụ anịị zụ̀ avaba Anisirẹrị ịnị eyigede nị.

Currently Selected:

Iruuku 1: EBTP

Highlight

Copy