Iruuku 12

Ẹnị a vọrọ ka èe hí angwa anị?

(Imt 10.26-33; 12.32; 10.19-20; Ịmk 8.15; 3.28-29)

1 # Imt 16.6; Ịmk 8.15 Ọ́kọnị aza mẹ̀ wara gụ tawụ-tawụ, dị ẹ yaa kụ́ ahụụ hi ẹngụ, dị Ijeesu vịdị kà a yị ezirẹma anị ka, “Sị eyi pe ẹngụ awụ nịnị agụvị òwù Anihwarisi nịnị, oo! Ogevegeve ẹnịnị m maa kà avọọ nị. 2#Ịmk 4.22; Irk 8.17Ẹ yị nyị ịsa ana a sị ịsa kú, ẹnẹ ẹ̀ yị vaa tụ́ ẹhẹ; ẹ yị nyị ịsị ẹ tẹ, ọnị ọza ọ̀ yị vaa yẹ. 3Agụvị avọọ ịrẹyị ọnị ụ wàa kà ịnị ịrahụ nịnị, a vaa wụ́ ọ ịnị ọọdụ; ịsị u wèe were kà chire ẹngụ ụtọ nịnị, a vaa nọ ọ ị́rẹsụ irehi.

4“Ọta amị, jẹẹ ma kà a wụ nịnị, asị u hí angwa ọza ana zụ wụ̀ ọza kẹnẹ, dị ẹ̀ yị nyị ịsị ọ kụkụ zụ mẹ para avọọ hu. 5Maa kà a wụ nịnị ọza ana a vọrọ ka wee hí angwa anị nịnị: Wee hí angwa Ohomorihi, ana ahịka ọ̀ọ sị ọza wụ̀, dị ọ rẹ nyị ụkata ọyị sị ọọ ne ngụ ẹkụra. Mị ka wee hí angwa anị nịnị! 6Wáá yẹ ka aara ẹẹhị ịkọvọ aa hị́ ọọ nị? Wáá yẹ ka Ohomorihi o yi hí ayị ikonyara ẹnịnị? 7Avaba ẹyị ịrẹsụ awụ nịnị vị oni Ohomorihi hyakụ za ịrịka. Agụvị avọọ asị u rè hí angwa nịnị, ka ẹ yị vị u were huna aara ọrụrụ-ọrụrụ yọ nịnị!

8“Dị ma rẹ kà a wụ nịnị ka, Ọza ana àa dọ irenu éyi aza ka áamị ọ́nị vị nị, emi Ozi ọza onigirima rẹ vaa dọ irenu ọ́vịdị anggẹẹrị Ohomorihi ka áamị ọ́za ọnọọ vị nị. 9Ama ọza ana àa rẹ kà a ẹ́yị aza ka ọnị ọ yị yẹ mị, ẹmị rẹ vaa kà a ọ́vịdị anggẹẹrị Ohomorihi ka ẹmị ẹ yị rẹ yẹ ẹ. 10#Imt 12.32; Ịmk 3.29Ọza tụra ọza ana àa kà ịrẹyị odivi hi ẹmị Ozi ọza onigirima, a vaa vagu ọ ịnị anị. Ama ọza ana àa kụ̀ Ụhwẹ Ọnịnị ụhụ, o yi vee re ẹvagu dọ ịnị anị. 11#Imt 10.19,20; Ịmk 13.11; Irk 21.14,15Ịhị àa za wụ nịnị nọ ini irehi Ohomorihi, àa vị ini ikootu, àa vị ịdị aza ana nyị ọda, asị u ne ro o nịnị ka u mè vee tụ́ ohi, à vị ka sị ụ vaa kà kẹ! 12Ịjị ụmẹ òo si tù, Ụhwẹ Ọnịnị vaa sịị zụ̀ wụ nịnị ịrẹyị ana a vọrọ ka wa kà nịnị.”

Ụhịrẹyị ọnyẹkẹhị ọnụra ọnya

13Ọza ịnya ịnị ọkọnị aza ana jẹẹ ịzọọ, ộ kà a yị Ijeesu ka, “Nda, kà a yị ẹnẹbẹnị amị ka ọ̀ gà ogu ada ayị, dị ọ̀ sị áamị yị mị!” 14Dị Ijeesu kà a yọ ka, “Ọnọrụ ọnọnị, ẹnẹ sị mị vị ọmọkarẹyị ọnịrị ojirẹyị yị wụ nịnị?” 15Dị ọ rẹ kà a yị wa ka, “Sị eyi pe ẹngụ awụ nịnị, dị ụ wa rẹ sị ụvọ za ẹngụ awụ nịnị ịnị ịrẹyị eyọhụrẹ o, agụvị ka ẹ yị vị ogu ọnị ọza nyị ọ vị ẹhẹ ọnọọ vẹ.”

16Di Ijeesu ve che ụhịrẹyị ọnya yị wa nị ka, “Opisa ọnya aanị ộ nyị aarẹ, dị ịsa ịnị anị mẹ ẹtẹẹtẹrẹ nị. 17Dị ọnọrụ ọnọọ ee ro o ịnị ayị anị ka sị ọnị vaa mẹ, agụvị ka ọnị ọ yị nyị aha ana a vọrọ ka ọnị ọ̀ kụ́ ịsa ẹnẹnị hi. 18Dị ọ ka ịsị ọnị aa mẹ, yị: oni ee wú ụhwọ anị, dị ọnị ọ̀ dà ana banyị hu avọọ. Dị ọnị kụ́ avaba akụ anị ọnịrị ogu anị hi ọọ. 19Dị ọnị va kà a yị ẹngụ anị ka ọnị ộ nyị ịsa ọnị ọnị kụ́ tẹ ana vaa mẹ ịrayị ọrụrụ-ọrụrụ; ọnị ọ̀ kụkụụ tụ́ ụhwọ́, dị ọnị ọ̀ọ rị, di oni òo hú, dị ọnị ọ̀ọ mẹrị! 20Ama di Ohomorihi va kà a yọ ka: ‘Ẹwụ ọnụra ọnọnị, ịrahụ ajịnị aa dọ wụ ụhwẹ nọ! Avaba ịsa ọnị ụ kụ́ gụ yị ẹngụ aanị, ẹnẹ kụkụ vaa nyị?’ 21Avọọ ọ mẹ̀ vaa yàa yị aza anaa kụ́ ịsaa gụ yị ẹngụ ẹnịnị kẹnẹ, dị ẹ̀ yị nyị ịsị ẹ nyị ini eyi Ohomorihi nị.”

Ariro ẹhẹ

(Imt 6.25-34)

22Dị Ijeesu kà a yị ezirẹma anị ka, “Asị ụ rẹ̀ mẹ ariro ini oze ẹhẹ awụ nịnị ka sị ụ vaa rị kẹ! Asị ụ rẹ mẹ ariro agụvị ọchẹngụ awụ nịnị ka si u ve sii kú ẹngụ nịnị! 23Ụhwẹ ọza ô huna ịsọyịrị, ẹngụ ọza o re huna ịta. 24Wee re ọrụ nịnị, ẹnịnị e mē chire ịsa, ẹnịnị ẹ mā rẹ kụ́ ịsa gụ. Ẹnịnị ẹ yị nyị ụhwọ, ẹ yị rẹ nyị oje; ama Ohomorihi aa yịị pá wa. Aanịka we yi huna inomi nịnị? 25Ẹnẹ nyẹngụ sị ariro ọyịmẹ̀ dà ụvọ ọnya tụ́ ịnị ụgọdọ anị ịnị ẹngụ awụ nịnị? 26Wẹ̀ yị nyẹngụ mẹ oweyi kiiki ọnọnị nịnị, sị ẹ vavẹ dị ụ waa mẹ ariro ịsa ana vọ nịnị?

27 # 1 Ohi 10.4-7; 2 Ịtọ 9.3-6 “Wee re ododo nịnị, ẹ mẹmẹẹ̄ hụ! Ẹnịnị ẹ mā ngwẹ owu, e mē re hí ịta. Dị ma kà a wụ nịnị ka, Isoromọnị ộ nyị ụbanyị obodaasụ, ama ọ yị nyị ịta ene zoza anka ọnya ini ododo ẹnẹẹ. 28Ohomorihi ộ vavọọ sị ịsa ozoza yị avị, oni u wèe re ajịnị, ụhwọọ di a sị ọọ ká tụ́ ịnị ịra, wéé ro ka ọ yị vaa sị ịta ene zoza hu avọọ kú wu nịnị ẹngụ? Ẹdọwụ awụ nịnị ộ da weyi kẹnẹ. 29Asị u rè ro o ka sị ụ vaa rị, à vị ka si u vee hú, asị ụ rẹ̀ rẹ mẹ ayị ẹẹva nịnị! 30Avaba ịsa ẹnẹẹ ánẹhẹ ee sìi zị nị. Ada awụ nịnị ộ yẹ ka â vọrọ ka wa nyị ịsa ẹnẹnị nịnị. 31Ama wee sì ka Ohomorihi ọ̀ọ mẹ ịjọvaa tụra wụ nịnị, ka ọ vaa sị avaba ịsa ana vọ aanịị tụ́ ọọ yị wụ nịnị.”

Sị ogu awụ nịnị tẹ ẹ́bẹẹba

(Imt 6.19-21)

32“Ẹwụ nịnị ịragụ oweyi, asị u hí angwa nịnị, agụvị ka ịnẹ Ada awụ nịnị ô hine ka wa ngụ ịdị anị nịnị dị ọnị ọ̀ọ mẹ ịjọvaa tụra wụ nịnị. 33Ná ịsa ọnị ụ nyị, dị ụ wa sị mẹ onosiye nịnị ẹyịza! Mẹ asụnụ ene è yi mē bo yị ẹngụ awụ nịnị, dị ụ wa sị ogu awụ nịnị tẹ tụ́ ẹbẹẹba! Ịzọọ, ẹnịnị e yi zụ vú, oyi ọ yị zụ nọ ịzọọ, ikere o yi re zụ ne du ọọ. 34Agụvị ka ịzị ogu awụ nịnị ọ̀ọ yà, ịzọọ áyị awụ nịnị rẹ vaa yà nị.”

Ezida ene ee zí

(Imt 24.45-51)

35 # Imt 25.1-13 “Tenyi ẹngụ nịnị! Dị ụ wa sị obo awụ nịnị sụ́ ọtẹ, di ozotupa awụ nịnị ọ̀ọ za! 36#Ịmk 13.34-36Wa mẹ̀ ebira nịnị anka ezida ene ee zí ọga ẹnịnị! Ịjị ọ̀ọ va hụrẹ ịzị a yà aa nyị ọnẹẹ vẹ, dị ọ sị ụvọ ká oze nị, dị ẹ wụsẹ na oze yọ. 37Ezida ọnị ọga ẹnịnị ọ̀ọ vavọọ vẹ, di o ve tù wa ka ệ ha, eyee zí ọnị nị, ẹ vaa daa jẹ. Dị ma kà a wụ nịnị, ka vị ọga ọnọọ ee tenyi obo anịị sụ́ ọtẹ, dị ọ ka ezida ẹnẹẹ ẹ̀ yaayịtẹ, dị ọnị ụvọta aa sị ịsaa yị wa nị. 38Ọga ọnọọ ọ̀ọ daka vẹ agẹvịrahụ, àa vị etumeyọnị, di o yi ve tù ka ệ ha ee zí ọnị nị, ezida ẹnẹẹ vaa jẹ ẹtẹẹtẹrẹ. 39#Imt 24.43,44Dị ụ wa yẹ nịnị ka adarehi ọ̀ọ yẹ ụmẹ oni oyi vaa sị vẹ, vị ọ yaanị ee sere ẹtẹ nị, dị ọ yị zẹẹ ka oyi ọ̀ chaka ọnị irehi. 40Agụvị avọọ, ẹwụ nịnị ọ̀ rẹ vavọọ zí, agụvị ka ẹmị Ozi ọza onigirima vị ana vaa vẹ ịnị ụmẹ oni u we yi ro nịnị!”

41Dị Ipita ka, “Ananyị yị, ẹyị ú wéé che ụhịrẹyị ọnọnịị yị nị, à vị avaba aza?” 42Dị Ananyị yị, tụ́ ohi, dị ọ ka, “Ẹnẹ vị ozi ahụ ọnịrẹyịzẹyịza ana yẹ ịrẹyị, ọnị ọga anị vaa sị ezi ahụ ana vọ chire ụvọ ka ọ̀ọ sị ịsọyịrịị yị wa ịnị ụmẹ ana vọrọ? 43Ọga anị ọ̀ọ vẹ, di o ve tù ka ọ vavọọ aa mẹ nị, ozi ahụ ọnọọ vaa daa jẹ. 44Ịzẹyịza m maa kà a wụ nị, ozi ahụ ọnọọ ọ́ga anị vaa kụ́ avaba ogu anịị chire ụvọ nị. 45Ama àa vị ozi ahụ ọnọọ kà a ịnị ayị anị ka: ‘Ọga amị ee kù ọyịvẹ’, di o nyima di ee tụ́ ozi ahụ anọrụ ẹnịrị anẹẹ ana vọ, dị aa rị, di ee hú, dị aa mẹrị eche nị, 46dị ọga anị vana vẹ kẹnẹ ẹkụhị ọnya oni ò yi zí ọọ eyi ọnịrị ịnị ụmẹ ọnị ọ̀ yị yẹ. Dị ọga anị za a, dị ọ sẹ̀ ẹ rugu-rugu, dị ọ sị ọgụ ọza ẹnẹ ẹ̀ yị mẹ ịzẹyịza yọ.

47“Ozi ahụ ana àa yẹ ịsị ọga anị sì, ama di ò yi tenyi ẹngụ ka ọnị ọ̀ mẹ̀ ẹ nị, vaa dọ ịjapa ẹtẹẹtẹrẹ. 48Ama ozi ahụ ẹnẹ ẹ̀ yị yẹ ịsị ọga anị sì, dị ọ mẹ ịrẹyị ịjapa nị, ọ vaa dọ ịjapa chee. Ọza ana àa sị ịsa ọrụrụ yị, a rẹ vaa kà a ka ọ̀ sị ịsa ọrụrụ vẹ nị. Ọza ọnị ọza ọ̀ọ sị ịsa ọrụrụ chire ụvọ, o reē họ̀ use ịsa ọrụrụ ịnị ụvọ anị.”

Ẹ́hahi mẹmẹ vaa vẹ

(Imt 10.34-36)

49Dị Ijeesu ka, “Mâ vẹ ka ma va jị ịra tụ́ ịnị ẹhẹ. Àa yẹ, ịra ọnọọ ọ̀ọ za booro aanị! 50#Ịmk 10.38Â nyị ọyịhwọzenyi ana a vaa mẹẹ mị, mị vaa daa rị ụya dị à va mẹ̀ ẹ ta. 51U wéé ro ka mị vẹ ẹhẹ ka ma va sị ẹngwọọrọ vẹ nị? Jẹẹ maa kà a wụ nịnị ka ẹ yị vị avọọ. Ẹhahi mị sị aa vẹ nị. 52Agụvị ka hụrẹ ọyaanị na, aza ẹnị ẹẹhị vee hi ini eehi ọnya, dị ẹ sị gà hi. Dị ẹnị ẹẹta kwẹẹtẹ tù ẹnị ẹẹva, dị ẹnị ẹẹva ẹnị rẹ kwẹẹtẹ tù ẹnị ẹẹta. 53#Imi 7.6Ada vaa kwẹẹtẹ tù ozi anị, dị ozi ọnị rẹ kwẹẹtẹ tu ada anị. Ọnyị rẹ vaa kwẹẹtẹ tu ozi anị ọnẹẹ, di ozi ọnẹẹ ọnị rẹ kwẹẹtẹ tù ọnyị anị. Ọnyị ọva vaa kwẹẹtẹ tù ose ozi anị, di ose ozi ọnị rẹ kwẹẹtẹ tù ọnyị ọva anị.”

Sị ụmẹ ọnọnị ka?

(Imt 16.2-3; 5.25-26)

54Dị Ijeesu rẹ kà a yị ọkọnị aza ka, “Wèe re ka eguhi ộ dà tụ́ oze ọnị ọyịị̄ zịị ngụ ẹtẹ nịnị, dị ụ wụsẹ ka orihi vaa zụ̀ nịnị; ịzẹyịza, dị ọ vavọọ yà. 55Wèe re re ka ahị aa tụ́ hụrẹ eyi ụvẹtẹẹ vẹ, dị ụ ka ẹtẹ vaa ngụra nịnị; ịzẹyịza, dị ọ vavọọ yà. 56Ẹwụ nịnị ọmọzakụyẹ, wâ yẹ ịsị eguhi ọnịrị ẹtẹẹ̄ kà nịnị; ama sị ẹ vẹ dị ụ wẹ̀ yị yẹ ịsị ụmẹ ọnọnị aa kà nịnị?

57“Sị ẹ vẹ dị ụ wẹ̀ yị zẹẹ ka wa yẹ ịsa ana vọrọ nịnị? 58Ọza ọ̀ọ hị́ wụ ịrẹka, dị ọ sị wụ aa nọ ini ikootu nị, re ka ẹwụrị ọọ ộ mẹ̀ ọkarẹyị ẹngụ awụ nịnị, ụ màa yịị na óze nịnị, agụvị asị ọ sị wụ nọ ịdị ọmọkarẹyị, dị ọmọkarẹyị ọ̀ va na sị wụ́ chire iporisi ụvọ, di iporisi ọnị kụkụ sị wụ ne ngụ ịnị ẹngwa. 59Dị ma kà a yị wụ ka wẹ yị vaa jịnẹẹ hụụ ịzọọ pooro di u we sì ịkọvọ ana àa vọ ịnị ẹkẹhị ana àa dà wụ.”

Currently Selected:

Iruuku 12: EBTP

Highlight

Copy