Iruuku 20

Ịrẹyị ọda Ijeesu

(Imt 21.23-27; Ịmk 11.27-33)

1Ẹkụhị ọnya, Íjeesu màa zụ̀ aza ịsa ini irehi Ohomorihi, dị aa kà enube ọyịzaa yị wa nị. Ohirẹsụ ẹbanyị irehi Ohomorihi ọnịrị ọzwọzọda nịnị beri ọdọvịdị nịnị ê ve tù, 2dị ẹ kà a yọ ka, “Kà ẹ yị, ọda ịsị ụ maanị aa sịị mẹ? Ẹnẹ sị ọda ọnọnịị wụ?” 3Di Ijeesu tụ́ ohi, dị ọ ka, “Ẹmị raa họ̀ wụ nịnị use ịrẹyị ọnya: di u we tụ́ mi ohi nịnị! 4Ọyịhwọzenyi ọnị Ịjọọnụ aa mẹ avọọ, Ohomorihi ọ́ọ́ sị ọda anịị yọ nị, à vị aza?” 5Di eyee pe ẹngụ nyị ahankata nị, dị ẹ ka, “Yàa kà a ka: ‘Ohomorihi ọ sị yọ nị’, dị ọ ka sị ẹ vẹ dị ẹyị ẹ̀ yị dọ ọ wụ́? 6Ama yàa na kà a ka ọza ọ sị yọ nị, vị avaba aza ẹnẹnị ee ne yi ịrẹta nị, agụvị ka ẹnịnị ệ dọ ka Ịjọọnụ vị ọnịsẹ.” 7Agụvị avọọ, di e tụ́ Ijeesu ohi ka, “Yẹ yị yẹ ịzị o re ọda ọnọọ hụrẹ.” 8Dị Ijeesu ọnị rẹ kà a yị wa ka, “Ẹ̀hẹẹ, ẹmị ẹ yị rẹ vaa kà a wụ nịnị ọda ọnị mị maanị aa sịị mẹ.”

Ụhịrẹyị aza ana a dà ẹtẹ yị

(Imt 21.33-46; Ịmk 12.1-12)

9 # Ayị 5.1 Dị Ijeesu nyima aa sị ụhịrẹyị ọnọnịị kà ịrẹyị yị wa nị. Dị ọ ka, “Â nyị ọza ịnya aanị ana dà ụbazị, di o si rere aza anaā sịị eyii pe ụbazị nị. Di o si hu aa hụrẹ eehi nee kù nị. 10Ịjị ụmẹ si tù ka à kụ́ ẹtụtụ gụ, dị ọ tụ́ ozi ahụ anị ọnya ne tù aza ẹnẹẹ ọnị ọ dà ẹtẹ yị ka ọ̀ na dọ ẹtụtụ ana vị áanị va yị ọnị nị. Ama aza ẹnẹẹ ệ za ozi ahụ ọnọọ, di e tụ́ ọọ, dị ẹ dụ ọọ avosusu na jịnẹ nị. 11Dị ọ rẹ tụ́ ozi ahụ anị ọsa na nị. Dị aza ẹnẹẹ rẹ za a, di e tụ́ ọọ, dị ẹ mẹ̀ ụhị nyị ọọ, dị ẹ rẹ dụ ọọ jịnẹ avosusu nị. 12Dị ọza ana nyị ụbazị ọnọọ rẹ tụ́ ozi ahụ anị ọhụta na nị. Dị ẹ rẹ za ọnọọ, dị ẹ tụ̀ ọ ụnava, dị ẹ tụ ọ ụvọ tụ́ ẹhẹ nị. 13Dị ọza ana nyị ụbazị ọnọọ kụkụ ka: ‘Sị mị vaa mẹ aanị?’ Dị ọ ka: ‘Maa tụ́ ozi emi oni mi sì ịrẹyị anịị na. Mâ yẹ ka ẹ daba vaa sị ụbanyịị yọ, èe re e.’ 14Ama ịjị aza ana a dà ụbazị yị re ozi anị ọnọọ, dị ẹ kụkụ gẹ eyi nị, dị ẹ ka: ‘Ozi ọnọnị ọ vaa kụ́ ogu ada anị nị; à vẹ ya wụ ọọ nịnị, di ogu anị ò kụkụ vị áayị!’ 15Ịzẹyịza, dị ẹ sị ọọ nọ ịrẹma ụbazị, dị ẹ wụ̀ ọ tụ́ ịzọọ nị. Si u ro nịnị ka ọza ana nyị ụbazị ọnọọ vaa mẹ aza ẹnẹẹ? 16Vị aa vẹ, dị ọ va wụ̀ aza ẹnẹẹ nị, dị ọ sị ụbazị ọnọọ yị aza ẹnẹsa.” Ịjị ẹ maanị wụ́, dị ẹ ka, “Asị Ohomorihi zẹẹ!” 17#Ahẹ 118.22Di Ijeesu kana eyi re wa nị, dị ọ ka, “Sị ẹ va vị iruvo ịrẹyị ọnọnị ana a chẹrẹ tụ́ ini Iwe Ohomorihi?

‘Ịrẹta ọnị ọtụrarehi nịnị yi tịtẹ,

ọnị ọ vana vị ọọnyị ịnị ịrẹta ana a sịị̄ dà irehi nị.’

18Ọza ana àa hyẹdụ nya ịrẹta ọnọọ, vị aa gara nị. Ama ọza ọnị ịrẹta ọnọọ ọ̀ọ hụrẹ nya, vị aa kụ̀ ọọ nẹrẹ-nẹrẹ nị.”

Ịrẹyị ẹkẹhị irehi

(Imt 22.15-22; Ịmk 12.13-17)

19Ohirẹsụ ẹbanyị irehi Ohomorihi ọnịrị ọzwọzọda nịnị ê sì ka ẹnị è za Ijeesu ịzị ịzọọ, agụvị ka ịrẹyị ẹnịnị Íjeesu si che ụhịrẹyị ọnọọ nị. Ama angwa aza ee hí wa. 20Dị ẹnịnị kuku ee be e nị. Dị ẹ tụ́ aza ana aa mẹ apẹ ka ẹnị ệ nyị ịzẹyịza ka è ne be Ijeesu ịnị ịrẹyị ana aa kà nị, agụvị dị ẹnị ẹ̀ zụ za a, dị ẹnị ẹ̀ sị ọọ ne chire ọda ịgọvọnọ ụvọ. Ịgọvọnọ ọnọọ vị Aniroomi; ộ nyị ọda ọnịrị ụkata. 21Dị aza ẹnẹẹ na họ̀ Ijeesu use ka, “Nda, yâ yẹ ka ịrẹyị ịzẹyịza ụ waa kà, dị ụ raa sịị zụ̀ aza nị. We mē re eyi ọza, ịzẹyịza oze Ohomorihi kẹnẹ, ụ sịị̄ zụ̀ aza nị. 22Ọ́ọ́ vọrọ ka yaa tụ́ ẹkẹhị irehii yị ohinọyị Aniroomi, à vị ọ yị vọrọ?” 23Ama Ijeesu ộ yẹ irikichi ẹnẹ ẹyaa mẹ, dị ọ kà a yị wa ka, “Sị ẹ vẹ dị ụ waa zama mịị re nịnị? 24Sị ẹkẹhị enyusẹ ọnyaa mị, di a re nịnị! Ẹnị uhwoto anị ọnịrị ịrẹha anị yà ịnị anị aanị?” Di e tụ́ ohi dị ẹ ka, “Óohinọyị Aniroomi yọ nị.” 25Dị Ijeesu kà a yị wa ka, “Ẹ̀hẹẹ, sị ịsa ana àa vị óohinọyị Aniroomi yọ! Dị ụ wa rẹ sị ịsa ana àa vị ịsa Ohomorihi, yị Ohomorihi nịnị!” 26Ẹnịnị ẹ yị nyẹngụ sị ịrẹyị ọnyọọnyị za Ijeesu éyi aza ịzọọ. Dị ẹnịnị kú irenu nị, agụvị ka ohi ọnị ọ sị yị wa, o si hí wa irenu.

Oku nịnị wáá vanaa haa hụụnị isu?

(Imt 22.23-33; Ịmk 12.18-27)

27 # Ụkọ 23.8 Aza ẹnyị aanị ana aā hị́ Anisadusi nịnị, ệ ká Ijeesu vẹ. Ẹnịnị ẹẹ̄ kà a ka oku ọ yị vaa haa hụụnị isu nị. Ệ họ̀ Ijeesu use ka: 28#Ọda 25.5“Nda, Imosiisi ộ chẹrẹ ẹ tịtẹ yị ka, ọza òo sú, dị ọ navọ ose anị tịtẹ dị ọ̀ yị ma ozi nị, ọyịnyara anị ọ̀ kụ́ ọnẹẹ ọnọọ ogu, dị ọ̀ ma ozi yị ẹnẹbẹnị anị ene sú. 29A va nyị ẹyịnyara ịhịmba. Ị́ịpaapa ộ nyị ọnẹẹ, ọnọrụ ọnọọ ô wusu, ọ yị ma ozi. 30Ọhụva anị ọ rẹ kụ́ ọnẹẹ ọnọọ ogu, ọ yị ma ozi yọ, di oni re sú. 31Ọnọhụta ọnị ọ rẹ kụ́ ọọ ogu, avọọ ọ́nị mẹ̀ rẹ yà nị, pooro naa ngụ ọnọhụhịmba. Ộ yị ma ozi yị avaba ẹnịnị ana nyị ọọ, di e sú. 32Ọdịrẹma anị, dị ọnẹẹ ọnọọ oni re sú nị. 33Ịnị ụmẹ oni oku nịnị vaa sị haa hụụnị isu, ẹnẹ ọnẹẹ ọnọọ kụkụ vaa vị ose anị? Ẹnị ịhịmba ọ nyị ọọ aanị nị.”

34Dị Ijeesu tụ́ wa ohi ka, “Anẹhẹ ọnọnị aa nyị ọnẹẹ, dị ẹyaa va ọnọrụ nị. 35Ama aza oni Ohomorihi re ka ộ vọrọ ka ẹ̀ ha hụụnị isu, dị ẹ̀ rẹ ra ị́dị Ohomorihi, ẹ yị kụkụ vaa nyị ọnẹẹ, dị à hyakụ va sị aza ẹnyị gà ọnọrụ. 36Vị ẹ rẹ vaa sị mẹẹ anka anggẹẹrị nịnị avọọ nị, e yi kuku vee sú. Ezi Ohomorihi ẹ rẹ vị nị, agụvị ka ẹ sị ha hụụnị isu. 37#Kụra 3.6Imosiisi nyẹmba, ộ hyakụ sị zụ̀ ka oku nịnị vaa ha hụụnị isu ini oze ịrẹyị ọnọọ kà ịzị avị yà aa rị ịra; ộ hị́ Ananyị yị ‘Ohomorihi Abụrahamị ọnịrị Ohomorihi Ayiziiki beri Ohomorihi Ijekọvụ.’ 38Ohomorihi ọ yị vị Ohomorihi aza ene wusu, ama Ohomorihi aza ana yàra; agụvị ka avaba aza vị ana yàra yọ.” 39Dị ọzwọzọda ẹnyị ka, “Nda, ohi awụ ô zoza.” 40Ịrẹma ọsọnị ẹ yị nyị ọza ana vana nyayịnẹ họ̀ ọ use ịrẹyị ọnyọọnyị.

Ẹ̀nị Ikirisiti vị ozi anị?

(Imt 22.41-46; Ịmk 12.35-37)

41Dị Ijeesu họ̀ wa ka, “Sị ẹ vẹ dị aza kà a ka Ikirisiti vị ozi Idevidi? 42#Ahẹ 110.1Idevidi ọnị nyẹmba ộ kà a ini iwe ahẹ ụga ka: ‘Ohomorihi ộ kà a yị Ananyị mị ka: Yaayịtẹ éyi ụvọrị amị 43pooro dị ma sị ọnịvị awụ tụ́ ịzị ụ waa kụ́ ahụụ hi!’ 44Idevidi ọnị ụvọta ộ hị́ ọọ Ananyị mị, Íkirisiti mẹmẹ rẹ va mẹ vị ozi Idevidi?”

Ijeesu ộ kà ọ̀nọ̀ agụvị ọzwọzọda nịnị

(Imt 23.1-36; Ịmk 12.38-40)

45Avaba aza mẹ̀ sị ụtọ pe ịrẹyị Ijeesu, dị ọ kà a yị ezirẹma anị ka: 46“Sị eyi pe ẹnụ awụ nịnị ịnị ụvọ ọzwọzọda nịnị. Eē sì ka eni èe chire awuru ọgọdọọ zịịzị, dị aza ẹ̀ẹ kụ́ ẹnị ini ohu. E reē sì ka ẹnị ẹ̀ẹ yaayịtẹ aha ene hu keekere ini irehi Ohomorihi ọnịrị ịzị àa kụ́ gụ aa rị eche. 47Ẹnị ẹẹ̄ sị irikichi dọ osoku nịnị irehi nị, ama dị ẹyaa mẹ apẹẹ mẹ̀ aduwa ọgọdọ. Ẹnị ẹ vaa rị ụya hu nị.”

Currently Selected:

Iruuku 20: EBTP

Highlight

Copy