Iruuku 22

A mẹmẹ gẹ eyi Ijeesu

(Imt 26.1-16; Ịmk 14.1-2,10-11; Ịjọ 11.45-53)

1 # Kụra 12.1-27 Ụmẹ eche ana a sịị̄ rị Ịbụrẹẹdị ọnị ọza ọ̀ yị mā sị òwù tụ́, ọ sị gụrị ẹtẹ. Eche ọnọọ a rẹẹ̄ hị́ Eche Ọyịparahu nị. 2Dị ohirẹsụ ẹbanyị irehi Ohomorihi ọnịrị ọzwọzọda nịnị ee sì oze ka ẹ́nị mẹmẹ vaa mẹẹ wụ Ijeesu nị, agụvị ka angwa aza vị ene ee hí wa.

3Di Echu sị ngụ ịnị ayị Ijudasi ọnị ịrẹha ẹtẹ anị rị Isikarịyọtị nị. Ọnị rẹ vị ọnya ini ezirẹma ẹwụrẹva. 4Dị ọ na, dị ọnịrị ohirẹsụ ẹbanyị irehi Ohomorihi beri iporisi ana sị eyi pe irehi Ohomorihi na gẹ eyi ka ọnị aa sị Ijeesuu chire wa ụvọ nị. 5Dị aza ẹnẹẹ aa jẹ, dị ẹ ka ẹnị vaa sị ẹkẹhịị yọ nị. 6Dị Ijudasi sị avaba ayị anị dọ ooho nị. Di o kuku ee sì oze, ọ́ nị mẹmẹ vaa sị Ijeesuu chire wa ụvọ, dị asị aza yẹ vụrụ-vụrụ nị.

Ijeesu ô tenyi ẹngụ Eche Ọyịparahu

(Imt 26.17-19; Ịmk 14.12-16; Ịjọ 13.21-30)

7O si tù ẹkụhị Eche Ịbụrẹẹdị ẹnẹ ẹ̀ yị nyị òwù. Ịhị ọnọọ a rẹẹ̄ wụ ozi ịdẹba Eche Ọyịparahu nị. 8Dị Ijeesu tụ́ Ipita ọnịrị Ịjọọnụ kà è ne tenyi ịsa Eche Ọyịparahu tịtẹ, dị ẹnị ẹ̀ na rị ọ nị. 9Dị ẹ họ̀ ọ ka, “Ịzị u sì ka ye ne tenyi ọọ tịtẹ?” 10Dị ọ kà a yị wa ka, “Re! Wàa maanị aa yịị ngụ ịnị ẹkụra ọnọọ nịnị kẹnẹ, ụ vaa gẹrị ọnọrụ ọnya aanị nịnị; ộ sị ụnọkọ dà enyi. Dụ ọọ na ngụ ini irehi ọnị ọ̀ọ na ngụ nịnị! 11Dị ụ wa kà a yị adarehi ọnọọ nịnị ka: ‘Ọga ka ịzị ẹtapa ọzọga yà, ịzị ọnịrị ezirẹma anị vaa rị Eche Ọyịpara hu?’ 12Ọza ọnọọ vaa zụ̀ wụ nịnị ẹtapa ọbanyị ọnya ẹ́bẹẹba, ene e si tenyi, dị ụ wa kụ́ avaba ịsa oni yee sì hi ịzọọ yị!” 13Dị ezirẹma anị ẹnẹẹ si hu, di e re e, Íjeesu mẹ̀ yị kà a yị wa gẹdẹ-gẹdẹ nị. Di e tenyi ịzọọ tịtẹ yị Eche Ọyịparahu nị.

Ịsa oruva ọdịrẹma

(Imt 26.20-30; Ịmk 14.17-26; 1 Ịkọ 11.23-25)

14Ịjị ụmẹ si tù, dị Ijeesu yaayịtẹ beri ezirẹma anị ka ẹnị ẹ̀ rị ịsa nị. 15Dị Ijeesu kà a yị wa ka, “Mâ da sì ka ẹmịrị ẹwụ nịnị ò dudu rị ịsa Eche Ọyịparahu ọnọnị, dị ma va rị ụya. 16Dị ma kà a wụ nịnị ka mẹ mā vana rị ịsa ọnọnị, pooro di iruvo anị obooro ọ̀ tụ́ ẹhẹ ịzị Ohomorihi yà aa mẹ ịjọva.” 17Dị Ijeesu sị ako ana a sị ká eche tịtẹ, dị ọ kụ́ Ohomorihi avọ, dị ọ sị yị wa, dị ọ ka ẹ̀ gà a hú nị: 18“Dị ma kà a wụ nịnị ka, me mē vene hú ịnị ẹtụtụ ọchị ịvayịnị ọnọnị, pooro dị ụmẹ oni Ohomorihi aa mẹ ịjọva ọ̀ vẹ.” 19[Dị ọ rẹ sị Ịbụrẹẹdị, dị ọ kụ́ Ohomorihi avọ tụ́ ọọ nị. Dị ọ dà a, dị ọ sị yị ezirẹma anị nị. Dị ọ ka, “Ọsọnị ọ vị ẹngụ amị ana a sị mẹ̀ ịsọvọ agụvị awụ nịnị nị. Waa mẹ ọsọnị, dị ụ wa sịị tamayị amị nịnị!” 20#Ijer 31.31-34Dị ọ rẹ sị ako ana a sị ká eche tịtẹ, ẹ mẹ̀ sị ịsa oruva ọnọọ rị nị. Dị ọ ka, “Eche ini ako ọnọnị ọ vị oto ọwọọwa oni Ohomorihi sị anya amị sị ụvọ tụ́ nị. Mi vee che anya amị ọnọọ sẹ́ ẹtẹ yị wụ nịnị.] 21#Ahẹ 41.9Ama, re nịnị! Ọza ana vaa sị mịị chire ọnịvị amị ụvọ yà ịzị mị yà aa rị ịsa booro aanị. 22Ịzẹyịza ẹmị Ozi ọza onigirima vee sú, anka Óhomorihi mẹ̀ vịdị mẹ eto anị tịtẹ; ama ọza ana vaa sị mịị chire ọnịvị amị ụvọ, ọ sị dà.” 23Dị ezirẹma anị nyima aa họ̀ ẹngụ use ka ẹnị ọ vị ịnị ẹnịnị ana vavọọ vaa mẹ nị.

Ẹnẹ vị ene hu keekere?

(Imt 20.25-28; 19.28; Ịmk 10.42-45; Ịjọ 13.1-17)

24 # Imt 18.1; Ịmk 9.34; Irk 9.46 Ezirẹma anị aa nyị ahankata ka ẹnẹ vị ene hu keekere ịnị ẹngụ ẹnịnị. 25Dị Ijeesu kà a yị wa ka, “Wâ yẹ ka ohinọyị anẹhẹ ọnọnị vị anaā mẹ ehunaa yị aza ẹnịnị. Ọza ana aa mẹ ọda tụra wa, ẹẹ̄ hị́ ọta ẹnịnị nị. 26#Imt 23.11; Ịmk 9.35#Imt 20.25-27; Ịmk 10.42-44Ama ẹ yị vọrọ ka áawụ nịnị ọ̀ vavọọ yà. Ọza ene èe hu ịnị ẹngụ awụ nịnị, a vọrọ ka ọ̀ sị ẹngụ anị tụ́ udi oweyi nị. Ọza ana àa vị ọdọvịdị, ọ̀ọ mẹ̀ ebira ozi ahụ. 27#Ịjọ 13.12-15Ọza ana yaayịtẹ aha ịsọyịrị kẹnẹ ọnịrị ọza ana aa sị ịsaa yọ, ye re ene hu? Yâ yẹ ka ọza ana yaayịtẹ kẹnẹ yọ nị. Ama ẹmị vị ana yà ịnị akakana awụ nịnị, dị maa zị wụ nịnị ụtụ.

28“Wá raa jẹẹ pe mi nịnị pooro ịnị avaba ẹzamare amị nịnị. 29Anka Áda amị mẹ̀ sị ọdaa mị ka ma vị ohinọyị, avọọ ẹ́mị mẹ̀ rẹ sị ọdaa wụ nịnị nị, 30#Imt 19.28ka wa yaayịtẹ aha ịsọyịrị amị ịzị mị yà aa mẹ ịjọva nịnị, dị ụ waa rị, di u wee hú nịnị. Ẹwụ nịnị rẹ vaa vị ohinọyị, dị ụ waa mẹ̀ ọkarẹyị tụ́ ịrẹsụ ovwoovu ẹwụrẹva Anisirẹrị nịnị.”

Ijeesu kà Ipita vee yi ọnị

(Imt 26.31-35; Ịmk 14.27-31; Ịjọ 13.36-38)

31Dị Ananyị yị ka, “Ịsayịmọnị, Ịsayịmọnị! Re, Echu ee sì ka ọnị ọ̀ sị wụ nịnị, di oni ò pehe wu nịnị, dị à zụ yẹ aza ana vị azịzẹ ọnịrị akụ. 32Ama ma raà mẹ̀ aduwa yị wụ ka asị ẹdọwụ awụ jị wụ ụvọ. Ịjị ụ wàa sị và ká mị vẹ, dị ụ waa sị ụkataa yị ẹyịnyara awụ ana vọ!” 33Dị Ipita ka, “Ananyị yị, ma sị ẹngụ tenyi ka à za ẹmịrị ẹwụ tụ́ ịnị ẹngwa, dị à hyakụ wụ ẹmịrị ẹwụ bẹẹ.” 34Dị Ijeesu kà a yọ ka, “Ipita, ụkọkọrọ o yi vee nowu ajịnị, dị ụ wa kà a tù ụpẹ ẹẹta ka wẹ yị yẹ mị.”

Ịrẹyị ụmẹ ọkatẹngụ

35 # Imt 10.9,10; Ịmk 6.8,9; Irk 9.3; 10.4 Dị Ijeesu rẹ kà a yị wa ka, “M mẹ̀ tụ́ wụ nịnị jịnẹ, dị mị ka asị ụ sị asụnụ ọnịrị ampo beri adava nịnị, áá nyị ịsị ụ rị ụya anị nịnị?” Dị ẹnịnị ka, “Eyiye” nị. 36Dị Ijeesu va kà a yị wa ka, “Ama booro aanị, ọza ana àa nyị asụnụ, àa vị ampo, ọ̀ sị ọọ! Ọza ene èe re ka ọnị ọ yị nyị ụhwọ, ọ̀ na ná awuru anị, dị ọ̀ sị hị́ ụhwọ.” 37#Ayị 53.12Dị ma kà a wụ nịnị ka â nyị ka ịrẹyị ọnọnị ana a vịdị chẹrẹ tịtẹ aanị, ọ̀ sẹ ị́rẹsụ amị. Ịrẹyị ọnọọ ka: “Â za a ịrịka beri aza ana jịnẹ ọda. Avaba ịsa ẹnẹnị e si nyima aa sẹ ị́rẹsụ amị.” 38Dị ẹ ka, “Ananyị yị ụhwọ ẹẹva yà ịzẹnị, ọ!” Dị Ijeesu ka, “Ô ze.”

Ijeesu ộ mẹ̀ aduwa ị́rẹsụ Ataba Orivi

(Imt 26.36-46; Ịmk 14.32-42)

39Ijeesu ọ rẹ jịnẹ nọ ịnị Ataba Orivi, anka ọ mẹ̀ vịdị yị mẹ; dị ezirẹma anị rẹ saasa a na nị. 40E mè si tù ịzọọ, dị ọ kà a yị wa ka, “Waa mẹ̀ aduwa nịnị, agụvị asị ụ ngụ ịnị ọyịzamare nịnị!” 41Dị ọ para wa hu na chee, di o ku ẹtẹ, dị aa mẹ̀ aduwa nị. 42Dị ọ ka, “Ada amị, wèe sì, ụ sị ako ụyọrị ọnọnị hụrẹ mị ịrẹsụ. Ama ẹ yị vị ịsị mi sì, mẹ ịsị u wèe sì!” 43[Dị anggẹẹrị ọnya hụrẹ ẹbẹẹba vẹ, di o ve tù ọọ, dị ọ sị ụkata yọ nị. 44Ayị Ijeesu o si du ẹtẹẹtẹrẹ, dị aa mẹ̀ aduwa hu avọọ nị. Ẹhị ana aa tọ̀ hụụnị ẹngụ anịị hi ẹtẹ vị ana sị mẹẹ anka anya avọọ.] 45Ọ mẹ̀ kwẹẹtẹ hụụnị aduwa, di o ve tù ezirẹma anị, di o ve tù ka ẹyaa sụ ara nị, agụvị ka ayị ẹnịnị o si du. 46Dị Ijeesu kà a yị wa ka, “Sị ẹ vẹ dị ụ waa sụ ara nịnị? Kwẹẹtẹ, wa mẹ̀ aduwa nịnị ka ụ va ngụ ịnị ẹzamare nịnị!”

Â za Ijeesu

(Imt 26.47-56; Ịmk 14.43-50; Ịjọ 18.3-11)

47Íjeesu mẹ̀ yị yà ịnị ịrẹyị aa kà kẹnẹ, dị ọkọnị aza vana vẹ nị, beri ọza ịnya aanị ana aā hị́ Ijudasi, ana vị ọnya ini ezirẹma ẹwụrẹva. Dị ọ kà pe Ijeesu, ka oni ò kú ọ irenu nị; 48Dị Ijeesu kà a yọ ka, “Ijudasi, wee kú emi Ozi ọza onigirima irenu, agụvị di u we re oze sị mị chire ọnịvị amị ụvọ nịị?” 49Ịjị ezirẹma ana vọ ana jẹẹ pe Ijeesu ee re ịrẹyị ana aa vaa mẹ, dị ẹ ka, “Ananyị yị ụ wáá ka ya tụ̀ ụhwọ ayị tù wa nị?” 50Dị ọza ịnya ẹnịnị tụ̀ ụhwọ, dị ọ sị jị ozi ahụ ohirẹsụ ọbanyị irehi Ohomorihi ụtọ ụvọrị nị. 51Dị Ijeesu tụ́ ohi, dị ọ ka, “Ọnọọ ô ze!” Dị ọ sị ụvọ kanyị ụtọ ọnọrụ ọnọọ, dị ọ mẹ̀ ẹ yọ nị.

52Dị Ijeesu kà a yị ohirẹsụ ẹbanyị irehi Ohomorihi beri iporisi ana sị eyi pe irehi Ohomorihi, ọnịrị ọdọvịdị nịnị ana vẹ ka, “Ẹmị ụ kụ́ ụhwọ ọnịrị arubebe ee vee tù nịnị anka oyi avọọ nịị! 53#Irk 19.47; 21.37Ẹ́mị rị ẹwụ nịnị mẹ̀ẹ̄ yà ini irehi Ohomorihi eyinị-eyinị, wẹ yị sị ụvọ kanyị mị nịnị. Ama ụmẹ awụ nịnị ọnịrị ụmẹ ụkata ịrahụ o si tù.”

Ipita ka ọnị ọ yị yẹ Ijeesu

(Imt 26.57-58,69-75; Ịmk 14.53-54,66-72; Ịjọ 18.12-18,25-27)

54Ệ za Ijeesu, dị ẹ sị ọọ nọ ini eehi ohirẹsụ ọbanyị irehi Ohomorihi nị. Dị Ipita aa dụ ọọ na ẹ́nẹẹnẹ nị. 55Â kà ịra tụ́ ịnị akakana ohweje, dị ẹ yaayịtẹ ịzọọ nị. Dị Ipita ọnị rẹ yaayịtẹ pe wa nị. 56Di ozi ahụ ọnẹẹ ọnya aanị re ka Ipita ộ yaayịtẹ pe ịra nị. Dị ọ na jị eyi ngụ ọọ, dị ọ ka, “Ọnọrụ ọnọnị vị ana rẹẹ̄ dụ Ijeesuu zị.” 57Dị Ipita ka ireche yọ nị. Ọ kà, “Ọnẹẹ ọnọnị, mẹ yị hyakụ yẹ ọza ọnị ụ waa kà aanị.” 58Ịjị ọ naa daa kù chee, ọza ẹnẹsa ô re re Ipita, dị ọnị rẹ ka, “Ọza ịnyara ẹnịnị ụ vị nị.” Dị Ipita rẹ ka, “Ọnọrụ ọnọnị, ẹ yị vị ẹmị ụ waa kà.” 59Ịjị ọ rẹ naa mẹ agogo ọnyaa tụ́ ọọ, dị ọza ịnya rẹ sị kà geri-geri, dị ọ ka, “Ịzẹyịza, ọza ọnọnịị̄ dụ ọọ zị, agụvị ka Anigariri ọ vị nị.” 60Dị Ipita rẹ ka, “Ọnọrụ ọnọnị, mẹ yị hyakụ yẹ ịrẹyị ọnị ụ waa kà aanị.” Ípita màa yịị kà ịrẹyị kẹnẹ, dị ụkọkọrọ nowu nị. 61Dị Ananyị yị kana eyi, di o re Ipita nị. Di Ipita sị tamayị ịrẹyị ana Ananyị yị vịdị kà yọ ka, “Ụkọkọrọ o yi vee nowu, dị ụ wa kà a tụ́ ụpẹ ẹẹta ka wẹ yị yẹ mị.” 62Di Ipita jịnẹ tụ́ ẹhẹ, dị ọ jị òrèrè ana nyị ịrẹyị nị.

Â za Ijeesu nọ ini ikootu

(Imt 26.59-68; Ịmk 14.55-65; Ịjọ 18.19-24)

63Dị aza ana sị eyi pe Ijeesu aa mẹ̀ ẹ isiya, di eyee tụ́ ọọ nị. 64Dị ẹ sị ịsa kú ọọ eyi, dị ẹyaa họ̀ ọ ka, “Kà ẹ yị di a re ene ee tụ́ wu aanị?” 65Avọọ ẹ màa yịị kụ̀ ọọ ụhụ irenyi-irenyi nị.

66Éyi mẹ̀ yị sị nị kẹnẹ, dị ọdọvịdị aza ẹnẹẹ ọnịrị ohirẹsụ ẹbanyị irehi Ohomorihi ne beri ọzwọzọda nịnị kụ́ gụ nị, dị ẹ sị Ijeesu nọ ini ikootu ẹnịnị nị. Dị ẹ ka: 67“Kà ẹ yị, ẹwáá vị Ikirisiti ọnọọ nị?” Dị Ijeesu kà a yị wa ka: “Màa kà a wụ nịnị, wẹ yị vaa dọ ọ wụ́ nịnị. 68Màa rẹ họ̀ wụ nịnị use ịrẹyị, we yi vee tụ́ ohi nịnị. 69Ama hụrẹ ọyaanị na, ẹmị Ozi ọza onigirima vaa yaayịtẹ éyi ụvọrị Ohomorihi Ochẹtẹngụ.” 70Dị avaba ẹnịnị ka, “Ọnị ọ vị ka ẹwa vị Ozi Ohomorihi nịị?” Dị Ijeesu kà a yị wa ka, “Ụ ka ẹmịị yọ nị.” 71Dị ẹnịnị ka, “Onivenu ịsị i kuku ee sì? Ẹ yị ụvọta ọ sị ịrẹyị irenu anị wụ́.”

Currently Selected:

Iruuku 22: EBTP

Highlight

Copy