Ịmaakị 15

Â za Ijeesu ne tù Ipayireti ana vị ịgọvọnọ

(Imt 27.1-2,11-14; Irk 23.1-5; Ịjọ 18.28,33-38)

1Ịnị ẹnẹnẹ viri-viri, ohirẹsụ ẹbanyị irehi Ohomorihi beri ọdọvịdị nịnị ẹnịrị ọzwọzọda nịnị ne beri avaba ọmọkarẹyị nịnị ê gẹ eyi, dị ẹ sụ́ Ijeesu orupa, dị ẹ vàa tụ́ ọvịdị, dị ẹ sị ọọ ne chire Ipayireti ụvọ nị. 2Dị Ipayireti họ̀ Ijeesu use ka, “Ẹ wáá vị ohinọyị Aniju nịnị nị?” Di o tụ́ ohi, dị ọ ka, “Ụ mẹ̀ yị kà a, avọọ yọ nị.” 3Ohirẹsụ ẹbanyị irehi Ohomorihi ệ kụ́ ịrẹka ọrụrụ-ọrụrụ za Ijeesu; ama o yi tụ́ ohi. 4Dị Ipayireti rẹ họ̀ ọ ka, “We yi tụ́ ohii? Wê re avaba ịrẹyị awụ ana a sị tụ́ ịrẹka aanị.” 5Ama Ijeesu oyi tụ́ ohi vụrụ-vụrụ; agụvị avọọ di o si hí Ipayireti irenu nị.

Ệ jị ịvị isu yị Ijeesu

(Imt 27.15-26; Irk 23.13-25; Ịjọ 18.39—19.16)

6Eche ọ̀ọ maanị si tù, Ipayireti ụụ̄ hụrẹ anịnẹngwa ọnya ụvọ yị wa, ọza tụra ọza ẹnẹ ẹnịnị èe sì. 7Â nyị ọza ịnya aanị ana aā hị́ Ibaraba. Â kụ́ ọnịrị aza ẹnyị aanị hi ịnị ẹngwa. Ẹnịnị vị ana wụ̀ ọza, ẹ́nịrị ịjọva màa zyaazị. 8Dị ọkọnị aza vẹ, dị ẹ ka Ipayireti ọ̀ mẹ ịsị ọọ̄ vịdịị mẹ yị ẹnị nị. 9Dị Ipayireti ka, “Wéé sì ka ma hụrẹ Ohinọyị Aniju nịnị ụvọ wụ nịnị?” 10Ộ yẹ ka agụvị ayamịkụ ohirẹsụ ẹbanyị irehi Ohomorihi sị sị Ijeesu chire ọnị ụvọ nị. 11Dị ohirẹsụ ẹbanyị irehi Ohomorihi tụ́ aza ịrẹyị ka ẹ̀ kà a ka Ipayireti ọ̀ vana hụrẹ Ibaraba ụvọ yị ẹnị. 12Dị Ipayireti rẹ kà a yị wa ka, “U mè sì ka ma mẹ ọza ọnị ụ wa hị́ Ohinọyị Aniju nịnị aanị?” 13Di e nowu zẹtẹ, dị ẹ ka, “Kanyị ọọ za apavahị!” 14Dị Ipayireti rẹ ka, “Sị ẹ vẹ? Sị ẹ vị ịsa odivi ọnị ọ mẹ̀?” Di e re nowu hu avọọ, dị ẹ ka, “Kanyị ọọ za apavahị!” 15Ama Ipayireti ô sì ka ọnị ọ̀ mẹ̀ ịsa ene zè aza ẹnẹẹ eyi; agụvị avọọ dị ọ hụrẹ Ibaraba ụvọ yị wa nị; Dị ọ ka è tụ́ Ijeesu ịjapa, dị à sị ọọ, dị à na kanyị ọọ za apavahị.

Isoja nịnị ệ sị Ijeesu mẹ enyinyi

(Imt 27.27-31; Ịjọ 19.2-3)

16Isoja nịnị ệ sị Ijeesu nọ ịnị ọba irehi Ipayireti. Dị ẹ hị́ isoja nịnị ana vọ gụ nị. 17Ẹnịnị ệ sị awuru ohinọyị ovivi ọnya chire Ijeesu. Dị ẹ mẹ ọkẹkẹrẹkụ ikeyi-ikeyi, di e si kú ọọ ịrẹsụ nị. 18Di e nyima, dị ẹyaa kụ́ ọọ, dị ẹ ka, “Taarụ, Ohinọyị Aniju nịnị.” 19Dị ẹyaa và okutẹẹ hi ọ ịrẹsụ nị. Dị ẹyaa jị atẹẹ kú ọọ nị, dị aza ẹnyị ree ku ẹtẹ (anka èe rere) aa hẹkẹ ẹ avọọ nị. 20Ịjị ẹ raà sị ọọ mẹ enyinyi, dị ẹ ngwa a awuru ovivi ọnọọ, dị ẹ sị awuru anị ụvọta chire e nị. Dị ẹ sị ọọ jịnẹ ka ẹnị ẹ̀ na kanyị ọọ za apavahị nị.

Â kanyị Ijeesu za apavahị

(Imt 27.32-44; Irk 23.26-43; Ịjọ 19.17-27)

21 # Iro 16.13 Ẹ mẹ̀ sị ọọ aa na, ê re ọza ịnya aanị ana aa parahu, ọ mẹ̀ hụrẹ aarẹ aa vẹ. Aā hị́ ọọ Ịsayịmọnị Anisayireni; ọnị ọ vị ada Arẹkịsanda ọnịrị Iruhwọọsị nị. Dị ẹ sị ụkata za a ka ọ̀ va za apavahị Ijeesu nị. 22Ệ sị Ijeesu nọ ịzị aā hị́ Ịgọrịgọta (oni iruvo anị vị “aha akokoro ịrẹsụ”). 23Â sị eche ana a sị avị ọnyịrẹyị và hura yọ ka ò hú ọọ. Ama Ijeesu ọ yị dọ ọ. 24#Ahẹ 22.18Dị ẹ za a, dị ẹ kanyị ọọ za apavahị nị. Dị ẹyaa gà ịta anịị hi ẹngụ ụvọ, dị ẹ jị osisii ka ẹnị ẹ̀ yẹ ana vọrọ ka ò tụ́ ọzọza nị. 25Ụmẹ agogo ịhịịna ẹnẹnẹ ẹ sị kanyị ọọ za apavahị nị. 26Ệ chẹrẹ ịsa ẹnẹ ẹ ka ộ mẹ̀ tụ́ ịrẹsụ apavahị ka, “Ohinọyị Aniju nịnị.” 27#Ayị 53.12Ệ rẹ kanyị oyi ẹẹva za apavahị; ọnyara yà eyi ụvọrị anị, dị ọsa rẹ yà eyi ụvọha anị nị. 28[Iwe Ohomorihi ọ sị sẹ, ana kà a ka: “Â za a ịrịka vaka aza ana jịnẹ ọda.”] 29#Ahẹ 22.7; 109.25; Ịmk 14.58; Ịjọ 2.19Dị aza ẹnyị ana aa parahu aa kụ̀ Ijeesu ụhụ nị; di eyee mi ịrẹsụ, dị ẹ ka, “Ịhịịn, ewu ene vee wú irehi Ohomorihi, di u re tenyi ọọ dà ịhyẹgwẹta anị. 30Dọ ẹngụ awụ tụ́, di u we chí hụrẹ ịrẹsụ apavahị vẹ!” 31Avọọ ohirẹsụ ẹbanyị irehi Ohomorihi ne beri ọzwọzọda nịnị mẹ̀ raa sị ọọ mẹ enyinyi nị. Dị ẹ yaa kà a yị ẹngụ ka, “Ọọ̄ dọ aza ẹnẹsa há, ama ọ yị zụ dọ ẹngụ anị há. 32Ikirisiti ana vị Ohinọyị Anisirẹrị nịnị ò chí hụrẹ ịrẹsụ apavahị vẹ booro aanị, di yee re e, dị yaa dọ ọ wụ́!” Dị ẹnị ana a rẹ kanyị za apavahị, ẹnị raa mẹ̀ ẹ isiya nị.

Íjeesu meme sú

(Imt 27.45-46; Irk 23.44-49; Ịjọ 19.28-30)

33Ịnị ụmẹ agogo ẹwụrẹva, avaba ẹtẹ ọnọọ saka-saka ọ sị vara ịrahụ, pooro na ngụ ụmẹ agogo ẹẹta. 34#Ahẹ 22.1Ịnị ụmẹ agogo ẹẹta, dị Ijeesu nowu tụ́ ẹba, dị ọ ka, “Ohomorihi amị, Ohomorihi amị, sị ẹ vẹ dị ụ sị ayị hụụnị ịrẹyị amị?” 35Aza ẹnyị ana jẹẹ ịzọọ, dị ẹ wụ́, ệ kà a ka vị aa hị́ Erija nị. 36#Ahẹ 69.21Dị ọza ịnya wuse zwe na sị awẹ, dị ọ jị ọọ ngụ ini eche ọsụrẹyị, dị ọ sị tụ́ ịrẹsụ ọchị, dị ọ tana ẹ yị Ijeesu ka ò hú ọọ nị. Dị ọ ka, “Naavọ nịnị ye re e, àa vị Erija ee vee chí ọọ hi ẹtẹ nị!” 37Ijeesu ộ nowu tụ́ ẹba, dị ọ hụrẹ ụhwẹ anị ụvọ nị. 38#Kụra 26.31-33Dị achị ọratụpọ anaa sị che irehi Ohomorihi, há hi ẹẹva hụrẹ ẹbẹẹba na ngụ ụvẹtẹ waara nị. 39Ọga ana sị eyi pe isoja ẹchẹhị nịnị ana jẹẹ và eyi ká Ijeesu ô re e, o meme nowu, dị ọ hụrẹ ụhwẹ ụvọ; dị ọ ka, “Ịzẹyịza, ọnọrụ ọnọnị vị Ozi Ohomorihi!” 40#Irk 8.2,3A rẹ nyị anẹẹ ẹnyị aanị ana jẹẹ ẹ́nẹẹnẹ, di eyee re ẹtẹ nị. Imeri Anịmagịdara ọnịrị Ịsarọmị yà ịnị ẹnịnị; Imeri ọnyị Ijemiisi oweyi ọnịrị Ijosẹsị ọnị rẹ yà ịzọọ bẹẹ. 41Ijeesu mẹ̀ vịdị yà Igariri, ẹnịnị ệ dụ ọọ zịịzị, dị ẹ rẹ sị ịsa mẹ ọgụvọ yọ bẹẹ nị. Anẹẹ ọrụrụ-ọrụrụ ana saasa a vẹ Ijerusarẹmị ẹnị rẹ yà ịzọọ bẹẹ.

A mẹmẹ sị oku Ijeesu tụ́ ịnị ụsị ịnị ịrẹta

(Imt 27.57-61; Irk 23.50-56; Ịjọ 19.38-42)

42Oruva o si tù; ịhị ọnọọ ọ vị ẹkụhị enee siī tenyi ẹngụ nị, ọnọọ vị ka eyinẹhẹ anị ọ vị ẹkụhị ụhwọtụ nị. 43Ọza ịnya ana aā hị́ Ijosẹẹhụ Anarịmatịya ộ vẹ ịzọọ. Ọzọbanyị ọ vị ịnị ọmọkarẹyị nịnị nị; ọnị nyẹmba vị ene ee zí ụmẹ ịjọva Ohomorihi. Dị ọ sị ọtụtụrụma ne tù Ipayireti, di o họ̀ use oku Ijeesu nị. 44Ô hí Ipayireti irenu ka Ijeesu ọ jịnẹ wusu. Dị Ipayireti tụ́ na hị́ ọga isoja nịnị ọnọọ, dị họ̀ ọ ka Ijeesu óó wusu nị. 45Ịjị ọga isoja nịnị ọnọọ sị ọọ kà a yọ ka Ijeesu ô wusu, dị ọ ka Ijosẹẹhụ ò na sị oku anị nị. 46Dị Ijosẹẹhụ na hị́ ịta ọvụ, di o chí oku Ijeesu hụrẹ ịrẹsụ apavahị, dị ọ sị ịta ọnọọ chire e ikuma nị. Dị ọ sị ọọ na tụ́ ịnị ụsị ana a vịdị sị chị tụ́ ịnị ịrẹta nị. Di o zina ịrẹta ọnya gù ụsị ọnọọ irenu nị. 47Imeri Anịmagịdara ọnịrị Imeri ọnyị Ijosẹsị ê re ịzị a sị oku Ijeesu tụ́.

Currently Selected:

Ịmaakị 15: EBTP

Highlight

Copy