Fịrịmẹnjịapụ 1
1
1 #
Luk 1.1-4
Tiyofịlọsị, ì iḅi-ḅọ: À tarị kẹẹ ḍiri mẹ ḅio Jizọsị kọrị aị na ò toluma aị na gboloma aị mamgba à kẹẹ koroma famam, ọ̀ tarị saakị ọ̀ kọrịnama kọrị sakị ḅụ, 2ọkị mu Tamụnọ ori ọkị iwo so mu sakị la. Tẹrẹmẹ Tamụnọ ori ọkị iwo so mu, ọ̀ tarị Fịafịa Tẹmẹ ḅe kụrọ ḅụ ọ̀ sẹlẹ-ọkị afịrịmẹnjịapụ ma mịẹ ḅẹ aị tọn ịn pịrịm. 3Ọ̀ fịị tẹso, ḍin amesi ọ̀ nwẹn kẹ tọnwa sakị kẹ ḅụụ pakama-pakama in ḍiem, kẹ mịẹtẹ in nimi mịnẹ, piki-pikiye-ofori ḅara ḅụ, ò ḍumo wararị. Ini ori ẹrị tẹ ọ̀ pịkị ini na Tamụnọ Ama-da mẹ gboloma ye ḍukom. 4#Luk 24.49Tẹ ịn ḅo kobiri tẹso, ọ̀ mị oloko mẹ sụa ịn pịrịm: “Ó Jeruselemu koroma-so ma, tẹ koru nwenii tẹ Ḍaḅọ ḅe minini ọ́ pịrị tẹ à ḍuko ọ́ pịrị ye mẹ ḅo ọmịna ḅara la sakị la. 5#Mat 3.11; Mak 1.8; Luk 3.16; Jọn 1.33Jọnị papaa minji kẹ ọ́ saram, kụma boowa aḍin sakị ḅụ ịn Fịafịa Tẹmẹ ḅe kẹ minji kẹ ọ́ sara ḅa.”
Tamụnọ Jizọsị Ọkị Iwo So Mum
6Fịrịmẹnjịapụ ma na Jizọsị na ḅo gboloma tẹso ịn nwẹnị ò gbela: “KỊNỊNYANAḄỌ, mie ị́ Ama-da mẹ saḅama Izirẹlị pịrị ḅẹ sakị mẹ anị?”
7Jizọsị nwẹnị ịn ḅẹẹ: “Ị̀ Ḍa anie sakị mẹ na mịẹ ḅẹ aị ma na kụrọ nyanaḅọọ. Anị ọmịna kiri-a mịna aị ma mịẹ ḅẹ sakị nimi. 8#Mat 28.19; Mak 16.15; Luk 24.47,48Kụma Fịafịa Tẹmẹ ḅe ḅo ọmịna ọgọnọ gbana sakị, kụrọ ọmịna ḅụụ ḅio ḅin tẹ, ó Jeruselemu ḅụ na, Judiya ḅụ na, Sameriya ḅụ na, bebe tomikiri mẹ ḅụ na ị̀ ḅụụ ḅẹ aḅẹrẹ ma ḍuko-ḍuko tomi pịrị ḅa.” 9#Mak 16.19; Luk 24.50,51Ò miemẹ ḍuko fama tẹso, Tamụnọ nwẹnị ori ọkị iwo so mu, tẹ oḅuto nwẹnị ḅo ọ̀ gbaịn-koro, tẹso, ịn ḅarị ori ẹrị-a.
10Ori so tẹ ini paa bio-bioma So-tọrụ ḍikiarị ogbo, abịlala ḅiri maa atomi, ḅiotọn-a ḅara, kẹ ḅo ịna akaka sịẹ tẹ 11ịn ḅẹẹm, “Galili ḅẹ apụ, ó tiegotẹ anịanga sịẹ tẹ So-tọrụ ḍikiarị? Ḅị gbọrụ Jizọsị ḅe tẹ Tamụnọ ọmịna ḅụ ọkị so mu tẹ ḅọ ḅe, ọ̀ pịkịma ḅo ḅa, ọmịnị ori ẹrị tẹ ori iwo so mu gbọrụ ḅara mẹ ḅụ.”
Judasị Kiri Ọkị Ḅọ
12Anịtẹso ịn nwẹnị Olivu Tụndụ mẹ ḅụ pịkịma-so Jeruselemu mu, etela mẹ gbọrụ tombi pembe ye kẹ opu ama mẹ ḅụ ḅelem. 13#Mat 10.2-4; Mak 3.16-19; Luk 6.14-16Ini opu ama mẹ ḅio sọ sakị ịn nwẹnị iwo mu in sime-sime warị mẹ ḅẹ ḅio mẹ sọ, Pita na, Jọnị na, Jemusị na, Anduru na, Filipu na, Tọmọsị na, Batolomiyo na, Matiyo na, Alịfịyọsị tụḅọ Jemusị na, Sayịmọnị, Ama ḅẹlẹmaḅọ ḅe na, Jemusị tụḅọ Judasị na. 14Sakị sakị ḅụ ịn gbarịma-a ḅara kẹ gboloma tẹ tẹkẹ tẹkẹm, ereme ma na, Jizọsị iyingi Meri na, ori owiapụ-amịnapụ ma na sọ ịna ḅụ simem.
15Boowa aḍin ḅọrọ tẹso, Jizọsị minini apụ ma, kịnị sonioa si pembe ye, nwẹnị kobiri, tẹ Pita nwẹnị saakị sịẹ tẹ ẹkwẹn. 16Ori mẹẹ, “Ị̀ amịnapụ, Fịafịa Ḍiri mẹ Devidi ḅụụ ḅọrọ tẹ kẹẹ ye mẹ paka tẹ, anie Fịafịa Tẹmẹ ḅe Judasị, kịnị kẹ mu tẹ in Jizọsị kun ḅọ ḅe, ḅụụ ḍukoye mẹ. 17Ori Judasị ḅe, ò ḍumo wararị sakị, wamịna ḅụ ḅẹ gbọrụḅọọ, gbala ori na wamịnị na anie Jizọsị sẹlẹ tẹ kẹ mị fịrị mẹ pịrị ye.”
18 #
Mat 27.3-8
(Judasị, ò si ḅọkọ ḅụ nyana ḅo igbigi kẹ kiri fẹm, anị ḅụ anie ọ̀ ḅịkị-koro tẹ fịị ye. Ọ̀ nwẹnị sun kanakana tẹ kan, tẹ ò furo ḅẹ ịla mamgba sara paka-ḅo. 19Jeruselemu ḅụ sime tẹ miemẹ naa-a ḅọ ofori, anie ịn pịkị gotẹ ịna ama ḅẹ ḅịḅị ḅụ Akalịdama kẹ anị sịn ye, anie fiearị ye “Ọmbie Kiri.”)
20 #
Dev 69.25;
Dev 109.8
Kẹ gotẹ ọkọ ḍukoarị Devidi Nume ḍiri ḅio anị kẹẹ koro wararị,
Yee ọ̀ warị ḅio sime aị mamgba faa,
yee gbọrụḅọ-sọ anị ḅio anga ma.
Anị pịkị kẹẹ koro wararị,
Yee jụmọ ọ̀ kọrịnama kiri ọkị.
21 #
Mat 3.16; Mak 1.9; Luk 3.21;
Mak 16.19; Luk 24.51 “Ọkọẹrẹsị, anị mịẹ na-iḅi ye mịnẹ wa wa Nyanaḅọ Jizọsị wamịna ogboku sime tẹ wamịnị na sọ na, paka na sime kụra-ḅio sime gbọrụḅọ sẹlẹ, 22anie Jọnị minji-sara ḅụ saakị mu Tamụnọ Jizọsị kẹ iwo so mu sakị la, tẹ mḅọ wamịna ḅụụ sọ tẹ KỊNỊNYANAḄỌ Jizọsị fị-ḅụ-saakị ye mẹ ḍuko tomi pịrị.”
23Anịtẹso ịn nwẹnị maa apụ gotẹ, Josẹfụ (ịn pịkị Basabasị na Josịtọsị na sọ kẹ ọ̀ sịn sịnm) na Matayasị na. 24Anịtẹso ịn nwẹnị tẹkẹ, “KỊNỊNYANAḄỌ, anie tomi kuromarị aị mamgba nimi ḅọ, mịna maa apụ ma ḅụ ị́ sẹlẹ-ọkị tẹ ḅọ kẹ wa ḍie, tẹ mḅọ 25Judasị anị gbẹẹ-a ẹrẹsị koroma tẹ mu ọ̀ gbẹẹ anga mu tẹ ḅọ ḅe kiri mẹ ọkị, fịrịmẹnjịḅọ ḅara ḅụ.” 26Anịtẹso ịn nwẹnị maa apụ ma kẹ apịan sụa, tẹ anị nwẹnị Matayasị ọlọ, tẹ ịn nwẹnị ọ̀ kẹ oyi gbọrụḅọ finji ma ḅụ sụa.
Currently Selected:
Fịrịmẹnjịapụ 1: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
