Suku-saakị 8
8
Opu Minji Mẹ Kunomam
1Kụma Tamụnọ Noha na, piri-ḅio-ḅẹ anama mamgba na, opu anama mamgba na tẹ ori na opu arụ mẹ ḅio sime aị ma kẹ ḅiokoromam. Tẹ Tamụnọ mịẹtẹ fẹrụ tomikiri mẹ ḅụ fiem, tẹ minji mẹ saakị ọmọ iderim; 2pokolo ayeyọ ma ḅẹ ngụngụḅa ma na, so ma ḅẹ ikiḅa-aḅọkọ ma na gbaịnm, so ma ḅio ḅụ sararị eene mẹ daasịẹm, 3tẹ tomikiri mẹ ḅụ minji mẹ sịkọpẹlẹ-a ḅara kẹ ọmọm. Ḍin sọnọma si oyi finji (150) mẹ ḅẹ kunoma ḅụ minji mẹ kẹlẹ iderimam. 4Sọnọma akalụ karama akalụ mẹ ḅẹ tẹra aḍin fa si karama eneḅaka ḅụ opu arụ mẹ ḅo Araratị ḅẹ tụndụ ma ọgọnọ gbanam. 5Minji mẹ paa ọmọ iderima-iderima-iderima nwenii mu oyi akalụ karama akalụ mẹ lam; oyi akalụ karama akalụ mẹ ḅẹ tarị eneḅaka ḅụ tụndụ ma asịḅị paka, paka-ḅo tẹ kịnị ẹrịm.
6Ḍin amesi ḅo ḅọrọ tẹso, Noha nwẹnị ikiḅa-ḅọkọ mẹ tẹ opu arụ mẹ ḅụ ọ̀ sụa ye mẹ finji, 7tẹ nwẹnị ịn kẹ revini sịn gbọrụ opu feni fịrịma pakama feni ḅe fiin-fiin ikelema-ikelema nwenii minji mẹ kiri mẹ ḅụ fa kpalịkpalị tẹ kiri mẹ samụnọm. 8Anịtẹso ọ̀ nwẹnị olosịkịya fịrịma pakama mịẹtẹ ò mu ḍiki ḅẹ ḅara minji mẹ kiri mẹ ọgọnọ iderima tẹ ḅoto, 9kụma olosịkịya ḅe sịẹ ḅẹ gbọrụ anga sọ ḍọkị-ẹrịa tẹ ọ̀ ḍọkụma-ḅo ḅẹ ḅara kẹ pịkịma opu arụ mẹ ḅom, gbala minji mẹ paa tomikiri mẹ ḅụ kọpụ wararị ẹrẹsị. Anie ḅụ Noha ọ̀ ḅara sụn-pakama tẹ olosịkịya ḅe kuun-ọkị tẹ ori ọkị-ḅo opu arụ mẹ ḅio sunm. 10Noha jen sọnọma aḍin kẹ korum, tẹ pịkị sin opu arụ mẹ ḅio olosịkịya ḅe fịrịma pakamam; 11tẹ ḅoḅiri-so ḅụ olosịkịya ḅe nwẹnị fiin pịkị ọ̀ ḍọkụma-ḅo, anịsakị ḍikii, ori ọ̀ ḅịḅị ḅụ ori ịwọma kaịn ọkị wararị gbọrụ olivu ịnyịnya kpopu wararị; anie ḅụ Noha nimim mịnẹ minji mẹ iderima tẹ tomikiri mẹ ḅụ. 12Anịtẹso ọ̀ nwẹnị pịkị jen sọnọma aḍin kẹ koru, tẹ nwẹnị olosịkịya ḅẹ fịrịma pakama anịsakị ọ̀ ḅarị jen-maaịn kẹ pịkịma ọ̀ ḍọkụma-ḅoa.
13Noha sịḅị kụra gbọrụ ẹndẹ oyia asi finji na gbọrụ kụra karama kụra mẹ ḅẹ tarị akalụ mẹ ḅẹ tarị ene ḅụ minji mẹ kiri mẹ ḅụ fa kpalịkpalịm. Noha nwẹnị ịn kẹ opu arụ mẹ gbaịn ye mẹ sin tẹ ḍiki, nwẹnị ẹrị mịnẹ kiri mẹ sakị samụnọ tẹẹ. 14Maaịn karama akalụ mẹ ḅẹ, tẹra aḍin fa suei eneḅaka ḅụ kiri mẹ gbọrsịḅị samụnọm.
15Anịtẹso Tamụnọ nwẹnị Noha ḅẹẹ, 16“Ị́yẹrị na, ị́ ta na, í owiapụ-awọmẹ na, í owiapụ-awọmẹ ma sime-ereme na kẹ ị́ ḅụụ sụa tẹ opu arụ mẹ ḅio koro-ḅoo. 17Ḍumo wararị ye goyegoye tẹ ị́nịna simearị meni sụa aị mamgba anie feni amẹẹ na, nama amẹẹ na, ikiriarị ye tẹ kiri mẹ ọgọnọ sime tẹ ikiri-ikiri ye goyegoye kẹ ị́ ḅụụ sụa koro-ḅoo, mịẹtẹ ịn tọnwa ḅara kẹ kiri mẹ ọgọnọ ye kọn fị, tẹ tomikiri mẹ ḅụ iyi tẹ lolo-kama ḅẹ ḅara.” 18Mie ḅụ Noha ori owiapụ-awọmẹ na, ọ̀ ta na, ori owiapụ-awọmẹ ma sime-ereme na kẹ ọ̀ ḅụụ sụa tẹ koro-som. 19Anịsakị piri-ḅio-ḅẹ nama goyegoye na ikiriarị ye goyegoye na; feni goyegoye na, ye goyegoye tẹ kiri mẹ ọgọnọ mẹnjị-mẹnjị ye goyegoye ogbo-ogbo ḅụ opu arụ mẹ ḅio mẹnjị-mẹnjị korom.
Noha Agba Mịẹ Tamụnọ Pịrịm
20Anịtẹso Noha nwẹnị gbọrụ agbamịẹ-anga nama KỊNỊNYANAḄỌ ḅe pịrị, tẹ fịafịatẹ nama goyegoye na, fịafịatẹ feni goyegoye na ḅụ ye ọkị tẹ kẹ dọkịma-agba mịẹ agbamịẹ-anga mẹ ọgọnọ. 21Tẹ agba mẹ ḅẹ kụnụ mu KỊNỊNYANAḄỌ ḅe la tẹso, KỊNỊNYANAḄỌ ḅe nwẹnị ò ḅioḅẹngbọ ḅụ ḅẹẹ, “À ḅarị jen-maaịn kẹ tomḅọ sịḅị gotẹ kiri mẹ wori ḅịa, kẹ gotẹ ọkọ ḅẹẹarị, tomḅọ kala-sakị kụra-ḅio ò ḅioḅẹngbọ ḅụ siye sikima ò jen kẹ ḅiokoroma-a; à pịkị ḅarị gbala-gbala jen kẹ ḍumo warị ye goyegoye ḅaa guluguluma ḅịa à mịọkụ mịẹ tẹ ḅara mẹ. 22Tomikiri mẹ simearị sakị goyegoye, fịye ḍiḅi sakị, na, fịye soku sakị na; oḅoku na, ọfịrị na ịrụa kụra sakị na, fẹngụ sakị na; eneḅaka na, ḍin na ḅarị kunoma ḅịa.”
Currently Selected:
Suku-saakị 8: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
