Okunwẹngịapụ 10
10
Pita Ḅe Na Kọnịliọs Ḅe Na
1Gbọrị owuḅọ Sizaria ḅie simemẹ oria ẹrẹ Kọnịliọs, Rom owukụlọnịḅọ, owuni-a sọnọasi ḍikiḍiki kiri nwọ lasa ḅọ-ẹ “Itili Owukụlọ owuni ogbo ḅie.” 2Tamụnọ tẹkẹtẹkẹ ḅọ-ẹ; ori na oria bebe furo mị mgba tịḅịtu Tamụnọ pịrịpịrịmẹ. Ọ̀ ḅakama ḅarachụa Ju igwein apụma pịrịpịrịmẹ. Se sịkịmamgba Tamụnọ Ḅe nwọ tẹkẹtẹkẹ mẹ. 3Tẹrẹ-a so pembe ḅiri ḅụ gbọrị eneogboin ḅụ, ori ịkịan ọrịmẹ, anịa ḅie ò ḅelema Tamụnọ enjẹlḅọ nwọ ọrịmẹ sọ ḅo nwọse ọ̀ ḅẹmẹ, “Kọnịliọs!”
4Ḅalafa ḅụ ọ̀ tọrụ se enjẹlḅọ ḅe ḅụgbana se nwọ ḅẹmẹ, “Sẹnịḅọ, mị cheye?”
Enjẹlḅọ ḅe pẹkẹrẹmẹ, “Tamụnọ Ḅe, ori ị́ya tẹkẹma na ị́ya nweni ḅẹlẹma fịrịma na nwọ ọkịsam, se ị́ se ḅiekoromasam. 5Mịọkụ owuapụ se Jọpa ḅie Saịmọn Pita nwọ chịnḅọ ḅe fịrịma ò ḅo. 6Nama apụra fịrịnwẹngịḅọ ḅe warị ḅie ori igoni mun waraḅẹ, Saịmọn nwọ chịnḅọ ḅe, tọrụ aka ḅụ ori angamẹ.” 7Anịsịkị ọkwẹịn ọ̀ pịrị sime enjẹlḅọ ḅe nwẹngị somẹ, se Kọnịliọs ḅe oria fịrịnwẹngịapụma ḅe mama apụ nwọ chịnmẹ, pịkị gbọrị owuniḅọ na, Tamụnọ tẹkẹtẹkẹ ḅọ, ò koruarịapụ ma ḅie gbọrịḅọ. 8Ọ̀ pakaye mị nwọ ḍuko ini pịrịmẹ se ini fịrịma pakụma Jọpa sẹịnmẹ.
9Anịḅe eneḅa ḅụ, ini inia nwẹngị kọnma mun se Jọpa na kpekiarị sịkị, Pita ḅe iwo warị ochu mị ọgọnọ mun mẹ karakara eneogboin ḅiri ḅụ tẹkẹḅịa ẹrẹchị. 10Fịye ọ̀ tarịmẹ, se ò yefị ḍọkịmẹ ini fịye mị nwọ karakaramarịogbo, ori ịkịan ọrịmẹ. 11Ò so mị finji ọkụ nwọ ọrịmẹ, se opu agbanị simeọkụ simeye, anịa inein-a ịkọlị ma na wẹrị koro sẹkiri ḅoaḅẹ. 12Anịa ḅie inein-a ḅụọ nama tọrụkịrịkịrị omi-ẹ, ikiriarị nama na, pịkị ye se nweni lamalama owoi-a feni na. 13Gbọrị pụkọ nwọse ọ̀ ḅẹmẹ, “Sịsẹ, Pita; ḅaa se pẹị!”
14Ọkụma Pita ḅe nwọ ḅẹmẹ, “Ngịsị ọkọ pakakẹ, Nyanaḅọ! Jịn sịkị ma à pụlasaye, anịkanịka fịafịakaye nwọ fịkẹ.”
15Pụkọ mị pịkịna nwọse ọ̀ ḅẹmẹ, “Tamụnọ Ḅe mịẹfịafịamasaye ḅarị pụlasaye nwọse anị chịnma.” 16Tẹrẹ-a sịkị ḅụ mịn mị mịẹmẹ, se anị gbọrị kirikiri ini ye mị ọkị iwo soḅie mun mẹ.
17Pita ḅe kuḅie chịẹ-chịẹ-chịẹ ḅụ ori ọrị ịkịan mị fieye ḅe koroma nwọ kọn simearị sịkị, Kọnịliọs ḅe se fịrịma apụma Saịmọn ḅe warị gbela nemi, se mịọkụ onu mị ḅọkọ chịẹsime waraḅẹ. 18Ini nweni chịn se gbelamẹ, “Mịanga ini Saịmọn Pita nwọse chịn igoniḅọ omi?”
19Pita ḅe pa ḅiaḅẹ ori ọrị ịkịan mị fiearịye nwọ nemi, Tẹmẹ Ḅe nwọ ḅẹmẹ, “Poki! Tẹrẹ owuapụ mịnyọ omi-ẹ, ini ị́ ḍọkịaḅẹ. 20Anịẹrẹchị ị́ ḅụ karakarama se koro mun, pịkị makuḅie nyana ma ị́ ini ḍuko mun-arị sịkị, anịatịḅị ị̀rị̀ ini se fịrịmamẹ.” 21Anị Pita ḅe koro mun se nwọse owuapụma ḅẹye-ẹ, “Ị̀rị̀ anị ọ́ ḍọkịarịḅọ ḅe-ẹ. Nde ó gose ḅo ye?”
22“Mịna Kụlọnịḅọ Kọnịliọs ḅe wa se fịrịmamẹ,” ini nwọ pẹkẹrẹmẹ. “Ori iḅi tomoniḅọ-ẹ, Tamụnọ tẹkẹtẹkẹ ḅọ-ẹ, Juapụ mamgba pịkị opu osi se pịrị ḅọ-ẹ. Tamụnọ enjẹlapụma ḅie gbọrịḅọ ḍuko ọ̀ pịrịmẹ na ori ị́ chịn oria warị ḅo-ẹ, mịẹse ori ị́ ḍukoḅịaye nwọ naaḅịa ọkụ.” 23Pita ḅe owuapụma chịn warị ḅie chumẹ, se mịẹmẹ ini ḍin mị se anịnyọ simemẹ.
Anịḅe eneḅa ḅụ ọ̀ ḅụkarakarama se inia ḅụ sọ mun mẹ, se Jọpa ḅie sime mịnapụma ḅie dapụ ò ḍuko mun mẹ. 24Anịḅe eneḅa ò ḅo Sizaria lamẹ, Kọnịliọs ḅe ò koru sime nyọ mị, ori na pakụma apụma na pịkị ọ̀ chịn ḅịpị se pịrị oria ikiapụ mamgba na ọ̀ ḅụ sọmẹ. 25Pita ḅe sọ mun-ẹtọn-arị sịkị, Kọnịliọs ḅe ori na ịrịamẹ, ḅịkị ọ̀ ḅụọchuku koro, se tịḅịtu ọ̀ pịrịmẹ. 26Ọkụma Pita ḅe ọ̀ mịẹse ọ̀ sịsẹ chịẹmẹ, “Chịẹsime,” ọ̀ nwọse ọ̀ ḅẹmẹ, “Anịatịḅị ị̀rị̀ na mịnaḅụ na tomoniḅọ-ẹ.” 27Pita ḅe ọkwẹịn Kọnịliọs ḅe pa nwọ pịrịaḅẹ ọ̀ warị mị ḅie sọ sịkị, anịnyọ koḅirima sime tọn-a tomoni ọ̀ nwọ ọrịmẹ. 28Ọ̀ nwọ seni ini ḅẹmẹ, “Ómine na mịnaḅụ na nemimẹ na Ju ḅọ ḅe Tamụnọ tẹkẹ ḅara mị gose ò Jịnsẹapụ lalakẹ ọ̀ pịkị ḅụ se ini pịrịpịrịkẹ. Ọkụma Tamụnọ Ḅe anị se ị̀ ḍiesam na à fịafịaka na pụlasa ḅọ tọrụ nwọse gbọrị tomoniḅọ sọnị ḍiki ma-ẹ. 29Anị mị mịẹse ị́ ị̀ fịrịma sịkị à ḅomẹ anị sịkịka ḅara ḅụ. Anị gose, àrị ị́ gbelaḅẹ, nde ị́ gose ị̀ fịrịmaye?”
30Kọnịliọs ḅe nwọ ḅẹmẹ, “Tẹrẹ-a ḍin ḅọrọ sa sịkị ḅụ, nwọ pembe ḅiri ḅụ àrị ị̀ya warị ḅie sime tẹkẹ simemẹ, tẹrẹ-a so ḅiri, eneogboin. Ḅụnemika ḅụ ḅịaḅịa ḅiriaye ḅiri gbọrị owuḅọ ị̀ tọrọkọ chịẹ simemẹ 31se nwọ ḅẹmẹ, ‘Kọnịliọs! Tamụnọ Ḅe ị́ya tẹkẹma naasam, pịkị ị́ya nweni ḅẹlẹma fịrịma nwọse ḅiekoromasam. 32Nweni se Jọpa fịrịma mun gbọrị owuḅọ nwọ chịnḅo Saịmọn Pita anị oria ẹrẹ-ẹ. Saịmọn warị ọ̀ nwọ bịanmẹ, nama apụra fịrịnwẹngịarịḅọ ḅe, tọrụ aka ḅụ ori angamẹ.’ 33Anị à gose kirikiri ị́ fịrịmaye-ẹ, ị́ ḅo ḅara iḅimẹ. Mịọkụ mine mgba Tamụnọ Ḅe tọrọkọ omi-ẹ, Nyanaḅọ Ḅe tọn ị́ pịrị na ḍuko-ẹ nwọ ḅẹye goyegoye nwọ pokiḅịa ẹrẹchị.”
Pita Ḅe Kọn Ọkwẹịn
34Pita ḅe sakị ọkwẹịnmẹ: “Mịọkụ anị àrị iḅiọkụ nemisaye-ẹ, na Tamụnọ Ḅe gbọrị ḅara mị ò se tomoni mamgba na angarịye-ẹ. 35Ò ḍikiḅalafa se karakaraye mịẹḅọ goyegoye ori iniḅọ ọkịmẹ, anị ḅẹrẹ nyanakẹ iniḅọ pakaḅo nyọ goyegoye. 36Ò se Izrẹlapụma fịrịma oku mị ómine anị nemimẹ, Jizọs Kraịst Ḅe ḅụ ḅọrọ deinma Iḅi Ḅẹrẹ mị nwọ ḍuko pakụmaḅẹ, tomoni mamgba Nyanaḅọ Ḅe. 37Izrẹl ama mị kelema koro, kiri ọkị opu mịẹmịẹye mị ó nemimẹ, Galili ḅie sakị, Jọn ḅe oria mengi sara oku mị ḍuko ḅọrọ sịkị. 38Jizọs Nazarẹtḅọ Ḅe gbolomaye mị ó nemimẹ, Tamụnọ Ḅe ḅara wẹrịma Fịafịa Tẹmẹ Ḅe na kụrọ na nwọse oria ọgọnọ sara ḅara mị. Ọ̀ nyọ goyegoye nwọ mun se iḅi mịẹma ḅọrọmẹ, pịkị oru ḅe iniaḅụ kụrọ nyana apụma ọ̀ nwọ gwọmẹ. Tamụnọ Ḅe ọ̀ ḅụ simemẹ nwọ ḅẹye gose. 39Juapụ amama na Jerusalẹm na ḅie ọ̀ mịẹaye mamgba mine arịa onyechịẹapụ-ẹ. Ini ọ̀ ḅaamẹ ò se mgbẹsẹchịn ọgọnọ ḅakụḅaamẹ. 40Ọkụma Tamụnọ Ḅe fịḅụ ọ̀ sịsẹmamẹ tẹrẹ-a ḍin karama ene ḅụ, pịkị ọ̀ mịẹse ori ọ̀ ḅụ ḍiepakụmamẹ, 41ò se tomoni mamgba ḍiekẹ, ọkụma ò se mine Tamụnọ Ḅe sẹlẹsa onyechịẹapụma kẹngẹ nwọ ḍiemẹ. Wa ori na yefị pịkị ḅuḅuaye ḅumẹ ọ̀ fịḅụsịsẹ so sịkị. 42Ọ̀ pịkị tọn wa pịrịmẹ na wa Iḅi Ḅẹrẹ mị nwọ ḍuko tomonima pịrị, se pịkị onyechịẹ na ori mị Tamụnọ Ḅe tọn se ḅẹrẹkọnḅọ sọ ḍumo apụ na fịapụ na pịrịḅịaye-ẹ. 43Ịkịankoroapụ mamgba ò gbolomaye nwọ ḍukomẹ, na ò ḅereni ḅọ goyegoye ini iniḅọ si ḅụ ḅarasin iniḅọ pịrịḅịa, oria ẹrẹ mị ḅe kụrọ ḅụ.”
Jịnsẹapụ Ma Fịafịa Tẹmẹ Ḅe Ọkịmẹ
44Pita ḅe pa ọkwẹịn àrị ogbo, Fịafịa Tẹmẹ Ḅe koroḅo oku mị poki sime apụma ọgọnọ gbanamẹ. 45Anị Jọpa ḅie sime Pita ḅe ḅụ sọ ori na ḅo Juapụma ḅụgbiripumamẹ na Tamụnọ Ḅe oria Fịafịa Tẹmẹ Ḅe ḍiepịrịye pịkị nwọse Jịnsẹapụma ọgọnọ sọnị sarasam nwọ ḅẹye mị ini nwọ ọrị sịkị. 46Anịatịḅị ini naamẹ ini kịrị ḅẹlẹ ḅụ kịrị ọkwẹịn nwọ kọnmẹ, se pịkị Tamụnọ Ḅe opu mị nwọ bomaḅẹ. Anị Pita ḅe nwọ ḅẹye-ẹ, 47“Mịna apụma ini Fịafịa Tẹmẹ Ḅe da ọkịsam, anị mine ma sọnị daọkị oku mị. Anịọkụma tụḅọ ineda ini kiki ḅe mengi se ini sara mị ḅụ?” 48Anị ọ̀ tọn ini pịrịye-ẹ, na ini mengi seni Jizọs Kraịst Ḅe ẹrẹ ḅụ ini sara. Anịsịkị ini ọ̀ ḅara ḅimẹ na ọ̀ pa boka kala ḍin nwọse ini na sime.
Currently Selected:
Okunwẹngịapụ 10: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
