Okunwẹngịapụ 13
13
Banabas Ḅe Na Sọl Ḅe Na Ini Nwọ Sẹlẹ Se Ini Fịrịma Pakụmamẹ
1Antiọk sime chọchị mị ḅie tọn-a ịkịankoroapụ na yeḍie apụ na omi-ẹ: Banabas, Simiọnị (Kurukuruḅọ ini nwọse chịnḅọ ḅe) Lusịọs (Saịrini ḅọ ḅe) Menian (ini Hẹrọd gọvịna ḅọ ḅe na se chụa ḍikiḍiki pakụmaḅọ ḅe), na pịkị Sọl ḅe na. 2Ini fịrịnwẹngị Nyanaḅọ Ḅe pịrị se ḅuru se ḅụḅamarị sịkị, Fịafịa Tẹmẹ Ḅe nwọse ini ḅẹmẹ, “Banabas ḅe na Sọl ḅe na nwọ sikima anga pịrị ị̀ pịrị, à gose ini chịn fịrị mị ini nwọ nwẹngịḅịa ḅara.”
3Ini ḅuruseḅụḅaama se tẹkẹmẹ, inia ḅarama se inia ọgọnọ gbanamẹ, se ini fịrịma pakụmamẹ.
Iniḅo Saịprọs Ama Mị Lasịkị
4Banabas ḅe na Sọl ḅe na, anịsịkị Fịafịa Tẹmẹ Ḅe ini se fịrịma ḅara ḅụ ini anịju ḅọrọ mun Silusia lamẹ, anịnyọ mị ini tọrụ ḅụ ḅọrọ mun Saịprọs ama mị munye-ẹ. 5Ini mun Salamis nwọ lasịkị, ini tẹkẹwarịma ḅie Tamụnọ ḅẹrẹ mị nwọ ḍukomẹ. Ini Jọn Mak ḅe ọkị inia ḅụ chụamẹ, ḅarachụa fịrị mị pịrị gose.
6Ini saḅa mun Pafọs ama mị la, anịanga ini gbọrị majik mịẹ ḅọ na ịrịamamẹ, oria ẹrẹ anị Baa-Jizọs, Juḅọ-ẹ, ori ịkịankoroḅọ-ẹ ọ̀ nwọse ọ̀ ḅụ chịnmẹ. 7Ori chọ mị ḅe gọvịna ḅe ikiaḅọ-ẹ anị Sajiọs Pọlus ḅe, ori nemi nyanaḅọ-ẹ. Gọvịna ḅe Banabas ḅe na Sọl ḅe na nwọ chịn ọ̀ tọrọkọ ḅomẹ, Tamụnọ ọkwẹịn mị naaḅịa ẹrẹchị. 8Ọkụma ori majikḅọ ḅe anị ini (Grik ọkwẹịn ḅie Ẹlimas se chịnḅọ ḅe) mịẹse ḅereni mị ḅụ gọvịna ḅe tọrụchụasinḅịaye gose ini na tụḅụrụmẹ. 9Anịsịkị Sọl ḅe, ini pịkị Pọl nwọse chịnḅọ ḅe, Fịafịa Tẹmẹ Ḅe ò ḅie ḅein ḅara ḅụ anị ọ̀ gamụnụma majik mịẹ ḅọ ḅe ḍiki 10se nwọse ọ̀ ḅẹye-ẹ, “Ị́rị́ Oru ḅe tọkụ! Ị́rị́ iḅiye goyegoye na tarakaḅọ, ị́rị́ si se epele goyegoye ḅie ḅeinḅọ, ị́ pịkị sịkịmamgba Nyanaḅọ Ḅe karakaraye ma pịkị iruoaye mịẹ ḍọkịḍọkịḅọ! 11Mịọkụ Nyanaḅọ Ḅe ḅara mị koroḅo ị́ya ọgọnọ gbanaḅịa, ị́ tọrụmgbọlụ pụnḅịa, gbọrị ogu sịkị ḅụ ị́ ḅarị enekuḅu ọrị ẹkẹ.”
Anịkirikiri Ẹlimas ḅe ọ̀ ḅụnemimẹ na kurukuru ataraḅa ọ̀ tọrụmgbọlụma kanakanamasam se nwẹngị kelekelema ḅọrọmẹ, ḅara ḅụ ori ọlọ ateli se ò ḍieḅịa ḅọ ọ̀ nwọ ḍọkịmẹ. 12Gọvịna ḅe pakaye mị ọrị sịkị ò ḅerenimẹ anịatịḅị Nyanaḅọ Ḅe gbolomaye ḅụ ini ḍiearịye mị anị opuma ijira se ọ̀ ḅụ saramẹ.
Iniḅo Pisidia Antiọk Ama Mị Lasịkị
13Pọl ḅe na ori na nwẹngịapụma na Pafọs koroma so arụ ḅụkụlọ Pẹga nwọ mun mẹ, Pamfilia mị ḅie gbọrị ama, ọkụma Jọn Mak ḅe anịanga ini koromaso se vinpịkị Jerusalẹm mun mẹ. 14Ini Pẹga ḅụ nwẹngịma mun ḅo Pisidia ḅie Antiọk nwọ lamẹ se Ịnyọsara Ene mị ḅụ ini tẹkẹwarị mị ḅie sọmun se kpọnjị simemẹ. 15Ini Moziz Oloko mị ḅie na ịkịankoroapụma gịẹịnye ma na nwọ go so sịkị, tẹkẹwarị mị ḅie fịrịnwẹngịapụma oku se ini fịrịmamẹ: “Mịnapụ, wa ḅimẹ ómine ọkwẹịn tomonima pịrị, se inia kuḅie kụrọmaḅịa oku ọ́ nwọ nyanamẹ ḅẹḅẹ.” 16Pọl ḅe sịsẹ chịẹ, ḅara se ini dẹdẹ se sakị ọkwẹịnmẹ:
“Ị́ juo Izrẹlapụ na Jịnsẹapụ na, Tamụnọ Ḅe nwọ tẹkẹarịapụ: ómine à ḍukoarịye mị nwọ naa! 17Mine Izrẹlapụma Tamụnọ Ḅe mịna ḅieju-aḍapụma nwọ sẹlẹmẹ, se ini se opu sẹ nwọ mịẹmẹ, ini igoniapụ ḅara nwọse Ijipt ama ḅie anga sịkị. Tamụnọ Ḅe oria opu kụrọ ḅụ Ijipt ama ḅie ini ọkị pakụmaḅomẹ, 18se kụra mesi na gbasịye ḅụ ori inuma fị ini pịrịmẹ eleogbo mị ḅie. 19Kenan opu ama mị ḅie sọnọma sẹ ọ̀ nwọ famamẹ, se oria tomonima mịẹse ini ama mị nyana apụ nwọ sọmẹ. 20Kụra ẹndẹ na kụra mesi oyi fịnjị ḅọrọ sịkị ḅụ.
“Anịeso ò ḅẹrẹkọn apụ se ini pịrịmẹ, ọkịmun ịkịankoro Samụẹl ḅe ḅụọ lamẹ. 21Se ini amanyanaḅọ nwọ ḅi sịkị, Tamụnọ Ḅe Kish ya, Sọl ḅe se ini pịrịmẹ, Bẹnjamin furo ḅie, kụra mesi ọ̀ nwọse amanyana ini pịrịmẹ. 22Ini ò sin sịkị, Tamụnọ Ḅe Devid ḅe se inia amanyanaḅọ nwọ mịẹmẹ. Tamụnọ Ḅe ọ́ ḅụ mịn mị nwọ ḍukomẹ, ‘À ḍọkị ọrịsam na Devid, Jẹsi yaḅe anị ị̀ ḅụḅẹlẹḅọ ḅe-ẹ, à ḅiarịye mamgba nwọ mịẹḅịaḅọ-ẹ.’ 23Jizọs Ḅe Devid furo ḅie pakaḅo ḅọ ḅe, mị Tamụnọ Ḅe se Izrẹlapụma ḍụaḅọrọmaḅọ nwọ mịẹye-ẹ, ò ḅereni sa ḅara mị ḅụ. 24Jizọs Ḅe ma oria fịrị sakịka simeogbo, Jọn ḅe Tamụnọ ḅẹrẹ nwọ ḍuko Izrẹlapụ mamgba pịrịmẹ, na, ini inia si mamgba ḅụ vinpịkị, se mengisara. 25Jọn ḅe oria fịrị mị nwẹngị so-ẹtọn-arị sịkị, ọ̀ nwọse ini ḅẹmẹ, ‘Ómine ị̀ se tụḅọ chịn? Ó koruarịḅọ ḅe ị̀rị̀kẹ. Ọkụma ḍiki! Ori ị̀ya ọḅụju ḅoaḅẹ, àrị iḅi ọkọ lakẹ; ọ̀ ḅụọ sime akpaka ma sin.’
26“Ị̀ juo Izrẹlapụ, Ebraham furoḅie apụ, pịkị ómine mịnyọ sime Tamụnọ Ḅe tẹkẹarị Jịnsẹapụ mamgba: mị ḍụaḅọrọma oku mị, mine gose ini anị se fịrịmamẹ! 27Anịatịḅị Jerusalẹm ḅie anga apụma na ini se tọrọkọ ịsụn apụma na ini nemikẹ na ori inia ḍụaḅọrọmaḅọ ọkụ, ini pịkị ịkịankoroapụ ọkwẹịn kaịnḅokẹ anị Ịnyọsara Ene goyegoye ini go-arịye ma. Anị sọnị ini mịẹse ịkịankoroapụma kọn ọkwẹịnma ḅo kọkọmaye sọmẹ ḅẹrẹkọn Jizọs Ḅe ḅara sime mị ḅụ. 28Ini gose ḅaa ḅẹrẹ pẹlẹ ọ̀ pịrịḅịa ḅẹrẹtịḅị ini nwọ ḍọkịḅokẹ nwọ ḅẹ sọnị, ini Paịlet ḅe ḅara ḅimẹ na ori ò se ḅaa ḅụ chu-ẹ. 29Se Fịafịa ḍiri ma ḅie ọ̀ ḅụ gịẹịnye goyegoye ini nwọ mịẹ so sịkị, ini mgbẹsẹchịn ọgọnọ ò sin koroma se ò seni iḍupu ḅie ḍipimẹ. 30Ọkụma Tamụnọ Ḅe fịḅụ ọ̀ sịsẹmamẹ, 31se ọ̀ pịkị tọn-a ene ọ̀ ḅụ se ori na Galili ḅie so Jerusalẹm mun-arị apụma ḍiemẹ. Ini mị mịọkụ oria onyechịẹ Izrẹlapụma pịrịarịye-ẹ. 32-33Mine ma pịkị mịnyọ omi-ẹ, Iḅi Ḅẹrẹ mị ọkịḅo ọ́ pịrịḅịa ẹrẹchị: Tamụnọ Ḅe ḅereni na ọ̀ mịẹ mịna ḅieju-aḍapụma pịrịḅịa nwọ ḅẹye mị, mịọkụ ori anị mịẹ mine inia ḅụ pakaḅo-apụ ma pịrịsam anị ò Jizọs Ḅe nwọ sịsẹma ḍumo ḅie chuye ḅụ. Mịn maịn karama Fịafịa Nime mị ḅie anị gịẹịnsa ọkụ mị-ẹ,
‘Ị́rị́ ị̀ya Tọkụ-ẹ,
mịmgba à Ḍaḅọ sọ ị́ pịrịsam.’
34Mị Tamụnọ Ḅe ḍukoye-ẹ, anị fịḅụ ori ọ̀ sịsẹmaye mị ḅụ, na ngịsị ọ̀ ḅụrụ ẹkẹ iḍupu ḅie:
‘Àrị osiḅụ sime pịkị gbarị ẹka ḅẹlẹma nwọse ị́ pịrịḅịa
anị à ḅereni Devid ḅe pịrị ḅara ḅụ.’
35Ọ̀ pịkị jịn ḍiri tọrụ kụrọma ḍuko ḅara ḅụ na,
‘Ị́ya kọkọma fịrịnwẹngịḅọ ḅe iḍupu ḅie ọ̀ ḅụrụ ẹkẹ.’
36Anịatịḅị Devid ḅe oria sịkị ḅụ Tamụnọ Ḅe ḍukoye ma mịẹmẹ se ọ̀ fịmẹ. Ini ò se oria ḅieju-aḍapụma anga ḅụ ḍipimẹ, se oria oju mị ḅụrụmẹ iḍupu mị ḅie. 37Ọkụma Tamụnọ Ḅe fịḅụsịsẹma ḅọ ḅe ọ̀ ḅụrụkẹ. 38-39Ị̀ juo Izrẹlapụ, wa ḅimẹ ó nemi na Jizọs Ḅe ḅụ mị ini siḅụ-ḅarasin ḅẹrẹ mị ḍuko ọ́ pịrịarịye-ẹ na ọ́mịna ḅie ọ̀ ḅụ ḅereni nyanaḅọ nyanaḅọ ini iniḅọ sima ḅụ iniḅọ finmaḅịa anị Moziz Olokoma ineda finma ẹkaye ma. 40Anịẹrẹchị, ómine ọ́ ḅụ ọbị, mịẹse ịkịankoroapụma ḍukoye ma ọ́mịna ḅụ paka ẹka ḅara:
41‘Ḍiki, ómine ye ḍikisimarịapụ ma! Ye ọ́mịna ḅụgbiripu se ọ́ fị!
Anịatịḅị ma enema ḅie à nwẹngịarị fịrịma
anị ó ḅereni ẹkaye-ẹ,
nweniḅọ anịḅe sime ḅara nwọ ḍuko ḅelema ọ́ pịrị sọ!’”
42Pọl ḅe na Banabas ḅe na tẹkẹwarị mị nwọ koromasoarị sịkị, tomonima pịkị ini chịnmẹ, na ḅoarị Ịnyọsara Ene mị ḅie ini vinpịkị ḅo se mayema gbolomaye pịkị nwọ ḍuko ini pịrị. 43Tomonima koḅirima mị ḅie pakaso sịkị, tọn-a Juapụ na Jịnsẹapụ na Pọl ḅe na Banabas ḅe na ḍukomẹ anị vinpịkị ḅo Juapụ Tamụnọ ḅẹrẹ nemi mị ḅie sọsa apụ ma-ẹ. Okunwẹngịapụ ma ọkwẹịn ini pịrị se inia kuḅie kụrọmamẹ na ini Tamụnọ ḍikiḅụgerere mị ḅie sime anga gbaso.
44Anị ḍukoma Ịnyọsara Ene mị ḅie kalaye kọnmẹ ama mị ḅie simeḅọ goyegoye ḅo Nyanaḅọ Ḅe ọkwẹịn mị nwọ pokisam. 45Juapụma tomonikpo mị ọrị sịkị, opu ḅụnwọnwọ inia ḅie sọmẹ, ini Pọl ḅe ḍukoarịye mị na tụḅụrụ se pịkị ọ̀ wọlọmẹ. 46Ọkụma Pọl ḅe na Banabas ḅe na ḅalafaka ḅara se pụkọ deki ọkwẹịn tarị ḅara mị sọ nẹngịmẹ se nwọ ḅẹmẹ: “Anị ḅụgbẹịnmẹ tatarị Tamụnọ ọkwẹịn mị kọn ómine pịrị. Ọkụma ọ́ nwọ anịsịkị pịkị sime gbaso ḍumo mị ọ́ gbẹịnmẹ nwọ ḅẹ ḅara se ọ́ ḅụ ọkịka sịkị, wa ọ́ wẹrịso se so Jịnsẹapụma damamunḅịa. 47Anịatịḅị mị Nyanaḅọ Ḅe tọn wa pịrị ọkụ-ẹ:
‘Arị ómine se enekuḅu mịẹ se Jịnsẹapụma pịrịsam,
mịẹse tomonikiri mị ḅo ḍụaḅọrọma nyanaḅịa ọkụ.’”
48Jịnsẹapụma mịn mị naa sịkị inia ḅieḅẹlẹmẹ, se tokoni se Nyanaḅọ Ḅe oku mị pịrịmẹ; se ini sẹlẹ se sime gbaso ḍumo mị pịrị apụma pịkị ḅo ḅereniapụ nwọ sọmẹ.
49Nyanaḅọ Ḅe ọkwẹịn mị nyọ goyegoye ḅụ wasamamẹ anị pẹkẹrẹ mị ḅie. 50Ọkụma Juapụma ama mị ḅie, Tamụnọ tẹkẹtẹkẹapụ ma ḅie ḅịpị ḅẹrẹ la owuapụ na pịkị Jịnsẹ eremeni ma ḅie tọrọkọ da apụma na Juapụma ini kpẹịnmamẹ. Ini ḅụfụka se Pọl ḅe na Banabas ḅe na pịrị, se inia ama pẹkẹrẹ ma ḅie ini desinmẹ. 51Okunwẹngịapụ ma inia ḅụọ fun ma gugusin se so Aịkonịọm mun mẹ. 52Antiọk ḅie sime ọḅụḍukoapụma ḅieḅẹlẹ na Fịafịa Tẹmẹ Ḅe na inia ḅie ḅeinmẹ.
Currently Selected:
Okunwẹngịapụ 13: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
