Okunwẹngịapụ 8
8
1Sọl ḅe ḅara pụnụ Stivin ḅe niniḅaa mị pịrịmẹ.
Sọl Ḅe Ḅụọ Se Chọchị Mị Chụamẹ
Anị gbọrị ene mị ḅụ Jerusalẹm ḅie sime chọchị mị sakị opu tọrụsiọrị ḅie sọmẹ. Okunwẹngịapụ ma sikima ọkụma, ḅereniapụ mamgba galagala Judia na Sameria na irima la-ọkụ la-ọkụ ḅie sọmẹ. 2Ḅereni ḅie sime iḅi kuḅie nyana dapụ Stivin ḅe ḍipimẹ, oloku owu se ḍụẹịn ḍin ọ̀ pịrịmẹ.
3Ọkụma Sọl ḅe chọchị mị famaḅịa ọkụ ḍọkịmẹ; mun warị warị ḅie sọ, se ḅereniapụma fọnọfọnọ pakụmaḅomẹ, owuapụ na eremeni na, se ini se ikoli ḅie chumẹ.
Sameria Ḅie Ini Iḅi Ḅẹrẹ Mị Ḍukomẹ
4Ḅereniapụ ma galagala nyọ mamgba mun se oku mị ḍuko wasamamẹ. 5Filip ḅe so Sameria opuama mị ḅie mun se Mẹsaya Ḅe ḅẹrẹ ḍuko ini pịrịmẹ. 6Tomonikpo mị kuḅie chịẹ-chịẹ-chịẹ ḅụ iḅi ḅeri se Filip ḅe pokimẹ, se ọ̀ mịẹ ḅụgbiripumaye ma ọrịmẹ. 7Sitẹmẹ oloku pụkọ se tọn-a apụ ḅie pakaḅomẹ, tọn-a oju ḅụ gbọrị pẹkẹrẹ fịapụ na ikeliapụ na ọ̀ nwọ gwọmẹ. 8Anịgose opu ḅieḅẹlẹ Sameria mị ḅie sọmẹ.
9Saịmọn nwọ chịnḅọ anị opuama mị ḅie omi-ẹ, majik mịẹse tomonima tọrụ irima-irimamẹ Sameria mị ḅie. Ori ọ̀ ḅụ se opuḅọ mịẹmẹ, 10se ama mị ḅie sime kala na opu na tọrụ se ò ḍikimẹ. Ini nwọ ḅẹmẹ, “Ori anị Tamụnọ kụrọ mị-ẹ, ‘Opu kụrọ ini nwọse chịnye mị.’” 11Ori oria majik nwọse ḅọlọ sịkị ngịsị inia tọrụ irimamẹ anị mịẹse ini tọrụ se ò ḍikiye-ẹ. 12Ọkụma ini Filip ḅe oku mị nwọ ḅereni sịkị, Tamụnọ Amanyanakiri mị gboloma Iḅi Ḅẹrẹ mị na pịkị Jizọs Kraịst ẹrẹ mị gbolomaye mị na ḅụ, ini mengi se ini saramẹ, owuapụ na eremeni na. 13Saịmọn ḅe sọnị ò ḅerenimẹ se ò mengi sara so sịkị, ọ̀ ḅụ se Filip ḅe kpekimamẹ, anị ọ̀ ḅụbuamamẹ ò Filip ḅe mịẹarị ḅụbuamaye ma na ḅụgbiripumaye ma na nwọ ọrị sịkị.
14Jerusalẹm ḅie sime okunwẹngịapụ ma naamẹ na Sameria apụma Tamụnọ ọkwẹịn mị ọkịsam nwọ ḅẹ sịkị, ini Pita ḅe na Jọn ḅe na nwọse ini fịrịmamẹ. 15Ini mun lasịkị, ini tẹkẹ ḅereniapụma pịrịmẹ mịẹse ini Fịafịa Tẹmẹ Ḅe nyanaḅoḅịa ḅara. 16Anịatịḅị Fịafịa Tẹmẹ Ḅe koroḅo ḅụgbana sa ḅọ ma ofori-ẹ; Jizọs Ḅe ẹrẹ ḅụ kẹngẹ mị ini mengi se ini sarasaye-ẹ. 17Anịsịkị Pita ḅe na Jọn ḅe na inia ḅarama se inia tịḅị ọgọnọ gbanamẹ, se ini Fịafịa Tẹmẹ Ḅe nwọ nyanaḅomẹ.
18Saịmọn ḅe ọrịmẹ na ini Tẹmẹ nwọse ḅereniapụma pịrịsam, okunwẹngịapụ ma inia ḅarama nwọse inia ọgọnọ gbana sịkị. Anị ori igbiki ḅereni Pita ḅe na Jọn ḅe na pịrịye-ẹ, 19se nwọ ḅẹmẹ, “Ọ́ mị kụrọ mị se ị̀rị̀ sọnị nwọ pịrị, mịẹse àrị ị̀ ḅara se ḅụgbana ḅọ goyegoye Fịafịa Tẹmẹ Ḅe nwọ nyanaḅịa ḅara.”
20Ọkụma Pita ḅe ọ̀ pẹkẹrẹmẹ, “Ye ị́rị́ na ị́ya igbiki na fịfa-a, ị́ nwọ koromarị sịkị na ị́ igbiki se Tamụnọ ḍiepịrịye fẹḅịa nwọ ḅẹ sịkị! 21Mịna fịrị ḅụ ị́ nyana se ḍia ọkịḅịa pẹkẹrẹ ofori-ẹ, anịatịḅị ị́ kuḅiemgbọlụ Tamụnọ Ḅe tọrụkuḅu karakarakẹ. 22Mịn ị́ tọn-arị siye mị ḅụ vinpịkị, se Nyanaḅọ Ḅe tẹkẹ, mịẹse ò si ḅụ ḅarasin ị́ pịrịḅịa ḅara, nwọ simeye ị́ nwọse ḅiekoromarịye gose. 23Anịatịḅị àrị ọrịmẹ na ị́ opuma akụ ḍikitọrụfụka nwọ nyanamẹ, ị́rị́ pịkị si mị ḅie ikoliḅọ-ẹ.”
24Saịmọn ḅe nwọse Pita ḅe na Jọn ḅe na ḅẹmẹ, “Pasisi ọ́ Nyanaḅọ Ḅe tẹkẹ ị̀ pịrị, mịẹse ó ḍukoarịye ma ḅụ gbọrịye sọnị paka ị̀ pịrị ẹka ḅara.”
25Ini inia onyechịẹ ọkwẹịn ma nwọ kọn so sịkị, se Nyanaḅọ Ḅe oku mị ḍuko se so, Pita ḅe na Jọn ḅe na vinpịkị so Jerusalẹm mun mẹ. Ini mun-arị sịkị ini Iḅi Ḅẹrẹ mị nwọ ḍukomẹ tọn-a Sameria kala amama ḅie.
Filip Ḅe Na Itiopia Fịrịtịḅịnịḅọ Ḅe Na
26Nyanaḅọ Ḅe enjẹlḅọ nwọse Filip ḅe ḅẹmẹ, “Ị́ ḅụ karakarama, se Jerusalẹm ḅie ḅọrọ Gaza ama mị munḅịa ateli ḅụ chukuda nyọ mị ḅie sọmun.” (Mịn ateli mị tomoni ḅarị anịa ḅie nwẹngịkẹ mịọkụ.) 27-28Anị Filip ḅe ḅụkarakarama se munye-ẹ. Mịọkụ ḅụposa gbọrị Itiopiaḅọ so oria ama nwọ mun aḅẹ. Ḅe owuḅọ ḅe opuma yela anị Amanyana-eremeniḅọ ma pịrị fịrịnwẹngịḅọ-ẹ, ori árịa ngọ koko ḅọ-ẹ, ò mun Jerusalẹm ḅie Tamụnọ tẹkẹ se vinpịkị ḅoaḅẹ oria kirinwẹngị arụ ḅie. Ọ̀ dọkụma mun-arị sịkị, ori Aịzaya ịkịankoroḅọ ḅe ḍiri nwọ go-aḅẹ. 29Fịafịa Tẹmẹ Ḅe nwọse Filip ḅe ḅẹmẹ, “Saḅa ísí pẹkẹrẹ mun se anị kirinwẹngị arụ mị na kpekima sime.” 30Filip ḅe mangị saḅa mun se ori Aịzaya ḍiri ḅie simeye go-arị ọkụ mị nwọ naamẹ; anị ò gbelaye-ẹ, “Ị́ go-arị ḍiri mị ị́ anị kaịnḅo?”
31Fịrịnwẹngịḅọ ḅe pẹkẹrẹmẹ, “Nde àrị ineda kaịnḅoḅịa ọkụ, jịnḅọ anị ḍuko ḅelema ị̀ pịrịka simeogbo?” Se ò Filip ḅe chịnmẹ, na ọ̀ tanjị iwo mun ori na kirinwẹngị arụ mị ḅie sime. 32Ò go sime Fịafịa ḍiri tọrụ mị, anị mị mị-ẹ,
“Ini se mun ḅaa-ẹmun anana simeọkụ,
ini oria oju ichuka ma kịrịsin-arị sịkị gboinma sime anana tọkụ simeọkụ.
Gbọrị ọkwẹịn sọ ọ̀ kọnkẹ.
33Ini ọ̀ ḅụgereremamẹ, ini karakara ḅẹrẹkọn ọ̀ pịrịkẹ.
Ineda ọ̀ wẹrị pakaḅo ḅara ḍukoḅịa gbọrịḅọ sọ ofori-ẹ,
anịatịḅị oria ḍumo tomonikiri kulumasam.”
34Fịrịtịḅịnịḅọ ḅe nwọse Filip ḅe gbelamẹ, “Ḍuko ọkọmụ tụḅọ ḅụ ḅẹrẹ ịkịankoroḅọ ḅe nwọ ḍuko-ao? Ọ̀ ḅụ ḅẹrẹ mụnọ se jịnḅọ ḅụ ye?” 35Se Filip ḅe sakị ọkwẹịnmẹ, mịn Fịafịa ḍiri tọrụ mị ḅụ ọ̀ sakị, Jizọs Ḅe gboloma Iḅi Ḅẹrẹ mị nwọ ḍuko ọ̀ pịrịmẹ. 36Ini anị ateli mị ḅie dọkụma mun-arị sịkị, iniḅo mengi sime nyọ nwọ lamẹ, se fịrịtịḅịnịḅọ ḅe nwọ ḅẹmẹ, “Mịn mengi-ẹ. Cheye kikichụa ị̀ pịrị ḅe mengi sara ḅụ?”
37[Filip ḅe nwọse ọ̀ ḅẹmẹ, “Ini ineda mengi se ị́ saraḅịa ị́ nemikase ị́ kuḅiemgbọlụ mgba se ḅereni mẹ ḅẹḅẹ.” “Iin, à ḅerenimẹ,” fịrịtịḅịnịḅọ ḅe nwọ pẹkẹrẹmẹ; “À ḅerenimẹ na Jizọs Kraịst Ḅe ori Tamụnọ Tọkụ-ẹ.”]
38Fịrịtịḅịnịḅọ ḅe tọnmẹ na kirinwẹngị arụ mị dachịẹ, se Filip ḅe na fịrịtịḅịnịḅọ ḅe na koro mengi ḅie mun mẹ, anịsịkị Filip ḅe mengi se ọ̀ saramẹ. 39Ini mengi mị ḅie pakaḅo sịkị, Tamụnọ Tẹmẹ Ḅe Filip ḅe ọkị somẹ. Fịrịtịḅịnịḅọ ḅe ḅarị ori ọrịka sịkị, ḅieḅẹlẹ ò ḅie ḅein ḅụ ò mun-arị nyọ ọ̀ nwọ mun mẹ. 40Filip ḅe Azotọs ḅie ọ̀ ḅụ ḍọkịḅo ọrịmẹ; ò so mun Sizaria lamẹ, se ateliogbo ò mun-arị sịkị amama ḅie ori Iḅi Ḅẹrẹ mị ḍukoma mun mẹ.
Currently Selected:
Okunwẹngịapụ 8: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
