Chukusakị 18
18
Ini Gbọrị Owutọkụ Ḅereni Ebraham Ḅe Pịrịmẹ
1Nyanaḅọ Ḅe Mamre ḅie sime osiḅụ sime ejema nyọ ḅụ, ọ̀ ḅụpakụma Ebraham ḅe pịrịmẹ. Ebraham ḅe ene mị opuma ọfịrịye gose oria ikowarị mị ḅọkọkọ ọ̀ kpọnjị simemẹ, 2ori ọ̀ tọrụ dekichịẹma ḍiki se tẹrẹ-a owuapụ nwọ ọrịmẹ anị nyọ ḅụ chịẹwaraḅẹ. Ori ini ọrị gbọrị kirikiri, ọ̀ mangị mun ini lamẹ. Ọ̀ ḅịkị korose ọ̀ tọrụ se kiri lamamẹ, 3se nwọ ḅẹmẹ, “Ị̀ nyanapụ, pasisi ómine ị̀ya warị agbaka ḅaraḅụ ḅọrọma; fịrịnwẹngị ọ́ pịrị gose à mịanga simemẹ. 4Ye à mengi ọkịḅo ó se ọ́mịna ḅụọma sịkịrị; ọ́ pịkị ejema chuku ịnyọsara. 5Se à fịye kalaye ọkịḅo ọ́ pịrịḅịa; anị ịnyọ se ọ́ pịrị se ó mun-arị nyọ mị munḅịa. Ómine osi se ị̀ pịrịmẹ ọ́ nwọ ị̀ya warị ḅoye mị, anịẹrẹchị ye à fịye kalaye se ọ́ pịrị.”
Ini nwọse ọ̀ pẹkẹrẹmẹ, “Wa ḅerenimẹ, ị́ ḍuko ọkụ mị mịẹ.”
6Ebraham ḅe be mangị ikowarị mị ḅie sọ se nwọse Sera ma ḅẹmẹ, “Sarama, tẹrẹ-a kiri laḅịa fịlawa ọkị se be fịturu fọị.” 7Ọ̀ pịkịna be mangị oria nama ogboma ḅie mun se gbọrị ḍụḅa ayamburama nambulo ọkịpakụmaḅo seni oria fịrịnwẹngịapụma ḅie gbọrịḅọ pịrị se ori ọ̀ ḅụ nwẹngị na gbẹịn-a fịrịnwẹngị se anị karakaramamẹ. 8Ò fịye krim kalaye na, ndo mengi na, nama mị na, ọkị se mun inia tọrọkọ koromamẹ. Anịnyọ eje mị chuku ọ̀ ḅarana anị tẹlịma se ini fịayema fịmẹ.
9Ini nwọse ò gbelamẹ, “Ị́ ta Sera ma nde árị?”
“Anịnyọ ikowarị mị ḅie árị omi-ẹ,” ọ̀ nwọse ini pẹkẹrẹmẹ.
10Inia ḅie gbọrịḅọ nwọ ḅẹmẹ, “Mịọkụ ọkịmun esenie-a akalụ laḅịa sịkị à pịkịna ḅoḅịa, ị́ ta Sera ma anịsịkịḅụ á gbọrị owutọkụ yiḅịa.”
Sera ma oria ọḅụju árị omi-ẹ, ikowarị ḅọkọ mị ḅụ árị ini pokiaḅẹ. 11Ebraham ḅe na Sera ma na ini iḅiọkụma olomusam, Sera ma, á ḅarị pịkị sịkị ọrịkẹ. 12Anịḅụ Sera ma, á ḅieḅụ ḍẹrị se nwọ ḅẹmẹ, “Mịọkụ àrị olomuso sịkị, ị̀ de ḅe sọnị olomusam, nde wa gboloma se tọrụḅẹlẹ nyanaḅịa ọkụ?”
13Anị Nyanaḅọ Ḅe Ebraham ḅe gbelaye-ẹ, “Cheye gose Sera ma á ḍẹrị se nwọḅẹ na, ‘Mịọkụ à nwọ olomu lasaḅara mị à kọkọma tọkụ yiḅịa nọ?’ 14Nyanaḅọ Ḅe ḅụ opuma kụrọ kụkụye omi? À ḍukosa ḅaraḅụ, mịọkụ ọkịmun esenie-a akalụ laḅịa sịkị à pịkịma ḅoḅịa, anịsịkịḅụ Sera ma gbọrị owutọkụ á nwọ yiḅịa.”
15Sera ma á ḅalafaye gose, árị anị pikimẹ, “À ḍẹrịka-ao” à nwọ ḅẹmẹ.
“Ẹn-ẹn, ọkụma ị́ ḍẹrịmẹ” ọ̀ nwọse á pẹkẹrẹmẹ.
Ebraham Ḅe Sọdọm Mị Gose Ḍikiḅụgerere Ḅimẹ
16Anịḅọrọso tomonima somun ini ineda Sọdọm mị ọrịḅịa nyọḅụ chịẹmẹ, Ebraham ḅe sọnị ori ini na mun mẹ ḅaḅa se ini ḅẹḅịa ẹrẹchị. 17Nyanaḅọ Ḅe nwọse mịnaḅụ ḅẹmẹ, “À mịẹḅịaye mị à se Ebraham ḅe ḅọịma ẹkẹ. 18Ò furo ḅie pakaḅoḅịa awọma, ini opuma ḍụḅa sẹ sọḅịa, ọ̀ ḅụ mị à pịkịna ḅọrọ sẹsẹ mamgba ḅẹlẹmaḅịaye-ẹ. 19Àrị ọ̀ sẹlẹọkịsam mịẹso sịkị ọ̀ tọn oria awọma na ò furo ḅie pakaḅoḅịapụ ma na pịrị, ini ị̀ ḅịpịpoki pịkị karakaraye na mịẹgbẹịnye na mịẹḅịa ḅara. Ini ọkọmịẹ ọkụma, à ḅereni ọ̀ pịrịye goyegoye à mịẹ ọ̀ pịrịḅịa.”
20Anị Nyanaḅọ Ḅe nwọse Ebraham ḅe ḅẹye-ẹ, “Ini seni Sọdọm na Gomọra na tịḅị gbana ḅalafamaye omi-ẹ, inia sima pịkị opuma ḅakasam. 21À mun ḍọkịpakụmaḅịa nwọfa à naase ini se inia ọgọnọ gbana ḅẹrẹ ma karakaraye-etuḅo.”
22Anịḅụ mama apụma nwẹngịso Sọdọm damẹ, ọkụma Nyanaḅọ Ḅe na Ebraham ḅe na simemẹ. 23Ebraham ḅe Nyanaḅọ Ḅe damamun se ò gbelamẹ, “Ị́ mun kọkọma karakaraye mịẹ apụma se simịẹapụma ḅụ chụa se ini ḅaafama ḅe? 24Nemikase karakaraye mịẹ apụ ḅụ kịnị-a mesi oyi fịnjị opuama mị ḅie sime ọkụma, bebe opuama mị mgba ị́ famaḅe? Ị́ ḅarasin anị pịrị-ẹka kịnị-a mesi oyi fịnjịma tịḅị gose? 25Pikipikiye ofori-ẹ na, karakaraye mịẹ apụma ị́ ini se siapụma ḅie chụa ḅaa-ẹkẹ. Anị mịẹkaye-ẹ! Ngịsị ị́ ineda ọkọsimeye mịẹkẹ. Ị́ ọkọmịẹ ọkụma iḅiapụma na siapụma na fomuḅara da gbolomaḅịa. Anị ị́ mịẹkaye-ẹ. Bebe sẹkiri mị mgba ḅe ḅẹrẹkọnḅịaḅọ ḅe, ọ̀ karakaraye mị mịẹḅịa.”
26Nyanaḅọ Ḅe nwọ pẹkẹrẹmẹ, “Nemikase karakaraye mịẹ apụ kịnị-a mesi oyi fịnjị Sọdọm ḅie à nwọ ḍọkịḅo ọkụma, ini gose bebe opuama mị mgba à wẹrịsoḅịa.”
27Ebraham ḅe pịkịna ọkwẹịnmẹ, “Pasisi ị̀ya kụrọ kuḅie mị ḍikitọrụsin ị̀ pịrị, à nwọ pa ị́rị́ na ọkwẹịn arịye mị, Nyanaḅọ. Ị̀rị̀ papa tomoniḅọ-ẹ, à kụrọnyanakẹ gbọrịye sọnị ḍuko. 28Ọkụma sosi kịnị-a mesi oyi fịnjị na karaka kịnị-a mesi na sọnọ apụ fịnjị kẹngẹ karakaraye mịẹ ọkụma. Bebe opuama mị mgba ị́ famaḅe sọnọ apụma oforikaye gose?”
Nyanaḅọ Ḅe nwọ pẹkẹrẹmẹ, “Opuama mị à fama ẹkẹ à ḅọrọ nemikase kịnị-a mesi na sọnọ apụ fịnjị ḍọkịḅo ọkụma.”
29Ebraham ḅe pịkịna ọkwẹịn se nwọ ḅẹmẹ, “Sosi kịnị-a mesi kẹngẹ-ẹ nwọḅẹ ọkụma?”
Ọ̀ nwọ pẹkẹrẹmẹ, “Àrị anị fama-ẹkẹ kịnị-a mesi omi ọkụma.”
30Ebraham ḅe nwọ ḅẹmẹ, “Sisi ịganịma-ao Nyanaḅọ, ọkụma à pịkịna ọkwẹịnḅịa. Nemikase kịnị-a soi kẹngẹ ọkụma?”
Ọ̀ nwọ pẹkẹrẹmẹ, “À mịẹkẹ kịnị-a soi kẹngẹ à nwọ ọrị ọkụma.”
31Ebraham ḅe nwọ ḅẹmẹ, “Pasisi ị̀ya kụrọ kuḅie mị ḍikitọrụsin ị̀ pịrị, à nwọ pa ọkwẹịn ị́ pịrịarịye mị ḅụ, Nyanaḅọ. Nemikase si kẹngẹ pakaḅo ọkụma?”
Ọ̀ nwọ ḅẹmẹ, “Anị opuama mị à fama-ẹkẹ, si keme kẹngẹ à nwọ ọrị ọkụma.”
32Ebraham ḅe nwọ ḅẹmẹ, “Sisi ịganịma-ao, Nyanaḅọ, à pa pịkị gbọrị sịkị se ọkwẹịnḅịa. Oyi apụ kẹngẹ-ẹ nwọḅẹ ọkụma.”
“Àrị anị fama-ẹkẹ oyi apụ omi ọkụma,” ọ̀ nwọ pẹkẹrẹmẹ. 33Ori Ebraham ḅe na ọkwẹịnso sịkị Nyanaḅọ Ḅe ò somẹ, se Ebraham ḅe sọnị vinpịkịso oria warị mun mẹ.
Currently Selected:
Chukusakị 18: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
