Chukusakị 24
24
Aịzịk Ḅe Simeḅịa Eremeniḅọ
1Mịọkụ Ebraham ḅe ori opuma olomusam, Nyanaḅọ Ḅe oria mịẹmịẹye goyegoye ḅụ ọ̀ ḅẹlẹmamẹ. 2Ọ̀ nwọse oria fịrịnwẹngịapụma ḅụ sẹnịtẹịnḅọ ḅe ḅẹmẹ, anị ọ̀ nyanaye goyegoye ḍikiḍikiarị ḅọḅe, “Ị́ ḅarase ị̀ ḅụọfuro ma ẹmbẹ ḅie chu, se Nyanaḅọ Ḅe ẹrẹḅụ yekarịfị ị̀ pịrị. 3À ḅimẹ, Nyanaḅọ Ḅe, anị so na kiri na tẹmẹ Tamụnọ ḅe ẹrẹḅụ yekarịfị ị̀ pịrị, na mịanga Kenan ḅie sime eremeni awọma ḅie, ị́ eremeniḅọ sẹlẹ ị̀ya tọkụ Aịzịk ḅe pịrịse ò sime ẹkẹ. 4Anị mịẹka mịẹka ḅara simemẹ na, ị́ vinpịkị mun ini ị̀ yi ama mị ḅie ị̀ya mịnapụma ḅie eremeniḅọ ọkịḅo ị̀ya tọkụ Aịzịk ḅe pịrịse ò simeḅịa.”
5Ọkụma fịrịnwẹngịḅọ ḅe nwọ gbelamẹ, “Cheye pakaḅe tọkụ ma nemikase árịa ama koromaso ị̀ ḍuko mị ama ḅo ḍụkụka ọkụma? À pịkị ị́ya tọkụ ḅe se ị́ ḅo ama mị fịrịmaḅe?”
6Ebraham ḅe ọ̀ pẹkẹrẹmẹ, “Ọrị na ị̀ya tọkụ ḅe ị́ pịkị nwọse anịju sẹịnkẹ! 7Nyanaḅọ, soḅie Tamụnọ Ḅe, ị̀ ḍaḅe na ị̀ya mịnapụma na ama ḅie ị̀ ọkị pakụma mịanga ḅo ḅọ ḅe, ọ̀ pịkị jokoma ḅereni ị̀ pịrịmẹ na, ọ̀ mị ama mị se ị̀ ḅụ pakaḅoḅịa apụma pịrịḅịa. Ori oria enjẹlḅọ fịrịma ị́ tọrọkọ ịsụnḅịa, mịẹse ị́ anịanga eremeniḅọ nyanaḅo ị̀ya tọkụ ḅe pịrịḅịa ḅara. 8Nemikase tọkụma ḅerenikẹ se ị́ ḍukoḅo ḍụkụkẹ ḅẹḅẹ, mị ị́ ḅereniye mị anị ị́ ọlọ ẹkẹ. Ọkụma ye sime la-ọkụ la-ọkụ, ị̀ya tọkụ ḅe ngịsị anịju ò munma.” 9Anị gose fịrịnwẹngịḅọ ḅe ori ọ̀ ḅarama se ọ̀ nyanaḅọ Ebraham ḅe ḅụọfuro ẹmbẹ ma ḅie chu se yekarịfịmẹ. Ebraham ḅe ḍuko ọ̀ pịrịye mị mịẹḅịa ẹrẹchị.
10Ebraham ḅe nyanaye mamgba ḍikiḍikiarị fịrịnwẹngịḅọ ḅe ori ọ̀ nyanaḅọ ḅe ike-nambuloma ḅie oyi nwọ ọkịmẹ pịkị yela ḍiepịrịaye na se Nehọ Mẹsopotemịa ọgọnọju anga ḅọ ḅe nyọ nwọ mun mẹ. 11Ọ̀ nyọ mị lasịkị, ọ̀ mịẹse ike-nambuloma kpẹrẹkịmẹ anị opuama mị laka simeogbo sime tiḅe mị chuku. Anịsịkị saso-ẹ, eremeni pakaḅo mengi ḍuḍu sịkịmị-ẹ. 12Ọ̀ tẹkẹmẹ, “Nyanaḅọ, ị̀ nyana Ebraham ḅe Tamụnọ, mịmgba fụḅara iḅise ị̀ pịrị, pịkị ị́ ḅereni ị̀ nyanaḅọ ḅe pịrịye mị mịẹ ḅeinma. 13Mịanga àrị omi-ẹ, iremenima opuama mị ḅie pakaḅo mengi ḍuḅịa tiḅe mị chuku. 14À nwọse inia ḅie gbọrịḅọ ḅẹḅịa, ‘Sisi, kele ị́ya ojongo mị tumgbo, à mengi ḅu.’ Á nemikase nwọ ḅẹ na, ‘Ḅu, à pịkị seḅo ị́ya ike-nambuloma pịrịḅịa,’ ye árịḅọ ma, ị́ sẹlẹ ị́ya fịrịnwẹngịḅọ Aịzịk ḅe pịrịsaḅọ nwọsọ. Nemikase mịn mị ọkọ pakamẹ ḅẹḅẹ, à nemiḅịa na ị́ ḅereni ị̀ nyanaḅọ ḅe pịrị yemị ị́ mịẹsam.”
15Ma ọ̀ tẹkẹ soka simeogbo, Ribeka ma árị aba ḅụ mengi ojongo na ḅo lamẹ. Árị anị Bẹtuẹl ḅa-ẹ, ori anị Ebraham numbireowu, Nehọ ya-ẹ, tarọ ma anị Milka ma-ẹ. 16Árị anị opuma iḅi iremeni tọkụ-ẹ, anịsịkị sọnị ma árị owuḅọ nemikẹ. Á tiḅe mị chuku mun mẹ, se árị árịa ojongo mị ḍu ḅeinmamẹ se pịkị vinpịkị ḅomẹ. 17Fịrịnwẹngịḅọ ḅe mangị á damamun se nwọse á ḅẹmẹ, “Sisi kele ị́ya ojongo mị ḅie mengi se ị̀ pịrị à ḅu.”
18Á nwọ ḅẹmẹ, “Ḅu, sẹnịḅọ,” se á sarama árịa aba ojongo mị sin iderima, anị ọlọ ọ̀ pịrị se ò ḅumẹ. 19Ò ḅuso sịkị, á nwọ ḅẹmẹ, “À pịkị mengi ọkịḅo ị́ya ike-nambuloma sọ pịrịḅịa, árị ḅu árịa pụkọ tanḅịa ḅara.” 20Á be árịa ojongo mị ḅie sime mengi mgba se namama àrịa mengi ḅuye ḅie saraso sịkị á pịkị mangị tiḅe mị chuku mun mẹ jịn mengi ḍuḅịa ẹrẹchị, mị ḅara mị á mịẹ nweni oria ike-nambuloma mamgba mengi ḅusomẹ. 21Tomoniḅọ ḅe ò deinma sime á ḍikimẹ nwọfa Nyanaḅọ Ḅe ọ̀ fụḅara-iḅi se ọ̀ pịrịsa-ẹtuḅo.
22Á ye so sịkị, tomoniḅọ ḅe ori opuma yela goli iringi nwọse á nini sụkamẹ pịkị opuma ḍụḅa goli nụnụma nwọse á ḅara chụamẹ. 23Ọ̀ nwọ ḅẹmẹ, “Sisi ḍuko ị̀ pịrị ị́ ḍaḅe tụḅọ. Oria warị ḅie, ẹmbẹ omi ị̀rị̀ na ḅo apụma na ị̀rị̀ na mọnọḅịa nyọ?”
24“Ị̀ ḍaḅe anị Bẹtuẹl ḅe-ẹ, ori anị Nehọ ḅe na Milka ma na yi ḅọ ḅe-ẹ,” á nwọ pẹkẹrẹmẹ. 25“Mịna warị nama fịfịye ḅakamẹ, pịkị ị́ simeḅịa nyọ omi-ẹ.”
26Anịsịkị tomoniḅọ ḅe ọ̀ kpẹrẹkị se Nyanaḅọ Ḅe tẹkẹmẹ. 27Ọ̀ nwọ ḅẹmẹ, “Boma sime Nyanaḅọ Ḅe pịrị, ị̀ nyana Ebraham Tamụnọ Ḅe, ò kuḅie se ḅụgbana na iḅi ḅara se ò ḅereni ị̀ nyanaḅọ ḅe pịrị yemị ọ̀ mịẹsam. Nyanaḅọ Ḅe ori ị̀ da gbụkụkụma mun ị̀ nyanaḅọ ḅe mịnapụma lamẹ.”
28Tọkụ ma mangị nyọngọrọma warị mun se ḅẹrẹ mị mgba ḍukomẹ. 29Mịọkụ Ribeka ma numbireowu omi-ẹ, ori ẹrẹ anị Leban, ọ̀ mangị nụngọpaka, Ebraham fịrịnwẹngịḅọ ḅe sime tiḅe chuku mun mẹ. 30Leban ḅe nini chụaye mị na pịkị nụmbụrarọ ma ḅara sime nụnụma mị na ọ̀ nwọ ọrịmẹ, ọ̀ pịkị tomoniḅọ ḅe kọn á pịrị ọkwẹịn mị naamẹ. Ori Ebraham fịrịnwẹngịḅọ ḅe damamunmẹ, oria ike-nambuloma angasịkị ọ̀ chịẹ waraḅẹ tiḅe mị chuku, 31ọ̀ nwọ ḅẹmẹ, “Ḅo ị̀rị̀ na warị mun. Ị́rị́ anị Nyanaḅọ Ḅe ḅẹlẹmasaḅọ-ẹ. Cheye gose ị́ mịanga chịẹ-ao? Ị̀ya warị ḅie à ḅie karakarama ị́ pịrịsam, pịkị ị́ya namama simeḅịa anga omi-ẹ.”
32Anịgose tomoniḅọ ḅe ọ̀ warị mị ḅie sọmunmẹ, Leban ḅe ọ̀ nambuloma ọgọnọ simeayema sinkoromamẹ pịkị fịye se àrị pịrịmẹ. Ò mengi ọkịḅo Ebraham fịrịnwẹngịḅọ ḅe na ori na ḅo apụma na pịrịmẹ ini se inia ḅụọma sịkịrịmẹ. 33Fịye ḅo sịkị, tomoniḅọ ḅe nwọ ḅẹmẹ, “À yefịẹkẹ à ḍukoḅịaye mị ma à nwọ ḍukoka simeogbo.”
Leban ḅe nwọ ḅẹmẹ, “Ọkwẹịnma mun.”
34“Ị̀rị̀ Ebraham ḅe oria fịrịnwẹngịḅọ-ẹ,” ọ̀ sakịmẹ. 35“Nyanaḅọ Ḅe ọ̀ ḅakama ị̀ nyanaḅọ ḅe ḅẹlẹmasam pịkị mịẹse ori opuma ye nyanasam. Tọn-a anana ogbo, oḅori, nama tọrụkịrịkịrị, seleḅa, goli, owuapụ na, eremeni omoni na, tọn-a ike-nambulo na, yepụra asụn na, ọ̀ nwọse ọ̀ pịrịsam. 36Sera, ị̀ nyanaḅọ ḅe tarọ ma árị owutọkụ yi ọ̀ pịrịmẹ árị olomuso sịkị re, ị̀ nyanaḅọ ḅe ọ̀ pịkị ọ̀ nyanaye goyegoye nwọse ọ̀ pịrịsam. 37Ị̀ nyanaḅọ ḅe ori ị̀ mịẹse à yeḅereni se yekarịfị ọ̀ pịrịmẹ na ọ̀ tọnye à nwọ mịẹḅịa. Ọ̀ nwọ ḅẹmẹ, ‘Kenan ama ḅie sime eremeni awọma ḅie, ị̀ya tọkụ ḅe simeḅịa eremeniḅọ sẹlẹ ọ̀ pịrịma. 38Anịnakaraka, ị̀ ḍaḅe oria tomonima damamun, ị̀ya mịnapụma inia ḅie ò simeḅịa eremeniḅọ sẹlẹ ọ̀ pịrị.’ 39Àrị ị̀ nyanaḅọ ḅe gbelamẹ, ‘Nde anị simeḅịa ọkụ, nemikase tọkụma ị̀ ḍukoḅo ḍụkụka ọkụma?’ 40Ọ̀ nwọ pẹkẹrẹmẹ, ‘Nyanaḅọ Ḅe, sịkịmamgba ò ḍukoye à nwọ mịẹmịẹḅọ ḅe, ori oria enjẹlḅọ se ị́ fịrịmaḅịa se ori iḅifụḅara se ị́ pịrịḅịa. Ị̀ya tomonima ḅie mị ị́ eremeniḅọ nyanaḅo ị̀ya tọkụ ḅe pịrịḅịaye-ẹ, ị̀ ḍa furo mị ḅie. 41Gbọrị achọ ḅụ kẹngẹ anị ị́ karịfị yemị ḅụ ị́ ị́ tịḅị kpọrọnịsinḅịaye-ẹ; ị́ nemikase ị̀ya mịnapụma damamunmẹ se ini ḅereni ị́ pịrịkẹ ḅẹḅẹ anị ị́ gbarịḅọrọsam.’
42“Mịmgba à ḅo tiḅe mị chuku lasịkị, à tẹkẹmẹ, ‘Nyanaḅọ, ị̀ nyana Ebraham Tamụnọ, sisi mịọkụ à nwọ mịẹarịye mị ḅụ iḅifụḅara se ị̀ pịrị. 43Mị ị̀rị̀-ẹ tiḅe mị chuku. Iremeni tọkụ pakaḅo mengi ḍuḅịa sịkị, àrị á ḅara ḅiḅịa á kele árịa ojongo ḅie mengi se ị̀ pịrị à ḅu. 44Á nemikase ḅereni pịkị kuḅie lokoloko ḅụ mengi se ị̀ya ike-nambuloma pịrịmẹ ḅẹḅẹ, ye árị ị́ sẹlẹ ị̀ nyanaḅọ ḅe oria tọkụ ḅe pịrịsa tarọ ma nwọsọ.’ 45Ma à miniminima tẹkẹ soka simeogbo Ribeka ma árịa aba mengi ḍuḅịa ojongo mị na ḅomẹ, se á tiḅe mị chuku mun mẹ mengi ḍuḅịa ẹrẹchị. À nwọse á ḅẹmẹ, ‘Sisi mengi se ị̀ pịrị à ḅu.’ 46Kirikiri á ḅo árịa aba sime ojongo mị tumgbo se nwọ ḅẹmẹ, ‘Ḅu, à pịkị mengi se ị́ya ike-nambuloma pịrịḅịa.’ Anị à ḅuye-ẹ, á pịkị mengi se ike-nambuloma pịrịse ḅu mẹ. 47Àrị á gbelamẹ, ‘Ị́ ḍaḅe tụḅọ?’ Á nwọ pẹkẹrẹmẹ, ‘Ị̀ ḍaḅe anị Bẹtuẹl ḅe-ẹ, Nehọ ḅe na Milka ma na yi tọkụ ḅe.’ Anịsịkị mị à iringi mị se á nini sụka pịkị nụnụma mị seni á ḅara chụaye-ẹ. 48À kpẹrẹkị se Nyanaḅọ Ḅe tẹkẹmẹ. À Nyanaḅọ Ḅe bomamẹ, ị̀ nyana Ebraham Tamụnọ Ḅe, ị̀ dagbụkụkụma mun ị̀ nyanaḅọ ḅe mịnaḅọ ḅe la ḅọḅe, anịnyọ oria tọkụma ọrị ḅo ị̀ nyanaḅọ ḅe tọkụ ḅe pịrịḅọ ḅe. 49Mịọkụ ó nemikase ọ́ mịẹḅịaye ḅụ ị̀ nyanaḅọ ḅe ḅiye mịẹḅeinma pịkị iḅiọkụma ò ḅerenimẹ ḅẹḅẹ, sisi ó ḍuko ị̀ pịrị, pịkị iḅi-ẹkẹ ḅẹḅẹ ó ḍuko à pịkị mịẹḅịa ọkụ nemi.”
50Leban ḅe na Bẹtuẹl ḅe na nwọ pẹkẹrẹmẹ, “Mị ḅẹrẹ mị Nyanaḅọ Ḅe ḅụ ḅomẹ ḅẹsịkị, wa ngẹrị mịna ḅarakuḅu ḅẹrẹtọn ḅịa ọkụ ofori-ẹ. 51Ribeka ma, ma árị-ẹ; árị ọkịso. Ye ị́ nyanaḅọ ḅe tọkụ ḅe ta á nwọsọ, Nyanaḅọ Ḅe ḅarana ḍukosa ḅaraḅụ.” 52Ebraham fịrịnwẹngịḅọ ḅe mị naa sịkị, ori ọ̀ tọrụ tuse Nyanaḅọ Ḅe tẹkẹmẹ. 53Anịsịkị mị chụa ḅịa ḅụchụaye na ḅịtẹ na, seleḅa na, goli na, pịkị ḅụḅirima jịn aye na, ọ̀ nwọse Ribeka ma pịrịmẹ. Ọ̀ pịkị yela ḍiepịrịaye nwọse tọkụma numbireowu ḅe na nyọngọrọma na pịrịmẹ.
54Anịsịkị re mị Ebraham fịrịnwẹngịḅọ ḅe na pịkị ori na mun owuapụma na yefị pịkị ḅuḅuaye ḅuye-ẹ, se ini ḍin mị se anịanga mọnọmẹ. Dede ḅie ini sịsẹ sịkị, ọ̀ nwọ ḅẹmẹ, “Ye à vinpịkịso ị̀ nyanaḅọ ḅe damamun.”
55Ọkụma Ribeka numbireowu ḅe na nyọngọrọma na nwọ ḅẹmẹ, “Ye tọkụma mine na sọnọma ḍin anịkanịka oyi-a ḍin nwọ sime, anịsịkị mị á soḅịaye-ẹ.”
56Ọkụma ọ̀ nwọ ḅẹmẹ, “Ọ́ wa kikima. Nyanaḅọ Ḅe ori iḅifụḅara se ị̀ya nwẹngị mị pịrịsam; ye à so ị̀ nyanaḅọ ḅe damamun.”
57Ini nwọ pẹkẹrẹmẹ, “Ye wa tọkụma chịn se á ḍukoḅịaye nwọ naa.” 58Anị ini Ribeka ma chịn se á gbelaye-ẹ, “Ị́ ḅi ị́ ḅeḅọ ḅe na so?”
“Iin,” á nwọ pẹkẹrẹmẹ.
59Anị gose ini Ribeka ma na árịa olomu furo fịrịnwẹngịḅọ ḅe na mịẹse ini Ebraham fịrịnwẹngịḅọ ḅe na ori na ḅo apụma na somẹ. 60Mà ọkwẹịnma ḅụ ini inia ḅẹlẹma se Ribeka ma pịrịmẹ:
“Ye ị́rị́, mịna mịnaḅọ ma nyengiḅọ sọ kịẹnḅịa ọkụ oforika awọ pịrị!
Ye ị́ ḅụ pakaḅoḅịa apụma ini na taraka apụ opuamama inuma!”
61Anị Ribeka ma na pịkị árịa iremeni fịrịnwẹngịapụma na ḅụkarakarama ike-nambuloma tanjịye-ẹ, Ebraham fịrịnwẹngịḅọ ḅe na munḅịa ẹrẹchị, anị gbọrị sịkị inimgba ini sakị nwẹngịmẹ.
62Aịzịk ḅe ọ̀ paka “Ị̀ Ọrị Ḍumoḅọ Ḅe Oria Tiḅe” mị sime onwun ele mị ḅie mun mẹ se Kenan ḅụ chuku daọrụ ḅụ simemẹ. 63Sasoḅiri ọ̀ paka mun onwun ele mị ḅie ḅụọ ịsụn-ẹmunmẹ se ḅoarị ike-nambuloma nwọ ọrịmẹ. 64Ribeka ma Aịzịk ḅe ọrị sịkị árịa ike-nambulo ḅe ọgọnọ á koromẹ 65se árị Ebraham fịrịnwẹngịḅọ ḅe gbelamẹ, “Anị onwun ele mị ḅie nwẹngị wa da àrịḅọ ḅe tụḅọ?”
“Ori anị ị̀ nyanaḅọ ḅe-ẹ,” fịrịnwẹngịḅọ ḅe nwọ pẹkẹrẹmẹ. Anị gose árị árịa ḅịtẹ ọkị se á tọrụgbẹịnmẹ.
66Fịrịnwẹngịḅọ ḅe ọ̀ mịẹye layelaye nwọ ḍuko Aịzịk ḅe pịrịmẹ. 67Aịzịk ḅe ò Ribeka ma ọkịḅo nyọngọrọma anga ikowarị mị ḅie chumẹ se á ḅo tarọ sọmẹ. Aịzịk ḅe ò Ribeka ma ḅẹlẹmamẹ, á ḅo kuḅie kụrọma ḅọ sọ ọ̀ pịrịmẹ, nyọngọrọma ḅarị oforika sịkị.
Currently Selected:
Chukusakị 24: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
