Chukusakị 30
30
1Ọkụma Rechẹl ma gbọrị tọkụ sọ á yi Jekọb ḅe pịrịkaye gose, á nụmbụrarọma ḍiki pụkọsolimẹ se á nwọ seni Jekọb ḅe ḅẹmẹ, “Awọ se ị̀ pịrị, anịka à fịḅịa.”
2Jekọb ḅe ọ̀ kụrọma ịganị Rechẹl ma pịrị se nwọ ḅẹmẹ, “Àrị ineda Tamụnọ Ḅe kiri ọkịḅịa ọkụ ofori-ẹ. Ori mị ị́ya awọyika mị mịẹye-ẹ.”
3Á nwọ ḅẹmẹ, “Ma ị̀ya omoni tọkụ Bilha ma-ẹ; árị na gboloma, mịẹso sịkị á tọkụ yi ị̀ pịrịḅịa ḅara. Mị ḅaraḅụ àrị á ḅụ ḅọrọ nyengiḅọ sọḅịa ọkụ.” 4Anịẹrẹchị á Bilha ma se dewu ḅe pịrịmẹ se ori árị na gbolomamẹ. 5Bilha ma ḅo simekọn se owutọkụ yi Jekọb ḅe pịrịmẹ. 6Rechẹl ma nwọ ḅẹmẹ, “Tamụnọ Ḅe ọ̀ ḅẹrẹkọn ị̀ ḅara iḅimasam. Ori ị̀ya tẹkẹ mị naasam se owutọkụ se ị̀ pịrịsam;” anịẹrẹchị á nwọse ọ̀ chịnmẹ, Danị. 7Bilha ma á pịkị jịn simekọnmẹ se maịn-karama owutọkụ nwọ yi Jekọb ḅe pịrịmẹ. 8Rechẹl ma nwọ ḅẹmẹ, “Àrị mbụra ma na kụrọ owusọmẹ, se ọmụḅaraiḅi nyanasam”, anịẹrẹchị á nwọse ọ̀ chịnmẹ Naftalaị.
9Lia ma á ḍọkịḅo ọrịmẹ na á yi pẹlẹsam nwọḅẹ sịkị, àrị árịa omoni tọkụ Zilpa ma se Jekọb ḅe pịrịmẹ se ori á simemẹ. 10Zilpa ma árị owutọkụ yi Jekọb ḅe pịrịmẹ. 11Lia ma nwọ ḅẹmẹ, “Àrị iḅifụḅara nyanamẹ;” anịẹrẹchị á nwọse ọ̀ chịnmẹ Gadị. 12Zilpa ma á pịkị gbọrị owutọkụ yi Jekọb ḅe pịrịmẹ, 13Lia ma pịkị nwọ ḅẹmẹ, “Nde nde ọkụ sime ḅieḅẹlẹ à nwọ nyanaḅe! Mịọkụ eremeni nwọse ị̀ chịnḅịa ḅieḅẹlẹ;” anịẹrẹchị á nwọse ọ̀ chịnmẹ Asha.
14Fịturu mịẹ ịpịamgba pẹlẹ sịkị ḅụ Rubẹnị ḅe ori ozu mun mẹ se ozu ḅie chịnmgbọlụ ọrịmẹ, se ori anị seḅo nyọngọrọ Lia ma pịrịmẹ. Rechẹl ma nwọse Lia ma ḅẹmẹ, “Sisi kele ị́ya tọkụ ḅe oria chịnmgbọlụma ḅụ kalaye se ị̀ pịrị.”
15Lia ma nwọ pẹkẹrẹmẹ, “Ị́ ị̀ deḅe ọkị ye mị ma pa ị́rị́ na iḅikẹ? Mịọkụ ị́ pịkị ị̀ya tọkụ ḅe se ḅo ị̀ pịrị chịnmgbọlụma sọnị ọkịḅịa ẹrẹchị ḍọkịaḅẹ.”
Rechẹl ma nwọ ḅẹmẹ, “Ị́ nemikase ị́ya tọkụ ḅe se ḅo ị́ pịrị chịnmgbọlụma ḅụ ye se ị̀ pịrịmẹ ḅẹḅẹ, Jekọb ḅe mị ḍin ò ḅo ị́rị́ na gbolomaḅịa.”
16Jekọb ḅe sasoḅiri ozu ḅie ḅo sịkị, Lia ma á pakamun ori na ịrịa se nwọ ḅẹmẹ, “Mị ḍin ị́ ḅo ị̀ya anga mọnọḅịa, anịatịḅị, ị̀ya tọkụ ḅe oria chịnmgbọlụma à nwọse ị́ ị̀ya anga mọnọḅịaye mị gbẹịnsam.” Anịgose anị ḍin ori árị na gbolomamẹ.
17Tamụnọ Ḅe Lia ma árịa tẹkẹ mị pẹkẹrẹmẹ, se á ḅo pịkị simekọn se sọnọ karama owutọkụ yi Jekọb ḅe pịrịmẹ. 18Lia ma nwọ ḅẹmẹ, “Tamụnọ Ḅe ori ị̀ya gbẹịnye se ị̀ pịrịsam, anịatịḅị ị̀ya omoniḅọma à nwọse ị̀ deḅe pịrịmẹ;” anịẹrẹchị á nwọse tọkụ ḅe chịnmẹ Ịsaka. 19Lia ma á pịkị simekọn se sonio karama owutọkụ yi Jekọb ḅe pịrịmẹ. 20À nwọ ḅẹmẹ, “Tamụnọ Ḅe ori iḅi ḍiepịrịye se ị̀ pịrịsam. Mịọkụ ị̀ deḅe ori ị̀ ọkịḅịa, anịatịḅị à sonio owuapụ awọ yi ọ̀ pịrịsam;” anịẹrẹchị à nwọse ọ̀ chịnmẹ Zẹbụlọnị. 21Ọḅụkọ árị eremeni tọkụ nwọ yimẹ, á nwọse á chịnmẹ Daịna.
22Anịsịkị re mị Tamụnọ Ḅe Rechẹl ma se ḅiekoromaye-ẹ, se árịa tẹkẹ mị ọ̀ pẹkẹrẹmẹ se á ḅụlọ finji mẹ. 23Á simekọn se owutọkụ yimẹ. Á nwọ ḅẹmẹ, “Tamụnọ Ḅe ị̀ya ḅụgerere mị ò sinsam, owutọkụ se ị̀ pịrịḅụ. 24Ye Nyanaḅọ Ḅe ọ̀ jịn owutọkụ se ị̀ pịrị;” anịẹrẹchị á nwọse ọ̀ chịnmẹ Josẹf.
Jekọb Ḅe Leban Ḅe Na Nyana Ḅịpịogbosọ
25Josẹf ḅe ini nwọ yi so sịkị, Jekọb ḅe nwọse Leban ḅe ḅẹmẹ, “Ị̀ wẹrịso à so ị̀ya warị mun. 26Ị̀ya erema na awọmẹnịma na se ị̀ pịrị, fịrịnwẹngị ị́ pịrịḅụ à nyanaḅo apụma, à soḅịa. Àrị iḅiọkụ fịrịnwẹngị ị́ pịrịsa ọkụ ị́ nemimẹ.”
27Leban ḅe nwọse ọ̀ ḅẹmẹ, “Ye à mịn mị ḍuko: pikipikiye ofori-ẹ anị ị̀ ḅụ okoromẹ na Nyanaḅọ Ḅe ị́ tịḅị gose ori ị̀ ḅẹlẹmamẹ. 28À se ị́ gbẹịnḅịaye nwọ ḍuko ị̀ pịrị se àrị ị́ gbẹịnḅịa.”
29Jekọb ḅe nwọ pẹkẹrẹmẹ, “À fịrịnwẹngị ị́ pịrị lasa ọkụ ị́ nemimẹ, pịkị ị̀ ḅaraḅụ ị́ya ananama ḅaka lasa ọkụ na. 30Ma à ḅoka sịkị ị́ nyana kalaye mị, mịọkụ àrị opuma ḅakasam, Nyanaḅọ Ḅe ori ị́ ḅẹlẹmasam à ḅo ị́rị́ na anga sịkị ngịsị. Mịọkụ ị̀rị̀sọ àrị ị̀yaye ḍọkịḅịa sịkị lasam.”
31“Cheye à ḅọrọ nwọse ị́ gbẹịnḅe?” Leban ḅe nwọse ò gbelamẹ.
Jekọb ḅe nwọ pẹkẹrẹmẹ, “À gbọrị gbẹịnye sọ ḅikẹ. À pa ị́ya ananama ḍikiḍiki ma tọrọkọ munḅịa, ị́ nemikase mị ḅereniḅịa ọkụma: 32Ye àrị ị́ya anana ogboma ḅie nwẹngị kelema mịmgba, se arịa ḅie kurukuru anana pịkị oju gbọgbọ oḅori layelaye à nwọ ọkị. Anị kẹngẹ anị à ḅiḅịa gbẹịnye-ẹ. 33Àrị inumamẹ ḅẹḅẹ tọrọkọju ị́ ọrịḅịa. Ị́ ḅo kpoto ị̀ya gbẹịnye ḍikiḅịa sịkị, nemikase gbọgbọka oḅori anịkanịka kurukuruka anana à nwọ nyanamẹ ḅẹḅẹ, nemi na anị à furumẹ.”
34Leban ḅe nwọ pẹkẹrẹmẹ, “À ḅerenimẹ. Ị́ ḍuko ọkụ mị anị wa mịẹḅịa ọkụ-ẹ.” 35Ọkụma anị ene mị ḅie Leban ḅe gwagwa owoi oḅorima na pịkị gwagwa ịrọrọ oḅorima na anịkanịka ḅịaḅịa ḅalaḅụ sime ayema ò deki sinmẹ; ọ̀ pịkị kurukuru ananama sọnị nwọ sinmẹ. Ori oria owuapụ awọma ḅẹ se ini àrị ḍikiḍikimẹ, 36se ò Jekọb ḅe wẹrịso se tẹrẹ-a ḍin laḅịa ḅọlọju nwọ mun mẹ. Jekọb ḅe, Leban ananama ḅụ kọn ayema nwọ ḍikiḍikimẹ. 37Jekọb ḅe elelenda tọrụ nyana chịn ịkpangị na, ịmụnụ chịn ịkpangị na pịkị papa chịn na, nwọ ọkị se arịa apụra ma ḅụ daye nwọ pịnị sinmẹ, anị mị mịẹse ịkpangị ma ḅụ ḅịaḅịa ḅala ḅọrọmẹ. 38Ọ̀ ma ịkpangị ma se ananama mengi ḅuḅu nyọ mị tọrọkọ koromamẹ. Ò gose arịse anịanga koromaye, namama àrị ḅo mengi ḅuḅịa sịkị, owoi na ịrọrọ na gboloma gbolomamẹ anịnyọ ḅụ. 39Anịgose oḅorima àrị yi sịkị oju ḅịaḅịa, ḅala ḅọrọ, gwagwa pịkị gbọgbọ awọ na àrị nwọ yimẹ.
40Jekọb ḅe ori ananama ḅie Oḅori ma sikimamẹ, se àrị se Leban nama ogboma ḅie gwagwa ayema na gbọgbọ ayema na damẹ. Mị ḅaraḅụ ori oria namama nyanamẹ, se ò Leban ayema ḅie oriaye ma sikimamẹ.
41Kpụrụkpụrụ ayema ḅụgbolomarị sịkị ḅụ, Jekọb ḅe chịn ịkpangị ma ò nwọse àrị mengi ḅuḅu nyọ ḅụ tọrọkọ koromamẹ, mịẹse àrị chịn ịkpangị ma ogboku sime yiḅịa ḅara. 42Ọkụma ịnyọ nyanaka namama ịkpangị ma ò se arịa tọrọkọ koromakẹ. Anị ḅọlọ sịkị ọkịkẹ, Leban ḅe ịnyọ ḅụ ofori nama mamgba nwọ nyanamẹ, se Jekọb ḅe ḅo ịnyọ nyana aye mamgba nwọ nyanamẹ. 43Mị ḅaraḅụ Jekọb ḅe ò ḅo opuma ye nyanamẹ. Ọ̀ ḅaka anana ogbo na, omoni na, ike-nambulo na, yepụra asụn na nwọ nyanamẹ.
Currently Selected:
Chukusakị 30: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
