Chukusakị 32
32
Jekọb Ḅe Isọ Ḅe Na Ịrịaḅịa Ẹrẹchị Ḅụkarakaramamẹ
1Jekọb ḅe ateli mị ḅie mun-arị sịkị tọn-a enjẹlapụ ori na ịrịamẹ. 2Ori ini ọrị sịkị, ọ̀ nwọ ḅẹmẹ, “Mị anị Tamụnọ ikowarị mị-ẹ,” anị gose, ọ̀ nwọse nyọ mị chịnmẹ Mahaneim.
3Jekọb ḅe ori okunwẹngịapụ se tatarị numbireowu Isọ ḅe sẹịnmamẹ Idọm sẹ mị ḅie. 4Ọ̀ nwọse ini ḅẹmẹ, “Ò ḍuko Isọ ḅe pịrị, mị anị ị́ya ḅịpị poki fịrịnwẹngịḅọ Jekọb ḅe ḍuko ọkụ-ẹ na anị kụra ma ḅie ngịsị à Leban ḅe na angamẹ se ị̀ya ḅo mị se ọḅụda ọkị ḅo mịọkụ lamẹ. 5À tọn-a nama, yepụra asụn, anana, oḅori, pịkị omoni na nwọ nyanamẹ. Àrị oku se ị́ fịrịma aḅẹ, sẹnịḅọ, se tọrụse ḍikiaḅẹ ị́ya ḅẹlẹma nwọ nyanaḅịa ọkụ.”
6Okunwẹngịapụ ma vinpịkị Jekọb ḅe damaḅo sịkị, ini nwọ ḅẹmẹ, “Wa ị́ mbire Isọ ḅe damamunmẹ, ọ̀ ḅụkarakarama se nwẹngịḅo ị́rị́ na ịrịa-ẹḅo aḅẹ. Owuapụ ḅụ kịnị ẹndẹ ori na omi-ẹ.” 7Jekọb ḅe anị ọ̀ ḅalafama pịkị ọ̀ ḅụḅalaḅalamamẹ. Ori na simeapụma, ọ̀ nwọse mama kiri pumẹ, pịkị oria ananama na, oḅorima na, namama na pịkị ike-nambuloma na. 8Ọ̀ nwọ koromamẹ, “Nemikase Isọ ḅe owuse tatarị kpo mị nwọ pakamẹ ḅẹḅẹ ísí kpo mị ineda mangị soḅịa.”
9Anịsịkị Jekọb ḅe ọ̀ tẹkẹmẹ, “Ị̀ya opuḍaḅọ Ebraham Tamụnọ pịkị ị̀ ḍa Aịzịk Tamụnọ ị̀ naa! Nyanaḅọ, ị́ nwọse ị̀ ḅẹmẹ na à vinpịkịso ị̀ya ama mun pịkị ị̀ya mịnapụma na damamun, na ị́ mịẹse yelayelaye sarasara ị̀ pịrịḅịa. 10Ị́ se ị̀ mịẹsa iḅi mamgba na ị́ nyana ị̀ pịrị kuḅie-se-ḅụgbana iḅi mị ị̀ gbẹịnkẹ, ị̀rị̀ ị́ya fịrịnwẹngịḅọ ḅe. À se mị Jọdan mị saḅaye ofori-ẹ, ọkụma gbọrị amgbara kẹngẹ-ẹ, ọkụma mịọkụ à ma mama kpo ma na vinpịkị ḅosam. 11Ị̀ ḍụa à tẹkẹmẹ mbire Isọ ḅe ḅara ḅie. Ị̀ ḅalafamẹ—ị̀ ḅalafamẹ ori owuse ḅo wa paka-ẹḅoaḅẹ, mine mgba na pịkị eremeni ma na, awọmẹnịma sọnị ḅaasinḅịa ẹrẹchị. 12Ḅiekoroma na ị́ ḅereni ị̀ pịrịmẹ na ị́ mịẹse yelayelaye ị̀rị̀ na lọkọlọkọ tọrọkọ munḅịa, ị́ pịkị mịẹḅịa gbọrịḅọ sọ ineda kịẹnka tomoni ị̀ ḅụ pakaḅoḅịa, tọrụ aka sime onwun ma ḅaka ọkụ ḅaka apụ.”
13-15Anị ḍin ọ̀ nwọse anịanga simemẹ, anịeso Jekọb ḅe oria namama ḅie ḍiepịrịaye sẹlẹmẹ se ḍie numbireowu Isọ ḅe pịrịḅịa ẹrẹchị: Ịrọrọ oḅori oyiasi, ẹkpẹịn si, anana oyiasi, ajirima si, ndo pịrịarị ike-nambulo na awọma na soi, nambulo-a mesi, pịkị owoi-a nambulo oyi, yepụra asụn si, pịkị oyi-a owoi yepụra asụn na ọ̀ nwọ sẹlẹmẹ. 16Ori àrị se kirikiri pumẹ, se oria fịrịnwẹngịapụma ḅie gbọrịḅọ gbọrịḅọ nwọse kirikiri ḅụ tịḅịdamẹ. Ọ̀ nwọse ini ḅẹmẹ, “Ómine ị̀ tọrọkọ pẹlẹma mun se nama kpo ma ḅụ ómine ẹmbẹ pakụma tọrọkọda kpo mị na ọḅụda kpo mị na ḅụ.” 17Ọ̀ nwọse tatarị fịrịnwẹngịḅọ ḅe ḅẹmẹ, “Mbire Isọ ḅe ị́rị́ na ịrịa se ị́ gbela na, ‘Ị́ nyanaḅọ tụḅọ? Ị́ nde anga mun-ao? Ị́ tọrọkọ sime namama tụḅọ àrị nyana?’ 18Nwọ pẹkẹrẹ, ‘Ị́ya fịrịnwẹngịḅọ Jekọb ḅe oriaye-ẹ. Ò se Isọ ọ̀ nyanaḅọ ḅe sẹịnma ḍiepịrịaye-ẹ. Jekọb ḅe na mịnaḅụ na mịna ọḅụju ò ḅoaḅẹ.’” 19Mị gbọrị ḅara anị ò ḍuko maịn karamaḅọ mị na tẹrẹ karamaḅọ mị na pịkị ísí-a nama ogboma na ḅụ tịḅịdapụ mamgba pịrị ọkụ-ẹ: “Mị ó ḍuko Isọ ḅe pịrịḅịa ọkụ-ẹ, ò ḅo ómine na ịrịa sịkị. 20Mị ọ́ ḅẹḅịa ḅara-ẹ, ‘Iin, ị́ya fịrịnwẹngịḅọ Jekọb ḅe ọḅụju ori omi-ẹ.’” Jekọb ḅe koroma ḅụ nwọ ḅẹmẹ; “Ma ḍiepịrịayema ḅụ anị àrị ọ̀ nyana ị̀ ḅụ pịrịḅịaye-ẹ, àrị ori na ịrịaḅịa sịkị, sosi ò siḅụ ḅarasin ị̀ pịrịḅịa.” 21Ò ḍiepịrịayema se ọ̀ tọrọkọ pẹlẹma sẹịnmẹ se anị ḍin mị se anịanga ikowarị mị ḅie mọnọmẹ.
Pẹnuẹl Nyọ Mị Ḅụ Jekọb Ḅe Ịmgba Sọmẹ
22Anị gbọrị ḍin ḅie Jekọb ḅe oria mama ya eremeni ma na mama ịgwa eremeni ma na pịkị oria oyigbọrị awọ fịnjịma na ọkị Jabọk Tọrụ mị saḅamẹ. 23Ori inise tọrụ mị saḅama sosịkị ọ̀ pịkị ọ̀ nyanaye layelaye nwọ sẹịn saḅamamẹ, 24ọkụma ori ngẹrị ọḅụda simemẹ. Anịsịkị gbọrịḅọ ḅo ori na ịmgbasọmẹ ọkịmun eneḅa kpekimẹ. 25Nweniḅọ ḅe ḅo ọrịmẹ na ọ̀ mịẹọkụ mịẹọkụ ori ineda Jekọb ḅe nẹngịmakẹ nwọ ḅẹ sịkị, ò Jekọb ḅe igo ḅakụmẹ, kirikiri oria igo imgbe mị ḅọrọmẹ. 26Nweniḅọ ḅe nwọ ḅẹmẹ, “Ị̀ wẹrịso à so, eneḅa kpekiaḅẹ.”
“Ị́ ị̀ ḅẹlẹmaka simeogbo àrị ị́ wẹrịso ẹkẹ.” Jekọb ḅe nwọ pẹkẹrẹmẹ.
27Nweniḅọ ḅe nwọse ò gbelamẹ, “Nde ị́ya ẹrẹ?”
“Jekọb,” anị ọ̀ pẹkẹrẹye-ẹ.
28Nweniḅọ ḅe nwọ ḅẹmẹ, “Jekọb ḅarị ị́ya ẹrẹkẹ. Anịatịḅị ị́ Tamụnọ na pịkị tomoni na ḅụ imgbe piki-a se pịkị ini nẹngịmasam; anịgose ị́ya ẹrẹ anị Izrẹl.”
29Jekọb ḅe nwọ ḅẹmẹ, “Mịọkụ ị́ya ẹrẹ go ị̀ pịrị.”
Ọkụma ori nwọ pẹkẹrẹmẹ, “Cheye gose ị́ ị̀ya ẹrẹ nemi ḍọkị?” Anịsịkị ò Jekọb ḅe ḅẹlẹmamẹ.
30Jekọb ḅe nwọ ḅẹmẹ, “À Tamụnọ Ḅe ọrịsam, tọrụna tọrụna se à pịkị pa ḍumo waraḅẹ,” anịgose ọ̀ nwọse anịnyọ mị chịnmẹ Pẹnuẹl. 31Jekọb ḅe Pẹnuẹl mị koroma soarịsịkị ịrụa mị ḅịaḅẹ, ọ̀ dọdọ nwẹngịmẹ oria igo mị gose. 32Mịmgbasọ Izrẹl furo ḅie apụ goyegoye nama konju-anda-na-ikoli-na-ịmgbe mị ḅe sịan mị ini pẹịpẹịkẹ anịatịḅị mị sịan ḅụ anị ini Jekọb ḅe ḅakụye-ẹ.
Currently Selected:
Chukusakị 32: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
