Jọn 8
8
Sẹfị Ḅụ Ini Ọlọ Eremeniḅọ Ma Gbolomaye
1[Se ọrị ḅọḅọ so mịna warị mun mẹ, ọkụma Jizọs Ḅe so Oliv Tụndụ mị ọgọnọ mun mẹ. 2Anịḅe ene ḅa ḅe dede funfun ḅụ ò vinpịkị Oputẹkẹwarị mị ḅie mun mẹ. Tomoni mamgba koḅirima ò kelemamẹ, se ọ̀ kpọnjị sime se sakị ye seni ini ḍiemẹ. 3Oloko ḍieapụma na Farisiapụ ma na ini sẹfị sime gbọrị eremeniḅọ nwọ kun ḅomẹ, á mịẹse árị inimgba tọrọkọ chịẹ simemẹ. 4Ini nwọse Jizọs Ḅe ḅẹmẹ, “Yeḍieḅọ, ma eremeniḅọ ma á sẹfịarịogbo ini á kunmẹ. 5Mịna Oloko mị ḅie Moziz ḅe ọ̀ tọnsam na ini ọkọ sime eremeniḅọ nwọ gbin ḅaa. Mịọkụ, ị́rị́ nde ị́ ḍuko ọkụ?” 6Ini mịn mị ḍukomẹ se ḍẹịntu Jizọs Ḅe pịrịḅịa ẹrẹchị, mịẹse ini ḅẹrẹ se Ọ̀ pụnụmaḅịa ḅara. Ọkụma Jizọs Ḅe tu se ọ̀ ḅaratụmgbalị se kiri ye gịẹịnmẹ. 7Ini anịnyọ chịẹ sime ḅẹrẹ seni ò gbelarịogbo, Ori Ọ̀ ḅụ chịẹma se nwọse ini ḅẹmẹ, “Ọ́mịna ḅie ma simịẹkaḅọ goyegoye ye iniḅọ tatarị imgbele mị nwọse á gbin.” 8Anịsịkị Ọ̀ pịkị tu se kiri ye gịẹịnmẹ. 9Ini mịn mị nwọ naa sịkị, inimgba nwẹngị somẹ, gbọrịḅọ gbọrịḅọ, sẹnịapụma tatarị-ẹ. Jizọs Ḅe ngẹrị kọnmẹ, eremeniḅọ ma pa anịnyọ chịẹ sime waraḅẹ. 10Ori ọ̀ ḅụ chịẹma se nwọse á ḅẹmẹ, “Nde anga ini omi? Inia ḅụ kọn se ḅẹrẹkọn ị́ ḅara sima gbọrịḅọ sọnị ofori?”
11Á nwọ pẹkẹrẹmẹ, “Gbọrịḅọ sọnị ofori-ẹ, Yeḍieḅọ.”
Anịọkụma, iḅimẹ, “Ị̀rị̀ sọnị à ḅẹrẹkọn ị́ ḅara simakẹ. So, ọkụma ḅarị simịẹ ma.”]
Jizọs Ḅe Tomonikiri Mị Ḅe Enekuḅu-ẹ
12Jizọs Ḅe pịkịna ọkwẹịn Farisiapụma pịrịmẹ, “Ị̀rị̀ tomonikiri mị ḅie enekuḅu mị-ẹ, ị̀ ḍuko nwẹngịḅọ goyegoye ḍumo mị ḅe enekuḅu nwọ nyanaḅịa se iniḅọ ngịsị kanakana ḅie nwẹngị ẹkẹ.”
13Farisiapụ ma nwọse ọ̀ ḅẹmẹ, “Mịọkụ ị́rị́ ḅara na onyechịẹ ị́ ḅụ pịrịaḅẹ; ị́ ḍukoarịye mị yeḅụ ofori-ẹ.”
14Jizọs Ḅe pẹkẹrẹmẹ, “Ẹn-ẹn, àrị onyechịẹ ị̀ ḅụ pịrịmẹ nwọḅẹ sọnị, à ḍukoye mị kọkọmaye-ẹ, anịatịḅị à wẹrị ḅo anga na à pịkị mun-arị anga na à nemimẹ. Ó nemikẹ à wẹrị ḅo anga anịkanịka à mun-arị nyọ sọ. 15Ọkụma jokoma tomoni ḅẹrẹkọn kọn ọkụ mị ó seni ḅẹrẹkọn àrịye-ẹ, à ḅẹrẹpẹlẹ pịrị gbọrịḅọ sọ ofori-ẹ. 16Ọkụma à nemikase ḅẹrẹpẹlẹḅịa ọkụma, ị̀ya ḅẹrẹpẹlẹ mị kọkọmaye sọḅịa, anịatịḅị mịn mị ḅụ ị̀rị̀ ngẹrị ofori-ẹ, ị̀ se fịrịma Ḍaḅọ Ḅe sọnị ori ị̀rị̀ na omi-ẹ. 17Ọ́mịna Oloko mị ḅie anị gịẹịn waraḅẹ, na mama onyechịẹapụ gbọrị ḅịpị fie ọkụma, ini ḍukoye mị kọkọmaye-ẹ. 18Àrị onyechịẹ ị̀ ḅụ pịrịmẹ, ị̀ se fịrịma Ḍaḅọ Ḅe pịkị onyechịẹ ị̀ pịrịmẹ.”
19Ini ò gbelamẹ, “ị́ Ḍaḅe ori nde anga omi?”
Jizọs Ḅe nwọse ini pẹkẹrẹmẹ, “Ómine ị̀ nemikẹ, ị̀ Ḍaḅe sọ ọ́ pịkị ò nemikẹ. Ómine ị̀ nemi ọkụma, ọ́ pịkị ị̀ Ḍaḅe sọ nemiḅịa.”
20Jizọs Ḅe mịn mị mgba nwọ ḍukomẹ ori Oputẹkẹwarị mị ḅie yeḍiearịogbo, ini ḍiepịrịaye igbe ma koroma koroma ḅie mị ḅụ. Se ò kun gbọrịḅọ sọ ofori-ẹ, anịatịḅị oria sịkị mị ma lakẹ.
Ómine Ineda À Mun-arị Nyọ Mị Nwọ Mun Ẹkẹ
21Jizọs Ḅe pịkị nwọse ini ḅẹmẹ, “À soḅịa; ómine ị̀ ḍọkịḅịa, ọkụma ómine ọ́mịna sima ḅie sime fịḅịa. Ómine ineda à mun-arị nyọ mị mun ẹkẹ.”
22Anị Ju ḅẹrẹkọn apụma nwọḅẹye-ẹ, “Ọ̀ nwọ ḅẹmẹ, wa ineda ò mun-arị nyọ mị nwọ mun ẹkẹ. Mịn mị anị fie-ao na ori ọ̀ ḅụ ḅaaḅịa?”
23Jizọs Ḅe pẹkẹrẹmẹ, “Ómine mị chukuju mị ọ́ wẹrị pakaḅoye-ẹ, ọkụma ị̀rị̀ ọgọnọju mị à wẹrịḅoye-ẹ. Ómine mị tomonikiri mị ḅie mị ọ́ wẹrịḅoye-ẹ, ọkụma ị̀rị̀ à mị tomonikiri ḅie wẹrị ḅokẹ. 24Mịn mị gose mị à ḍuko ọ́ pịrịarịye-ẹ na ómine ọ́mịna sima ḅie sime fịḅịa, ‘Ị̀rị̀ Anị Ị̀rị̀-ẹ,’ nwọḅẹye mị ọ́ nwọ ḅerenikẹ ḅẹḅẹ, ọ́mịna sima ḅie mị ó sime fịḅịaye-ẹ.”
25Ini ò gbelamẹ, “Ị́rị́ tụḅọ?”
Jizọs Ḅe pẹkẹrẹmẹ, “Sakị sịkị mị ngịsị à ḍuko ọ́ pịrịmẹ. 26Ọ́mịna ḅụ à ḍukoḅịaye ḅakamẹ, se ḅẹrẹkọn ọ́ ḅarasimaḅịaye pịkị ḅakamẹ. Ị̀ se fịrịmaḅọ ḅe, anị simeọkụ simeọkụ sọnị kọkọmaye ḍuko ḍuko ḅọ-ẹ, anị gose ọ̀ ḅịpị à naaye mị kẹngẹ anị à ḍuko tomonikiri mị pịrịye-ẹ.”
27Ini kaịnḅokẹ, na ọ̀ Ḍaḅọ Ḅe gbolomaye nwọ ḍuko ini pịrịaḅẹ. 28Anị Jizọs Ḅe nwọse ini ḅẹye-ẹ, “Ó Tomoniḅọ Tọkụ Ḅe nwọ dekichịẹmaḅịa sịkị, mị ó nemiḅịaye-ẹ na ‘Ị̀rị̀ Anị Ị̀rị̀-ẹ’; anịsịkị mị ó nemiḅịaye na ị̀rị̀ ị̀ ḅarakuḅu ḅụ mịẹye ofori-ẹ, ọkụma Ḍaḅọ Ḅe se ị̀ ḍieye kẹngẹ mị à ḍukoarịye-ẹ. 29Ị̀ se fịrịmaḅọ ḅe pịkị ị̀rị̀ na omi-ẹ; na ori ị̀ ḅụ ḅarasin se àrị ngẹrị simekẹ, anịatịḅị à sịkịmamgba ọ̀ ḅụḅẹlẹye mịẹmịẹmẹ.”
30Jizọs Ḅe ḍukoarịye ma nwọ naa tọn apụ ò ḅerenimẹ.
Furo Awọ Na Omoni Awọ Na Ḅẹrẹ
31Anị Jizọs Ḅe nwọse ò ḅereni Juapụma ḅẹye-ẹ, “Ómine à ḍiearịye ma mịẹmẹ nwọ ḅẹḅẹ ómine kọkọma ị̀ya ọḅụḍukoapụ-ẹ; 32ọ́ kọkọmaye mị nwọ nemiḅịa, se kọkọmaye mị mịẹse ómine ngẹrị ọ́mịna ḅụ ma nyanaḅịa.”
33Ini nwọ pẹkẹrẹmẹ, “Mine Ebraham furo ḅie awọ-ẹ, wa omoni sọ pịrịsaḅọ ma ofori-ẹ. Cheye anịọkụma ị́ nwọ fie-ao, nwọḅẹ na, ‘Ómine ọ́ ḅụ nyanaḅịa?’”
34Jizọs Ḅe nwọse ini ḅẹmẹ, “Kọkọmaye à nwọ ḍuko ọ́ pịrịaḅẹ: si mịẹḅọ goyegoye anị si mị ḅe omoniḅọ-ẹ. 35Omoniḅọ ḅe ọ̀ sịkịmamgba sime furo mị pịrịkẹ, ọkụma furotọkụ ḅe ò sime furo mị nwọ pịrị gbasomẹ. 36Tọkụ Ḅe nemikase ị́ mịẹse ị́ ḅụ nyanamẹ ḅẹḅẹ, anị ị́ kọkọma ị́ ḅụ nyanaḅịa. 37À nemimẹ na ómine Ebraham furo ḅie awọ-ẹ. Anị sọnị ómine ị̀ ḅaa ḍọkịaḅẹ, ye mịẹye ómine ị̀ya ḍieye mị ọkị ḍọkịkẹ. 38Ị̀ Ḍaḅe se ị̀ ḍieye mị à ḍukoarịye-ẹ, ọkụma ọ́mịna ḍaḅe ḍuko ọ́ pịrịye mị ó mịẹarịye-ẹ.”
39Ini ọ̀ pẹkẹrẹmẹ, “Mịna ḍa anị Ebraham ḅe-ẹ.”
Jizọs Ḅe ini pẹkẹrẹmẹ, “Ómine nemikase kọkọma Ebraham awọ-ẹ nwọḅẹ ọkụma,” “ọ̀ nwẹngị fịrịma mgbọkụ ọ́ nwọ nwẹngịsam. 40À bebema mịẹsaye mamgba anị Tamụnọ Ḅe ḅịpị à naasa kọkọmaye mị nwọ ḍuko ọ́ pịrị, anị sọnị ómine ị̀ ḅaa ḍọkịaḅẹ. Ebraham ḅe ọ̀ nwọ simeye nwọ mịẹkẹ! 41Ọ́mịna ḍaḅe mịẹye mị ọ́ mịẹarịye-ẹ.”
Ini nwọ pẹkẹrẹmẹ, “Tamụnọ Ḅe na mịnaḅụ na kẹngẹ mị wa nyana Ḍaḅọ Ḅe-ẹ, mine anị oria kọkọma awọ ma-ẹ.”
42Jizọs Ḅe nwọse ini ḅẹmẹ, “Tamụnọ Ḅe nemikase kọkọma ọ́mịna Ḍa-ẹ nwọḅẹ ọkụma, ómine ị̀ ḅẹlẹmaḅịa, anịatịḅị Tamụnọ Ḅe ḅụ à wẹrị ḅomẹ, se mịọkụ à mịanga omi-ẹ. Ị̀rị̀ ngẹrị ị̀ya kụrọ ḅụ ḅokẹ, ọkụma ori mị ị̀ se fịrịmaye-ẹ. 43Nde ó gose à ḍukoye nwọ kaịnḅokaye? Anịatịḅị ómine ineda inema à se ḅo oku mị nwọ pokikẹ. 44Ómine ọ́mịna ḍa Oru ḅe awọ-ẹ, ó ḅiaḅẹ ómine ọ́mịna ḍaḅe ḅiarịaye ma nwọ ḍuko nwẹngị. Sakị mị ngịsị ori niniḅọ-ẹ, ọ̀ kọkọmaye mị ju nwọ sọsọkẹ, anịatịḅị kọkọmaye ò ḅie ofori-ẹ. Ori iruo kọn àrị sịkị, ori na sopakaye mị ọ̀ mịẹarịye-ẹ, anịatịḅị ori iruo ḅọ-ẹ, pịkị iruo mamgba ḅe ḍaḅọ-ẹ. 45Ọkụma à kọkọmaye mị nwọ ḍukomẹ, anị mị mịẹse ómine ị̀ ḅerenikaye-ẹ. 46Ọ́mịna ḅụ tụḅọ gbọrịḅọ ineda ḍuko ḅe na ị̀rị̀ à siye mịẹsam? À nemikase kọkọmaye mị nwọ ḍuko ọkụma, nde anịọkụma ó gose ḅerenikaye? 47Tamụnọ Ḅe ḅụ wẹrị ḅo ḅọ ḅe, Tamụnọ Ḅe ọkwẹịn ma pokipokimẹ. Ómine anị simeọkụ simeọkụ sọnị ọ́ Tamụnọ Ḅe ḅụ ḅokẹ, mịn mị mịẹse ó poki ḍụkụ ẹkaye-ẹ.”
Jizọs Ḅe Na Ebraham Ḅe Na Sime Ḅara
48Ini Jizọs Ḅe gbelamẹ, “Wa karakaraye ḍukoka nwọḅẹ na ị́rị́ Sameriaḅọ-ẹ, na sitẹmẹ pịkị ị́ ḅie omi-ẹ?”
49Jizọs Ḅe pẹkẹrẹmẹ, “Sitẹmẹ ị̀ ḅie ofori-ẹ. Àrị ị̀ Ḍaḅe osimẹ, ọkụma ómine ị̀ osikẹ. 50Àrị osi ḍọkị ị̀ ḅụ pịrịkẹ. Anị ḍọkịarị gbọrịḅọ omi-ẹ, ọ̀ pịkị ị̀ ju sọ se ḅẹrẹkọn aḅẹ. 51À kọkọmaye ḍuko ọ́ pịrịaḅẹ: ị̀ya ḍieye mị mịẹḅọ goyegoye iniḅọ ngịsị fị ẹkẹ.”
52Ini nwọse ọ̀ ḅẹmẹ, “Mịọkụ mị wa kọkọma nemiye-ẹ na sitẹmẹ ị́ ḅie omi-ẹ! Ebraham ḅe ọ̀ fịmẹ, ịkịankoroapụma pịkị fịmẹ, anịsọ ị́rị́ nwọ ḅẹmẹ na, ị́ya ḍieye mị mịẹḅọ goyegoye iniḅọ ngịsị fị ẹkẹ. 53Mịna ḍa Ebraham ḅe ọ̀ fịmẹ; ị́ ọkịka na ị́ opusọtẹịn Ebraham ḅe nẹngịmẹ? Ị́ ọkọ ọkị? Ịkịankoroapụma ini fịmẹ. Ị́ koroma ḅara ị́rị́ tụḅọ?”
54Jizọs Ḅe pẹkẹrẹmẹ, “À nemikase osi se ị̀ ḅụ pịrị nwọ ḅi ọkụma, ị̀ ḅarakuḅu osi mị anị papaye nwọ sọḅịa. Ị̀ Ḍaḅe mị osi se ị̀ pịrịarịye-ẹ—ọ́ ḅẹ na ọ́mịna Tamụnọ-ẹ nwọḅẹ gbọrịḅọ ḅe. 55Ma ómine ò nemikẹ, ọkụma ị̀rị̀ àrị ò nemimẹ. À nemikase ḅẹ na ị̀rị̀ ò nemikẹ nwọḅẹ ọkụma, àrị ó juo iruo kọnḅọ nwọ sọḅịa, ọkụma àrị ò nemimẹ, à pịkị oria ọkwẹịnma ḍukoye nwọ mịẹmẹ. 56Ọ́mịna ḍa Ebraham ḅe ò ḅieḅẹlẹmẹ na ori ị̀ya ḅo sịkị mị nwọ ọrịḅịa, ori anị ọrị se ḅieḅẹlẹmẹ.”
57Ini nwọse ọ̀ ḅẹmẹ, “Kụra mesi-oyi fịnjị kẹngẹ sọnị ma ị́ lakẹ—ọkụma Ebraham ḅe re mị ị́ ọrịsaye-ẹ?”
58Jizọs Ḅe pẹkẹrẹmẹ, “À kọkọmaye ḍuko ọ́ pịrịaḅẹ, na ma ini Ebraham ḅe yi ka sịkị ngịsị, ‘Àrị omi-ẹ.’”
59Ini ḍụparị dekimẹ se ò gbinḅịa ẹrẹchị, ọkụma Jizọs Ḅe ọ̀ ḅụ kikima se Oputẹkẹwarị mị ḅie pakasomẹ.
Currently Selected:
Jọn 8: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
