Luk 14
14
Jizọs Ḅe Ḅụiḅika Owuḅọ Gwọmẹ
1Gbọrị Ịnyọsara Ene ḅụ Jizọs Ḅe mun Farisiapụma ḅie gbọrị tịḅịdaḅọ warị yefị-ẹ mun mẹ, se tomoni kpekima sime Jizọs Ḅe ẹnyẹmẹ. 2Gbọrị foin obi kọn owuḅọ Jizọs Ḅe damaḅomẹ, 3se Jizọs Ḅe pụkọ deki ọkwẹịn Oloko yeḍieapụma na Farisiapụma na gbelamẹ, “Mịna Oloko mị Ịnyọsara Ene ḅụ obi gwọ mị anị ḅereni mụnọ se anị ḅerenika?”
4Ọkụma ini ḍuko gbọrịye sọnị ofori-ẹ. Jizọs Ḅe ori ọkị, ọ̀ gwọ se ọ̀ ḅẹmẹ so. 5Anịsịkị Ọ̀ nwọse ini ḅẹmẹ, “Ọ́mịna ḅie gbọrịḅọ nemikase gbọrị owutọkụ anịkanịka gbọrị nambulo nwọ nyanase ori Ịnyọsara Ene ḅụ sokoro olulu ḅie sọ ọkụma ó kirikiri ò sin pakụmaḅo ẹka Ịnyọsara Ene ḅụ?”
6Ọkụma ini ineda mịn mị ḅụ ye se ọ̀ pẹkẹrẹkẹ.
Ḅụiderima Na Igonikọn Na
7Jizọs Ḅe igoniapụma ḅie dapụ iḅitẹịn-a kirima sẹlẹarị ọkụ mị nwọ ọrị sịkị, anị Ọ̀ mị kaḅo mị kọn inimgba pịrịye-ẹ: 8“Tomoniḅọ ị́ chịn ereya alalị nwọ mun mẹ ḅẹḅẹ, iḅitẹịn nyọ ḅụ kpọnjị sime ma. Anị ineda ọkọ pakaḅịa na opusọ ị́ nẹngịḅọ ọ̀ pịkị nwọ chịn waraḅẹ, 9se ómine igoni ḅo pịrị ḅọ ḅe, anị ómine mgba chịn ḅọ ḅe ḅo se nwọse ị́ ḅẹḅịa, ‘Ye ori mịanga sime.’ Anịsịkị ị́ ḅụgerere ḅụ somun iderimatẹịn kiri ḅụ simeḅịa. 10Anị mị nakaraka, ini ị́ chịn sịkị mun iderimatẹịn nyọ ḅụ sime, mịẹse ị́ chịn ḅọ ḅe ị́ damaḅo se nwọ ḅẹ, ‘Ị̀ inikio, ḅo iḅitẹịn nyọ ḅụ sime.’ Mịn mị osi se ísí igoniapụ mamgba tọrụkuḅu ị́ pịrịḅịa. 11Anịatịḅị mịnaḅụ deki chịẹmaḅọ goyegoye ini iniḅọ iderimaḅịa, se mịnaḅụ iderimaḅọ goyegoye ini iniḅọ deki chịẹmaḅịa.”
12Anịsịkị Jizọs Ḅe nwọse ori igoni ḅo pịrị ḅọ ḅe ḅẹmẹ, “Ị́ dede anịkanịka saso alalị nwọ koromarị sịkị, ị́ya ikiapụma nwọ chịnma, anịkanịka ị́ya mịnapụ, anịkanịka ị́rị́ na pakụmapụ, anịkanịka ye nyana se ị́rị́ na palịa angapụ, anịatịḅị ọkọ sime apụma pịkị ị́ chịnḅịa se anị ḅara mị ḅụ ị́ mịẹsaye mị nwọ seni ị́ gbẹịnḅịa. 13Ị́ alalị koromarị sịkị igwein apụma nwọ chịn, ikeliapụma na, oju ḅụ yetọkọrọapụma na, pịkị tọrụmgbọlụ pụn apụma na; 14se ị́ ḅẹlẹma nyanaḅịa, anịatịḅị ini ineda seni ị́ gbẹịn ẹkẹ. Tamụnọ Ḅe mị ị́ gbẹịnḅịaye-ẹ iḅi apụma fịḅụ sịsẹḅịa sịkị.”
Opu Alalị Mị Ḅe Kaḅo Mị
(Mat 22.1-10)
15Dẹbụl ḅụ sime owuapụma ḅie gbọrịḅọ mịn mị naa se nwọ seni Jizọs Ḅe ḅẹmẹ, “Tamụnọ Amanyanakiri mị ḅie dẹbụl ọgọnọ sime alalị fịḅịa apụma nyanaḅịa ḅieḅẹlẹ laḅịa ọkụ ḍiki!”
16Jizọs Ḅe nwọse ọ̀ ḅẹmẹ, “Opu alalị koroma gbọrị owuḅọ simemẹ, ori anị gose tọn apụ chịnmẹ. 17Alalị mị ḅo lasịkị, ori oria fịrịnwẹngịapụma fịrịmamẹ na ini mun ḍuko oria igoniapụma pịrị-ẹ, na ini ‘Ḅo-ẹ, yelayelaye karakarasam!’ 18Ọkụma inimgba ọrị ḅọḅọ sakị ḍukoye nyana mịnaḅụ pịrịmẹ. Tatarị ḅọ ḅe nwọse fịrịnwẹngịḅọ ḅe ḅẹmẹ, ‘Àrị ozu fẹmẹ, se à mun anị sime ḅara ḍikiḅịa, pasisi ị̀ya tẹkẹ ḅịpị mị ọkị.’ 19Jịnḅọ nwọ ḅẹmẹ, ‘À nambulo fẹsam maịn maịn ḅe sọnọ-a kiri, à mun àrị elekima ḍiki-e mun aḅẹ, pasisi ị̀ya tẹkẹ ḅịpị mị ọkị.’ 20Jịnḅọ nwọ ḅẹmẹ, ‘Mịọkụ mị à pa ere simeye-ẹ, mịn mị gose àrị ineda ḅo ẹkẹ.’ 21Fịrịnwẹngịḅọ ḅe vinpịkị mun maye mamgba nwọ ḍuko ọ̀ nyanaḅọ ḅe pịrịmẹ. Anị ọ̀ nyanaḅọ ḅe ịganịma se ọ̀ nwọse oria fịrịnwẹngịḅọ ḅe ḅẹmẹ, ‘Ḅo opu atelima ḅie mun pịkị ama mị ḅie kala atelima na, se igwein apụma na, oju ḅụ yetọrọkọapụma na, tọrụmgbọlụ pụn apụma na, pịkị ikeliapụma na nwọ ọkị ḅo.’ 22Ḅịpịkalaye ḅọrọ sịkị, fịrịnwẹngịḅọ ḅe nwọ ḅẹmẹ, ‘Sẹnịḅọ ị́ tọn ḅara mị mịẹsam, ọkụma jịn apụ sọḅịa ḅie pa pịkị kọn waraḅẹ.’ 23Anị nyanaḅọ ḅe nwọse fịrịnwẹngịḅọ ḅe ḅẹye-ẹ, ‘Ama mị ḅie atelima na kpapụ atelima na ḅie mun, se tomonima mịẹse ini sọḅo, mịẹse ị̀ya warị mị ḅeinḅịa ḅara. 24À ḍuko ómine mgba pịrịaḅẹ na ini chịn ḅịpị se pịrị apụma ḅụ gbọrịḅọ sọnị ḅịpị se ị̀ya saso fịye mị lama ẹkẹ!’”
Ọḅụḍukoḅọ Sọ Mị Laye
(Mat 10.37-38)
25Gbọrị sịkị tọn-a tomonikpo Jizọs ḅe na nwẹngịma mun simemẹ. Ò vinpịkị se nwọse ini ḅẹmẹ, 26“Ị̀ damaḅo se taraka seni iniḅọ ḍaḅọ na nyengiḅọ na, iniḅọ ta na awọ na, iniḅọ owuapụ mịnapụ na eremeni mịnapụ na, pịkị iniḅọ ḅụ wẹrịmaka ḅọ goyegoye ineda ị̀ya ọḅụḍukoḅọ sọ ẹkẹ. 27Pịkị iniḅọ mgbẹsẹchịn pụra se ị̀ ḍukoka ḅọ goyegoye ineda ị̀ya ọḅụḍukoḅọ sọ ẹkẹ. 28Ọ́mịna ḅie gbọrịḅọ ọgọnọ warị namaḅịa ẹrẹchị tọn aḅẹ ḅẹḅẹ, ọ̀ tatarị kpọnjị sime se anị laḅịaye nwọ kịẹn nemiḅịa, nwọfa ori anị laḅịa igbiki nwọ nyana-o tuḅo se anị nama karamaḅịaye. 29Ò nemikase chuku chụa so se, ḍọkịḅo ọrị na ọ̀ ḅarị ineda ọgọnọwarị mị nama karama ẹkẹ nwọ ḅẹḅẹ anị ọrị apụ mamgba ò seni ḍẹrịye mịẹḅịa. 30‘Ini nwọ ḅẹḅịa ḅe ḅọ ḅe ọ̀ warị mị sakịmẹ, ọkụma ọ̀ ḅarị ineda nama karamakẹ!’ 31Gbọrị amanyanaḅọ nemikase kịnị poku na sọnọ ẹndẹ nwọse kịnị-a mapoku na oyi ẹndẹ nyana amanyanaḅọ na owusọḅịa ḅẹḅẹ, ọ̀ tatarị kpọnjị sime se koroma kọn anị pịrịḅịa nwọfa ori ịnyọ nyana ísí amanyanaḅọ ḅe na owu mị sọḅịa-ẹ tuḅo. 32Ori ineda ẹkẹ ḅẹḅẹ, ori oku se ísí amanyanaḅọ ḅe fịrịmaḅịa, ọ̀ pa sasaju ḅụ simearị sịkị ḅụ, deinma mịẹḅịa ḅara. 33Jizọs Ḅe ọkwẹịn mị ḅe kuluma ḅụ nwọ ḅẹmẹ, anị gbọrị ḅara mị ḅụ,” “ọ́mịna ḅụ gbọrịḅọ sọnị ineda ị̀ya ọḅụḍukoḅọ sọ ẹkẹ iniḅọ nyanaye goyegoye ḅụ ḅarasinka simeogbo.
Yeḅụsọka Fụn
(Mat 5.13; Mak 9.50)
34“Fụn mị anị iḅimẹ, ọkụma anị nemikase anịa ḅẹlẹ nwọ fama ọkụma anị mịẹse anị ḅo pịkị fụn pụkọ nyanaḅịa ọkụ ḅarị ofori-ẹ. 35Anị ḅarị iḅi se kiri mị mịẹkẹ, anị pịkị sọye mịẹ onwun kpo mị sọ pịrịkẹ ini anị se gbin wokumaḅịa. Anịọkụma ó poki, ó nemikase ḅeri nyanamẹ ḅẹḅẹ!”
Currently Selected:
Luk 14: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
