Luk 6
6
Ịnyọsara Ene Mị Gboloma Ḅẹrẹ Mị
(Mat 12.1-8; Mak 2.23-28)
1Jizọs Ḅe Ịnyọsara Ene ḅụ nwẹngị ịpịamgba ozu ḅie tolu ḅọrọmẹ. Anị Oria ọḅụḍukoapụma sakị ịpịamgbama nwọ kaịnye-ẹ, àrị pịsịrị se mgbọlụma fịmẹ. 2Farisiapụma ḅie dapụ gbelamẹ, “Nde ó gose mịna Oloko mị ḅie na mịẹ ma nwọ ḅẹye nwọ mịẹarịye Ịnyọsara Ene ḅụ?”
3Jizọs Ḅe ini pẹkẹrẹmẹ, “Devid ḅe mịẹye mị ma ó goka, ḅuru ori na, ori na nwẹngịapụma na tarị sịkị? 4Ọ̀ Tamụnọ warị mị ḅie sọmun mẹ, ini se agbamịẹ Tamụnọ Ḅe pịrị fịturu ọ̀ nwọ ọkịmẹ, anị fị, pịkị anị seni oria tomonima pịrịmẹ. Anị sọnị anị mịna Oloko mị na kurakẹ na ḅẹḅọ ḅẹḅọ anị fị, agbamịẹapụma sikima ọkụma.”
5Se Jizọs Ḅe ḍukopẹlẹmẹ, “Tomoniḅọ Tọkụ Ḅe Ori mị Ịnyọsara Ene mị nyanaḅọ Ḅe-ẹ.”
Gbọrị Ḅara Fịḅọ Ḅe
(Mat 12.9-14; Mak 3.1-6)
6Jịn Ịnyọsara Ene ḅụ Jizọs Ḅe mun gbọrị tẹkẹwarị ḅie yeḍiemẹ. Gbọrị owuḅọ anịnyọ omi-ẹ, oria amaḅara mị fịmẹ. 7Oloko ḍieapụma ḅie dapụ na Farisiapụma ḅie dapụ na yeḍuko Jizọs Ḅe ọgọnọ gbana na Ọ̀ mịẹirimasam nwọ ḅẹḅịaye ḍọkịmẹ, anị ini kpekima sime iḅiọkụ se Ori ẹnyẹye-ẹ, nwọfa Ò nweniḅọ ḅe gwọḅịa etuḅo Ịnyọsara Ene mị ḅụ. 8Ọkụma Jizọs Ḅe inia koromama nwọ nemimẹ, se nwọse ḅara fịḅọ ḅe ḅẹmẹ, “Sịsẹ se ḅo ị̀ tọrọkọ chịẹ sime.” Nweniḅọ ḅe sịsẹ se anịanga chịẹmẹ. 9Anịsịkị Jizọs Ḅe nwọse ini ḅẹmẹ, “Àrị ó gbelaḅẹ: Ịnyọsara Ene mị ḅụ wa che mịẹ, mịna Oloko mị nwọ ḅereni wa pịrị? Ḅarachụa mụnọ se ye se nweni lama? Tomoniḅọ ḍumo ḍụa mụnọ, se anị fama?” 10Ori inimgba nwọ ḍiki kelemamẹ; anịsịkị nwọse nweniḅọ ḅe ḅẹmẹ, “Ị́ ḅara ịsụn pakụma.” Ori ọkọ mịẹmẹ, se ọ̀ ḅara mị pịkịna iḅimẹ.
11Ọkụma ịganị inia ḅie sọ ḅeinmẹ se ini inia ogboku ọkwẹịnmamẹ, ini se Jizọs Ḅe mịẹḅịaye.
Jizọs Ḅe Oyimaịn Okunwẹngịapụ Fịnjị Ma Sẹlẹmẹ
(Mat 10.1-4; Mak 3.13-19)
12Anịsịkị mị ḅụ Jizọs Ḅe iwo chịngị ọgọnọ mun tẹkẹ-ẹ mun mẹ, se anịnyọ bebe ḍin mị mgba nwọse sime Tamụnọ Ḅe tẹkẹmẹ. 13Ene mị ḅa sịkị Ori Oria ọḅụḍukoapụma chịn se inia ḅie oyimaịn apụ fịnjị nwọ sẹlẹmẹ, Ori okunwẹngịapụ nwọse chịn apụma: 14Saịmọn, Ọ̀ pịkịna Pita nwọse chịnḅọ ḅe numbireowu Andru ḅe na, Jems ḅe na, Jọn ḅe na, Filip ḅe na, Batolomiu ḅe na, 15Matio ḅe na, Tọmọs ḅe na, Jems Alfịọs yaḅe, pịkị Saịmọn ḅe na, ini ama tarịḅọ nwọse chịnḅọ ḅe, 16Judas, Jems yaḅe na pịkị Judas Ịskarịọt ḅe na, anị ịbafịḅọ ḅe.
Jizọs Ḅe Ye Se Nweni Ḍie Pịkị Obi Gwọmẹ
(Mat 4.23-25)
17Jizọs Ḅe chịngị mị ọgọnọ Oria okunwẹngịapụma na koroḅo sịkị, pẹsị kiri ḅụ Oria tọn-a ọḅụḍukoapụma na Ori na chịẹ simemẹ. Opuma ḅaka tomonikpo anịnyọ simemẹ, Judia ḅie na, Jerusalẹm ḅie na, Taya na Saịdọn na tọrụ-a kọngọ opuamama ḅụ wẹrịḅo apụ na 18ini Ọ̀ damaḅomẹ, Ò poki na pịkị inia obima na gwọḅịa ẹrẹchị. Sitẹmẹ ḅụfụka se pịrị sime apụma sọnị pịkị ḅomẹ, se Ori ini gwọmẹ. 19Tomoni mamgba ḅụkụrọma ḅara se Ọ̀ lama ḍọkịmẹ, anịatịḅị kụrọ Ọ̀ ḅụ pakapakaḅo inimgba gwọaḅẹ.
Ḅieḅẹlẹ Na Ngịrị Na
(Mat 5.1-12)
20Jizọs Ḅe Oria ọḅụḍukoapụma ḍiki se nwọ ḅẹmẹ,
“Ḅieḅẹlẹ sime ómine igwein apụma pịrị;
Tamụnọ Amanyanakiri mị ọ́mịnaye-ẹ!
21Ḅieḅẹlẹ sime ómine mịọkụ ḅuru pụkọtarịarị apụma pịrị;
ọ́mịna ḅụlọ ḅeinḅịa!
Ḅieḅẹlẹ sime ómine mịọkụ owuarịapụma pịrị;
ọ́ ḍẹrịḅịa!
22“Ḅieḅẹlẹ sime ọ́ pịrị tomoni taraka se ọ́ wẹrịmaḅịa, pịkị ọ́ sịkịḅịa sịkị, pịkị ọ́ wọlọḅịa sịkị, pịkị ómine siapụ-ẹ nwọse ọ́ chịnḅịa sịkị, Tomoniḅọ Tọkụ Ḅe tịḅị gose! 23Ó ḅieḅẹlẹ anị mị mịẹḅịa sịkị, ó ḅieḅẹlẹ ḅụ sẹkị, anịatịḅị ini soḅie opu gbẹịnye se koroma ọ́ pịrị waraḅẹ. Anịatịḅị inia ḅieju-aḍapụma anị gbọrị ḅara mị nwọse ịkịankoroapụma mịẹmẹ.
24“Ọkụma anị ḅalafamaye sọ ómine mịọkụ ngọ kọn apụma pịrị ọkụ ḍiki;
ómine ọ́mịna sarasara dein ḍumo mị nyanasam!
25Anị ḅalafamaye sọ ọ́ pịrị ọkụ ḍiki ómine mịọkụ fị ḅụlọ ḅeinma apụma;
ḅuru ọ́ tarịḅịa!
Anị ḅalafamaye sọ ọ́ pịrị ọkụ ḍiki ómine mịọkụ ḍẹrịarị apụma;
ó kururu pịkị owuḅịa!
26“Anị ḅalafamaye sọ ọ́ pịrị ọkụ ḍiki tomoni mamgba ọ́ḅụ iḅiye ḍukoarị sịkị; anịatịḅị inia ḅieju-aḍapụma iruo ịkịankoroapụma ḅụ àrị gbọrị ayema nwọ ḍukomẹ.
Nyana Tarakapụ Pịrịḅịa Ḅẹlẹma
(Mat 5.38-48; 7.12a)
27“Ọkụma à ḍuko ómine ị̀ naarịapụma pịrịaḅẹ: Ómine ómine na tarakapụma ḅẹlẹma, iḅi se taraka se ọ́ wẹrịma apụma mịẹ, 28nwọ ó wori apụma ómine ini ḅẹlẹma, pịkị tẹkẹ ọ́ mịẹ sima apụma pịrị. 29Tomoniḅọ gbọrị amgba ḅụ ị́ ḅụrọmẹ ḅẹḅẹ, ye iniḅọ pịkị ísí amgba mị sọnị ḅụrọ; tomoniḅọ ị́ya ọgọnọ gbana ḅụchụaye mị sin ọkịmẹ ḅẹḅẹ, ye ọ̀ pịkị ḅie chụa ḅụchụaye mị sọ sin ọkị. 30Ị́ ḅara yeḅi ḅọ goyegoye se iniḅọ pịrị, se tomoniḅọ pịkị ị́ nyanaye nwọ ọkịmẹ ḅẹḅẹ, ḅarị anị gbelama. 31Jịn apụ mịẹ ị́ pịrị ị́ nwọ ḅi ḅara mị ị́rị́ sọnị nwọ mịẹ jịn apụ pịrị.
32“Ị́ ḅẹlẹma apụ kẹngẹ ị́ nwọ ḅẹlẹma ọkụma, nde ị́ gose ḅẹlẹma nwọ nyanaḅịaye? Simịẹapụma sọnị ini ini ḅẹlẹma apụma nwọ ḅẹlẹmamẹ! 33Ị́ nemikase iḅi se ị́ mịẹapụ kẹngẹ iḅi se nwọ mịẹ ọkụma, nde ị́ gose ḅẹlẹma nyanaḅịaye? Simịẹapụma sọnị anị ini mịẹmịẹ ọkụ-ẹ! 34Ị́ pịkị tọrụse ḍiki na ineda ye se ị́ gbẹịnḅịa apụma kẹngẹ ị́ ye se nwọ ḅọlọ ọkụma, ị́ che gose ḅẹlẹma nyana ḅe? Simịẹapụma sọnị ini kọkọ ye se inia juo simịẹapụma ḅọlọ ḅọlọ, ini igbiki tịḅị mị nyanaḅoḅịa ẹrẹchị! 35Ẹn-ẹn! Ị́rị́ na tarakapụma ḅẹlẹma, se iḅi se ini mịẹ, ye se nweni ḅọlọ, ḅarị anị se ḅietọn ma, ómine opu gbẹịnye nyanaḅịa, pịkị Geletẹịn Tamụnọ Ḅe awọ nwọ sọḅịa. Anịatịḅị ori iḅi se mịẹḅaka ḅe ḍinka apụma na pịkị sitịḅịnyana apụma na mịẹmịẹmẹ. 36Ó ḍikiḅụgerere nyana, ọ́mịna Ḍaḅe ḍikiḅụgerere nyana ḅara mị.
Ḅẹrẹkọn Jịn Apụ Pịrị
(Mat 7.1-5)
37“Ḅẹrẹkọn jịn apụ pịrị ma, Tamụnọ Ḅe pịkị ḅẹrẹkọn ị́ pịrị ẹkẹ, ḅẹrẹsi pẹlẹ jịn apụ pịrị ma, Tamụnọ Ḅe Ọ̀ pịkị ḅẹrẹsi pẹlẹ ị́ pịrị ẹkẹ, siḅụ-ḅarasin jịn apụ pịrị, Tamụnọ Ḅe pịkị siḅụ-ḅarasin ị́ pịrịḅịa. 38Ye se ḍie jịn apụ pịrị, Tamụnọ Ḅe pịkị ye se ḍie ị́ pịrịḅịa. Ini jokoma tọn ḅein wa, pụnụ chụa, jike gboloma, se ineda ọlọḅịa ḅara nwọse ḅielokoloko ḅụ ọkịḅo ị́ kuḅu saraḅịa. Ị́ se yetọn jịn apụ pịrịye mị anị Tamụnọ Ḅe pịkị se tọn ị́ pịrịḅịaye-ẹ.”
39Se Jizọs Ḅe mị kaḅo mị kọn ini pịrịmẹ: “Tọrụmgbọlụ pụnḅọ ineda ateli se jịn tọrụmgbọlụ pụnḅọ ḍie ẹkẹ, ò nemikase ọkọ mịẹmẹ ḅẹḅẹ, inimgba sokoro olulu ḅie sọḅịa. 40Yeḍawọarịḅọ opu sọtẹịn ye se ò ḍiearịḅọ nẹngịkẹ; ọkụma yeḍawọarịḅọ goyegoye ọ̀ ḍawọ sosam nwọ ḅẹḅẹ ye se ò ḍieḅọ ḅe simeọkụ ọ̀ nwọ simeḅịa.
41“Nde ị́ gose ị́ mbire ḅe tọrụmgbọlụ ḅie sime fun ọrị, se ị́ tọrụmgbọlụ ḅie sime chịn ikiḅa mị se yechịnkaye? 42Nde ị́ ineda nwọse ị́ mbire ḅe ḅẹḅịa ọkụ, ‘Sisi, ị̀ mbire, ye àrị ị́ tọrụmgbọlụ ḅie anị fun mị sin,’ ọkụma ị́ tọrụmgbọlụ ḅie sime chịn ikiḅa mị ị́ ọrịkẹ? Ị́rị́ epekelepepe tomoniḅọ! Tatarị ị́ tọrụmgbọlụ ḅie sime chịn ikiḅa mị sin anịsịkị mị ị́ iḅiọkụ ineda ị́ mbire ḅe tọrụmgbọlụ ḅie sime fun mị ọrị se anị sinḅịaye-ẹ.
Chịn Na Anịa Mgbọlụ Na
(Mat 7.16-20; 12.33-35)
43“Iḅi chịn si mgbọlụ chụa ẹkẹ, anị si chịn pịkị iḅi mgbọlụ chụa ẹka ọkụ-ẹ. 44Chịn layelaye anị chụa mgbọlụ ḅụ ini wẹrị anị lekirimẹ; ị́ ineda ịga piri ḅie figi chịn mgbọlụ kaịn ẹkẹ, anịkanịka oju dakadakama chịn sime piri ḅie tụmgbakị elelenda kaịn ẹkẹ. 45Iḅi ḅọ ḅe ò kuḅiemgbọlụ sime iḅi ngọ ḅụ wẹrị iḅiye pakụmaḅomẹ, si ḅọ ḅe pịkị ò kuḅiemgbọlụ sime si ngọma ḅụ wẹrị siye pakụmaḅomẹ. Anịatịḅị ḅịpị mị kuḅiemgbọlụ mị ḅie ḅein ayema mịn anị ọkwẹịn pakụmaye-ẹ.
Warị Nama Mama Apụ Ma
(Mat 7.24-27)
46“Nde ó gose, ‘Nyanaḅọ, Nyanaḅọ,’ nwọse ị̀ chịn, se à ḍuko ọ́ pịrịarịye mịẹkaye? 47Ị̀ damaḅo se ị̀ya ọkwẹịnma poki, se àrị ḍukoye mịẹḅọ goyegoye ọ̀ kịkẹye à nwọse ó ḍieḅịa. 48Warị nama-a sịkị kiri soku gbunma, se ḍụparị se chuku tẹrẹ namaḅọ simeọkụ ọ̀ nwọ simemẹ. Opu mengi seriḅo ḅein se anị ḅakụ warị mị ḅụ saramẹ, ọkụma anị ineda anị jikekẹ, anịatịḅị ini iḅiọkụ se anị namamẹ. 49Ọkụma ị̀ya ọkwẹịnma na se àrị ḍukoye mịẹka ḅọ ḅe, papa kiri ọgọnọ warị namaḅọ simeọkụ ọ̀ nwọ simemẹ, chuku tẹrẹ ḍụparị oforika ḅara ḅụ opu mengi seriḅo anị warị mị lasịkị, anị kirikiri ḅịkịmẹ, anị ḅalafama ḅara se ḅịkị sara ọkụ ḍiki!”
Currently Selected:
Luk 6: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
