Ubutukilo 17
17
Ungalami: chinyingi cha Usendo uze Zambi akolesele ni Abrahama
1Muze Abrama habwa ni miaka 99, Mwene Zambi yasoloka kuli iye ni kumwamba ngwenyi: “Yami nguli Zambi Mukwa Ndundo Jeswe. Chakutamba kungwononokena ni kuliendela ni yami matangwa eswe. 2Ngunakolesa ne Usendo, mungukokesa vungu lie kuhiana.” 3Abrama yafulamana hashi, mba Zambi yamba ngwenyi:
4“Ngunakolesa ne Usendo ngwe chino: muukabwa kako ya mavungu anji a hano hashi. 5Jina lie hi Abrama#17:5 ABRAMA mu hebreu linalumbunuka ngwo: “kashakulu wa lufuma.” nawa ko, hiliabwa Abrahama#17:5 ABRAHAMA ha kulivuluka mu hebreu linalifu ni “kashakulu wa mavungu anji.” . Lino lie mulibwa jina lie mumu hinakupwisa kashakulu ka mavungu anji. 6Mungukakwaha mavungu anji, amwe maakabwa mavungu anene. Mukachi ko akwo maakabwa mianangana.
7“Usendo uno ngunakolesa ni yena ni vungu lie nawa ndoo ku miaka yeswe. Mungukabwa Zambi ye kanda Zambi yo. 8Yena uli njize mu chifuchi chino musono, mungukwaha cho yena ni vungu lie. Chifuchi chino cheswe cha Kanana muchikabwa niche ndoo ku miaka yeswe, mungukabwa Zambi yo.”
9Zambi yambila Abrahama ngwenyi: “Yena ni vungu lie ni waze maakasemuka kulutwe, chanutamba kufunga Usendo uno. 10Yena ni vungu lie, lunga mweswe chatamba kumupwisa ngalami. 11-12Chize ku tangwa lino, mwana mweswe wa lunga yoze masemuka chatamba kumupwisa ngalami nyi habwa ni matangwa nake. Chatamba nawa kupwisa ngalami mwana mweswe wa lunga wa kuli ndungo jenu, chibwe ndungo waze haanasemuka mu mazuwo jenu, chibwe waze nwalanjile kuli yilambala. Chino che chinyingi ngwo, Usendo uli hakachi ka yami ni yena. 13Lunga mweswe numupwisa ngalami. Chinyingi chino hakachi kenu muchilweza ngwo, nakolesa ne Usendo ndoo ku miaka yeswe. 14Lunga chilima, kuchatambile kumwalula nawa mukachi ka atu jami, mumu kafungile Usendo wami.”
15Zambi yambila nawa Abrahama ngwenyi: “Mukwenu pwo, kanda umuvuluka nawa ngwe, Sarai, alioze habwa Sara#17:15 sara mu hebreu linalumbunuka ngwo: “mwana pwo wa mwanangana.”. 16Mungumuwahisa, neye makasema mwana wa lunga. Mwe Sara makabwa naye ya mavungu anji. Hakachi ko akwo maakabwa mianangana.” 17Abrahama yafulamana, yabutuka kuseha chikolo ngwenyi: “Kuma lunga chibwe habwa ni miaka 100 masema mwana, nyi? Sara chibwe neye habwa ni miaka 99 mahasa kubwa ni mwana, myi?” 18Abrahama yaweza ho ngwenyi: “Nyi unazange, Ishmaele anguhinge kama.”
19Alioze Zambi ngwenyi: “Hi chocho ko. Mukwenu pwo Sara makasema mwana wa lunga. Ukamuluka ngwe, Isake#17:19 ISAKE mu hebreu linalumbunuka ngwo, “kanasehe.” . Mungukakolesa nenyi Usendo, ni lie vungu lienyi nawa. We Usendo muukalinduluka ndoo ku miaka yeswe. 20Hakutwala kuli Ishmaele hinakwivwa, hinamuwahisa. Mungukamupwisa semi, mungukamwokesa kuhiana; makasema mianangana kumi ni aali. 21Alioze mungukolesa Usendo ni mwane Isake, mwana yoze Sara makasema mwaka uze muwiza ho.” 22Muze Mwene Zambi hahanjika maliji wano eswe, yahichika Abrahama, yaya kwenyi.
23Tangwa lizeliene Abrahama yapwisa mwanenyi Ishmaele ngalami. Malunga waze asemukine mu zuwo lienyi ni waze akulanda ni mbongo, ni malunga waze te atwama mu zuwo lienyi, eswe yaapwisa ngalami ngwe chize amulwezele Zambi. 24Abrahama yabwa ni miaka 99, 25ni mwanenyi Ishmaele te habwa ni miaka 13 muze aapwishile ngalami. 26Abrahama ni Ishmaele yaapwisa ngalami tangwa limuwika, 27hamwe ni ndungo jenyi eswe.
Currently Selected:
Ubutukilo 17: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
