Luka 11

Yesu yalongesa tumbaji kulemba

(Tala nawa Mat 6:9-13; 7:7-11)

1Limwe tangwa Yesu te kanalembe kumwe kuma. Muze hamanununa, umwe wa kuli tumbaji twenyi yamwamba ngwenyi: “Mwene, tulongese kama kulemba, ngwe chize Yoano alongesele tumbaji twenyi.” 2Yesu yamba ngwenyi: “Muze munulemba, ambenu ngwenu:

‘Tata,

alemese jina lie.

Wanangana we Wize.

3Twehe kama tangwa ha tangwa yakulia yize yinalite.

4Tukonekene kama milonga yetu,

mumu yetu twakukonekena mwese yoze hanatuvulumuna.

Kanda ututwala kama ku yeseko yikalu.’ ”

5Yesu yaamba nawa ngwenyi: “Nyi umwe hakachi kenu maya kuli sepa lie nyi ha muchima ufuku nikumwamba ngwenyi: ‘Mukwetu, ngusondamise kama mbolo jitatu. 6Umwe sepa liami heza mu wenyi ku mahiami. Chishi nichimwe cha kumwaha!’ 7Nyi mukwo muchima lia zuwo makumbulula ngwenyi: ‘Kanda unguketeka, hinajila kulu chajilo ni sapi. Yami ni ana jami tuli ha muhela. Chahashile kuhinduka ni kukwaha mbolo.’ 8Ngunambe ngwami, chibwe kechi kuhinduka ni kumwaha jo mumu kali sepa lienyi, alioze mumu ha kuketeka chenyi kumahinduka hanga amwehe yize yeswe ali nayo chikala. 9Alioze yami ngunanwambe ngwami, etenu mba kumunukatambula; fupenu, mba kumunukawana; ngongwelenu, mba kumakanwazulwila. 10Mumu mutu mweswe wakwita, kakutambula; yoze Wakufupa, kakuwana; yoze wakungongwela, kakumwazulwila. 11Tata muka hakachi kenu, nyi mwanenyi mamwita yishi, mamwaha lunoka? 12Hanji nyi mamwita lionda mamwaha kavwanda? 13Nyi yenu abi nunanyingika kwaha ana jenu yuma yibema, kuhiana chikolo Tatenu wa mwilu maha waze maamwita Mwiku wa Linanga.”

Yesu ni Belzebu

(Tala nawa Mat 12:22-30; Mar 3:20-27)

14Yesu te kanatuhwisa mwiku wa luchisa muli kamama. Muze mwiku hiwatuhuka, kamama yabutuka kuhanjika. Mbunga yaalishimwoka kuhiana. 15Alioze amwe yaamba ngwo: “Belzebu,#11:15 BELZEBU: jina likwo lia Sakwonga, mwe mukwa lutwe wa miku ya luchisa. mwata wa mwiku wa luchisa, mwe unamwehe tachi ja kutuhwisa najo mwiku uze.” 16Akwo yaazanga kumutela muheto. Kashika yaamuhula chilayi cha kulweza ngwo, chiyulo chenyi cha kuli Zambi. 17Alioze Yesu yanyingika manyonga jo, mba yaamba ngwenyi: “Nyi akwa wanangana maalihandununa ni kulitachika ene, wanangana uze muukabwa wahululu. Nyi akwa limwe jiko maalihandununa ene, jiko lize mulikafwa. 18Chenacho nawa, nyi Sakwonga malihandununa ni kulitachika iye mwene, ngwe kuchi wanangana wenyi muukalinduluka? Mumu nunambe ngwenu, nakutuhwisa mwiku wa luchisa ni chiyulo cha Belzebu. 19Nyi yami nakuutuhwisa ni chiyulo cha Belzebu, iya wakwaha atu jenu chiyulo cha kuutuhwisa? Nyi chocho, atu jenu maakanuhisa. 20Alioze hi chocho ko. Nakuutuhwisa ni ndundo ja Zambi, Kulumbunuka ngwo, Wanangana wa Zambi hiuneza kulu mukachi kenu.

21“Muze chitakame halipakata ha kufunga zuwo lienyi, yikumba yenyi muyitwama kanawa. 22Alioze, nyi yoze Wahiana tachi meza, mamukumba ni kumuchiza yize yeswe analipakata, mamwanga yize yeswe amwiyile.

23“Yoze keshi hamwe ni yami, kakulimika ni yami. Yoze keshi kukunga hamwe ni yami, kakumwanga.”

Kuhiluka cha mwiku wa luchisa

(Tala nawa Mat 12:43-45)

24“Muze mwiku wa luchisa hiwatuhuka muli mutu, muulihiza muma mumu ha kufupa uhwimino. Nyi kuwawanyine, muulihanjikisa ngwenyi: ‘Munguhiluka mu zuwo liami muze natuhukile.’ 25We mwiku muuhiluka nikuwana liakukomba, liakululieka kanawa. 26Mba muuya nikuneha nawa mwiku ukwo shimbiali, ubi Wahiana uyo. Muwiza hamuwika, muunjila, muutwama mo. Hakusula kutwama cha mutu yoze muchibwa chibi chahiana chitangu.”

Uwahililo wamwenemwene

27Muze Yesu hamba chino, umwe pwo hakachi ka mbunga, yamwamba ngwenyi: “Kawaha pwo yoze wakusemene ni wakwamwishine!” 28Alioze Yesu yakumbulula ngwenyi: “Shinoho kawaha waze akwivwa liji lia Zambi ni Yoa kuliononokena!”

Atu yeeta chilayi

(Tala nawa Mat 12:38-42)

29Muze mbunga amukungulukile, Yesu yabutuka kwamba ngwenyi: “Atu abi a mwakono kaanafupu chilayi. Alioze kechi kaaha chilayi nichimwe shina chize cha mukwa munanyi wa Zambi, Yona. 30Ngwe chize Yona wabwile chilayi kuli akwa Ninive, Chenacho nawa mwe Mwana Mutu makabwa chilayi kuli atu ja mwakono. 31Ha tangwa lia Ubatwilo, mwanangana wa pwo wa ku Sude makakatukila atu ja mwakono ni kwahisa. Mumu yakatuka ku chifuchi kusuku ha kwivwa maliji a mana ja Solomone, ni chikuma chahiana chize cha Solomone hano hichili. 32Ha tangwa lia Ubatwilo akwa Ninive maakakatukila atu ja mwakono ni kwahisa. Mumu akwa Ninive yaalumuka ku mbunge muze evwile kwambujola cha Yona. Ni chikuma chahiana chize cha Yona hano hichili.”

Pangu lia mujimba

(Tala nawa Mat 5:15; 6:22-23)

33“Niumwe, muze akuwika ndeya, mayisweka hanji kuyisa kushi lia kapaya. Shinoho mayisa ha chikwachilo cha ndeya, hanga waze maanjila amone Pangu. 34Meso je kaali ngwe pangu lia mujimba. Nyi meso je maabwa angunu, ni mujimba we weswe muupanguka. Alioze, nyi meso je maabwa chitalawili, ni mujimba we muubwa milima. 35Ha chino, tala kanawa hanga pangu lize lili muli yena kanda libwa milima. 36Nyi mujimba we weswe muubwa ni pangu, Chihanda cha milima nichimwe, weswe wamuundu muupanguka ni pangu, ngwe muze ndeya muyikupangulwisa ni Pangu liayo.”

Yesu yakumika Afariseu ni alongeshi a Shimbi

(Tala nawa Mat 23:1-36; Mar 12:38-40)

37Muze Yesu hamanununa kuhanjika, umwe Kafariseu #11:37 Kafariseu: tala 5:17. yamulakenya alie nenyi. Yesu yanjila, yatwama ku mesa. 38Mwe Kafariseu yalishimwoka ha kumona chize te Yesu kanali kanda achisana ku moko. 39Mba Mwene yamwamba ngwenyi: “Yenu Afariseu nwakukosa haze lia musenge ni chenga, alioze muchima munazala ni kuzo ni ungulungulu. 40Yihepuke! Zambi yoze watangile haze, katangile ko muchima, nyi? 41Alioze ahenu yiswale yize yili mu misenge yenu ni mu yenga yenu, mba yeswe muyinubemena.

42“Lamba lienu Afariseu! Nwakulambula Zambi Chihanda cha muchikumi cha mafwo a milungo ni yilimalima yikwo, alioze nwakulelesa yitanga ya ululi ni zango lia Zambi. Yenayo chanutamba kulinga, ni yize yikwo nawa.

43“Lamba lienu Afariseu, mumu nawakuzanga yitwamo ya kulutwe mu mazuwo a kuwayila, nwakuzanga anumeneke ni vumbi mu yitanda! 44Lamba lienu, mumu nuli ngwe mafuka waze keeshi kusoloka, atu keeshi kwanyingika muze anende ho!”

45Umwe wa kuli alongeshi a Shimbi yamwamba ngwenyi: “Longeshi, muze unahanjika chino, unatusaula yetu nawa!”

46Yesu ngwenyi: “Lamba lienu nawa yenu alongeshi a Shimbi, mumu nwakutwika atu yilemu yahiana ayimbate, ni yenwene kunushi kwakwasa chibwe ni songo lia minwe yenu kumbata yilemu yize. 47Lamba lienu, mumu nwakutungila akwa munanyi a Zambi (waze tushakulu twenu ashihile) mafuka abema. 48Chenacho nwakulweza ngwenu, nunatayiza yitanga ya tushakulu twenu. Mumu ayo ashihile akwa munanyi a Zambi, ni yenu nwakutunga mafuka jo. 49Kashika Mana a Zambi haanambe ngwo: ‘Mungukaatumina akwa Munanyi a Zambi ni tunganda. Maakashiha amwe, ni akwo maakahungumiona.’ 50Ha chino, Zambi makamwesa atu ja mwakono lamba mumu ha manyinga ja akwa munanyi a Zambi waze amwangine hashi chize ku kutanga cha hashi, 51chize ku manyinga ja Abele ndoo ku manyinga ja Zakaria, yoze ashihilile hakachi ka chilumbilo ni muma mwa chijila. Ewa, ngunanwambulwila ngwami, atu ja mwakono, Zambi makaamwesa lamba ha yitela yeswe!

52“Lamba lienu, alongeshi a Shimbi! Nwaswekele sapi ya kwazulula nayo chajilo cha chinyingi. Yenwene kunushi kunjila mo, ni nwakukinda waze akuzanga kunjila mo!”

53Muze Yesu hakatuka ko, alongeshi a Shimbi ni Afariseu yaamushinjila ni kumusungasunga ni kumuhula yihula ha yikuma yeka ni yeka. 54Yeeseka kumutela miheto hanga amukwate nyi mahanjika chimwe Chuma cha kupiasuka.

Currently Selected:

Luka 11: CHK1970

Highlight

Copy