WƖAA DƖ-SUOMUŊ 15
15
Wɩa bil niiŋ ʋ dɩ Abɩram pɛgɛ
1Ʋ ŋɩɩ harɩŋ nɛ Wɩa bʋl wɩaa a pɩ Abɩram arɩ duosoo tʋɔŋ. Ʋ sɩ,
“Abɩram, sɩ́ leŋe dɩ fawʋllʋŋ kɛnɩŋ.
Mɩ nɛ jaŋ chu tɔ ŋ lɛ,
ŋ time jaŋ yʋgɛ.”
2Ŋɩɩ nɛ Abɩram pɩɛsɛ, “Mɩ Tɩɩna Wɩɩjarɩbakɔ, bɛɛ nɛ ŋ jaŋ joŋo pɩmɛ, bɛɛ wɩaa mɩ bɩ bii kala kɛnɛ sɩ jaŋ dii mɩ dɩa? Nɩɩ-la sɩɩ beŋ mɩ dɩa nɛ Elieza a lɩɩ taŋ-la ba sɩɩ yɩrɛ Damasɩkʋs.” 3Abɩram bɩra bʋl, “Ŋ sɩ bɩ mɩ biiriŋ pa, ŋɩɩ-na mɩ dɩa tɩntɩnnʋ-la Elieza nɛ jaŋ dii mɩ dɩa.”
4Ŋɩɩ nɛ La TƖƖNA Wɩa bʋla pʋ, “Baal-la dee bɩ jaŋ dii ŋ dɩa, ŋ tɩtɩa bii-lʋlʋŋ nɛ jaŋ dii ŋ dɩa.” 5Ŋɩɩ nɛ La TƖƖNA kɛŋ Abɩram lɩɩ dɩ-jalɩŋ aŋ bʋl, “Beŋ wɩa-nyuŋ a na chɛnwʋlaa sɩ magɛ ŋɩɩ, ŋ bɩ jaŋ wuo dɩɩsɛba. Ŋɩɩ nɛ ŋ doho nɩaa jaŋ magɛ.”
6Abɩram laa wɩalɩŋ kala La TƖƖNA sɩ bʋla pʋ dii nɛ. Ŋɩɩ nɛ tɩɩ Wɩa joŋu arɩ ʋ ŋaa tʋɔpʋl tɩɩna nɛ. 7Ŋɩɩ nɛ La TƖƖNA bʋla pʋ, “Mɩ nɛ kɛnɩŋ lɩɩ Uu sɩ hɛ Babɩlɔŋ tinteeŋ kɔ dɩ mɩ joŋ tinteeŋ deeŋ pɩŋ nɛ. Ʋ jaŋ ŋaa ŋ kʋŋ.”
8Ŋɩɩ nɛ Abɩram pɩɛsɛ, “La TƖƖNA Wɩɩjarɩbakɔ, ɛɛ nɛ mɩ jaŋ wuo jɩŋ arɩ mɩ nɛ jaŋ tɩɩ tinteeŋ deeŋ?”
9Ŋɩɩ nɛ La TƖƖNA bʋla pɩ Abɩram, “Kɛŋ jɩsɩŋ batori napaha, jɩsɩŋ batori bʋ-nɩɩŋ, jɩsɩŋ batori pie-bele, koko-pʋla arɩ koko-fɩaŋ a kaa kɔ.”
10Ŋɩɩ nɛ Abɩram kɛŋ kɩalɩŋ Wɩa sɩ daga a kaa keri balɩa balɩa a kaa yelli yelli dɔŋɔ, ama ʋ bɩ kokosu-la kaa keri. 11Ŋɩɩ nɛ zaaraa kʋ tuu dɩ ba dii kɩalɩŋ, Abɩram kiri.
12Wɩɩ-muluŋ sɩ tuu jʋʋ, doŋ faasa kɛŋ Abɩram. Ʋ nyuŋ ŋmɛrɛ, fawʋllʋŋ kɛnʋ woruŋ. 13Ŋɩɩ nɛ La TƖƖNA bʋla pʋ, “Jɩŋ woruŋ arɩ ŋ doho nɩaa jaŋ ŋaa nʋhʋɔraa tintee-wogo lɛ, a ŋaa ba yosuŋ dɩ ba dɔgɩsɛba jɩsɩŋ zɔɔ-banɛsɛ. 14Tintee-la nɩaa ba sɩ jaŋ tɩma pa, mɩ jaŋ dɔgɩsɛba, ka ʋ harɩŋ, ŋ nɩaa jaŋ lɩlɩɩ tintee-la lɛ dɩ ba dʋa kɩaa kɩŋkɛŋ. 15Ŋ-na tɩtɩa jaŋ hɩɛsɛ woruŋ aŋ na sʋʋ arɩ yarɩfɩɛlaa dɩ ba huguŋ. 16Ama, ŋ doho nɩaa nihi-lɩɛrɛ naansɩɩŋ bʋnɛsɛ ha jaŋ mɩɩra kɔ daha, dɩ Amɔrɩ tɩŋŋaa wʋbɔŋŋɔɔ ŋaanɩŋ ha bɩ dɛrɛ.”
17Wɩɩ-muluŋ sɩɩŋ sɩ jʋa, leriŋ biri lim, ŋɩɩ nɛ nyʋɔsʋŋ arɩ nyiŋgeliŋ to nammɩɩsɩ-la pɛgɛ a lɩɩ chaanɛ. 18Tapʋlɩɩ-la tɩtɩa nɛ La TƖƖNA bil niiŋ ʋ dɩ Abɩram pɛgɛ a bʋl, “Mɩ jaŋ joŋ tinteeŋ deeŋ a pɩ ŋ doho nɩaa a chɩŋ Ijipiti fuo-la a kaa mʋ Yufireti fuo-bal-la, nɩaa deemba tinteyee: 19Keni tɩŋŋaa, Kenas tɩŋŋaa, Kadomo tɩŋŋaa, 20Hiti tɩŋŋaa, Pɛrɛs tɩŋŋaa, Refem tɩŋŋaa, 21Amɔrɩ tɩŋŋaa, Kɛnaŋ tɩŋŋaa, Gɩgasɩ tɩŋŋaa arɩ Jebus tɩŋŋaa.”
Currently Selected:
WƖAA DƖ-SUOMUŊ 15: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
