WƖAA DƖ-SUOMUŊ 40

Nɩɩ-la sɩɩ kori Ijipiti tinteeŋ kuoro nyʋnyʋala arɩ nɩɩ-la sɩɩ wasɛ ʋ boroboro

1Bʋa kʋbala lɛ nɩɩ-la sɩɩ kori Ijipiti tinteeŋ kuoro nyʋnyʋala arɩ nɩɩ-la sɩɩ wasɛ kuoro boroboro ŋaa wɩɩ Ijipiti tinteeŋ kuoro tʋɔŋ chei. 2Ʋ na baanɩŋ woruŋ ʋ tɩntɩnnɩ-hɩasɩŋ deemba balɩa nyuŋ 3a kɛmba kaa mʋ tɔ ʋ nɩtɔɔrɩ dɩa-la lɛ Josɛf sɩ hɛ. 4Nɩtɔɔrɩ dɩa-la kʋhɩaŋ ŋaa Josɛf tɩma pɩpɩ tɩtɩnnɩ-hɩasɩŋ deemba balɩa. Ba sɩ hɛ nɩmɛ tapʋlaa baŋmɛnɛ, 5tapʋlɩɩ kʋbala Ijipiti tinteeŋ kuoro nyʋnyʋalɩ-koru-la arɩ nɩɩ-la sɩɩ wasɛ kuoro boroboro-la kala sɩ hɛ nɩtɔɔrɩ dɩa-la lɛ duosi duosoo dabamba tɩta-bala. Duoso kala kɛŋ ʋ bʋbʋa.

6Chʋchʋɔŋ Josɛf sɩ kɔ ba teeŋ, ʋ na arɩ ba tʋɔŋ cheye. 7Ŋɩɩ nɛ Josɛf pɩɛsɛba, “Bɛɛ nɛ kɛmma ma tʋɔŋ chei jɩnɩŋ?”

8Ba bʋla pʋ, “La duosi duosoo nɛ aŋ ka nʋʋkala tuo dɩ ʋ dagɛ duoso-la bʋbʋɔŋ pɩla.” Ŋɩɩ nɛ Josɛf bʋl, “Wɩa nɛ jɩŋ duoso bʋbʋɔŋ. Má dagɛ ma duoso-la pɩmɛ.”

9Ŋɩɩ nɛ kuoro nyʋnyʋalɩ koruru-hɩaŋ-la bʋl ʋ duoso pɩ Josɛf a bʋl, “Mɩ duosoo tʋɔŋ mɩ na girep tɩa dɩ ʋ chɩŋ mɩ sɩpaaŋ. 10Tɩa-la kɛŋ naakelee batori, naakele-la pʋʋra fɩɩlɛ a nɛŋ nɛnɛɛ a bɩɩ. 11Dɩ Ijipiti tinteeŋ kuoro nyʋnyʋala hɛ mɩ nɩsɩŋ lɛ. Ŋɩɩ nɛ mɩ chagɛ tɩɩnɛnɛ-la lɩɩŋ hɛ nyʋnyʋala-la lɛ a joŋo hɛ kuoro nɩsɩŋ lɛ.”

12Ŋɩɩ nɛ Josɛf bʋla pʋ, “Ŋ duoso-la bʋbʋɔŋ nɛ ŋ-la: Tɩɩ-naakele-la batori ŋaa tapʋlaa batori nɛ ŋɩɩ. 13Dɩ tapʋlaa batori-la nɛ yie, Ijipiti tinteeŋ kuoro jaŋ lɩɩsɩŋ nɩtɔɔrɩ dɩa lɛ a bɩra leŋ dɩ ŋ tɩtɩŋ ŋ tɩntɩŋŋaa arɩ ŋ fa sɩɩ tɩŋ ŋɩɩ. Ŋ jaŋ bɩra joŋ ʋ nyʋnyʋala a pʋpʋ arɩ ŋ fa sɩɩ ŋaa ŋɩɩ. 14Ama dɩ wɩaa nɛ vɛŋ woruŋ pɩŋ sɩ́ mɩ wɩaa yʋ, bʋl mɩ wɩaa pɩ Ijipiti tinteeŋ kuoro dɩ ʋ lɩɩsɛmɛ nɩtɔɔrɩ dɩa deeŋ lɛ. 15Doluŋ nɛ ba dii mɩ lɛ a lɩɩsɛmɛ Hiburu tɩŋŋaa tinteeŋ lɛ a kaa kɔ daha. Mɩ sɩ hɛ daha ma, mɩ bɩ wɩɩ cheye, ka ba kɛmmɛ tɔ dɩa deeŋ lɛ.”

16Kuoro boroboro wasɩrʋ-hɩaŋ-la sɩ nɩa dɩ Josɛf dagɛ duoso-la bʋbʋɔŋ, ʋ sɩma pʋ. Ŋɩɩ nɛ ʋ bʋla pɩ Josɛf, “Mɩ ma duoso dɩ mɩ chʋŋ sinsiŋ batori mɩ nyuŋ lɛ. 17Sime-la sɩ hɛ nyuŋ su arɩ boroboro dosunuŋ, mɩ kaa mʋ dɩ mɩ pɩ Ijipiti tinteeŋ kuoro, ka diibiisiŋ didii boroboro-la mɩ sɩ chʋŋa.”

18Ŋɩɩ nɛ Josɛf bʋl, “Ŋ duoso-la bʋbʋɔŋ nɛ ŋ-la: Sinsiŋ batori-la ŋaa tapʋlaa batori nɛ. 19Tapʋlaa batori-la nɛ yie, Ijipiti tinteeŋ kuoro jaŋ leŋ dɩ ba lɩɩsɩŋ a keri ŋ nyuŋ aŋ joŋuŋ sagɛ tɩa nyuŋ dɩ diibiisiŋ dii ŋ nammɩa.”

20Tapʋlaa batori-la yie dɩ Ijipiti tinteeŋ kuoro tapʋl-lʋlʋŋ ma nɛ ŋɩɩ. Ʋ ŋaa ba ŋaa kʋdiilee pɩ ʋ tɩntɩnnɩ-hɩasɩŋ kala ba dii aŋ gbigbieli. Ŋɩɩ nɛ ʋ chaarɛ ʋ nyʋnyʋalɩ koruru-hɩaŋ-la arɩ boroboro wasɩrʋ-hɩaŋ-la nɩtɔɔrɩ-dɩa lɛ a kaa kʋ lɩɩ ʋ tɩntɩnnɩ-hɩasɩŋ kala sɩpaaŋ. 21Ʋ leŋ ba bɩra joŋ ʋ nyʋnyʋalɩ koruru-hɩaŋ-la nyʋnyʋala pʋ ʋ bɩra tɩtɩŋ ʋ tɩntɩŋŋaa, 22ama ʋ leŋ ba lieŋi ʋ boroboro wasɩrʋ-hɩaŋ-la, arɩ Josɛf fa sɩ bʋl ŋɩɩ pʋ.

23Ama kuoro nyʋnyʋalɩ kokuru-hɩaŋ-la yʋ dɩ ʋ bʋl Josɛf wɩaa a pɩ Ijipiti tinteeŋ kuoro.

Currently Selected:

WƖAA DƖ-SUOMUŊ 40: SIS

Highlight

Copy