Jɔɔŋ 11
11
Lazarɔs sʋba
1Baal kʋbala nɛ fa hɛ nɩmɛ baa yɩrɛ Lazarɔs, a lɩɩ Bɛtanɩ. Ʋ dɩhaalaa nɛ fa Mɛɛrɩ arɩ Maata. 2Mɛɛrɩ deeŋ nɛ fa bɩsɛ tʋlaalɩ hɛ Yesu naasɩŋ lɛ ŋɩɩ aŋ kɛŋ ʋ nyu-pʋnaa tɩɩgɛ. Ŋɩɩ nɛ Lazarɔs fa wʋwɩɩlɛ. 3Ʋ dɩhaalaa tɩŋ ba mʋ bʋla pɩ Yesu, “La Tɩɩna, nɩɩ-la ŋ sɩ cho ka wɩɩlʋ nɛ.” 4Yesu sɩ nɩɩ wɩɩŋ deeŋ, ʋ sɩ, “Nyanyalɩŋ deeŋ dee bɩ maga dɩ Lazarɔs wɩɩla sʋʋ, ama dɩ Wɩa yɩrɩŋ to ŋɩɩ lɛ a yɩrɛ, dɩ mɩ ma Wɩa Bie yɩrɩŋ to nɩmɛ yɩrɛ.”
5Yesu fa cho Maata arɩ ʋ ŋaana arɩ Lazarɔs nɛ kɩŋkɛŋ. 6Ama ʋ sɩ nɩa dɩ Lazarɔs ka wɩɩlʋ, ŋɩɩ nɛ ʋ bɩra chʋa lee-la ʋ fa sɩ hɛ tapʋlaa balɩa. 7Ŋɩɩ harɩŋ nɛ ʋ bʋla pɩ ʋ harɩ-tooroo, “Má leŋ dɩ la mɩɩra mʋ Judiya tinteeŋ.” 8Ŋɩɩ nɛ Yesu harɩ-tooroo bʋla pʋ, “La kʋhɩaŋ, Juu tɩŋŋaa faa chɛ dɩ ba paa tabɩaa yagɩŋ lee-la nɛ, ʋ bɩ diene, aŋ ka ŋ bɩraa chɛ dɩ ŋ mʋ nɩmɛɛ?”
9Ŋɩɩ nɛ Yesu bʋl, “Pʋlʋmʋŋ yie hɛ nɩmɛ hawaba fii arɩ balɩa nɛ. Ŋɩɩ wɩaa, dɩ nʋʋ nɩɩ vɛŋ wɩɩhɛyɛ, ʋ bɩ jaŋ gɩgɛrɛ kɩaa, bɛɛ wɩaa leriŋ pʋlla nɛ. 10Ama dɩ ŋ nɩɩ vɛŋ tɩtaŋɩŋ, ŋ yie gɩgɛrɛ kɩaa nɛ, bɛɛ wɩaa pʋlʋmʋŋ tuo.” 11Ŋɩɩ nɛ Yesu bɩra bʋla pɩ ʋ harɩ-tooroo, “La nandɔŋɔ Lazarɔs pɩŋ doŋ nɛ, ama mɩ jaŋ mʋ chɩsʋ doŋ lɛ.” 12Ŋɩɩ nɛ ʋ harɩ-tooroo bʋla pʋ, “La Tɩɩna, dɩ ʋ nɛ pɩŋ doŋ, ŋɩɩ-na ʋ jaŋ duori.” 13Yesu sɩ bʋl ŋɩɩ, ʋ bʋla arɩ Lazarɔs sʋba nɛ, aŋ ka ʋ harɩ-tooroo bɩɩnɛ arɩ doŋ tɩtɩa nɛ ʋ pɩŋ.
14Ŋɩɩ nɛ Yesu chaasa bʋla pɩba arɩ Lazarɔs sʋba nɛ. 15Yesu sɩ, “A tɩŋ ma wɩaa mɩ tʋɔŋ tɔrɔ arɩ bʋa-la lɛ Lazarɔs sɩ sʋba mɩ tuo lee-la. Ŋɩɩ lɛ nɛ ma jaŋ to a wuo laa mɩ wɩaa dii. Má leŋ dɩ la mʋ ʋ teeŋ.”
16Yesu harɩ-tooroo tʋɔŋ dɔŋɔ yɩrɩŋ nɛ fa Tɔmas. Ba kɛnʋ yɩyɩrɛ daalɩarɩŋ ma nɛ, bɛɛ wɩaa ba fa ŋaa daalɩarɩŋ nɛ. Ŋɩɩ nɛ ʋ bʋla pɩ ʋ dɔnsʋŋ tɩmma-la, “Má leŋ dɩ la kala to Yesu harɩŋ, dɩ ʋ nɛ ŋaa sʋʋ ma, dɩ la kala sʋʋ.”
17Ba sɩ mʋ yi lee-la, nɩaa bʋla pɩ Yesu arɩ ba sɩ hugi Lazarɔs, ʋ tapʋlaa banɛsɛ nɛ ŋ-la. 18Bɛtanɩ arɩ Jerusalɛm fa ŋaa arɩ meel-daasɩŋ balɩa nɛ. 19Juu tɩŋŋaa fa yʋga a lɩɩ Jerusalɛm kɔ Bɛtanɩ dɩ ba lɔllɛ Maata arɩ Mɛɛrɩ a tɩŋ ba dɩbaala sɩ sʋba wɩaa. 20Maata sɩ nɩa arɩ Yesu ka kɔ nɛ, ʋ sii lɩɩ dɩ ʋ chemu wɛnɩŋ lɛ, aŋ ka Mɛɛrɩ-na fa hɛ dɩa lɛ.
21Ŋɩɩ nɛ Maata bʋla pɩ Yesu, “Mɩ Tɩɩna, dɩ ŋ nɛ fa hɛ daha, mɩ dɩbaala fa bɩ jaŋ sʋʋ. 22Arɩ ŋɩɩ ma ha, mɩ jɩma arɩ ŋ nɛ sʋl Wɩa chɩchɛ kʋŋkala, ʋ jaŋ pɩŋ.”
23Ŋɩɩ nɛ Yesu bʋla pʋ, “Ŋ dɩbaala jaŋ sii a kɛŋ mɩɩsɩŋ.”
24Ŋɩɩ nɛ Maata bʋla pʋ, “Mɩ jɩma arɩ dʋnɩa chɛ-dɛrɩŋ ʋ jaŋ sii sʋʋŋ lɛ, bʋa-la lɛ nɩalɩŋ kala sɩ sʋba sɩ jaŋ sii.”
25Ŋɩɩ nɛ Yesu bʋla pʋ, “Mɩ nɛ ŋaa Nɩɩ-la sɩ jaŋ sii sʋʋŋ lɛ, a chɩsɛ nɩaa sʋʋŋ lɛ dɩ ba kɛŋ mɩɩsɩŋ. Nʋʋkala sɩ laa mɩ wɩaa dii, dɩ ŋ sʋba ma, ŋ jaŋ sii a kɛŋ mɩɩsɩŋ. 26Nɩɩ-la ma kala sɩ weye aŋ laa mɩ wɩaa dii, ʋ bɩ jaŋ kɔ dɩ ʋ sʋba. Ŋ laa wɩɩŋ deeŋ dii nɛɛ?”
27Ŋɩɩ nɛ Maata bʋl, “Oo, mɩ Tɩɩna. Mɩ laa dii arɩ ŋ nɛ ŋaa Kirisito, Wɩa Bie, Nɩɩ-la sɩ maga dɩ ʋ kɔ dʋnɩa deeŋ.”
28Maata sɩ bʋl wɩaa deemba dɛrɛ, ʋ mɩɩra jʋʋ dɩa a lʋara yɩrɛ ʋ ŋaana Mɛɛrɩ, a munso bʋla pʋ, “Mɛɛrɩ, la kʋhɩaŋ kɔ nɛ aa pɩɛsɛ ŋ wɩaa.” 29Mɛɛrɩ sɩ nɩɩ ŋɩɩ, ʋ sii lɩma a lɩɩ dɩ ʋ chemu. 30Bʋa-la lɛ dɩ Yesu ha bɩ taŋ-la tʋɔŋ jʋa, ʋ ha hɛ lee-la Maata sɩ chemu nɛ. 31Juu tɩmma-la arɩ Mɛɛrɩ fa sɩ hɛ dɩa lɛ baa nyagɛ ʋ bɔyɛ, ba na Mɛɛrɩ dɩ ʋ sii lɩma. Ba sɩ na ŋɩɩ, ba sii to ʋ harɩŋ, bɛɛ wɩaa ba fa bɩɩna ʋʋ chɛ dɩ ʋ mʋ ʋ dɩbaala vaamɩŋ leriŋ nɛ a yel.
32Mɛɛrɩ sɩ yi lee-la Yesu fa sɩ hɛ a naʋ, ʋ tuu tel ʋ naasɩŋ lɛ aŋ bʋl, “Mɩ Tɩɩna, dɩ ŋ nɛ fa hɛ daha, mɩ dɩbaala fa bɩ jaŋ sʋʋ.” 33Yesu sɩ na Mɛɛrɩ arɩ Juu tɩmma-la sɩ to ʋ harɩŋ kɔ dɩ baa yel, ʋ tʋɔŋ faasa chei. Ʋ yaraa ma faasa vɛŋ. 34Ŋɩɩ nɛ ʋ pɩɛsɛba, “Nɩɩ lɛ nɛ ma hugu?” Ba bʋla pʋ, “La Tɩɩna, kʋ na lee-la.”
35Ŋɩɩ nɛ Yesu yel.
36Juu tɩmma-la bʋl, “Má bee na ʋ sɩ chou ŋɩɩ.”
37Dɔnsʋŋ ma pɩɛsɛ, “Ka ʋ nɛ suri nyʋlɩmaa sɩaa ŋɩɩ, ʋ saa fa bɩ jaŋ wuo ŋaa dɩ Lazarɔs sɩ́ sʋʋ?”
Yesu chɩsɛ Lazarɔs sʋʋŋ lɛ
38Yesu yaraa bɩra vɛŋ. Ŋɩɩ nɛ ba mʋ yi bʋa-la leriŋ. Bʋa-la fa hɛ bʋŋ lɛ nɛ. Ba joŋ tabɩɩŋ tɔ niiŋ. 39Ŋɩɩ nɛ Yesu bʋl, “Má kɛŋ tabɩɩ-la suri bʋa-la niiŋ.” Maata, baal-la sɩ sʋba dɩhaala dɔŋɔ, bʋla pʋ, “Mɩ Tɩɩna, ʋ sɩ sʋba, ʋ tapʋlaa banɛsɛ nɛ jɩnɩŋ, ŋ-la ʋʋ sʋɔrʋ.”
40Ŋɩɩ nɛ Yesu bʋla pʋ, “Mɩ bɩ bʋla pɩŋ arɩ ŋ nɛ laa mɩ wɩaa dii, ŋ jaŋ na ŋɩɩ Wɩa sɩ kɛŋ doluŋ?”
41Ŋɩɩ nɛ ba kɛŋ tabɩɩ-la suri. Yesu wʋla beŋ wɩa-nyuŋ aŋ bʋl, “Mɩ Nyɩmma, mɩɩ lɔllʋŋ arɩ ŋ sɩ jegile nɩɩ mɩ teeŋ. 42Mɩ jɩma arɩ ŋŋ jegili mɩ teeŋ nɛ bʋa na-kala lɛ. Ama mɩ bʋl wɩɩŋ deeŋ a tɩŋ nɩalɩŋ sɩ hɛ daha wɩaa nɛ, dɩ ba wuo laa dii arɩ ŋ nɛ tɩmmɛ.”
43Yesu sɩ bʋl ŋɩɩ dɛrɛ, ʋ faasa yɩrɛ, “Lazarɔs, kʋ lɩɩ!” 44Baal-la sɩ sʋba sii kʋ lɩɩ. Gɛrɩ-kɔsʋmɔɔ nɛ fa vɔɔ ʋ naasɩŋ arɩ ʋ nɩsaa kala. Gɛrɩŋ dɔŋɔ ma tɔ ʋ sɩaa. Ŋɩɩ nɛ Yesu bʋla pɩ nɩalɩŋ, “Má kɛnʋ puro ta dɩ ʋ viiri.”
Ba vʋʋra dɩ ba kpʋ Yesu
Mat. 26.1-5; Maak 14.1-2; Luuk 22.1-2
45Juu tɩmma-la fa sɩ kɔ dɩ ba chʋɔlɛ Mɛɛrɩ, a to ʋ harɩŋ mʋ a na wɩɩ-la Yesu sɩ ŋaa, ba tʋɔŋ nɩaa yʋga a laa ʋ wɩaa dii. 46Ama dɔnsʋŋ ma mɩɩra mʋ bʋla pɩ Farisii tɩŋŋaa wɩɩ-la Yesu sɩ ŋaa. 47Ŋɩɩ nɛ Farisii tɩmma-la arɩ Wɩɩsʋllɩ sɩpaalaaraa kʋhɩasɩŋ arɩ nɩaa dɔnsʋŋ sɩ yie hilime vʋvʋʋrɛ wɩaa bʋl, “Bɛɛ nɛ la jaŋ ŋaa? Má na wʋmagɩla-la kala baala deeŋ sɩɩ ŋaa nɛ. 48Dɩ la nɛ leŋe dɩ ʋ ŋɩŋaa wɩaa deemba, nʋʋkala jaŋ laa ʋ wɩaa dii. Ŋɩɩ harɩŋ Rom tinteeŋ nɩaa jaŋ kɔ a kɛŋ la Wɩa dɩɩ-balɩŋ arɩ la tinteeŋ kala laa.”
49Juu nɩhɩasɩ-la tʋɔŋ dɔŋɔ yɩrɩŋ nɛ fa Kayafas. Jɩna-la lɛ ʋ nɛ fa ŋaa Wɩɩsʋllɩ sɩpaalaaraa kʋhɩaŋ. Ŋɩɩ nɛ ʋ bʋl, “Ma bɩ wɩɩ jɩŋ. 50Ma bɩ jɩŋ dɩ nɩbala nɛ laa tinteeŋ nɩaa kala nyuŋ sʋʋ, ʋ nɛ kpɩa la tinteeŋ nɩaa kala sɩ sʋbaa?”
51Ʋ sɩ bʋl ŋɩɩ, ʋ bɩ naga ʋ tɩtɩa doluŋ lɛ nɛ ʋ bʋl ŋɩɩ, ama ʋ sɩ ŋaa Wɩɩsʋllɩ sɩpaalaaraa kʋhɩaŋ jɩna-la, ŋɩɩ nɛ tɩɩ ʋ wuo bʋl wɩaa Wɩa doluŋ lɛ, arɩ Yesu jaŋ laa tinteeŋ nɩaa kala nyuŋ sʋʋ, 52tinteeŋ deeŋ nɩaa ma dʋndʋŋa wɩaa dee, ama dɩ ʋ wuo pɛ kɛsɛ Wɩa biiri-la sɩ pɩsa hɛ leree dɔnsʋŋ ma a hɛ dɔŋɔ lɛ. 53A chɩŋ tapʋlɩɩ-la a kaa mʋ Juu tɩŋŋaa kʋhɩasɩ-la vʋʋrɛ ŋɩɩ ba sɩ jaŋ to a kpʋ Yesu.
54Ŋɩɩ wɩaa Yesu bɩra bɩ chaasaa gɔllɛ kpɩlɩɩ Juu tɩŋŋaa tʋɔŋ. Ʋ lɩɩ nɩmɛ a mʋ taŋ kʋbala baa yɩrɛ Efirem a kpagɛ tintee-hɩlɩŋ. Ʋ dɩ ʋ harɩ-tooroo hɛ nɩmɛ.
55Bʋa-la lɛ dɩ Juu tɩŋŋaa dɩɩsɩŋ kiele bal gbiele-la kpaga. Ŋɩɩ nɛ Juu tɩŋŋaa yʋgɛ a lɩɩ ba jasɩŋ lɛ a mʋ Jerusalɛm, dɩ ba pɩɩsɛ ba disiniŋ ta, aŋ ka dɩ gbiele-la-na yi. 56Ŋɩɩ nɛ ba bee chɩchɛ Yesu gbiele-la tʋɔŋ. Ba sɩ hɔŋ Wɩa dɩa tʋɔŋ, ŋɩɩ nɛ ba pɩpɩɛsɛ dɔŋɔ, “Ma bɩɩna ʋ jaŋ kɔ gbiele-la koo, ʋ bɩ jaŋ kɔ?” 57Bʋa-la lɛ, dɩ Wɩɩsʋllɩ sɩpaalaaraa kʋhɩasɩŋ arɩ Farisii tɩŋŋaa pa niiŋ, dɩ nʋʋkala nɛ jɩŋ Yesu sɩ hɛ lee-la, dɩ ʋ dagɛ, dɩ ba wuo kɛnʋ.
Currently Selected:
Jɔɔŋ 11: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
