Jɔɔŋ 16

1Mɩ bʋl wɩaa deemba kala pɩpɩma dɩ ma sɩ́ wɩalɩŋ ma sɩ laa dii joŋo ta. 2Ba jaŋ kirima ta Wɩɩchʋɔlɛ dɩɩsɩŋ lɛ. Bʋa dɔŋ jaŋ yi dɩ nɩaa kpʋma aŋ bɩɩnɛ baa to Wɩa wombiiŋ nɛ ŋɩɩ. 3Ba jaŋ ŋaa wɩaa deemba kala a tɩŋ ba sɩ́ bɩ mɩ Nyɩmma jɩŋ, a bɩ mɩ ma jɩŋ. 4Mɩ bʋl wɩaa deemba kala pɩpɩma dɩ bʋa-la nɛ kʋ yi dɩ wɩaa deemba ŋɩŋaa, ma jaŋ liisi arɩ mɩ bʋla pɩma.

Wɩa Dɩŋ-zɔmʋŋ tɩntɩŋŋaa

Mɩ dɩ ma kala fa sɩɩ to dɔŋɔ, ŋɩɩ nɛ tɩɩ mɩ bɩ wɩaa deemba bʋla pɩma. 5Ama lɛɛlɛ mɩɩ mʋ Nɩɩ-la sɩ tɩmmɛ teeŋ nɛ, aŋ ka ma kʋŋkala bɩ mɩ pɩɛsa arɩ nɩɩ nɛ mɩɩ mʋ. 6Mɩ sɩ bʋl wɩaa deemba pɩma lɛɛlɛ ŋ-la, ma tʋɔŋ chaasa chei nɛ. 7Ama wʋtɩtɩɩ nɛ mɩ bʋlaa pɩma ŋ-la: Mɩ sɩɩ mʋ ŋɩɩ, ʋ jaŋ zɔmɔ pɩma. Dɩ mɩ nɛ bɩ mʋa, Wɩa Dɩŋ-zɔmʋŋ sɩ jaŋ kɔ a pɛ ma lɛ bɩ jaŋ kɔ. Ama dɩ mɩ nɛ mʋa, mɩ jaŋ leŋ dɩ ʋ kɔ. 8Dɩ ʋ nɛ saa kɔ, ʋ jaŋ leŋ dɩ dʋnɩa nɩaa jɩŋ arɩ ba ŋaa wʋbɔŋŋɔɔ nɛ. Ʋ jaŋ bɩra dagɛba ŋɩɩ ba sɩ jaŋ to a kɛŋ tʋɔpʋla Wɩa sɩpaaŋ, a bɩra dagɛba arɩ Wɩa jaŋ dii ba sarɩya. 9Ba jaŋ jɩŋ arɩ ba sɩ bɩ mɩ wɩaa laa dii, ʋ ŋɩɩ ŋaa wʋbɔŋ nɛ. 10Mɩ sɩ mɩɩraa mʋ mɩ Nyɩmma teeŋ ŋɩɩ, ma bɩra bɩ jaŋ namɛ. Ʋ ŋɩɩ ma jaŋ dagɛ arɩ mɩ kɛŋ tʋɔpʋla nɛ Wɩa sɩpaaŋ. 11Wɩa sɩ folo dii dʋnɩa kuoro Sɩtaanɩ sarɩya ŋɩɩ, ba jaŋ jɩŋ arɩ Wɩa jaŋ dii ba ma sarɩya.

12Wɩaa yʋga nɛ mɩ ha kɛŋ dɩ mɩ bʋla pɩma, ama ma bɩ ba wuo nyalɩmɛ. 13Ama dɩ Wɩa Dɩŋ-zɔŋ-la nɛ kɔ, ʋ jaŋ dagɛma wʋtɩtɩɩ kala. Ʋ bɩ jaŋ bʋbʋl wɩaa ʋ tɩtɩa doluŋ lɛ, ama wɩalɩŋ kala ʋ sɩ nɩa mɩ Nyɩmma niiŋ lɛ nɛ ʋ jaŋ bʋl. Ʋ jaŋ dagɛma wɩalɩŋ kala sɩ jaŋ ŋaa. 14Ʋ jaŋ leŋ dɩ nɩaa yɩrɛ mɩ yɩrɩŋ, bɛɛ wɩaa wɩalɩŋ kala mɩ sɩ kɛnɛ mɩ bʋl, ʋ jaŋ kaa kʋ bʋla pɩma. 15Kʋŋkala mɩ Nyɩmma sɩ kɛnɛ ŋaa mɩ kʋŋ nɛ. Ŋɩɩ nɛ tɩɩ mɩ bʋla pɩma arɩ wɩalɩŋ kala mɩ sɩ kɛnɛ, Wɩa Dɩŋ-zɔŋ-la jaŋ kaa kʋ bʋla pɩma.”

Yesu bʋla pɩ ʋ harɩ-tooroo arɩ ba tʋɔŋ jaŋ tɔrɛ

16Ŋɩɩ nɛ Yesu bɩra bʋla pɩba, “Ʋ bɩ jaŋ dieni ma bɩra bɩ jaŋ namɛ. Tapʋlaa baŋmɛnɛ harɩŋ ma jaŋ bɩra namɛ.” 17Ŋɩɩ nɛ ʋ harɩ-tooroo dɔnsʋŋ pɩpɩɛsɛ dɔŋɔ, “Wɩɩŋ deeŋ bʋbʋɔŋ nɛ bɛɛ? Ʋ bʋla pɩla arɩ tapʋlaa baŋmɛnɛ la bɩ jaŋ naʋ, dɩ tapʋlaa baŋmɛnɛ harɩŋ la bɩra jaŋ naʋ. Ʋ bɩra bʋla arɩ ʋ sɩ jaŋ mʋ ʋ Nyɩmma teeŋ nɛ tɩɩ la bɩra bɩ jaŋ naʋ. 18Ʋ sɩ sɩ tapʋlaa baŋmɛnɛ deeŋ, ʋ bʋbʋɔŋ nɛ bɛɛ? La bɩ ʋ bʋbʋɔŋ jɩŋ.” 19Yesu jɩma arɩ baa chɛ dɩ ba pɩɛsʋ nɛ. Ŋɩɩ nɛ ʋ bʋla pɩba, “Mɩ sɩ sɩ tapʋlaa baŋmɛnɛ ma bɩ jaŋ namɛ, tapʋlaa baŋmɛnɛ harɩŋ ma jaŋ bɩra namɛ, ŋɩɩ wɩaa nɛ ma pɩpɩɛsɛ dɔŋɔɔ? 20Wʋtɩtɩɩ nɛ mɩ bʋlaa pɩma, ma jaŋ ŋmuŋmoo niiŋ ka dɩ dʋnɩa nɩaa tʋɔŋ tɔrɛ, ma tʋɔŋ jaŋ chei, ama ma tʋɔ-chei-la jaŋ mɩɩra bɩrɩmɛ tʋɔtɔrʋŋ. 21Dɩ haala luoruŋ nɩɩ wɩɩ dɩ ʋ chɩchɛ ʋ lʋl, ʋ yie tʋʋnɛ niiŋ nɛ, bɛɛ wɩaa ʋ hɛɛŋ bʋa yie nɛ. Ama dɩ ʋ nɛ kʋ lʋl bile dɛrɛ, ʋ yʋ ʋ hɛɛ-la kala lɛ, ka ʋ tʋɔŋ tɔrɛ a tɩŋ ʋ sɩ lʋl bii-falɩŋ hɛ dʋnɩa lɛ. 22Ŋɩɩ nɛ saa ʋ jaŋ nagɛ ma ma lɛ. Lɛɛlɛ ma tʋɔŋ cheye nɛ, ama mɩ jaŋ bɩra nama dɩ ma tʋɔŋ kala tɔrɛ. Bʋa-la lɛ nʋʋkala bɩ jaŋ wuo ŋaa dɩ ma tʋɔŋ bɩra chei. 23Dɩ tapʋlɩɩ-la nɛ yie, ma bɩ jaŋ pɩɛsɛmɛ chɩchɛ kʋŋkala. Wʋtɩtɩɩ nɛ mɩ bʋlaa pɩma, mɩ Nyɩmma jaŋ pɩma kʋŋkala ma sɩ pɩɛsʋ chɩchɛ mɩ yɩrɩŋ lɛ. 24Lɛɛlɛ ŋ-la, ma ha bɩ kʋŋkala pɩɛsa chɩchɛ mɩ yɩrɩŋ lɛ. Ŋɩɩ wɩaa má saa pɩɛsʋ, ʋ jaŋ joŋo pɩma, dɩ ma tʋɔŋ faasa tɔrɛ a mʋ dɛrɛ.

25Wɩaa deemba kala mɩ sɩɩ bʋl, namagaba nɛ mɩɩ magɛ. Ama bʋa kʋbala jaŋ yi, mɩ bɩra bɩ jaŋ magɛ namagaba, mɩ jaŋ chaasa bʋl wɩaa pɩma a mʋ tɩgɛ mɩ Nyɩmma lɛ, dɩ ma jɩŋ ba bʋbʋɔŋ woruŋ. 26Dɩ tapʋlɩɩ-la nɛ yie, ma nɛ jaŋ pɩɛsʋ chɩchɛ kɩaa mɩ yɩrɩŋ lɛ. Mɩ bɩ sɩ mɩ nɛ jaŋ sʋla pɩma, 27bɛɛ wɩaa mɩ Nyɩmma tɩtɩa ma choma nɛ. Ma chomi nɛ a laa mɩ wɩaa dii arɩ mɩ lɩɩ ʋ teeŋ nɛ. Ŋɩɩ nɛ tɩɩ ʋ ma choma. 28Mɩ lɩɩ mɩ Nyɩmma teeŋ nɛ a kʋ tuu dʋnɩa. Lɛɛlɛ mɩ saa jaŋ leŋ dʋnɩa aŋ mɩɩra mʋ mɩ Nyɩmma teeŋ.”

29Ŋɩɩ nɛ ʋ harɩ-tooro-la bʋla pʋ, “Lɛɛlɛ ŋ chaasaa bʋl wɩaa nɛ. Ŋ bɩra bɩ namagaba ka magɛ. 30Lɛɛlɛ la jɩma dɩ ŋ jɩŋ wɩɩ-wɩɩkala nɛ, ŋ bɩ chɛ dɩ nʋʋkala pɩɛsɩŋ wɩɩkala. Wɩɩŋ deeŋ nɛ leŋe la jɩŋ arɩ ŋ lɩɩ Wɩa teeŋ nɛ.” 31Ŋɩɩ nɛ Yesu pɩɛsɛba, “Lɛɛlɛ saa ma laa mɩ wɩaa dii nɛɛ? 32Bʋa kʋbala jaŋ yi, ʋ saa paala yi nɛ, ma kala jaŋ pɩsɛ a mʋ ma dɩɩsɩŋ, aŋ ka mɩ dʋndʋŋa. Ama saa, mɩ bɩ jaŋ ŋaa mɩ dʋndʋŋ. Mɩ Nyɩmma hɛ mɩ lɛ nɛ. 33Mɩ bʋl wɩaa deemba pɩma dɩ ma wuo hɔŋ arɩ fɩɛlɩŋ nɛ. Dʋnɩa deeŋ tʋɔŋ ma jaŋ na hɛɛŋ. Ama má leŋ dɩ ma nyuŋ nyaasɛ. Mɩ yuo dii dʋnɩa nɛ.”

Currently Selected:

Jɔɔŋ 16: SIS

Highlight

Copy