Jɔɔŋ 21

Yesu kɛŋ ʋ tɩtɩa dagɛ ʋ harɩ-tooroo balɩpɛ

1Yesu bɩra kɛŋ ʋ tɩtɩa dagɛ ʋ harɩ-tooroo dɔnsʋŋ mʋga kʋbala niiŋ baa yɩrɛ Tabiiras. Ʋ harɩ-tooro-la nɛ ŋ-la: 2Saamɔŋ Pɩɩta arɩ Tɔmas, nɩɩ-la ba fa sɩ kaa yɩrɛ daalɩarɩŋ ma, arɩ Natanɩal fa sɩ lɩɩ taŋ kʋbala baa yɩrɛ Kena a hɛ Galilii tinteeŋ. Zebidi biiriŋ balɩa ma fa hɛ nɩmɛ, arɩ Yesu harɩ-tooroo balɩa ma dɔnsʋŋ. 3Ŋ-la nɛ ʋ to a kɛŋ ʋ tɩtɩa kʋ dagɛba: Ba fa chɩŋ mʋga-la niiŋ nɛ. Ŋɩɩ nɛ Saamɔŋ Pɩɩta bʋla pɩ harɩ-tooro-la kʋkaanaa arɩ ʋʋ mʋ dɩ ʋ kɛsɛ chenfilee nɛ. Ba kala bʋl dɩ ba jaŋ to mʋ. Ŋɩɩ nɛ ba mʋ joŋ lɩɩŋ daboro a jʋʋ lɩɩŋ tʋɔŋ, ama tɩtaŋ-la kala ba bɩ chenfilii kala kɛnɛ.

4Taŋ sɩ pʋlaa kɔ dɩ Yesu chɩŋ lɩɩ-la niiŋ, ama ʋ harɩ-tooro-la bɩ jɩŋ arɩ ʋ nɛ. 5Ŋɩɩ nɛ Yesu pɩɛsɛba, “Mɩ nandɔsʋŋ, ma kɛsɛ chenfilee nɛɛ?” Ŋɩɩ nɛ ba bʋl, “Aɩ, la bɩ kʋŋkala na.” 6Ŋɩɩ nɛ ʋ bʋl, “Má joŋ ma jóŋ, a yuo hɛ lɩɩŋ daboro-la nadiiŋ sɛmɛ, ma jaŋ kɛsɛ chenfilee.” Ŋɩɩ nɛ ba yuo joŋ-la a kɛsɛ chenfilee su. Ʋ sɩ suo ŋɩɩ, ba bɩ wuo lɩlɛrɛ.

7Ŋɩɩ nɛ harɩ-tooru-la Yesu sɩ cho woruŋ bʋla pɩ Pɩɩta, “La Tɩɩna nɛ.” Bʋa-la lɛ dɩ Pɩɩta fa wuri ʋ gɛrɩŋ. Ʋ sɩ nɩɩ ŋɩɩ, ʋ joŋ ʋ gɛrɩŋ a laalɛ, aŋ lɩɩ lɩɩŋ daboro-la lɛ, a fɩla jʋʋ lɩɩŋ dɩ ʋ duoro kʋ lɩɩ Yesu teeŋ. 8Ka harɩ-tooro-la kʋkaanaa hɛ lɩɩŋ daboro-la tʋɔŋ aa lɛrɛ joŋ-la sɩ suo arɩ chenfilee. Lee-la arɩ lɩɩ-la niiŋ fa bɩ bol, ʋ fa ŋaa naakieliŋ zɔlɔ nɛ.

9Ba sɩ kʋ lɩɩ lɩɩ-la niiŋ, ba na hɔlɔɔ nyiniŋ dɩ chenfilee chɛbɛ, ka boroboro ma pɩŋ. 10Ŋɩɩ nɛ Yesu bʋla pɩba, “Má lɩɩsɛ chenfile-la dɔnsʋŋ ma sɩ kɛsɛ lɛɛlɛ a kaa kɔ.”

11Ŋɩɩ nɛ Saamɔŋ Pɩɩta mʋ jʋʋ lɩɩŋ-daboro-la a lɛrɛ joŋ-la kʋ lɩɩ lɩɩ-la niiŋ, dɩ chenfil-balaa suo. Chenfile-la fa ŋaa zɔlɔ arɩ mahɩŋ balɩa arɩ fii arɩ batori nɛ. Chenfile-la yʋga ŋɩɩ ma nɛ, aŋ ka joŋ-la bɩ kɩɛsa. 12Ŋɩɩ nɛ Yesu bʋla pɩba, “Má kʋ lɩɩ bɩllɛ ma niiŋ.” Ʋ sɩ bʋl ŋɩɩ, ʋ harɩ-tooroo kʋŋkala bɩ wuo pɩɛsɛ, “Kʋbɛɛ nɛɛ?” Ba kala jɩma arɩ La Tɩɩna nɛ. 13Ŋɩɩ nɛ Yesu joŋ boroboro-la a pɩba, a joŋ chenfile-la ma a pɩba dɩ ba dii. 14Yesu sɩ sii sʋʋŋ lɛ ʋ butori nɛ ŋɩɩ ʋ sɩ kɛŋ ʋ tɩtɩa kaa kʋ dagɛ ʋ harɩ-tooroo.

Yesu bʋl wɩaa a pɩ Pɩɩta

15Ba sɩ dii boroboro-la arɩ chenfile-la dɛrɛ, ŋɩɩ nɛ Yesu pɩɛsɛ Saamɔŋ Pɩɩta, “Jɔɔŋ nanʋala Saamɔŋ, ŋ chomi a kɩɩ nɩaa deemba nɛɛ?” Ŋɩɩ nɛ Pɩɩta sɩ, “Oo mɩ Tɩɩna, ŋ tɩtɩa jɩma arɩ mɩ choŋ nɛ.” Ŋɩɩ nɛ Yesu bʋla pʋ, “Beŋ mɩ nɩaa nyuŋ, arɩ pie-daara sɩ yie beŋ ʋ piesee nyuŋ ŋɩɩ.” 16Ŋɩɩ nɛ Yesu bɩra pɩɛsʋ, “Jɔɔŋ nanʋala Saamɔŋ, ŋ chomi nɛɛ?” Ʋ bɩra bʋl, “Oo mɩ Tɩɩna, ŋ jɩma arɩ mɩ choŋ nɛ.” Ŋɩɩ nɛ Yesu bɩra bʋla pʋ, “Beŋ mɩ nɩaa nyuŋ, arɩ pie-daara sɩ yie beŋ ʋ piesee nyuŋ ŋɩɩ.” 17Ŋɩɩ nɛ Yesu bɩra pɩɛsʋ torimuŋ, “Jɔɔŋ nanʋala Saamɔŋ, ŋ chomi nɛɛ?” Yesu sɩ pɩɛsʋ torimuŋ lɛ ŋɩɩ, ʋ tʋɔŋ chei. Ŋɩɩ nɛ Pɩɩta bʋla pʋ, “Mɩ Tɩɩna, ŋ jɩŋ wɩɩkala nɛ, ŋ jɩma arɩ mɩ choŋ nɛ.” Ŋɩɩ nɛ Yesu bɩra bʋla pʋ, “Beŋ mɩ nɩaa nyuŋ, arɩ pie-daara sɩ yie beŋ ʋ piesee nyuŋ ŋɩɩ. 18Wʋtɩtɩɩ nɛ mɩ bʋlaa pɩŋ, ŋ fa sɩ ŋaa hambie, ŋ tɩtɩa nɛ yie laalɛ ŋ gɛnnɩŋ a mʋmʋ lee-la kala ŋ sɩ cho. Ama dɩ ŋ nɛ kʋ hɩɛsɛ, ŋ jaŋ kɛŋ ŋ nɩsaa je, aŋ ka dɩ nʋʋ dɔŋ nɛ joŋ ŋ gɛnnɩŋ a laalɩŋ aŋ kɛnɩŋ mʋ lee-la ŋ sɩ bɩ cho dɩ ŋ mʋa.” 19Yesu sɩ bʋl wɩɩŋ deeŋ, ʋ dagɛ Pɩɩta sɩ jaŋ sʋʋ ŋɩɩ a laa yɩrɩŋ pɩ Wɩa nɛ. Ŋɩɩ harɩŋ lɛ nɛ Yesu bʋla pʋ, “To mɩ harɩŋ.”

20Ŋɩɩ nɛ Pɩɩta daasɛ harɩŋ a na Yesu harɩ-tooru-la Yesu fa sɩ cho woruŋ, nɩɩ-la fa sɩ sʋʋsa mʋ kpagɛ Yesu bʋa-la lɛ ba fa sɩɩ dii dɩɩsɩŋ kiele bal gbiele-la kʋdiilee, a fa pɩɛsʋ, “Mɩ Tɩɩna, kʋbɛɛ nɩɩ chɛ dɩ ʋ joŋuŋ yallɛ?” 21Pɩɩta sɩ naʋ, ŋɩɩ nɛ ʋ pɩɛsɛ Yesu, “Mɩ Tɩɩna, ka baala deeŋ?” 22Ŋɩɩ nɛ Yesu bʋla pʋ, “Dɩ mɩ nɩɩ chɛ dɩ ʋ hɛ nɩmɛ ka dɩ mɩ-na mɩɩra kɔ dʋnɩa, ŋ sɩpaa tuo nɩmɛ. To mɩ harɩŋ.” 23Ŋɩɩ nɛ ba ŋmoo doworo pɩ nɩalɩŋ kala sɩ laa Yesu wɩaa dii arɩ Yesu harɩ-tooro deeŋ-na bɩ jaŋ sʋʋ. Ama Yesu bɩ ŋɩɩ bʋla. Ʋ sɩ dɩ ʋ nɩɩ chɛ dɩ harɩ-tooru-la hɛ nɩmɛ ka dɩ ʋ-na mɩɩra kɔ dʋnɩa, Pɩɩta sɩpaa tuo.

24Mɩ-na Jɔɔŋ nɛ na wɩaa deemba aa ŋmʋnsɛ teniŋ deeŋ. La saa jɩma arɩ wɩalɩŋ kala mɩ sɩ bʋla ŋaa wʋtɩtɩɩ nɛ. 25Yesu ŋaa wɩaa dɔnsʋŋ yʋgɛ a pɛ wɩalɩŋ mɩ sɩ ŋmʋnsa hɛ teniŋ deeŋ lɛ. Dɩ mɩ nɛ fa ŋmʋnsɛ wɩalɩŋ kala, leriŋ fa jaŋ tuo dʋnɩa lɛ ba sɩ jaŋ bil tenni-la.

Currently Selected:

Jɔɔŋ 21: SIS

Highlight

Copy