Jɔɔŋ 4
4
Yesu arɩ Samarɩa tɩŋŋaa haala bʋl wɩaa
1Ŋɩɩ nɛ Farisii tɩŋŋaa nɩɩ arɩ Yesu na nɩaa yʋgɛ a kɩɩ Jɔɔŋ, baa tou ʋ fufoba Wɩɩchʋɔlɛ lɩɩŋ. 2(Ama Yesu tɩtɩa bɩ nʋʋkala Wɩɩchʋɔlɛ lɩɩŋ fo, ʋ harɩ-tooroo dʋndʋŋa nɛ.) 3Yesu sɩ nɩa dɩ baa bʋl ŋɩɩ, ʋ sii lɩɩ Judiya tinteeŋ lɛ a mɩɩra mʋ Galilii tinteeŋ. 4Ʋ sɩɩ mʋ Galilii ŋɩɩ, ʋ to Samarɩa tinteeŋ 5a kʋ yi taŋ kʋbala Samarɩa tinteeŋ lɛ baa yɩrɛ Sɩka. Tintee-la Jekɔb fa sɩ joŋo pɩ ʋ nanʋala Josɛf fa kpagɛ nɩmɛ nɛ. 6Jekɔb fa sɩ lu vil-la hɛ nɩmɛ. Yesu sɩ vɛŋ wombiiŋ ŋɩɩ a lɔl, ʋ mʋ hɔŋ vil-la sɛmɛ, dɩ wɩa jɩl nyu-gbaŋa.
7Ŋɩɩ nɛ Samarɩa tɩŋŋaa haal kʋbala kɔ vil-la leriŋ dɩ ʋ ŋaa lɩɩŋ. Yesu bʋla pʋ, “Ŋaa lɩɩŋ pɩmɛ dɩ mɩ nyʋa.” 8Bʋa-la lɛ dɩ ʋ harɩ-tooroo-na mʋ taŋ-la tʋɔŋ dɩ ba yɔɔ kʋdiilee.
9Ŋɩɩ nɛ Samarɩa tɩŋŋaa haal-la pɩɛsɛ Yesu, “Bɛɛ nɛ tɩɩ ŋ-na Juu tɩɩna chɩchɛ dɩ mɩ-na Samarɩa tɩɩna ŋaa lɩɩŋ pɩŋ dɩ ŋ nyʋa?” Juu tɩŋŋaa arɩ Samarɩa tɩŋŋaa bɩ wɩɩ pɛ. Ŋɩɩ nɛ tɩɩ haal-la bʋl ŋɩɩ.
10Ŋɩɩ nɛ Yesu bʋla pʋ, “Dɩ ŋ nɛ fa jɩŋ kʋ-la Wɩa sɩ joŋo pɩ nɩaa, a fa jɩŋ nɩɩ-la sɩ sʋlʋŋ dɩ ŋ ŋaa lɩɩŋ pʋ dɩ ʋ nyʋa, ŋ fa jaŋ sʋlʋ dɩ ʋ pɩŋ lɩɩ-la sɩɩ pɩ nɩaa mɩɩsɩŋ.”
11Ŋɩɩ nɛ haal-la pɩɛsʋ, “Kʋhɩaŋ, ŋ bɩ gʋʋga kɛnɛ dɩ ŋ kaa ŋaa lɩɩŋ, ka vil-la ma luŋ. Nɩɩ lɛ nɛ saa ŋ jaŋ na lɩɩ-la sɩɩ pɩ nɩaa mɩɩsɩŋ? 12La naabalɩma Jekɔb nɛ joŋ viliŋ deeŋ pɩla. Ʋ dɩ ʋ biiriŋ arɩ ʋ pʋsʋŋ kala nyʋa viliŋ deeŋ lɩɩŋ nɛ. Ŋ jaŋ bʋl ŋ kɩɩ Jekɔb nɛɛ?”
13Ŋɩɩ nɛ Yesu bʋla pʋ, “Nʋʋkala sɩ nyʋa lɩɩŋ deeŋ, lɩɩnyʋasʋŋ jaŋ bɩra kɛŋ tɩɩna. 14Ama nɩɩ-la kala sɩ jaŋ nyʋa lɩɩ-la mɩ sɩ jaŋ pʋ, lɩɩnyʋasʋŋ bɩra bɩ jaŋ kɛnʋ da. Lɩɩ-la mɩ sɩ jaŋ pʋ jaŋ bɩrɩmɛ lɩɩ-bulo ʋ tʋɔŋ lɛ a bubul, a pʋ mɩɩsɩŋ sɩ bɩ dɛrɛ.”
15Ŋɩɩ nɛ haal-la bʋla pʋ, “Mɩ Tɩɩna, pɩmɛ lɩɩŋ deeŋ, dɩ lɩɩnyʋasʋŋ bɩra sɩ́ mɩ kɛŋ, dɩ mɩ bɩra sɩ́ kʋ ŋaa lɩɩŋ daha.”
16Ŋɩɩ nɛ Yesu bʋla pʋ, “Mʋ yɩrɛ ŋ bala dɩ ma kɔ daha.”
17Haal-la bʋl, “Mɩ bɩ bala kɛnɛ.”
Ŋɩɩ nɛ Yesu bɩra bʋl, “Wʋtɩtɩɩ nɛ ŋ sɩ sɩ ŋ bɩ bala kɛnɛ. 18Ŋ fa jaa baalaa banɔŋ nɛ, ama ŋ dɩ baal-la sɩ hɛ nɩmɛ lɛɛlɛ sɛnɛ bɩ ŋ bal-tɩtɩɩ ŋaa. Ŋ bʋl wʋtɩtɩɩ nɛ pɩmɛ.”
19Ŋɩɩ nɛ haal-la bʋla pɩ Yesu, “Mɩ Tɩɩna, ʋ naga ŋ ŋaa Wɩa wʋlaabʋllʋ nɛ.” 20Haal-la bɩra bʋla pʋ, “La-na Samarɩa tɩŋŋaa naabalɩmaba ka chʋɔlɛ Wɩa peeliŋ deeŋ nyuŋ nɛ, aŋ ka ma Juu tɩŋŋaa sɩ Jerusalɛm nɛ lee-la sɩ maga dɩ laa chʋɔlɛ Wɩa.”
21Ŋɩɩ nɛ Yesu bʋla pʋ, “Laamɛ dii, bʋa kʋbala jaŋ yi, nɩaa bɩ jaŋ chʋɔlɛ la Nyɩmma Wɩa peeliŋ deeŋ nyuŋ koo Jerusalɛm lɛ. 22Ma-na Samarɩa tɩŋŋaa sɛnɛ bɩ jɩŋ nɩɩ-la ma sɩɩ chʋɔlʋ. La-na Juu tɩŋŋaa jɩŋ Nɩɩ-la la sɩɩ chʋɔlʋ nɛ. Nɩɩ-la lɛ Wɩa sɩ jaŋ to a laa dʋnɩa nɩaa ta, ʋ lɩɩ Juu tɩŋŋaa tʋɔŋ nɛ. 23Ama bʋa kʋbala jaŋ yi, ʋ paala yi nɛ, nɩalɩŋ sɩ jaŋ sɛnɛ chʋɔlɛ Wɩa, ba jaŋ chʋɔlɛ la Nyɩmma Wɩa arɩ wʋtɩtɩɩ, Wɩa Dɩŋ-zɔmʋŋ doluŋ lɛ. Nɩdosunu-la nɛ Wɩa chɩchɛ. 24Wɩa ŋaa dɩma nɛ, nɩalɩŋ sɩɩ chɛ dɩ ba chʋɔlʋ, ʋ maga dɩ ba chʋɔlʋ arɩ wʋtɩtɩɩ, ʋ Dɩŋ-zɔmʋŋ doluŋ lɛ.”
25Ŋɩɩ nɛ haal-la bʋl, “Mɩ jɩma arɩ Nɩɩ-la ba sɩɩ yɩrɛ Kirisito, Nɩɩ-la Wɩa sɩ lɩɩsa, jaŋ kɔ. Dɩ ʋ nɛ kɔ, ʋ jaŋ dagɛla wɩɩ-na kala.” 26Yesu mɩɩra bʋla pʋ, “Mɩ nɛ ŋɩɩ, mɩ nɩɩ bʋl wɩaa ŋ teeŋ ŋɩɩ.”
27Bʋa-la lɛ dɩ Yesu harɩ-tooroo mɩɩra kɔ. Ʋ kperiba ba sɩ kʋ naʋ dɩ ʋʋ bʋl wɩaa haal-la teeŋ. Ama ba kʋŋkala bɩ niiŋ suro a pɩɛsʋ, “Bɛɛ nɛ ŋŋ chɛ ʋ teeŋ?” Koo ba bɩra bɩ pɩɛsa, “Bɛɛ nɛ tɩɩ ŋ bʋbʋl wɩaa haal-la teeŋ?”
28Ŋɩɩ nɛ haal-la leŋ ʋ pupoiŋ nɩmɛ, aŋ mɩɩra mʋ jaŋ tʋɔŋ, a yɩrɛ nɩaa a bʋla pɩba, 29“Má kʋ na baal kʋbala sɩ wuo dagɛ wɩalɩŋ kala mɩ sɩ ŋaa. Nɩa deeŋ nɛ saa ŋaa Kirisito, Nɩɩ-la Wɩa sɩ lɩɩsa, koo?” 30Ŋɩɩ nɛ ba lɩɩ mʋ Yesu teeŋ. 31Bʋa-la lɛ dɩ Yesu harɩ-tooroo ka sʋlʋ, “La kʋhɩaŋ, laa kɩaa dii.” 32Yesu bʋla pɩba, “Mɩ kɛŋ kʋdiilee nɛ dɩ mɩ dii, ama ma bɩ kɩalɩŋ wɩaa jɩŋ.” 33Ŋɩɩ nɛ Yesu harɩ-tooro-la mɩɩra chɩnaa pɩɛsɛ dɔŋɔ, “Nʋʋ nɛ saa kɛŋ kʋdiilee kʋ pʋ koo?”
34Yesu bʋla pɩba, “Mɩ kʋdiilee nɛ dɩ mɩ to nɩɩ-la sɩ tɩmmɛ niiŋ, a tɩŋ tɩntɩmɩɩ-la ʋ sɩ pɩmɛ dɛrɛ. 35Ma sɩ ʋ ha ka chɛnsɩŋ banɛsɛ nɛ, ka dɩ ma ŋaa baga kɩaa hɛ dɔŋɔ lɛ. Mɩ bʋlaa pɩma, má bee na, kɩaa nɛ bɩa a gollima ŋɩɩ dɩ ma ŋaa hɛ dɔŋɔ lɛ. 36Nɩalɩŋ kala sɩ ŋaa kɩalɩŋ hɛ dɔŋɔ lɛ, ba jaŋ laa ba time. Kɩalɩŋ ma ma sɩ ŋaa hɛ dɔŋɔ lɛ, ba ma nɛ ŋaa nɩalɩŋ sɩ laa mɩ wɩaa dii. Ba nɛ jaŋ kɛŋ mɩɩsɩ-la sɩ bɩ dɛrɛ. Ŋɩɩ wɩaa, nɩalɩŋ sɩ kɛsɛ nɩalɩŋ sɩ laa mɩ wɩaa dii arɩ nɩalɩŋ sɩ bʋl Wɩa wɩaa pɩpɩ nɩaa, ba kala tʋɔŋ jaŋ tɔrɛ. 37Wɩɩ-la sɛnɛ ŋaa wʋtɩtɩɩ nɛ. Nʋʋ dɔŋ nɛ bʋl Wɩa wɩaa, nʋʋ dɔŋ ma kɛsɛ nɩalɩŋ sɩ laa mɩ wɩaa dii hɛ dɔŋɔ lɛ. 38Mɩ tɩmma nɛ dɩ ma mʋ ŋaa baga-la kɩaa ma sɩ dee bɩ duo. Nɩaa dɔnsʋŋ nɛ tɩma woruŋ, ka ma ma ŋaa kɩalɩŋ hɛ dɔŋɔ a nɩɩ ba lɔlʋŋ sɩma.”
39Ŋɩɩ nɛ nɩaa yʋgɛ Samarɩa taŋ-la lɛ a laa Yesu wɩaa dii a tɩŋ wɩɩ-la haal-la sɩ bʋla. Ʋ fa sɩ, “Ʋ bʋl wɩalɩŋ kala mɩ sɩ ŋaa nɛ a pɩmɛ.” 40Samarɩa nɩalɩŋ sɩ kɔ Yesu teeŋ, ba sʋlʋ dɩ ʋ chʋa ba teeŋ. Yesu sɛɩ a chʋa nɩmɛ tapʋlaa balɩa. 41Nɩaa bɩra yʋga a laa ʋ wɩaa dii a tɩŋ wɩalɩŋ ʋ sɩ dagɛba wɩaa.
42Ŋɩɩ nɛ nɩalɩŋ bʋla pɩ haal-la, “Lɛɛlɛ la laa ʋ wɩaa dii a tɩŋ la tɩtɩa sɩ nɩɩ ʋ niiŋ wɩaa nɛ, ʋ bɩ naga wɩɩ-la ŋ sɩ bʋla pɩla nɛ tɩɩ. La jɩma arɩ ʋ nɛ sɛnɛ ŋaa dʋnɩa Laataara.”
Yesu vaarɛ kerichi-bal kʋbala bie
43Yesu sɩ chʋa nɩmɛ tapʋlaa balɩa-la, ʋ sii a bɩra mʋ Galilii tinteeŋ. 44Yesu tɩtɩa fa bʋla arɩ nɩaa bɩ Wɩa wʋlaabʋlla ka zil ʋ tɩtɩa jaŋ lɛ. 45Ʋ sɩ mʋ Galilii tinteeŋ ŋɩɩ, ba kɛnʋ woruŋ a tɩŋ wɩalɩŋ kala ʋ sɩ ŋaa ba-na Juu tɩŋŋaa gbiele-la lɛ Jerusalɛm lɛ. Ba ma fa hɛ nɩmɛ.
46Yesu bɩra mɩɩra mʋ lee-la ba sɩɩ yɩrɛ Kena a hɛ Galilii tinteeŋ lɛ, lee-la ʋ fa sɩ kɛŋ lɩɩŋ bɩrɩmɛ sɩnɩŋ. Dɩ tɩntɩnnɩ-hɩaŋ kʋbala fa hɛ taŋ kʋbala lɛ baa yɩrɛ Kapɛnam, ʋ bie fa wʋwɩɩlɛ. 47Ʋ sɩ nɩa dɩ Yesu lɩɩ Judiya tinteeŋ a kɔ Galilii tinteeŋ, ʋ mʋ Yesu teeŋ a sʋlʋ dɩ ʋ kʋ vaarɛ ʋ bie pʋ, dɩ ʋ ka mʋa ka dɩ ʋ sʋʋ.
48Ŋɩɩ nɛ Yesu bʋla pʋ, “See dɩ ma na wʋmagɩlaa arɩ wʋkpuŋkperisiŋ, ma bɩ jaŋ laa dii.” 49Ŋɩɩ nɛ tɩntɩnnɩ-hɩaŋ-la bʋla pʋ, “Mɩ kʋhɩaŋ, kɔ lɩma dɩ mɩ bie sɩ́ sʋʋ.” 50Yesu bʋla pʋ, “Mʋ dɩa, ŋ bie duoro nɛ.” Baal-la laa wɩɩ-la Yesu sɩ bʋla pʋ dii a joŋ ʋ wombiiŋ a mʋmʋ. 51Ʋ sɩɩ mʋ ŋɩɩ, ʋ tɩntɩnna kʋ chemu a bʋla pʋ arɩ bile duoro nɛ. 52Ʋ pɩɛsɛ dɩ ʋ na bʋa-la lɛ ʋ sɩ duoro. Ba bʋla pʋ arɩ dɩamɩŋ wɩɩhɛyɛ, kerifi kʋbala lɛ nɛ waarɩ-la leŋu. 53Bile nyɩmma jɩŋ arɩ bʋa-la lɛ nɛ Yesu bʋla pʋ arɩ ʋ bie kɛŋ mɩɩsɩŋ nɛ. Ŋɩɩ nɛ ʋ dɩ ʋ dɩa nɩaa kala laa ʋ wɩaa dii. 54Wʋmagɩlɛ lɩamɩŋ nɛ ŋɩɩ Yesu fa sɩ ŋaa, ʋ sɩ bɩra lɩɩ Judiya kɔ Galilii tinteeŋ.
Currently Selected:
Jɔɔŋ 4: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
