Jɔɔŋ 7

Yesu mʋ lɛŋŋɛɛ gbiele Jerusalɛm lɛ

1Ŋɩɩ harɩŋ Yesu gʋgɔllɛ Galilii tinteeŋ. Ʋ bɩ chɛ dɩ ʋ mʋ gɔllɛ Judiya tinteeŋ lɛ, bɛɛ wɩaa Juu tɩŋŋaa fa sɩ hɛ Judiya tinteeŋ lɛ ka chɛ dɩ ba kpʋʋ nɛ. 2Juu tɩŋŋaa lɛŋŋɛɛ gbiele-la sɩ yie, 3Yesu ŋaanaa bʋla pʋ, “Sii daha a mʋ Judiya tinteeŋ, dɩ ŋ harɩ-tooroo ma wuo na wʋkpuŋkperisi-la ŋ sɩɩ ŋaa. 4Nɩɩ-la sɩɩ chɛ dɩ nɩaa jɩmʋ, ʋ bɩ faa ŋɩŋaa wɩaa. Ŋ sɩɩ ŋaa wɩaa deemba, leŋ dɩ dʋnɩa nɩaa kala na.” 5Ba tɩtɩa paala bɩ ʋ laa dii, ŋɩɩ nɛ tɩɩ ba bʋl ŋɩɩ.

6Ŋɩɩ nɛ Yesu bʋla pɩba, “Bʋa-la sɩ jaŋ yi dɩ mɩ mʋ gbiele-la, ʋ ha bɩ yie. Ma-na teeŋ bʋa na-kala maga nɛ. 7Dʋnɩa nɩaa bɩ ma bɛrɛ, ama ba bɛrɛ mɩ-na nɛ, bɛɛ wɩaa mɩ vɛnɛ bʋla pɩpɩba arɩ baa ŋaa wʋbɔŋŋɔɔ nɛ. 8Má-na lɩɩ mʋ gbiele-la, mɩ-na ha bɩ mʋ, bɛɛ wɩaa bʋa-la sɩ jaŋ yi dɩ mɩ mʋ ha bɩ yie.” 9Ʋ bʋl ŋɩɩ aŋ hɔŋ Galilii tinteeŋ lɛ.

10Yesu ŋaana-la sɩ mʋ gbiele-la dɛrɛ, Yesu ma sii mʋ, ama ʋ bɩ leŋe nɩaa jɩŋ. 11Juu tɩŋŋaa sɩ hɛ gbiele-la lɛ, ba bee chɩchɛ Yesu gbiele-la lɛ a pɩpɩɛsɛ, “Nɩɩ nɛ baal-la hɛ?”

12Ŋɩɩ nɛ nɩalɩŋ sɩ hɛ gbiele-la leriŋ jesiŋ suomo munso bʋbʋl Yesu wɩaa. Dɔnsʋŋ sɩ, “Ʋ ŋaa nɩzɔŋ nɛ.”

Dɔnsʋŋ ma bɩ sɛyɛ aŋ bʋl, “Ʋʋ nyɩsɛ nɩaa nɛ.” 13Ama ba kala faa fá Juu tɩmma-la nɛ, ŋɩɩ nɛ tɩɩ nʋʋkala bɩ wuo faasa bʋl ʋ wɩaa.

14Gbiele-la sɩ kʋ kpaa magɛ dɔŋɔ, Yesu jʋʋ Wɩa dɩɩ-bal-la a dɩdagɛ nɩaa. 15Ʋ sɩ dagɛ nɩaa ŋɩɩ ŋaa Juu tɩmma-la sɩ jegile nɩɩ wɩalɩŋ wʋkpuŋkpere. Ba sɩ, “Ɛɛ nɛ baala deeŋ jɩŋ wɩaa ŋ-la kɩŋkɛŋ aŋ bɩ karɩma?”

16Ŋɩɩ nɛ Yesu bʋla pɩba, “Wɩalɩŋ mɩ sɩɩ dagʋ, mɩ tɩtɩa doluŋ lɛ dee mɩɩ dagɛ. Nɩɩ-la sɩ tɩmmɛ nɛ dagɛmɛ wɩalɩŋ. 17Nɩɩ-la kala sɩɩ chɛ dɩ ʋ ŋaa wɩɩ-la Wɩa sɩ cho, ʋ jaŋ wuo jɩŋ arɩ wɩalɩŋ mɩ sɩɩ dagʋ lɩɩ Wɩa teeŋ nɛ koo mɩ tɩtɩa doluŋ lɛ nɛ. 18Nɩɩ-la sɩ yie bʋbʋl wɩaa ʋ tɩtɩa doluŋ lɛ yie bʋla chɩchɛ ʋ tɩtɩa yɩrɩŋ nɛ. Ama nɩɩ-la sɩɩ chɛ dɩ nɩɩ-la sɩ tɩmʋ laa yɩrɩŋ, ʋ ŋaa nɩtɩtɩɩ nɛ, ʋ bɩ wɩaa ka nyɩɛ. 19Mosis bil wombie-la sɩ maga dɩ maa to pɩma nɛ. Ama ma kʋŋkala bɩ wɩalɩŋ ka to. Bɛɛ nɛ tɩɩ maa chɛ dɩ ma kpʋmɛ?” 20Ŋɩɩ nɛ nɩ-daŋ-la bʋla pʋ, “Jɩŋ-bɔmʋŋ kɛnɩŋ nɛ. Kʋbɛɛ nɩɩ chɛ dɩ ʋ kpʋŋ?”

21Yesu bʋla pɩba, “Mɩ ŋaa wʋmagɩl bala nɛ ma chɛ-wiesii-la chɛɛŋ, ʋ ŋaa ma wʋkpuŋkpere. 22Mosis fa bʋla pɩma dɩ ma kikeri ma biiriŋ penee. Ʋ dee bɩ ŋɩɩ suomo, ʋ naabalɩmaba nɛ fa suomo ŋaa ŋɩɩ. Ʋ sɩ ŋaa ma naaba wɩɩ ŋɩɩ, ma paala yie keri ma biiriŋ penee chɛ-wiesii-la chɛɛŋ nɛ, dɩ ba lʋlʋŋ nɛ tel ŋɩɩ lɛ. 23Dɩ ma nɛ saa jaŋ wuo to Mosis niiŋ a kikeri ma biiriŋ penee chɛ-wiesii-la chɛɛŋ, dɩ ba lʋlʋŋ nɛ tel chɛ-wiesii-la chɛɛŋ, aŋ bɩ chɛ-wiesii-la kɩsɩŋ ka chei, bɛɛ nɛ saa tɩɩ maa na baanɩŋ a tɩŋ mɩ sɩ ŋaa puwuoloo duori chɛ-wiesii-la chɛɛŋ? 24Dɩ nʋʋ nɛ ŋaa wɩɩ, má sɩ́ guu joŋ cheeriŋ pʋ a tɩŋ ma sɩ bɩɩna arɩ ʋ bɩ woruŋ ŋaa wɩaa. Má beŋ wɩɩ-la tʋɔŋ a jɩŋ ʋ wʋtɩtɩɩ, aŋ-na joŋ cheeriŋ pʋ.”

25Ŋɩɩ nɛ nɩaa dɔnsʋŋ sɩ lɩɩ Jerusalɛm pɩɛsɛ, “Baala deeŋ dee ba chɩchɛ dɩ ba kpʋ ŋɩɩ? 26Na, ʋ nɛ chɩŋ nɩaa tʋɔŋ ŋɩɩ a bʋbʋl wɩaa, ka nʋʋkala bɩ wɩɩ wuo bʋl, koo nɩhɩasɩ-la lɛɛlɛ jɩma arɩ ʋ nɛ ŋaa Kirisito, Nɩɩ-la Wɩa sɩ lɩɩsa? 27Nɩɩ-la Wɩa sɩ jaŋ tɩŋ, dɩ ʋ nɛ kɔ, nʋʋkala bɩ jaŋ jɩŋ ʋ sɩ lɩɩ lee-la, ama la kala nɛ jɩŋ lee-la baala deeŋ sɩ lɩa.”

28Yesu sɩɩ dagɛ nɩaa Wɩa dɩɩ-bal-la tʋɔŋ ŋɩɩ, ŋɩɩ nɛ ʋ faasa pɩɛsɛ, “Ma sɛnɛ jɩmmɛ nɛ, a jɩŋ lee-la mɩ sɩ lɩaa? Mɩ bɩ mɩ tɩtɩa doluŋ lɛ nɛ kɔ, nʋʋ nɛ tɩmmɛ. Nɩɩ-la ma saa sɩ tɩmmɛ ŋaa wʋtɩtɩɩ Tɩɩna nɛ, ma bɩ ʋ jɩŋ. 29Mɩ-na jɩmʋ nɛ, bɛɛ wɩaa mɩ fa hɛ ʋ teeŋ nɛ. Ŋɩɩ nɛ ʋ tɩmmɛ.”

30Ŋɩɩ nɛ ba chɩchɛ dɩ ba kɛnʋ, ama nʋʋkala nɩsɩŋ bɩ ʋ dige, bɛɛ wɩaa bʋa-la lɛ ʋ sɩ jaŋ sʋʋ ha bɩ yie. 31Ama nɩaa yʋga nɩ-daŋ-la tʋɔŋ a laa ʋ wɩaa dii aa pɩɛsɛ, “Ma bɩɩna dɩ Kirisito, Nɩɩ-la Wɩa sɩ jaŋ lɩɩsɛ nɛ kɔ, ʋ jaŋ ŋaa wʋmagɩlaa kɩɩ baala deeŋ?”

Ba tɩŋ nɩaa dɩ ba mʋ kɛŋ Yesu

32Farisii tɩŋŋaa sɩ nɩa dɩ nɩ-daŋ-la munso bʋbʋl Yesu wɩaa ŋɩɩ, ŋɩɩ nɛ ba dɩ Wɩɩsʋllɩ sɩpaalaaraa kʋhɩasɩŋ tɩŋ nɩalɩŋ sɩɩ pɔ Wɩa dɩɩ-balɩŋ dɩ ba mʋ kɛŋ Yesu. 33Yesu bʋla pɩ nɩ-daŋ-la, “Mɩ jaŋ hɛ ma teeŋ tapʋlaa baŋmɛnɛ, aŋ mɩɩra mʋ nɩɩ-la sɩ tɩmmɛ teeŋ. 34Ma jaŋ chɛmɛ ka. Lee-la mɩ sɩ jaŋ hɛ, ma bɩ jaŋ wuo mʋ nɩmɛ.” 35Ŋɩɩ nɛ Juu tɩmma-la pɩpɩɛsɛ dɔŋɔ, “Nɩɩ nɛ ʋʋ chɛ dɩ ʋ mʋ la bɩ jaŋ wuo naʋ? Ʋʋ chɛ ʋ mʋ Giriik tinteeŋ, lee-la Juu tɩŋŋaa sɩ pɩsa hɛ nɛ, a dɩdagɛbaa? 36Ʋ sɩ dɩ la jaŋ chɛʋ ka, a bɩra bʋl dɩ la bɩra bɩ jaŋ wuo mʋ lee-la ʋ sɩ jaŋ hɛ. Ʋ sɩ bʋl ŋɩɩ, ʋ bʋbʋɔŋ nɛ bɛɛ?”

Yesu bʋl wɩaa a tɩgɛ lɩɩ-la sɩɩ pɩ nɩaa mɩɩsɩŋ lɛ

37Gbiele-la chɛ-dɛrɩŋ, tapʋlɩɩ-la nɛ fa ŋaa gbiele-la sɩɩfɩaŋ chɛɛŋ. Ŋɩɩ nɛ Yesu sii chɩŋ a faasa bʋl, “Nɩɩ-la kala lɩɩnyʋasʋŋ sɩ kɛnɛ, má leŋ dɩ ʋ kɔ mɩ teeŋ a nyʋa lɩɩŋ. 38Nɩɩ-la kala sɩ laa mɩ wɩaa dii, ʋ jaŋ nagɛ lɩɩ-bulo ʋ tʋɔŋ lɛ a bubul, arɩ ba sɩ ŋmʋnsɛ ŋɩɩ Wɩa teniŋ tʋɔŋ.” 39Yesu bʋl wɩaa deemba a tɩgɛ Wɩa Dɩŋ-zɔmʋŋ ʋ sɩ jaŋ joŋo hɛ nɩalɩŋ sɩ laa ʋ wɩaa dii lɛ nɛ. Bʋa-la lɛ dɩ ʋ ha bɩ Wɩa Dɩŋ-zɔŋ-la joŋo hɛ ba lɛ, bɛɛ wɩaa ʋ ha bɩ sʋʋŋ lɛ sie dɩ ʋ laa yɩrɩŋ.

Nɩalɩŋ pɔrɛ dɔŋɔ lɛ a tɩŋ Yesu wɩaa

40Nɩ-daŋ-la fa sɩ hɛ nɩmɛ a nɩɩ wɩalɩŋ Yesu sɩ bʋla, ŋɩɩ nɛ ba dɔnsʋŋ bʋl, “Baala deeŋ sɛnɛ ŋaa Wɩa wʋlaabʋllʋ nɛ.” 41Dɔnsʋŋ ma sɩ, “Ʋ nɛ ŋaa Kirisito, Nɩɩ-la Wɩa sɩ lɩɩsa.” Ama dɔnsʋŋ ma sɩ, “Nɩɩ-la Wɩa sɩ lɩɩsa bɩ jaŋ lɩɩ Galilii tinteeŋ. 42Wɩa teniŋ tʋɔŋ ba bʋla arɩ Kirisito, Nɩɩ-la Wɩa sɩ lɩɩsa, jaŋ ŋaa Devit doho nʋʋ nɛ a lɩɩ Bɛtɩlɛhɛm. Devit jaŋ nɛ fa Bɛtɩlɛhɛm.” 43Ŋɩɩ nɛ nɩalɩŋ pɔrɛ dɔŋɔ lɛ a tɩŋ Yesu wɩaa. 44Ba dɔnsʋŋ chɩchɛ dɩ ba kɛŋ Yesu, ama nʋʋkala bɩ nɩsɩŋ joŋo digu.

45Ŋɩɩ nɛ nɩalɩŋ sɩɩ pɔ Wɩa dɩɩ-bal-la ba sɩ tɩma dɩ ba mʋ kɛŋ Yesu mɩɩra mʋ Farisii tɩŋŋaa arɩ Wɩɩsʋllɩ sɩpaalaaraa kʋhɩasɩŋ teeŋ arɩ na-hɩllɩŋ. Ba pɩɛsɛba, “Bɛɛ nɛ tɩɩ ma bɩ ʋ kaa kɔ?”

46Ŋɩɩ nɛ ba bʋl, “Nʋʋkala ha bɩ wɩaa bʋla a nagɛ baala deeŋ sɩɩ bʋl ŋɩɩ.”

47Ŋɩɩ nɛ Farisii tɩmma-la pɩɛsɛba, “Ʋ nyɩsɛ ma ma nɛɛ? 48Ma ha nɩa arɩ la kʋhɩasɩŋ tʋɔŋ koo la Farisii tɩŋŋaa tʋɔŋ kʋbala laa ʋ wɩaa dii? 49Ama nɩ-daŋ deeŋ kala sɩ hilime, ba bɩ wɩalɩŋ Mosis sɩ ŋmʋnsa bil jɩŋ, ŋmɩaŋ jaŋ diiba.” 50Baal kʋbala baa yɩrɛ Nikodemɔs, ʋ ma fa ŋaa Farisii tɩŋŋaa dɔŋɔ nɛ a hɛ ba tʋɔŋ. Ʋ-na fa laa sɩpaaŋ mʋ Yesu teeŋ nɛ aŋ ka. 51Ŋɩɩ nɛ ʋ bʋla pɩba, “La kɩsɩŋ nɛ dɩ la joŋ cheeriŋ a pɩ nʋʋ dɩ ʋ nɛ ŋaa wɩɩ, see dɩ la laa sɩpaaŋ nɩɩ tɩɩna niiŋ, a jɩŋ wɩɩ-la ʋ sɩ ŋaa.” 52Ŋɩɩ nɛ Farisii tɩmma-la pɩɛsʋ, “Ŋ ma ŋaa Galilii tɩɩna nɛɛ? Karɩmɛ Wɩa teniŋ, dɩ ŋ nɛ karɩma, ŋ jaŋ na arɩ Wɩa wʋlaabʋllʋ kala ha bɩ Galilii tinteeŋ lɩa.” 53Ŋɩɩ nɛ ba kala sii pɩsɛ a mʋ ba dɩɩsɩŋ.

Currently Selected:

Jɔɔŋ 7: SIS

Highlight

Copy