Luuk 14

Yesu vaarɛ baala sɩɩ wɩɩlʋ

1Chɛ-wiesii-la chɛɛ kʋbala, Yesu mʋ dɩ ʋ dii kʋdiilee Farisii tɩŋŋaa kʋhɩaŋ kʋbala dɩa lɛ. Ŋɩɩ nɛ nɩaa faasa bibenu woruŋ. 2Dɩ baal kʋbala nɛ hɛ nɩmɛ a kɔ Yesu teeŋ. Ʋ yaraa kala fa ŋmɛrɛ nɛ. 3Ŋɩɩ nɛ Yesu pɩɛsɛ Wɩa teniŋ kerichiba arɩ Farisii tɩŋŋaa a bʋl, “Ʋ kɛŋ wombiiŋ nɛɛ dɩ la vaarɛ nyanyal tɩŋŋaa chɛ-wiesii-la chɛɛŋ koo?” 4Ba bɩ wɩɩkala bʋla. Ŋɩɩ nɛ Yesu kɛŋ baal-la a vaarʋ aŋ taʋ ʋ mʋ dɩa, 5aŋ bɩra pɩɛsɛba, “Dɩ ŋ bie koo ŋ nɛŋ nɛ tel viliŋ lɛ chɛ-wiesii-la chɛɛŋ, ma tʋɔŋ kʋbɛɛ nɛ bɩ jaŋ lɛrɛ lɩɩsʋ?” 6Ba bɩ wɩɩkala wuo bʋla pʋ.

Yesu bʋla pɩ nɩaa dɩ ba kɛŋ ba tɩtɩa muuri, a kɛŋ zile, a hʋhʋɔrɛ nɩaa

7Yesu sɩ beŋ nɩalɩŋ ba sɩ yɩra baa jʋʋ dɩa ŋɩɩ, ʋ na dɩ ba jʋʋ chɩchɛ ba hɔŋ nɩbalaa dɩ-hɔnɔɔ. Ŋɩɩ nɛ ʋ magɛ namaga a pɩba a bʋl, 8“Dɩ nʋʋ nɛ yɩrɩŋ dɩ ŋ kɔ ʋ hajaarɩ gbiele a dii kʋdiilee, sɩ́ mʋ bagɩsa joŋ nɩbalaa dɩhɔnʋŋ a hɔŋ. Dɩa tɩɩna jaŋ wuo yɩrɛ nʋʋ ma sɩ kɩɩŋ bɩra dɩ ʋ hɔŋ nɩmɛ. 9Nɩɩ-la sɩ yɩrɛma jaŋ wuo kʋ bʋla pɩŋ, ‘Sʋrɩsa mʋ, ka dɩ ŋ dɔŋɔ tɩɩna hɔŋ ŋ dɩhɔnʋŋ.’ Ŋɩɩ nɛ ŋ jaŋ sii a mʋ hɔŋ nɩbiisiŋ dɩhɔnʋŋ. Hɩɩsɩŋ jaŋ kɛnɩŋ woruŋ. 10Ŋɩɩ nɛ saa, dɩ ba nɛ yɩrɩŋ dɩ ŋ kʋ dii kʋdiilee, dɩ ŋ nɛ mʋa, hɔŋ nɩbiisiŋ dɩhɔnʋŋ. Dɩ nɩɩ-la sɩ yɩrɩŋ nɛ kʋ naŋ, ʋ jaŋ bʋla pɩŋ a bʋl, ‘Mɩ nandɔŋ, sii hɔŋ dɩ-hɔŋ-zɔmʋŋ.’ Ʋ nɛ ŋaa ŋɩɩ, ʋ jaŋ ziliŋ nɩalɩŋ kala sɩ hɛ nɩmɛ tʋɔŋ. 11Nɩɩ-la kala sɩɩ bigisi ʋ tɩtɩa lɛ, Wɩa jaŋ kɛnʋ muuri. Ka nɩɩ-la ma sɩ kɛŋ ʋ tɩtɩa muuri, Wɩa jaŋ ŋaa dɩ ʋ yʋgɛ.”

12Ŋɩɩ nɛ Yesu bʋla pɩ nɩɩ-la sɩ yɩrʋ dɩ ʋ kʋ dii kʋdiilee, “Dɩ ŋ nɛ ŋaa kʋdiilee, sɩ́ ŋ nandɔnsʋŋ koo ŋ naambiiriŋ yɩrʋ, sɩ́ ŋ dɩa nɩaa koo ŋ dɔnsʋŋ tɩŋŋaa sɩ kɛŋ kɩaa ma yɩrʋ. Ba ma jaŋ wuo yɩrɩŋ maachie dɩ ŋ kʋ dii kʋdiilee ba teeŋ a tiŋ ŋ chɩmɩŋ. 13Dɩ ŋ nɩɩ yɩrɛ nɩaa dɩ ba kʋ gbieli gbiele a dii kʋdiilee, yɩrɛ summoo arɩ nɩalɩŋ naasɩŋ koo nɩsaa sɩ sʋba arɩ nyʋlɩmaa kala. 14Dɩ ŋ nɛ ŋaa ŋɩɩ, Wɩa ma jaŋ pɛŋ lɛ, bɛɛ wɩaa ba-na bɩ jaŋ wuo tiŋ ŋ chɩmɩŋ. Wɩa jaŋ tiŋ ŋ chɩmɩŋ tapʋlɩɩ-la tʋɔpʋl tɩŋŋaa sɩ jaŋ sii sʋʋŋ lɛ.”

Yesu magɛ namaga a tɩgɛ baal-la sɩ ŋaa ba gbieli gbiele lɛ

Mat. 22.1-10

15Yesu sɩ bʋl wɩɩŋ deeŋ, ŋɩɩ nɛ nɩalɩŋ sɩ hɔnɔɔ dii kɩalɩŋ dɔŋɔ bʋla pɩ Yesu a bʋl, “Nɩalɩŋ sɩ jaŋ dii kɩaa Wɩa kuorii-la tʋɔŋ, ba tʋɔŋ jaŋ tɔrɛ.”

16Ŋɩɩ nɛ Yesu magɛ namaga a bʋl, “Baal kʋbala nɛ fa hɛ nɩmɛ. Ʋ ŋaa ba gbieli gbieli-bal. Ŋɩɩ nɛ ʋ yɩrɛ nɩaa yʋgɛ dɩ ba kɔ dɩ ba gbieli. 17Gbiele-la sɩ ŋaa siri, ʋ tɩŋ ʋ tɩntɩnna dɩ ʋ mʋ bʋla pɩ nɩalɩŋ ʋ sɩ yɩra arɩ ba ŋaa siri nɛ dɩ ba gbieli gbiele-la. 18Ʋ sɩ mʋ yɩrɛba, ba kala vɩa. Nɩ-bumbuŋ sɩ dɩ ʋ yɔɔ baga nɛ a chɩchɛ dɩ ʋ mʋ na, ŋɩɩ wɩaa ʋ bɩ jaŋ wuo kɔ. 19Dɔŋɔ ma sɩ dɩ ʋ ma yɔɔ nɛ-belliŋ fii nɛ a ma kaa lɩɩ dɩ ʋ kaa mʋ pɛrɛ na. Ŋɩɩ wɩaa ʋ ma bɩ jaŋ wuo kɔ. 20Dɔŋɔ tɩɩna ma sɩ dɩ lɛɛlɛ nɛ ʋ jaa haala. A tɩŋ ŋɩɩ wɩaa ʋ ma bɩ jaŋ wuo kɔ. 21Ŋɩɩ nɛ tɩntɩnnʋ-la mɩɩra mʋ bʋla pɩ ʋ kʋhɩaŋ-la. Ʋ sɩ nɩɩ ŋɩɩ, ʋ baanɩŋ sii kɩŋkɛŋ. Ŋɩɩ nɛ ʋ bɩra bʋla pʋ, ‘Lɩɩ mʋ wombiiŋ niiŋ lɩma arɩ jaŋ tʋɔŋ wombii-biisiŋ a yɩrɛ summoo arɩ gbɛrɩgɛɛ arɩ nyʋlɩmaa, arɩ nɩalɩŋ naasɩŋ arɩ nɩsaa sɩ sʋba.’ 22Lɩma lɩma dɩ baal-la ʋ sɩ tɩma lɩa a yɩrɛ nɩalɩŋ ba kʋ jʋʋ, ka ʋ jʋʋ bʋla pɩ ʋ kʋhɩaŋ-la arɩ nɩalɩŋ kɔ nɛ, ama ba ha bɩ yʋgɛ. 23Ŋɩɩ nɛ baal-la bɩra bʋla pɩ ʋ tɩntɩnnʋ-la, ‘Bɩra lɩɩ bagɩsɩŋ wombiee arɩ wombii-biisiŋ kala a yɩrɛ nɩaa dɩ ba kʋ jʋʋ, dɩ mɩ dɩa su.’ 24Mɩ jaŋ bʋla pɩma arɩ nɩalɩŋ mɩ sɩ yɩra, ba kʋŋkala bɩ jaŋ dii kʋdiilee deemba.”

Wɩɩ-la ŋ sɩ jaŋ ŋaa aŋ-na kʋ ŋaa Yesu harɩ-tooro

Mat. 10.37-38

25Yesu fa sɩɩ mʋ wombiiŋ ŋɩɩ, nɩ-daŋ to ʋ harɩŋ. Ŋɩɩ nɛ ʋ daasɛ harɩŋ a bʋla pɩba, 26“Dɩ nʋʋkala nɛ kɔ mɩ teeŋ, ʋ bɩ jaŋ wuo ŋaa mɩ harɩ-tooru, see ʋ bɛrɛ ʋ nyɩmma arɩ ʋ naaŋ arɩ ʋ haala arɩ ʋ biiriŋ arɩ ʋ naambiiriŋ arɩ ʋ tɩtɩa wʋŋaalaa kala. 27Nɩɩ-la kala sɩ bɩ ʋ tɩtɩa daagɛsɛ baasɛ aŋ to mɩ harɩŋ, ʋ bɩ maga dɩ ʋ ŋaa mɩ harɩ-tooru. 28Dɩ ma kʋŋ nɩɩ chɛ dɩ ŋ saa dii-leŋii, ŋ jaŋ laa sɩpaaŋ hɔŋ a bɩɩnɛ a na dɩ moribiee maga nɛ dɩ ŋ kaa saa dɩa-la dɛrɛ. 29Dɩ ŋ nɛ bɩ ŋɩɩ ŋaa aŋ suomo bil dɩa-la gentine aŋ bɩra bɩ moribiee kɛnɛ dɩ ŋ saa dɩa-la dɛrɛ, nɩaa jaŋ na wɩɩ-la ŋ sɩ ŋaa. Ba jaŋ mʋmɔmʋŋ. 30Ba jaŋ bʋl, ‘Baala deeŋ suomo dɩ ʋ saa dɩa nɛ aŋ bɩ wuo saa dɛrɛ.’ ”

31Ŋɩɩ nɛ Yesu bɩra magɛ namaga dɔŋɔ a bʋl, “Kuoro nɛ sie a kɛŋ nɩaa bʋɩ fii a kaa mʋ dɩ ʋ yuo ʋ kuoru dɔŋɔ. Ka kuoru-la ma kɛŋ nɩaa bʋɩ mara nɛ. Ʋ jaŋ laa sɩpaaŋ hɔŋ a bɩɩna na dɩ ʋ nɛ jaŋ wuo yuo dii kuoru-la aŋ-na mʋ yuou. 32Dɩ ʋ nɛ bɩ jaŋ wuo dii kuoru-la, ʋ jaŋ tɩŋ tɩndaaraa dɩ ba mʋ cheŋ kuoru-la dɔŋɔ dɩ ba hɛ dɩ-bolii, a leŋ dɩ ba sʋlʋ dɩ ba sɩŋ.” 33Ŋɩɩ nɛ Yesu bɩra bʋla pɩba, “Ŋɩɩ tɩtɩa nɛ ma kʋŋkala bɩ jaŋ wuo ŋaa mɩ harɩ-tooro, see ŋ vɩa kʋŋkala ŋ sɩ kɛnɛ ta.

Yesu bʋl wɩaa a tɩgɛ yɩsɩŋ lɛ

Mat. 5.13; Maak 9.50

34Yɩsɩŋ sɩma, ama dɩ ʋ nɛ sɛbɩsɛ, ŋ bɩra bɩ jaŋ wuo ŋaa dɩ ʋ sɩŋ. 35Ŋ bɩra bɩ jaŋ wuo joŋo hɛ baga lɛ dɩ ʋ leŋ dɩ kɩaa wasɛ. Ʋ bɩra bɩ nyʋʋrʋŋ kala kɛnɛ. Ba yie joŋo yuo ta nɛ. Ma dɩgɩlaa tɩŋŋaa, má wuoli ma dɩgɩlaa a nɩɩ wɩaa deemba.”

Currently Selected:

Luuk 14: SIS

Highlight

Copy