Luuk 22
22
Ba vʋʋra dɩ ba kpʋ Yesu
Mat. 26.1-5; Maak 14.1-2; Jɔɔŋ 11.45-53
1Bʋa-la lɛ ba sɩ yie gbieli dɩɩsɩŋ kiele bal gbiele-la fa kpaga nɛ, gbiele-la lɛ ba sɩ yie dii boroboro-la sɩ bɩ sɩbʋrʋŋ kɛnɛ. 2Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba wʋwalɩmɛ dɩ ba na wombii-la ba sɩ jaŋ to a kpʋ Yesu dɩ nɩalɩŋ bɩ jɩŋ, bɛɛ wɩaa baa fá nɩalɩŋ nɛ.
Judas sɛyɛ dɩ ʋ joŋ Yesu yallɛ
Mat. 26.14-16; Maak 14.10-11; Jɔɔŋ 11.45-53
3Ŋɩɩ nɛ Sɩtaanɩ kʋ jʋʋ Yesu harɩ-tooroo fii arɩ balɩa-la dɔŋɔ ba sɩɩ yɩrɛ Judas Ɩsɩkarɔt. 4Ŋɩɩ nɛ Judas sii mʋ bʋla pɩ Wɩɩsʋllɩ sɩpaalaaraa kʋhɩasɩŋ arɩ Wɩa dɩɩ-bal-la kʋhɩasɩŋ ŋɩɩ ʋ sɩ jaŋ to a kɛŋ Yesu yalla pɩba. 5Ba tʋɔŋ tɔrɛ. Ba sɛɩ arɩ ba jaŋ pʋ moribiee. 6Ŋɩɩ nɛ Judas sɛɩ, a suomo chɩchɛ wombii-la ʋ sɩ jaŋ to a kɛŋ Yesu yalla pɩba dɩ nɩalɩŋ bɩ jɩŋ.
Yesu arɩ ʋ harɩ-tooroo dii dɩɩsɩŋ kiele bal gbiele kʋdiilee
Mat. 26.17-25; Maak 14.12-21; Jɔɔŋ 13.21-30
7Ŋɩɩ nɛ gbiele-la lɛ ba sɩ yie dii boroboro sɩ bɩ sɩbʋrʋŋ kɛnɛ yi, bʋa-la lɛ sɩ maga dɩ ba kpʋ pie-bie-la ba sɩ jaŋ kaa ŋaa gbiele-la kʋdiilee. 8Ŋɩɩ nɛ Yesu tɩŋ Pɩɩta arɩ Jɔɔŋ a bʋl dɩ ba mʋ ŋaa ba dɩɩsɩŋ kiele bal gbiele kʋdiilee dɩ ba dii. 9Ŋɩɩ nɛ ba pɩɛsʋ, “Nɩɩ nɛ ŋŋ chɛ dɩ la ŋaa kʋdiile-la?” 10Ʋ bʋla pɩba, “Bee na, dɩ ma nɛ jʋʋ tabal-la tʋɔŋ, ma jaŋ cheŋ baal kʋbala dɩ ʋ chʋŋ nyuvie arɩ lɩɩŋ. Má to ʋ harɩŋ jʋʋ dɩa-la ʋ sɩɩ jʋʋ. 11Dɩ ma nɛ jʋa, má bʋla pɩ dɩa-la tɩɩna, ‘La kʋhɩaŋ sɩ la pɩɛsɩŋ dɩ nɩɩ lɛ nɛ nʋhʋɔraa dɩa hɛ, dɩ ʋ dɩ ʋ harɩ-tooroo jʋʋ hɔnɔ dii dɩɩsɩŋ kiele bal gbiele-la kʋdiilee?’ 12Ʋ jaŋ dagɛma lusuŋ nyuŋ dɩɩ-bal kʋbala, ba wasɛ ʋ kala nɛ. Lee-la nɛ ma jaŋ ŋaa kʋdiile-la.” 13Ŋɩɩ nɛ ba mʋ a na wɩalɩŋ kala ʋ sɩ bʋla pɩba arɩ ba jaŋ na, a ŋaa dɩɩsɩŋ kiele bal gbiele kʋdiile-la.
Kʋdiile-la la sɩ jaŋ dii a liliisi Yesu wɩaa
Mat. 26.26-30; Maak 14.22-26; 1 Kɔr. 11.23-25
14Bʋa-la sɩ yie dɩ ba dii kʋdiile-la, Yesu arɩ ʋ nanzɔɔba kala hɔŋ dɩ ba dii kɩaa. 15Ŋɩɩ nɛ Yesu bʋla pɩba, “Mɩ fa paala cho dɩ la dɩ ma dii kɩaa deemba nɛ, aŋ ka dɩ mɩ-na na hɛɛŋ. 16Mɩ jaŋ bʋla pɩma arɩ mɩ bɩra bɩ jaŋ kɔ dɩ mɩ dii kʋdiilee deemba, a kaa mʋ yi bʋa-la lɛ Wɩa kuorii-la sɩ jaŋ kɔ.”
17Ŋɩɩ nɛ ʋ joŋ nyʋnyʋala arɩ sɩnɩŋ a lɔllɛ Wɩa aŋ joŋo pɩ ʋ nanzɔɔba-la aŋ bʋl, “Má laa nyʋnyʋala deeŋ arɩ sɩnɩŋ a kaa kpaa ma tɩtɩa. 18Mɩ bʋlaa pɩma, mɩ bɩra bɩ jaŋ kɔ dɩ mɩ nyʋa sɩnɩŋ deeŋ, a kaa mʋ yi bʋa-la lɛ Wɩa kuorii-la sɩ jaŋ kɔ.”
19Ŋɩɩ nɛ Yesu bɩra joŋ boroboro a lɔllɛ Wɩa aŋ kaa chɔgɛ chɔgɛ, a joŋo pɩba aŋ bʋl, “Mɩ yaraa nɛ ŋɩɩ, mɩ joŋo pɩ Wɩa a tɩŋ ma wɩaa, má laa dii. Maa ŋaa ŋɩɩ a liliisi mɩ wɩaa.”
20Ba sɩ dii kɩalɩŋ dɛrɛ, ʋ bɩra joŋ nyʋnyʋala arɩ sɩŋ-la a pɩba aŋ bʋl, “Nyʋnyʋala arɩ sɩnɩŋ deeŋ ŋaa nii-falɩɩ nɛ Wɩa hɛ ʋ dɩ ma pɛgɛ. Mɩ chalɩŋ sɩ jaŋ jaasɛ ma wɩaa nɛ tɩɩ Wɩa ta nii-la. 21Má bee na, nɩɩ-la sɩ jaŋ kɛmmɛ yallɛ hɛ la tʋɔŋ nɛ, la kala didii kɩaa. 22Mɩ-na Nuhuobiine Bie, mɩ jaŋ sʋʋ arɩ Wɩa sɩ dagɛ ŋɩɩ, ama nɩɩ-la sɩ jaŋ jommi yallɛ, ʋ jaŋ na hɛɛŋ yʋgɛ.” 23Ŋɩɩ nɛ Yesu nanzɔɔba-la suomo pɩpɩɛsɛ dɔŋɔ arɩ ba tʋɔŋ kʋbɛɛ nɛ jaŋ ŋaa ŋɩɩ?
Yesu harɩ-tooroo kɛŋ ba tʋɔŋ kʋhɩaŋ wɩaa kaa lɩlɛrɛ
24Ŋɩɩ nɛ Yesu harɩ-tooroo kɛŋ ba tʋɔŋ kʋhɩaŋ wɩaa kaa lɩlɛrɛ. 25Yesu bʋla pɩba, “Nɩalɩŋ sɩ bɩ Juu tɩŋŋaa ŋaa kɛŋ ba doluŋ kaa hɔŋ ba nɩaa nyuŋ nɛ. Kuoroo dɔnsʋŋ sɩɩ beŋ nɩaa, ba cho dɩ nɩalɩŋ ba sɩɩ beŋ kɛmba kaa yɩyɩrɛ nɩzɔmɔ. 26Ama ʋ bɩ maga dɩ ma ŋɩŋaa ŋɩɩ. Ʋ maga dɩ ma tʋɔŋ kʋhɩaŋ nɛ bɩrɩmɛ hambie, dɩ ma sɩpaalaara ma nagɛ ma tɩntɩnna. 27Dɩ nʋʋ nɛ hɔnɔ, aŋ ka ʋ dɔŋɔ ŋaa kʋdiilee pʋ dɩ ʋ didii, ʋ dɩ nɩɩ-la sɩ ŋaa kʋdiile-la pʋpʋ, ba tʋɔŋ kʋbɛɛ nɛ yʋga? Nɩɩ-la sɩ hɔnɔ, ka ba ŋaa kʋdiilee pʋpʋ, ʋ nɛ yʋga. Ama mɩ-na hɛ ma tʋɔŋ a tɩma pɩpɩma nɛ.
28Ma chɩna gbɛrɛmɛ nɛ mɩ wʋwalɩmaa kala lɛ. 29Mɩ Nyɩmma pɩmɛ doluŋ nɛ dɩ mɩ dii kuoruŋ. Ŋɩɩ tɩtɩa nɛ mɩ ma jaŋ pɩma doluŋ dɩ ma dii kuoruŋ. 30Mɩ dɩ ma kala jaŋ dii kʋdiilee Wɩa kuorii-la tʋɔŋ. Ma jaŋ hɔŋ kuoru kpasɩnɩŋ nyuŋ a dii Iziral doho doho fii arɩ balɩa-la sarɩya.”
Yesu bʋla pɩ Pɩɩta arɩ ʋ jaŋ bʋl dɩ ʋ bɩ ʋ jɩŋ
Mat. 26.31-35; Maak 14.27-31; Jɔɔŋ 13.36-38
31Ŋɩɩ nɛ Yesu bʋla pɩ Saamɔŋ Pɩɩta, “Saamɔŋ, Saamɔŋ, Sɩtaanɩ laa wombiiŋ nɛ dɩ ʋ magɩsɛ ma kala, dɩ ʋ pɔrɛ nɩzɔŋŋɔɔ nɩbɔŋŋɔɔ lɛ, a nagɛ paara sɩ yie chaarɛ mɩɩ-jɔrʋŋ ta, aŋ ka mɩɩ-biiŋ ŋɩɩ. 32Ama mɩ chʋɔlɛ Wɩa pɩ ŋ-na Saamɔŋ nɛ dɩ ŋ Wɩa laa diiniŋ sɩ́ lɛl. Dɩ ŋ nɛ mɩɩra kɔ mɩ teeŋ, pɛ ŋ naambiiriŋ ma lɛ dɩ ba chɩŋ ba sɩ laa Wɩa dii naaŋ lɛ woruŋ.”
33Ŋɩɩ nɛ Pɩɩta bʋla pʋ, “Mɩ Tɩɩna, dɩ ba nɛ tɔŋ dɩa ma, mɩ ma ŋaa siri nɛ dɩ ba tɔmɛ. Dɩ ba nɛ jaŋ kpʋŋ ma, mɩ ma ŋaa siri nɛ dɩ mɩ sʋʋ.”
34Ŋɩɩ nɛ Yesu bʋla pɩ Pɩɩta, “Pɩɩta, ji-bele bɩ jaŋ yel jɩnɩŋ, aŋ ka dɩ ŋ bʋl naansɩɩŋ butori arɩ ŋ bɩ mɩ jɩŋ.”
Yesu bʋl moribiee arɩ tokobiee wɩaa pɩ ʋ harɩ-tooroo
35Ŋɩɩ nɛ Yesu pɩɛsɛ ʋ harɩ-tooroo, “Bʋa-la lɛ mɩ sɩ tɩmma, ma lɩɩ aŋ bɩ moribiee koo sʋllɩ-gbansɩŋ koro, a bɩ nɛntɛŋŋɛɛ tʋŋ bʋlɩa bʋlɩa ma koro, ma sɩ mʋ ŋɩɩ, ma chɛ kʋŋ nɛ kaa?”
Ba bʋl dɩ ba bɩ kʋŋkala chɛ ka.
36Ŋɩɩ nɛ Yesu bʋla pɩba, “Ama lɛɛlɛ ma kʋ-la kala sɩ kɛŋ moribiee lʋaga koo sʋllɩ-gbaŋa, ʋ maga dɩ ʋ joŋ. Ma kʋ-la ma kala sɩ bɩ tokobiiŋ kɛnɛ, ʋ maga dɩ ʋ joŋ ʋ gɛrɩ-balɩŋ yallɛ nɛ a yɔɔ dɔŋɔ. 37Ŋɩɩ nɛ ba ŋmʋnsɛ Wɩa teniŋ tʋɔŋ. Ba bʋla arɩ ba jaŋ kɛnʋ pɛ wʋbɔŋ ŋɩŋaaraa lɛ. Wɩaa deemba ba ŋmʋnsa a tɩgɛ mɩ lɛ nɛ. Ba kala jaŋ ŋaa mɩ lɛ, bɛɛ wɩaa wɩalɩŋ kala ba sɩ ŋmʋnsa a tɩgɛ mɩ lɛ, ba kala jaŋ sɛnɛ ŋaa a dɛrɛ.” 38Ŋɩɩ nɛ ʋ harɩ-tooroo bʋla pʋ, “La Tɩɩna, bee na, tokobiee balɩa nɛ ŋ-la.” Ŋɩɩ nɛ Yesu bʋla pɩba, “Má leŋ wɩɩ-la magɛ ŋɩɩ.”
Yesu chʋɔlɛ Wɩa peel-la nyuŋ ba sɩɩ yɩrɛ Olif
Mat. 26.36-46; Maak 14.32-42
39Ŋɩɩ nɛ Yesu lɩɩ Jerusalɛm lɛ a jɩl peel-la ba sɩɩ yɩrɛ Olif nyuŋ, arɩ ʋ sɩ vɛnɛɛ ŋaa ŋɩɩ. Ŋɩɩ nɛ ʋ harɩ-tooroo to ʋ harɩŋ mʋ. 40Ba sɩ yi lee-la, ʋ bʋla pɩba, “Má chʋɔlɛ Wɩa, dɩ Sɩtaanɩ nɛ magɩsɛma dɩ ʋ sɩ́ ma wuo.” 41Ʋ sɩ bʋl ŋɩɩ dɛrɛ, ʋ kieli ʋ harɩ-tooro-la a mʋ sɩpaaŋ mʋapɩlɩɩ, a tuu kpirimi a chʋɔlɛ Wɩa bʋl, 42“Mɩ Nyɩmma, dɩ ŋ tʋɔtɔrʋŋ lɛ nɛ, lɩɩsɛ hɛɛ-la sɩɩ kɔ mɩ lɛ. Ama mɩ-na tʋɔtɔrʋŋ lɛ dee, ŋ-na tʋɔtɔrʋŋ lɛ nɛ.” [ 43Ŋɩɩ nɛ Wɩa tɩndaara lɩɩ wɩa-nyuŋ a kʋ tuu ʋ teeŋ a pʋ doluŋ. 44Ʋ tʋɔŋ fa faasa chei nɛ woruŋ. Ŋɩɩ nɛ ʋ chʋɔlɛ Wɩa arɩ sɩɩfɩɛsɩŋ, ʋ suoluŋ paala nagɛ chalɩŋ a tutuu tinteeŋ.] 45Ʋ sɩ chʋɔlɛ Wɩa dɛrɛ, ʋ sii a mɩɩra mʋ ʋ harɩ-tooroo teeŋ, dɩ ba pɩŋ doŋ, bɛɛ wɩaa ba tʋɔŋ cheye nɛ woruŋ. 46Ŋɩɩ nɛ ʋ pɩɛsɛba, “Ma sɛnɛ pɩŋ nɛɛ? Má sii chʋɔlɛ Wɩa, dɩ Sɩtaanɩ nɛ kʋ magɩsɛma, dɩ ʋ sɩ́ ma wuo.”
Ba kɛŋ Yesu
Mat. 26.47-56; Maak 14.43-50; Jɔɔŋ 18.3-11
47Yesu fa sɩɩ bʋl wɩaa ŋɩɩ, ʋ niiŋ ha bɩ tinteeŋ tele dɩ nɩ-daŋ kɔ. Yesu harɩ-tooroo fii arɩ balɩa-la dɔŋɔ ba sɩɩ yɩrɛ Judas nɛ kɛmba kɔ. Judas mʋ Yesu teeŋ a guoru. 48Ŋɩɩ nɛ Yesu pɩɛsʋ, “Judas, ŋ sɛnɛ guorimi ŋ-la nɛ dɩ ŋ joŋ mɩ-na Nuhuobiine Bie yallɛɛ?”
49Yesu harɩ-tooro-la fa sɩ hɛ nɩmɛ a na wɩɩ-la sɩɩ ŋaa, ŋɩɩ nɛ ba pɩɛsɛ Yesu, “La Tɩɩna, ŋŋ chɛ dɩ la taba arɩ la tokobie-la nɛɛ?” 50Ŋɩɩ nɛ Yesu harɩ-tooroo dɔŋɔ joŋ tokobiiŋ, a ta nɩalɩŋ dɔŋɔ nadiiŋ dɩgɩlɩŋ keri. Baal-la fa ŋaa Wɩɩsʋllɩ sɩpaalaara kʋhɩaŋ tɩntɩnnʋ nɛ.
51Ŋɩɩ nɛ Yesu bʋl dɩ ʋ maga nɛ, dɩ ba leŋ. Ʋ sɩ bʋl ŋɩɩ, ʋ digi baal-la dɩgɩl-la lɛ a ŋaa ʋ fɩɛlɛ.
52Ŋɩɩ nɛ Yesu pɩɛsɛ Wɩɩsʋllɩ sɩpaalaaraa kʋhɩasɩŋ arɩ Wɩa dɩɩ-bal-la kʋhɩasɩŋ arɩ ba taŋ kʋhɩasɩ-la sɩ kɔ dɩ ba kɛnʋ, “Mɩ ŋaa wʋcheeru nɛ ma paa tokobiee arɩ toŋguloo a kʋkɔ dɩ ma kɛmmɛɛ? 53Mɩ dɩ ma kala nɛ fa hɛ Wɩa dɩɩ-bal-la lɛ tapʋlɩɩ kala, aŋ ka ma bɩ walɩma dɩ ma kɛmmɛ nɩmɛ. Ama bʋa deeŋ lɛ nɛ birimiŋ tɩɩna Sɩtaanɩ pɩma doluŋ ma wuo kɔ dɩ ma kɛmmɛ.”
Pɩɩta sɩ ʋ bɩ Yesu jɩŋ
Mat. 26.57-58, 69-75; Maak 14.53-54, 66-72; Jɔɔŋ 18.12-18, 25-27
54Ŋɩɩ nɛ ba kɛŋ Yesu a kaa mʋ Wɩɩsʋllɩ sɩpaalaara kʋhɩaŋ dɩa, ka Pɩɩta daa tuto ba harɩŋ. 55Dɩ ba hɛ nyiniŋ kaala tʋtʋɔbaanɩŋ a hɔnɔ wiwieni. Pɩɩta ma mʋ pɛ ba lɛ. 56Toli-bie kʋbala sɩ ŋaa dɩa-la tɩntɩnnʋ to nyiŋ-la pʋlʋmʋŋ lɛ a na Pɩɩta, a benu jim, aŋ bʋl, “Baala deeŋ ma faa to Yesu harɩŋ nɛ.” 57Ŋɩɩ nɛ Pɩɩta sɩ, “Haal, mɩ paala bɩ ʋ jɩŋ.” 58Mʋapɩlɩɩ dɩ baal kʋbala ma naʋ a bʋl, “Ŋ ma ŋaa ba dɔŋɔ nɛ.” Ŋɩɩ nɛ Pɩɩta bʋl, “Nandɔŋ, mɩ dee.” 59Ʋ bɩ diene bɩra dɩ baal dɔŋ ma nɛ ŋɩɩ a bʋl, “Wʋtɩtɩɩ, baala deeŋ ŋaa Yesu harɩ-tooroo dɔŋɔ nɛ, bɛɛ wɩaa ʋ ma ŋaa Galilii tɩɩna nɛ.” 60Ŋɩɩ nɛ Pɩɩta bɩra bʋl, “Nandɔŋ, mɩ paala bɩ wɩɩ-la ŋ sɩɩ bʋl jɩŋ.” Pɩɩta sɩɩ bʋl ŋɩɩ, ʋ niiŋ ha bɩ tinteeŋ tele, dɩ ji-bele yele. 61Ŋɩɩ nɛ La Tɩɩna daasɛ a beŋ Pɩɩta. Ʋ liisi wɩɩ-la Yesu fa sɩ bʋla, “Ka dɩ ji-bele-na yel jɩnɩŋ, ŋ jaŋ bʋl naansɩɩŋ butori arɩ ŋ bɩ mɩ jɩŋ.” 62Ŋɩɩ nɛ Pɩɩta lɩɩ a faasa yel.
Ba sieri Yesu lɛ aŋ ŋmobu
Mat. 26.67-68; Maak 14.65
63Ŋɩɩ nɛ nɩalɩŋ sɩ pɔ Yesu sieri ʋ lɛ aŋ ŋmobu. 64Ba vɔɔ ʋ sɩaa tɔ a ŋmobu aŋ pɩɛsʋ, “Dagɛ nɩɩ-la sɩ ŋmobuŋ.” 65Ba bʋl wɩaa ma yʋgɛ a tʋʋsʋ.
Ba kɛŋ Yesu kɔ nɩalɩŋ sɩ yie hilime vʋvʋʋrɛ wɩaa sɩpaaŋ
Mat. 26.59-66; Maak 14.55-64; Jɔɔŋ 18.19-24
66Taŋ sɩ pʋla, Juu tɩŋŋaa kʋhɩasɩŋ arɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba hilimi aŋ leŋ ba kɛŋ Yesu kɔ ba sɩpaaŋ. 67Ŋɩɩ nɛ ba pɩɛsʋ, “Dagɛla, ŋ nɛ ŋaa nɩɩ-la Wɩa sɩ lɩɩsaa?” Ŋɩɩ nɛ Yesu bʋla pɩba, “Dɩ mɩ nɛ bʋla pɩma ma, ma bɩ jaŋ laa dii. 68Dɩ mɩ nɛ saa bɩra pɩɛsɛma wɩɩ ma, ma bɩ jaŋ bʋl wɩɩkala, 69ama a lɩɩ lɛɛlɛ a kaa mʋ mɩ-na Nuhuobiine Bie jaŋ hɔŋ Wɩa doluŋ kala Tɩɩna nadiiŋ, nɩduoŋ dɩhɔnʋŋ.” 70Ŋɩɩ nɛ ba kala pɩɛsʋ, “Ŋ nɛ saa ŋaa Wɩa Bie koo?” Ŋɩɩ nɛ Yesu bʋla pɩba, “Ma bʋl woruŋ nɛ, mɩ nɛ sɛnɛ ŋaa Wɩa Bie.” 71Ŋɩɩ nɛ nɩalɩŋ bʋl, “La bɩra bɩ sɩada tɩɩna kala ka chɛ. La tɩtɩa nɩɩ wɩɩ-la ʋ sɩ bʋla nɛ.”
Currently Selected:
Luuk 22: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
