Maak 4

Yesu magɛ namaga a tɩgɛ baala sɩ lɩa dɩ ʋ duu kɩaa lɛ

Mat. 13.1-9; Luuk 8.4-8

1Ŋɩɩ nɛ Yesu mɩɩra mʋ hɔŋ Galilii mʋga-la niiŋ a dɩdagɛ nɩaa. Nɩaa yʋgɛ a kʋ gollu chu. Ba sɩ yʋga ŋɩɩ nɛ, ʋ sii mʋ jʋʋ lɩɩŋ daboro a hɔŋ lɩɩŋ tʋɔŋ. Ka nɩalɩŋ chɩŋ mʋga niiŋ. 2Ŋɩɩ nɛ ʋ magɛ namagaba a dagɛba wɩaa yʋgɛ. Ʋ namagaba-la dɔŋɔ nɛ ŋ-la: Ʋ sɩ, 3“Má jegile nɩɩ mɩ teeŋ. Baal kʋbala nɛ sie a kɛŋ ʋ kʋdoho kaa lɩɩ dɩ ʋ duu. 4Ʋ fa ŋaa mɩmɩsɛ nɛ, kʋdoho-la dɔnsʋŋ tel wombiiŋ tʋɔŋ. Diibiisiŋ kʋ tʋɔsa dii. 5Dɔnsʋŋ ma tel kpagɩnyɩlɩŋ nyuŋ. Hagɩla bɩ yʋga, ka ba guu nyʋ. Ba naapoloo bɩ tinteeŋ jʋa. 6Wɩa pɔsɛ wulumuŋ kɛŋ ba sʋʋ, bɛɛ wɩaa ba naapoloo bɩ tinteeŋ jʋa. 7Kʋdoho-la dɔnsʋŋ ma tel sɔsʋŋ tʋɔŋ a nyʋ, sɔsʋ-la waa a nyagɛba kpʋ. Ba bɩ wasa. 8Kʋdoho-la dɔnsʋŋ ma tel tintee-zɔmʋŋ lɛ a nyʋ a waa a wasɛ woruŋ. Dɔnsʋŋ hɛ biee mara arɩ fii fii, dɔnsʋŋ ma mahɩŋ batori batori, dɔnsʋŋ ma zɔlɔ zɔlɔ.”

9Yesu magɛ namaga-la dɛrɛ aŋ bʋl, “Dɩgɩlaa tɩŋŋaa, má wuoli ma dɩgɩlaa a nɩɩ.”

Wɩɩ-la sɩ tɩɩ Yesu mɩmagɛ namagaba

Mat. 13.10-17; Luuk 8.9-10

10Yesu dʋndʋŋa sɩ ka, ʋ harɩ-tooroo fii arɩ balɩa-la arɩ nɩalɩŋ dɔnsʋŋ sɩ gollu, pɩɛsʋ namagaba-la bʋbʋɔŋ. 11Ŋɩɩ nɛ ʋ bʋla pɩba, “Ma nɩaa deemba nɛ Wɩa dagɛ wɩalɩŋ sɩ faa ʋ kuorii-la lɛ a pɩpa. Ama nɩalɩŋ sɩ hɛ dɩ-jalɩŋ, namagaba nɛ ʋ yie maga pɩba. 12Ŋɩɩ nɛ

ba yie nyilimi nyilimi aŋ bɩ kʋŋkala wuo na,

a jegili jegili aŋ bɩ ba bʋbʋɔŋ wuo jɩŋ.

Dɩ ba nɛ fa jɩŋ ba bʋbʋɔŋ,

ba fa jaŋ bɩrɩma to Wɩa,

dɩ ʋ joŋ ba wʋbɔŋŋɔɔ chɛba.”

Yesu dagɛ namaga-la bʋbʋɔŋ

Mat. 13.18-22; Luuk 8.11-15

13Ŋɩɩ nɛ Yesu pɩɛsɛba, “Ma bɩ namaga deeŋ bʋbʋɔŋ jɩŋ? Ɛɛ nɛ saa ma jaŋ ŋaa a jɩŋ namaga na-kala bʋbʋɔŋ? 14Baal-la sɩɩ duu kɩaa, ʋ nagɛ Wɩa niiŋ wɩaa nɛ ʋ kaa lɩɩ dɩ ʋ bʋl ŋɩɩ. 15Kɩalɩŋ sɩ tel wombiiŋ lɛ nɛ ŋaa nɩalɩŋ sɩ yie nɩɩ Wɩa niiŋ wɩalɩŋ. Dɩ ba nɩɩ wɩalɩŋ dɛrɛ, Sɩtaanɩ yie guu kɔ a kɛŋ wɩalɩŋ liiri ba tʋɔŋ lɛ. 16Kɩalɩŋ ma sɩ tel kpagɩnyɩlɩŋ nyuŋ nɛ ŋaa nɩalɩŋ sɩ yie nɩɩ Wɩa niiŋ wɩalɩŋ a guu laa wɩalɩŋ dii arɩ tʋɔtɔrʋŋ. 17Ama ba bɩ bɔyɛ kɛnɛ a nagɛ kɩalɩŋ naapoloo sɩ bɩ tinteeŋ jʋa. Ba jaŋ sɛɩ wɩɩ-la a tou mʋ magɛ ŋɩɩ, dɩ hɛɛŋ nɛ jʋʋba, koo dɩ ba to naasɩŋ dʋdɔgɩsɛba a tɩŋ wɩɩ-la wɩaa, ba guu joŋo ta. 18Kɩalɩŋ sɩ tel sɔsʋŋ tʋɔŋ ma nɛ ŋaa nɩalɩŋ sɩ yie nɩɩ Wɩa niiŋ wɩalɩŋ, 19ama dʋnɩa kɩaa wɩaa wʋwalɩmɛba, a nyɩsɛba ba cho dɩ ba jige aa chɛ ba kɛŋ kʋŋkala. A tɩŋ kɩaa deemba wɩaa ba bɩ sɛɩ dɩ ba to wɩalɩŋ. Wɩalɩŋ bɩ doho kɛnɛ ba teeŋ. 20Kɩalɩŋ ma sɩ tel tintee-zɔmʋŋ lɛ nɛ ŋaa nɩalɩŋ sɩ yie nɩɩ Wɩa niiŋ wɩalɩŋ a laaba hɛ ba tʋɔŋ lɛ ba kɛŋ doho a pʋŋ, dɔnsʋŋ mara arɩ fii fii, dɔnsʋŋ mahɩŋ batori batori, dɔnsʋŋ zɔlɔ zɔlɔ.”

Yesu magɛ namaga a tɩgɛ chaanɩŋ lɛ

Luuk 8.16-18

21Ŋɩɩ nɛ Yesu bɩra pɩɛsɛ, “Ŋ jaŋ nyɩgɛ chaanɩŋ kaa jʋʋ dɩa, a joŋ gbaŋa chu tɔɔ? Koo a joŋo hɛ godo bʋbʋɔŋ? Aɩ, ŋ jaŋ joŋo daŋ chaaŋ daaŋ nyuŋ. 22Wɩɩkala sɩ faa, ba jaŋ kaa polli dɩ nɩaa jɩmʋ, wɩɩ-la ma kala sɩ hɛ birimiŋ tʋɔŋ jaŋ kʋ lɩɩ pʋlʋmʋŋ.

23Dɩgɩlaa tɩŋŋaa, má wuoli ma dɩgɩlaa a nɩɩ.” 24Ʋ bɩra bʋla pɩba, “Má fɩɛlɛ ma sɩaa woruŋ arɩ wɩalɩŋ ma sɩɩ nɩɩ. Ŋɩɩ ma sɩ joŋo to ma dɔnsʋŋ tɩŋŋaa lɛ, ŋɩɩ tɩtɩa nɛ Wɩa ma jaŋ joŋo to ma lɛ, a paala kɩɩ ŋɩɩ. 25Nɩɩ-la kala sɩɩ to Wɩa niiŋ wɩaa, Wɩa jaŋ faasa pɛ ʋ lɛ dɩ ʋ to woruŋ. Nɩɩ-la ma sɩ bɩ Wɩa niiŋ wɩaa ka to, Wɩa bɩ jaŋ pɛ ʋ lɛ. Ʋ sɩ pɛ ʋ lɛ mʋa-la ma, ʋ jaŋ laa ʋ kʋa.”

Yesu magɛ namaga a tɩgɛ kʋduuloo sɩ waa lɛ

26Ʋ bɩra bʋla pɩba, “Wɩa kuorii-la nagɛ nɩa sɩ mʋ duu kɩaa baga lɛ nɛ. 27Taŋ biri ʋ mɩɩra mʋ pɩŋ. Taŋ pʋl ʋ bɩra sii. Tapʋlaa baŋmɛnɛ ʋ sie dɩ kɩalɩŋ nyʋa a waa, ka ʋ bɩ jɩŋ ŋɩɩ ba sɩ ŋaa nyʋ. 28Ba nyʋ ba tɩtɩa lɛ nɛ a waa, a tʋʋrɛ guloo, a lɩɩsɛ nyusuŋ, a hɛ biee a bii. 29Ba sɩ bɩa, ʋ joŋ sɩa a mʋ kʋŋ, bɛɛ wɩaa baga kɩaa ŋaanɩŋ yie nɛ.”

Yesu magɛ namaga a tɩgɛ kʋdoho kʋbala ba sɩɩ yɩrɛ Masɩtad lɛ

Mat. 13.31-32, 34; Luuk 13.18-19

30Ŋɩɩ nɛ Yesu bɩra pɩɛsɛba, “Bɛɛ nɛ la jaŋ joŋ Wɩa kuorii-la a kaa magɩsɛ? Namaga bɛɛ nɛ la jaŋ kaa dagʋ? 31Ʋ nagɛ kʋdoho kʋbala ba sɩɩ yɩrɛ masɩtad nɛ, ba yie joŋo duu. Ʋ nɛ muuro kɩɩ kʋdoho na-kala sɩ hɛ nɩmɛ. 32Ama dɩ ba nɛ duo dɩ ʋ nyʋ, ʋ yie sii waa a ŋaa tɩa a kɩɩ baga kʋduuloo kala kala. Ʋ naakelee yʋgɛ. Diibiisiŋ yie kʋ sagɛ ʋ lɛ a saa ba dɛllɩŋ.”

33Yesu magɛ namagaba yʋgɛ a dɩdagɛ nɩaa. Ʋ yie dagɛba a magɛ ŋɩɩ ba sɩ jaŋ wuo jɩŋ ba bʋbʋɔŋ nɛ. 34Ʋ yie bɩ sɛɩ dɩ ʋ bʋl wɩɩkala polli see ʋ magɛ namaga. Ama ʋ dɩ ʋ harɩ-tooroo dʋndʋŋa nɛ hɔnɔ, ʋ yie dagɛ namagaba-la bʋbʋɔŋ a pɩba nɛ.

Yesu ŋaa pel-duoŋ kɛrɛ

Mat. 8.23-27; Luuk 8.22-25

35Chɛɛ-la tɩtɩa dɩdaanɩŋ Yesu bʋla pɩ ʋ harɩ-tooroo, “Má leŋ dɩ la chol mʋga cholo.” 36Ba ta nɩ-daŋ-la kala, aŋ kʋ jʋʋ lɩɩŋ daboro-la lɛ ʋ fa sɩ hɔnɔ a kɛnʋ baa mʋ. Lɩɩŋ daborusuŋ dɔnsʋŋ ma fa hɛ nɩmɛ a mʋmʋ. 37Ŋɩɩ nɛ dɩ pel-duo kʋbala suomo ŋɩŋaa a ŋmoo lɩɩŋ hɛ lɩɩŋ daboro-la tʋɔŋ ʋ chɩchɛ dɩ ʋ su. 38Ama Yesu fa pɩŋ doŋ nɛ daboro-la harɩŋ a yelli nyuŋ-yelle. Ba kʋ chɩsʋ a bʋla pʋ, “La kʋhɩaŋ, ŋ bɩ jɩŋ dɩ laa chɛ la sʋʋ nɛɛ?”

39Ŋɩɩ nɛ ʋ sii doŋ lɛ a kpɩa pel-la lɛ a bʋla pɩ lɩɩ-pel-la ma dɩ ʋ fɩɛla pɩŋ. Pel-la sigili, ka leriŋ kala ŋaa fʋɩɩ. 40Ŋɩɩ nɛ Yesu pɩɛsɛ ʋ harɩ-tooro-la, “Bɛɛ nɛ tɩɩ fawʋllʋŋ kɛmma? Ma ha bɩ Wɩa laa dii?” 41Ŋɩɩ nɛ fawʋllʋŋ kɛmba woruŋ, ba pɩpɩɛsɛ dɔŋɔ, “Kʋbɛɛ nɛ saa paala ŋaa nɩa deeŋ? Peliŋ arɩ lɩɩ-peliŋ kala tuto ʋ niiŋ.”

Currently Selected:

Maak 4: SIS

Highlight

Copy