JENESIS 23
23
1Go namauriana ki Sarah e pei natau p̃onotia sikai rualima takuna dua tamate larua tea maga wanogoe eu pei natau maga ni namauriana ki Sarah. 2Go Sarah e mate Kiriath‐arba (waina e pei Hebron), navanua ni Kanaan: go Abraham e umai naga ega susue Sarah, po dagisi a. 3Go Abraham e duleana m̃elu dua ki narae ni tea mate aneana, po pasa paki Heth natuna maga, po noa, 4Kinau a pei nam̃enaki go atatoko sikoti mu. Kuga tua au naveaniana ni matigo sikai sikoti mu, naga aga ova ki tea mate aginau ega vuoli ki naraegu. 5Go Heth natuna maga eu pasadara Abraham, po noa ki nia, eu naga, 6P̃a rogo gami, nawota aginau: nigo ku pei tea maraki sikai ki Sup̃e m̃aleoputo kakagami: matigo matadoaana aginami p̃a ova ki tea mate anigo asa; te naata kakagami ega wo da mauti ko matigo aneana mau, naga p̃a ta ova ki tea mate anigo asa mau. 7Go Abraham e duleana, po kolo suai natano paki naatam̃oli maga ni navanua, paki Heth natuna maga. 8Go e pasa paki da, po naga, E pe vei namidodoana animu naga aga ova ki tea mate aginau ega vuoli ki naraegu, kuga rogo au, po maginau pavara ni Efron natu ni Sohar, 9Naga ega tua au valea ni Makpelah, waina e peani a, waina e doko namatap̃ago ni vanua aneana; ega tua au asa m̃aleoputo kakamu raki silver waina e patakana naga aga veani a ega vei matigo. 10Go Efron e do natano m̃aleoputo ni Heth natuna maga: go Efron nawora ni Heth e pasadara Abraham nadaliga ni Heth natuna maga, nadaliga ni tea mamau puti waina eu pae namata‐pua paki natokoana aneana, 11e naga, Ee nawota aginau, p̃a rogo au: vanua wanogoe a dua ko asa, go valea waina e doko asa, a dua ko asa; namata ni naatam̃oli aginau maga natuda maga a dua ko asa: p̃a ova ki tea mate anigo. 12Go Abraham e kolo suai natano narae ni naatam̃oli maga ni navanua. 13Go e pasa paki Efron nadaliga ni naatam̃oli maga ni navanua, po naga, Ma ku pe suasua, p̃a rogo au, a pavara ni ko asa: aga wo pitua ki m̃ane raki vanua wanogoe; p̃a tape a kiagu, go aga wo ova ki tea mate aginau asa. 14Go Efron e pasadara Abraham, po noa ki nia, e naga, Nawota aginau, p̃a rogo au: matele 15ni navanua ni shekel ni silver p̃onotia pati, tea wanogoe e pei nasava namawota kakagida? E p̃ia p̃a ova ki tea mate anigo. 16Go Abraham e dogo parati ki Efron; go Abraham e magi Efron dowogi silver, waina e noa e nadaliga ni Heth natuna maga, shekel ni silver p̃onotia pati, tea vituatuakiana ki tea vakokoto. 17Go vanua ki Efron, waina e doko Makpelah, waina e doko narae ni Mamre, vanua wanogoe, go valea waina e doko asa, go nakau mamau puti waina eu doko vanua wanogoe, waina eu doko nadigina mamau daliviri, 18Eu magi Abraham du pei aneana naveaniana namata ni Heth natuna maga, narae ni tea mamau puti waina eu pae namata‐pua paki natokoana aneana. 19Go edaku ki tea wanogoe, Abraham e ova ki anagoroi Sarah valea ni vanua ni Makpelah narae ni Mamre (waina e pei Hebron), navanua ni Kanaan. 20Go vanua wanogoe, go valea waina e doko asa, ero magi Abraham du pei aneana naveaniana ni matigo pae Heth natuna maga.
Currently Selected:
JENESIS 23: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
