YOANE 19

1Ragi wanogoe nalakena tea wanogoe Pilato e puati Yesu, po parati a. 2Go naatam̃oli maga ni navakalo eu piri vauvau sikai ni tea makalikali maga, po sawa ki nia nap̃auna, go eu sugoro e ki sugoro kovagoro miala‐kesakesa sikai; 3go eu do umai punusi a, po do naga, P̃a laelaea, nawota ki naka ni Yudea! Go eu do dapagi a. 4Go Pilato e moro paki katama, po noa ki da, e naga, Kuga leo, a piragi a paki katama punusi mu, naga kuga atae naga a da pap̃ai te namariana sa asa mau. 5Nalakena tea wanogoe, Yesu e umai paki katama, e suni vauvau ni tea makalikali maga go sugoro kovagoro miala‐kesakesa wanogoe. Go Pilato e noa ki da, e naga, Kuga leo, naatam̃oli! 6Ma ragi waina tea viri warua maga go tasiga maga eu punusi a, eu pioso, po naga, P̃a turi a nakau valadagoto, pa turi a nakau valadagoto. Pilato e noa ki da, e naga, Nimu kuga vuati a, po duri a nakau valadagoto: nalakena kinau a da pap̃ai te namariana sa asa mau. 7Navarapule maga ni Yudea eu pasadara e, eu naga, Kinami au peani nawotaeana sikai, go pae nawotaeana wanogoe e one asa one naga ega mate, nalakena e dum̃ana mari a e pei Sup̃e Natuna. 8Nalakena tea wanogoe ragi waina Pilato e dogo navasaana wanogoe e mataku p̃arua; 9go e moro paki ekopu ni Pretorio, po noa ki Yesu, e naga, Nigo ku pei tea ni esava? Ma Yesu e da dua e te navasadaraana mau. 10Nalakena tea wanogoe Pilato e noa ki nia, e naga, Ku da pasa ki nau mau kite? Ku da atae mau naga a peani naveinawotaana naga aga veresi ko, go a peani naveinawotaana naga aga turi ko nakau valadagoto kite? 11Yesu e pasa dara e, e naga, E pe ta pei tea vituakiana paki‐go pae elagi mau, ku pe ta peani te naveinawotaana dip̃a au mau: nalakena tea wanogoe tea waina e pitua ki nau paki‐go e peani namarinaleosaana waina e p̃arua liu tea anigo, 12Pae ragi wanogoe pa pa Pilato e laaga naga ega veresi a: ma navarapule maga ni Yudea eu pioso, eu naga, Ku pe veresi naatam̃oli waia, ku pe ta pei Kaisar tana ri mau: sara naatam̃oli waina eu dum̃ada mari ra eu pei nawota eu pasadugoro Kaisar. 13Nalakena tea wanogoe ragi waina Pilato e dogo navasaana maga wanogoe, e piragi Yesu paki katama, po dasake malo tasake ni navasap̃otaeana tokora sikai waina e pei tea sosoana ki Napara ni vatu, ma pae Heberu, ki Cabbatha. 14Go e pei naaleatia ni namarim̃atakiana ni navakalauana: e alagoro pei aura kelatesa. Go e noa ki navarapule maga ni Yudea, e naga, Kuga leo, Nawota animu! 15Nalakena tea wanogoe nara eu pioso, eu naga, P̃a tape lua e, p̃a tape lua e, p̃a turi a nakau valadagoto. Pilato e noa ki da, e naga, Aga turi Nawota animu nakau valadagoto kite? Tea viri warua maga eu pasa dara, eu naga, Au da peani te nawota mau, ma Kaisar e sikina. 16Ragi wanogoe nalakena tea wanogoe e pitua ki nia paki da naga ega vei tea turiana nakau valadagoto.

17Nalakena tea wanogoe eu piragilua Yesu: go e dapetape nakau valadagoto aneana po dave pano paki tokora waina e pei tea sosoana ki Tokora ni nagarai, waina e pei tea sosoana pae Heberu ki Colcotha: 18tokora wanogoe eu duri a asa nakau valadagoto, go eu duri tea p̃ota dua ero sikoti a, nadigina go nadigina, go Yesu namawota kakada. 19Go Pilato e midiri nanoasaiana sikai, po doropusi a e doko nakau valadagoto. Go tea waina e pei tea midiriana, e pei YESU NI NASARETH, NAWOTA KI NAKA NI YUDEA. 20Nalakena tea wanogoe nanoasaiana wanogoe naka ni Yudea tea laapa kakada eu peve a: nalakena tokora waina Yesu e pei tea turiana asa e pei m̃aladigi ki natokoana: go e pei tea midiriana pae Heberu, go pae Roma, go pae Hellas. 21Nalakena tea wanogoe tea viri warua maga ni navarapule maga ni Yudea eu noa ki Pilato, eu naga, P̃a ta midiri, Nawota ki naka ni Yudea mau; ma p̃a midiri naga nae e naga, A pei Nawota ki naka ni Yudea. 22Pilato e pasa dara, e naga, Tea waina a midiri a, ta midiri a.

23Nalakena tea wanogoe naatam̃oli maga ni navakalo ragi waina eu duri sua Yesu nakau valadagoto, eu dape sugoro aneana maga, po mari namalomalo pati ara, agi sara naatam̃oli ni navakalo namalo sikai sarasara ra; go eu dape sugoro tokop̃ai nawilina: go sugoro tokop̃ai nawilina natuturiana e dika asa, e pei tea vausiana pae elagi usuraki. 24Nalakena tea wanogoe eu dum̃ada noa ki da, eu naga, Tuga ta puap̃orae a mau, ma tuga visaara asa, ega vei agi sei: naga navasaana midiriana ega lolomana, waina e naga,

Eu madeada p̃otae sugoro aginau maga eu sarasara ra,

Go tea suniana aginau eu nadi ki gole asa.

25Nalakena tea wanogoe naatam̃oli maga ni navakalo eu mari tea maga wanogoe. Ma Yesu p̃ilana, go p̃ilana taina, Maria, nagoroi ki Kelopa, go Maria ni Macdala eu lawodu pisari nakau valadagoto ki Yesu. 26Nalakena tea wanogoe ragi waina Yesu e punusi p̃ilana, go tea vasapiseikiana waina e dodomi a e lawodu pisari a, e noa ki p̃ilana, e naga, Koroi, p̃a leo, natum̃a! 27E edaku noa ki tea vasapiseikiana wanogoe, e naga, P̃a leo, p̃ilam̃a! Go pae aura wanogoe pa pa tea vasapiseikiana wanogoe e piragi a paki sum̃a ni kiana.

28Edaku ki tea wanogoe Yesu, waina e atae naga naleo maga mamau puti eu po pei tea marisuaana, naga navasaana midiriana ega vei tea vakavuroana, e naga, A madou. 29Lasa sikai e doko waina e pura ki waine kokona: go nalumulumu sikai waina e pura ki waine kokona wanogoe eu dakani a ki napati hussop sikai, po sai ki nia paki nawokana. 30Nalakena tea wanogoe ragi waina Yesu e menadogo sua waine kokona wanogoe, e naga, E nopu: go e kusu, po pitua ki naatana.

31Nalakena tea wanogoe navarapule maga ni Yudea, nalakena e pei naaleatia ni namarim̃atakiana, naga nap̃atokoda euga ta doko nakau valadagoto doko sabbath mau (nalakena naaleatia ni sabbath wanogoe e pei naaleatia warua), eu pavarani Pilato naga natuada maga euga vei tea marip̃oriana, naga euga vei tea tapeluaana. 32Nalakena tea wanogoe naatam̃oli maga ni navakalo eu rumai, po mari p̃ori natua ni tea vea, go ni tea p̃ota waina e pei tea turiana nakau valadagoto sikoti a: 33ma ragi waina eu rumai paki Yesu, po punusi naga e mate sua, eu da mari p̃ori natuana maga mau: 34ma naatam̃oli maga ni navakalo sikai kakada e puri navidina ki naio sikai, go nada go noai ero dave umai m̃araverave. 35Go tea waina e punusi e po noasokisoki, go nanoasokisokiana aneana e pei lomau: go nae e atae naga e noa tea lomau maga, naga nimu ma kuga saralomau. 36Nalakena tea maga wanogoe eu pakilina, naga navasaana midiriana ega lolomana, waina e naga, Te navatuna sikai ega wo da pei tea marip̃oriana mau. 37Go navasaana midiriana p̃ota sikai e moro naga, Euga wo leopunusi tea waina eu puri a.

38Go edaku ki tea maga wanogoe Yosef ni Arimathea, waina e pei tea vasapiseikiana sikai ki Yesu, ma e doko loku nalakena e matauki navarapule maga ni Yudea, e pavarani Pilato naga ega tape lua nap̃atoko ni Yesu: go Pilato e suasua ki nia. Nalakena tea wanogoe e umai po dape lua nap̃atokona. 39Go Nikodemo ma e umai, waina e umai punusi a p̃ogi ragi vea, e dape murra go aloe sarisari umai, e alagoro pei paund p̃onotia sikai. 40Go ero dape nap̃atoko ni Yesu, po pivisi a ki namasia maga ni nakulukulu ni linen go tea ni nap̃o wia wanogoe e pilake a, dapala waina naka ni Yudea eu do mari naovakiana. 41Go tokora waina e pei tea turiana asa nakau valadagoto roara sikai e doko asa; go roara wanogoe matigo vau sikai e doko asa, waina te naata sikai e ko da pei tea toropusiana asa mau. 42Nalakena tea wanogoe eu doropusi Yesu tokora wanogoe, nalakena naaleatia ni namarim̃atakiana ki naka ni Yudea, nalakena matigo wanogoe e pei m̃aladigi.

Currently Selected:

YOANE 19: NTB

Highlight

Copy