LUKA 15
15
1Go tea tape nasautoga maga go tea mari naleo sa maga eu rumai puti paki m̃aladigi ki nia naga euga rogo e. 2Go Farisi maga go tea midiri maga eu dauruuru, po naga, Naatam̃oli waia e piragi tea mari naleo sa maga, po ganikani sikoti ra.
3Go e noa ki da naluluakia waia, e naga, 4Nimu naatam̃oli sei kakamu, waina e peani shiip p̃onotia sikai, go waina e dape puoli ki sikai kakada, e da doropusi tea rualima loveti tamate loveti eu madoko maso p̃alo, po pano raki tea waina e puoli, pa pa e pap̃ai a? 5Go ragi waina e pap̃ai a, e lesi a e one pauna maga one, po laelaea. 6Go ragi waina e umai paki nasum̃a, e soso saisai ki tana ri maga go tea ni m̃aladigi ki nia maga, po noa ki da, e naga, Kuga laelaea sikoti au, nalakena a po pap̃ai shiip aginau waina e puoli. 7A noa ki mu, naga dapala nogoe nalaelaeaana ega wo p̃arua nakoroatelagi nalo ni tea mari naleo sa sikai waina e midoakidoa, ma ega wo kiki nalo ni tea leana rualima loveti tamate loveti, waina eu dika tea waina euga midoaki doa asa.
8Kite nagoroi sei waina e peani m̃ane ni silver rualima sikai, e pe tape puoli ki sikai, e pe ta dokoni nasulu sikai, po sasara nasum̃a, po laaga paratiki pa pa e pap̃ai a? 9Go ragi waina e pap̃ai a, e soso saisai ki tana ri maga go tea ni m̃aladigi ki nia maga, po naga, Kuga laelaea sikoti au, nalakena a po pap̃ai m̃ane waina a dape puoli ki nia. 10Dapala nogoe, a noa ki mu asa, nalaelaeaana e doko narae ni agelo maga ki Sup̃e nalo ni tea mari naleo sa sikai waina e midoa ki doa.
11Go e naga, Naatam̃oli sikai e peani natuna naanoai dua: 12go nara tea takariki kakada e noa ki tamana, e naga, Mama, p̃a tua au namagovai ni naloriki maga waina e maginau dowo. Go e madeada dap̃otae tea ni namauriana aneana maga. 13Go edaku ki naaleatia seara eu da laapa mau natuna takariki e saisai ki naleo maga mamau puti, po surata pano paki navanua ni uvea; go tokora wanogoe e sori p̃aragoto naloriki aneana maga, e do mari daratara. 14Go ragi waina e sori puti sua ra, ragi ni navitoloana warua sikai e pakilina navanua wanogoe; go nae e pae asa dika ki sara naleo. 15Go e pano po puluti naatatoko maga sikai kakada ni navanua wanogoe; go e dip̃aki lua e paki vanua aneana maga naga ega leo paratiki wago maga. 16Go e masauna naga ega vuka ki nawa ni karob waina wago maga eu gani a: go te naata e da dua e mau. 17Ma ragi waina nap̃op̃ona e liliu, e naga, Tea suasua vasadapuiana maga ki tamagu eu pisa waina eu peani navinaga waina e patakada go te seara e du pele, go kinau a mate nea ki navitoloana? 18Aga wo duleana po pano punusi tamagu, go aga wo noa ki nia, Mama, a mari naleo sa paki nakoroatelagi, go namatam̃a: 19a da moro p̃ia mau naga aga vei tea sosoana ki natum̃a: p̃a mari au aga takiusi tea suasua vasadapuiana anigo maga. 20Go e duleana, po umai punusi tamana. Ma ragi waina e ko madu uvea, tamana e punusi a, go e maritadodomi a, go e sava, po doti nanoana, po dum̃ili a. 21Go natuna e noa ki nia, e naga, Mama, a mari naleo sa paki nakoroatelagi, go namatam̃a: a da moro p̃ia mau naga aga vei tea sosoana ki natum̃a. 22Ma tamana e noa ki tea suasua aneana maga, e naga, Kuga m̃araverave dape lua sugoro waina e sikina p̃ia liu umai, po sugoro e asa; go kuga sara ki rig sikai nakinina, po sawa ki nam̃elevasiana maga nam̃elena maga: 23go kuga viragi kau natuna waina e m̃anopunopu umai, po mari punue a, go tuga kanikani, po mari katakata: 24nalakena natugu waia e mate, po moro mauri; e puoli, po pei tea vap̃aiana. 25Go eu pae asa mari katakata. Go natuna takalapa e doko vanua: go ragi waina e umai po paki m̃aladigi ki nasum̃a, e dogo nalegaana go nasaleana. 26Go e soso tea suasua maga sikai kakada, po pusuusu ki tea maga wanogoe eu alagoro pei nasava? 27Go e noa ki nia, e naga, Taim̃a e po umai; go tamam̃a e po mari punue kau natuna waina e m̃anopunopu, nalakena e po moro piragi a e p̃ia doko. 28Ma e maeto, po karai paki ekopu: go tamana e dave umai, po pavarani a. 29Ma e pasa dara po noa ki tamana, e naga, P̃a leo, natau laapa waia a do manigo suasua, go a da dapiri natip̃akiana anigo sikai te naaleatia mau; go ku da dua au naninani natuna sikai te naaleatia mau, naga aga mari katakata sikoti tagu ri maga: 30ma ragi waina natum̃a waia e umai, waina e gani dinomi tea ni namauriana anigo sikoti nagoroi masausara maga, ku maneana mari punue kau natuna waina e m̃anopunopu. 31Go e noa ki nia, e naga, Natugu, nigo ku sikoti au doko sara naaleatia, go naleo maga mamau puti aginau eu pei anigo. 32Ma e p̃ia naga tuga mari katakata po laelaea: nalakena taim̃a waia e mate, po moro mauri; go e puoli, po pei tea vap̃aiana.
Currently Selected:
LUKA 15: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
