LUKA 17
17
1Go e noa ki tea vasapiseikiana aneana maga, e naga, E pei tea mari‐sap̃o‐ana naga tea tapilagonaana maga euga ta umai mau: ma ai ki naata waina eu rumai pae asa! 2Vatumaa sikai e pe vei tea sarakiana nanoana, go nae e pe vei tea nadikiana paki natasi, e pe wia ki nia, liu waina naga e pe mari tea kirikiri maga waia sikai kakada ega tapilagona. 3Kuga tum̃amu leoparatiki mu: taim̃a e pe mari naleo sa, p̃a vasa kasua ki nia; go e pe midoaki doa, p̃a maneana midoakikorokoro e. 4Go e pe mari naleo sa dip̃a ko paka larua naaleatia sikai, go e pe vaka larua maradoa umai punusi ko, po naga, A midoaki doa; p̃a maneana midoakikorokoro e.
5Go apostolo maga eu noa ki Nawota, eu naga, P̃a sokari nasaralomauana aginami. 6Go Nawota e naga, Ku pe veani nasaralomauana e pe takiusi napati ni sinapi sikai, ku pe noa ki naita waia, P̃a vei tea vaku‐dakati‐ana, go p̃a vei tea lawoana natasi; go e pe rogo paratiki mu asa. 7Ma nimu sei kakamu, waina e peani tea suasua sikai waina e sisi natano kite e leo‐parati ki shiip, waina ega wo noa ki nia, ragi waina e po pae vanua umai, P̃a umai m̃araverave po kere one ganikani; 8go waina ega wo da noa ki nia, P̃a mari m̃ataki tea waina aga kani a, go p̃a tum̃am̃a dasoki ko, po maginau suasua, pa pa aga kanikani po munu sua; go nigo p̃a wo edaku ganikani po munu? 9E pasa dodom̃ata ki tea suasua wanogoe nalakena e mari tea maga waina e pei tea tip̃akiana ara kite? 10Dapala nogoe nimu ma, ragi waina kuga wo mari sua tea maga mamau puti waina ku pei tea tip̃akiana ara, kuga naga, Au pei tea suasua m̃oli; au po mari tea waina e one gami one naga auga mari a.
11Go e pakilina, ragi waina eu surata paki Yerusalem pano, naga nae e surata duaduru m̃aleoputo ni Samaria go Calilea. 12Go ragi waina e sili natokoana kiki sikai, naatam̃oli rualima sikai waina eu pei lepero eu sua e, waina eu lawodu uvea: 13go eu sike nadaleoda, po naga, Yesu, Nawota, p̃a dodomi gami. 14Go ragi waina e punusi ra, e noa ki da, e naga, Kuga vano po dum̃amu pisei ki tea viri maga mu. Go e pakilina, ragi waina eu do pano, eu pei tea mariana eu dautau. 15Go sikai kakada, ragi waina e punusi naga e pei tea maripauriana, e liliu umai, po samasamani Sup̃e ki nadaleo kasua; 16go e dowo dap̃olosiwo pisari nam̃elena maga, po pasadodom̃ata ki nia: go nae e pei naatam̃oli ni Samaria sikai. 17Go Yesu e pasa dara po naga, Tea rualima sikai eu da pei tea mariana eu dautau kite? 18Ma tea loveti wai? Seara eu da pei tea vap̃aiana waina eu liliu umai naga euga tua Sup̃e nasamasamaana, ma tea ni nalauna p̃ota waia sikina kite? 19Go e noa ki nia, e naga, P̃a tuleana, go p̃a vano: nasaralomauana anigo e po mari pauri ko.
20Go Farisi maga eu pusuusu paki nia ki ragi waina namarakiana ki Sup̃e ega wo umai asa, go e pasadara ra po naga, Namarakiana ki Sup̃e e da pilake naleoparatikiana umai mau. 21Go euga wo da naga, Kuga leo, tokora waia! Kite, Tokora wanana! Nalakena Kuga leo, namarakiana ki Sup̃e e doko nap̃alaumu.
22Go e noa ki tea vasapiseikiana maga, e naga, Naaleatia maga euga wo umai, waina kuga wo masauna naga kuga vunusi naaleatia maga ki naatam̃oli Natuna sikai kakada, go kuga wo da punusi a mau. 23Go euga wo noa ki mu, Kuga leo, tokora wanana! Kuga leo, tokora waia! Kuga ta pano mau, go kuga ta dausi ra mau: 24nalakena dakiusi waina navila, ragi waina e pila m̃elu tokora sikai etano ni nakoroatelagi, e maramalaga paki tokora kerua etano ni nakoroatelagi; naatam̃oli Natuna ega wo dapala nogoe naaleatia aneana. 25Ma e one asa one naga ega vea sua narogokitesaana laapa po pei tea tip̃adoaana pae tagona waia. 26Go dakiusi waina e pakilina naaleatia maga ki Noah, ega wo dapala nogoe naaleatia maga ki naatam̃oli Natuna. 27Eu ganikani, eu munu, eu pitawiri, eu pei tea vituakiana eu laki, pa pa paki naaleatia waina Noah e paki ekopu ni areka, go natave e umai, po mari punue puti ra. 28Dapala nogoe dakiusi waina e pakilina naaleatia maga ki Lot; eu ganikani, eu munu, eu pakokoto, eu sorisori, eu lalawo, eu davagi nasum̃a maga; 29ma naaleatia waina Lot e m̃elu dua ki Sodom pano nakapu vavaga go brimstone ero p̃owo pae nakoroatelagi, po mari punue puti ra: 30ega wo dapala tea sikai maau wanogoe naaleatia waina naatam̃oli Natuna ega wo pei tea mari‐pakasa‐kiana asa. 31Naaleatia wanogoe, naata waina ega wo doko nap̃au ni nasum̃a, go naloriki aneana maga eu doko ekopu, ega ta siwo mau naga ega tapelua ra: go tea waina e doko vanua ega tapala nogoe ega ta liliu mau. 32Kuga midoaki Lot anagoroi. 33Naata waina e pe wo laaga naga ega talua namauriana aneana ega wo dape puoli ki nia: ma naata waina e pe wo dape puoli ki namauriana aneana ega wo mauti pauri a. 34A noa ki mu, naga Nap̃ogiana wanogoe naanoai dua eroga wo one nawewele sikai; sikai ega wo pei tea viragiluaana, go kerua ega wo pei tea toropusiana ega wo madoko. 35Nagoroi dua eroga wo saisai mani, sikai ega wo pei tea viragiluaana, go kerua ega wo pei tea toropusiana ega wo madoko. 36Nanoai dua ero doko roara,sikai ega wo pei viragiluaana, go kerua ega wo pei tea toropusiana ega madoko. 37Go eu pasa dara po noa ki nia, eu naga, Seve tokora, Nawota? Go e noa ki da, e naga, Tokora waina nap̃atoko ni tea mate e one asa tokora wanogoe ikila maga euga wo pei tea saisaikiana paki asa.
Currently Selected:
LUKA 17: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
