Yookhani 3
3
UNikodeemu akʉbhala kwa Yeesu
1Kwámɨle nʉ mʉpɨtɨ weeka ʉwa Bhayahuudi ʉwa shɨpʉga sha Bhafalisaayi, ɨtaawa lyakwe bhakhatɨnjɨ uNikodeemu. 2Isiku limo, uNikodeemu akhabhala kwa Yeesu shawusiku, akhamʉbhʉʉzya akhatɨ, “We Mumanyizyi, tumanyile kʉtɨ ɨwe we mumanyizyi we ʉMʉlʉngʉ akusonteleziizye. Kʉnongwa ye atalɨɨpo umuntu wowonti we angakhola kʉbhomba ɨvɨlolesyo vwe ʉkʉbhomba, bhanje ʉMʉlʉngʉ atalɨ peeka nawo.” 3UYeesu akhamwamʉla akhatɨ, “Nalyoli ɨnkʉkʉbhʉʉzya, umuntu ɨnga atapapiilwe akha wʉbhɨlɨ,#3:3 Atapapiilwe akha wʉbhɨlɨ Amazwi ganaaga mʉ ndongo ɨya Shiyunaani kwe kʉtɨ, ʉMʉlʉngʉ we akʉbhabhɨɨkha abhantʉ kʉbha bhaana bhaakwe. Bhaazya Yookhani 1:13. atangakhola kʉwʉlola ʉwʉmwene wa Mʉlʉngʉ.”#3:3 Ʉwʉmwene wa Mʉlʉngʉ Bhaazya mu Wilulanyo ʉwa mazwi amajeni. 4UNikodeemu akhamʉbhʉzɨɨlɨzya uYeesu akhatɨ, “Umuntu umugoosi angakhola bhʉlɨɨbhʉlɨ kʉpaapwa akha wʉbhɨlɨ? Atangakhola kwinjila mʉ lwanda lwa nyina waakwe ɨnga apaapwe winza!” 5UYeesu akhamwamʉla akhatɨ, “Nalyoli ɨnkʉkʉbhʉʉzya, atalɨɨpo umuntu we angakhola kwinjila mʉ wʉmwene wa Mʉlʉngʉ ɨnga atapapiilwe ku minzi na kwa Mupepu uMufinjile. 6Umuntu akʉpaapwa nʉ mʉbhɨlɨ kufuma ku bhapaafi bhaakwe, ɨleelo akʉpaapwa nu Mupepu uMufinjile ɨnga aposheele uwuumi ʉwa wiila na wiila. 7Utaswigaje we ɨnkʉkʉbhʉʉzya kʉtɨ, ‘Ʉkwanzɨwa ʉpaapwe akha wʉbhɨlɨ.’ 8Impepu yikuvugula kʉbhala kwonti kwe yiyiganile. Ʉngakhola kwɨmvwa we yikuvugula, ɨleelo ʉtakʉmanya kwe yikufuma na kwe yɨkʉbhala. Ziniizi she zɨlɨ na kwa muntu wowonti we apapiilwe kwa Mupepu uMufinjile.”
9UNikodeemu akhamʉbhʉzɨɨlɨzya uYeesu akhatɨ, “Ziniizi zɨngabhombekha bhʉlɨɨbhʉlɨ?” 10UYeesu akhamwamʉla akhatɨ, “Ɨwe we mumanyizyi ʉmʉpɨtɨ ʉwa Bhaisilaeli, utazimanyile zyonti ziniizi? 11Nalyoli ɨnkʉkʉbhʉʉzya, ɨtwe tʉkʉlonga zye tuzimanyile na kufumwa uwukeeti zye tuzilolile, ɨleelo ɨmwe mʉtakwɨtɨkha zye tʉkʉbhabhʉʉzya. 12Imbabhuziizye ɨzya mʉ nsɨ, nɨɨmwe mʉtakʉnɨɨtɨkha. Mʉngakhola bhʉlɨɨbhʉlɨ kwɨtɨkha ɨnga ɨnkʉbhabhʉʉzya ɨzya kʉmwanya? 13Atalɨɨpo umuntu we abhalile lumo kʉmwanya, lyoli ʉMwana wa Muntu we ayinzile kufuma kʉmwanya. 14Anza she ʉMoose ábhusiizye ishifwani shɨ njokha ɨyɨ shaaba mu shilozu,#3:14 Bhaazya Mbaazyo 21:8-9. shɨnɨɨsho woope ʉMwana wa Muntu bhakhayɨmʉbhʉʉsya pa shɨkhobhenhanyo, 15ɨnga umuntu wowonti we akʉmwɨtɨkha abhe nu wuumi ʉwa wiila na wiila.
16“ɄMʉlʉngʉ ábhaganile abhantʉ bhonti mʉ nsɨ, ye nongwa akhamʉsonteelezya ʉMwana waakwe weeka mwene kwɨnza mʉ nsɨ umu, ɨnga umuntu wowonti we amwɨtɨkha ʉweene, atateegaje, lyoli abhe nu wuumi ʉwa wiila na wiila. 17ɄMʉlʉngʉ atámusonteleziizye ʉMwana waakwe kʉbhalonga abhantʉ, lyoli kʉbhapokha.
18“Wowonti we akʉmwɨtɨkha ʉweene, atakʉlongwa, ɨleelo we atakʉmwɨtɨkha alongiilwe kusilile, kʉnongwa ye atamwitishile ʉMwana weeka mwene ʉwa Mʉlʉngʉ. 19Kʉlongwa kwe ku kuuku: kʉtɨ, ʉlʉkhozyo lwinzile mʉ nsɨ, ɨleelo abhantʉ bhakhayɨgana akhiisi kʉshɨla ʉlʉkhozyo, kʉnongwa ye ɨmbombo zyabho zyámɨle mbiibhi. 20Abhantʉ bhonti bhe bhakʉbhomba imbiibhi bhakuluviitilwa ʉlʉkhozyo, khabhɨlɨ bhatakwanza kwɨnza kʉ lʉkhozyo, ɨnga ɨmbombo zyabho imbiibhi zɨtakhasakʉlwe apazelu. 21Ɨleelo bhaala bhe bhakʉbhomba uwanalyoli, bhakwɨnza kʉ lʉkhozyo ɨnga yɨloleshe apazelu kʉtɨ ɨmbombo zyabho zibhombeshile kʉ makha ga Mʉlʉngʉ.”
Uwukeeti wa Yookhani uMwozyi kʉ zya Yeesu
22We akhabhalɨlo khaashɨla khashe, uYeesu na bhalandati bhaakwe bhakhabhala mʉ nsɨ ɨya Yudeeya. Bhakhɨɨkhala kʉʉkwo kʉ khabhalɨlo, uYeesu akhabhozyaga abhantʉ.#3:22 Akhabhozyaga abhantʉ Ɨpa te wu Yeesu we akhabhozyaga abhantʉ, lyoli ábhapiiye abhalandati bhaakwe ʉwaamʉlo ʉwa kʉbhoozya abhantʉ. Bhaazya Yookhani 4:2. 23UYookhani uMwozyi woope akhabhozyaga abhantʉ mʉ nhaaya ɨya mu Ayinooni papɨɨpɨ nɨ nhaaya ɨya mu Saleemu, kʉnongwa ye kwámɨle na minzi aminji. Abhantʉ bhakhabhala kʉkwakwe ɨnga abhoozye. 24Akhabhalɨlo khanaakho uYookhani uMwozyi áshɨɨlɨ kʉkʉngwa mwɨ jeela.
25Isiku limo, abhalandati bha Yookhani uMwozyi bhakhanda kʉdalɨnhana nu Muyahuudi weeka kʉ zya minho aga kʉgeeza. 26Pe bhakhabhala kwa Yookhani uMwozyi, bhakhamʉbhʉʉzya bhakhatɨ, “We Mumanyizyi, umuntu ʉla we aamɨle peeka nɨɨwe kwɨsyɨla ɨlya lwizi ʉlwa Yoolodani, we waatʉpanjɨɨye intumi zyakwe, ishi akwozya, abhantʉ bhonti bhakʉbhala kʉkwakwe.” 27UYookhani akhabhaamʉla akhatɨ, “Umuntu atangakhola kʉbha na khantʉ ɨnga ʉMʉlʉngʉ atamupiiye. 28Ɨmwe mʉneemwe mwe bhakeeti bhaanɨ kʉtɨ, nálonjile nátɨlɨ, ‘Ɨne te ne Kilisiti, lyoli ʉMʉlʉngʉ ansonteleziizye kʉtɨ ɨmʉlongolele.’ 29Ʉmʉlɨndʉ we akwegwa wa mʉsakhaala we akʉmwega. Ɨleelo umanyani wa muntu we akwega, we akwɨmɨɨlɨla papɨɨpɨ nawo na kʉmʉtejeelezya, akʉseshela nhaani we akwɨmvwa izi lya we akwega. Shɨnɨɨsho she ʉlʉseshelo lwanɨ lwakwɨla. 30Yɨkwanzɨwa uYeesu abhe mʉpɨtɨ nhaani, lyoli ɨne ɨmbe ne munsi nhaani.”
31Ʉweene we akwɨnza kufuma kʉmwanya mʉpɨtɨ kʉshɨla bhonti, ɨleelo we akufuma mʉ nsɨ wa mʉ nsɨ, khabhɨlɨ akʉlonga ɨzya mʉ nsɨ. Ɨleelo we akwɨnza kufuma kʉmwanya mʉpɨtɨ kʉshɨla bhonti. 32Ʉweene akʉlonga zye azilolile na kʉzyɨmvwa kufuma kwa Mʉlʉngʉ, ɨleelo atalɨɨpo umuntu we akwɨtɨkha zye akʉlonga. 33Ɨleelo umuntu wowonti we akwɨtɨkha intumi zyakwe akusimishizya kʉtɨ ʉMʉlʉngʉ wa nalyoli. 34Kʉnongwa ye ʉweene we ʉMʉlʉngʉ amusonteleziizye, akʉlonga amazwi ga Mʉlʉngʉ, kʉnongwa ye ʉMʉlʉngʉ akuumupa uMupepu waakwe uMufinjile sita shipimilo. 35ɄTaata amuganile ʉMwana waakwe, khabhɨlɨ amupiiye ʉwaamʉlo ʉwa kʉtabhaala ivintu vwonti. 36We akʉmwɨtɨkha ʉMwana, alɨ nu wuumi ʉwa wiila na wiila. Ɨleelo we atakʉmwɨtɨkha ʉMwana, atalɨ nu wuumi ʉwa wiila na wiila, lyoli ʉmʉlakha wa Mʉlʉngʉ wʉkʉjendeelela kʉmʉgʉʉlɨla.
Currently Selected:
Yookhani 3: Malila
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
