EXODUS 13

Abasi Adianare Ofuri Akpan ke Otu Nditɔ Israel Onim Onyuŋ Ɔtɔŋɔŋɔ Usɔrɔ Ŋkaŋa Mbe

1NDIEN Jehovah ɔdɔhɔ Moses, ete, Dianare kpukpru akpan nim nɔ mi: 2se isirerede kpukpru itie-eyen ke otu nditɔ Israel, ke owo ye ke ufene edidi okim.

3Ndien Moses ɔdɔhɔ kpukpru owo, ete, Mbufo eti usen emi mbufo ewɔŋɔde ke Egypt, ke ufɔk ufin; koro Jehovah adade ɔkpɔsɔŋ ubɔk osio mbufo ke ebiet emi: mbufo ekudia baba se leaven odude ke esit. 4Mfin emi ke ɔfiɔŋ Abib ke mbufo ewɔŋɔ. 5Ndien ama ekem ke ini Jehovah edidade mbufo oduk ke isɔŋ mme Canaanite, ye mme Hittite, ye mme Amorite, ye mme Hivite, ye mme Jebusite, emi enye ɔkɔŋwɔŋɔde ɔnɔ mme usɔ, ete iyenɔ mbufo, isɔŋ emi ɔfiɔrɔde mmɔŋ-eba ye aran-ɔkwɔk, ndien mbufo enam utom emi ke ɔfiɔŋ emi. 6Mbufo edita uyo eke leaven miduhe, ke ofuri usen itiaba, ndien ke ɔyɔhɔ usen itiaba, eyedi usɔrɔ Jehovah. 7Edita uyo eke leaven miduhe ke ofuri usen itiaba emi; ekuyak ekut se leaven esinede ke ubɔk mbufo: ekunyuŋ eyak ekut leaven ke ubɔk mbufo, ye ke kpukpru mme adaŋa mbufo. 8Nyuŋ tiŋ nɔ eyen fo ke usen oro, ete, Ema enam emi ebaŋa se Jehovah akanamde ye ami, ke ini ŋwɔrɔde ke Egypt. 9Ndien enye eyedu fi ke ubɔk nte idiɔŋɔ fo, eyenyuŋ odu fi ke ufɔt enyin, nte ŋkpɔ eke edade eti, man mbet Jehovah okpodu fi ke inua: koro Jehovah adade ɔkpɔsɔŋ ubɔk osio fi ke Egypt. 10Nim ndien ewuhɔ emi ke ekem ini esie, kpukpru isua.

11Ndien ama ekem, ke adaŋemi Jehovah edidade fi oduk ke isɔŋ mme Canaanite, nte emi enye ɔkɔŋwɔŋɔde ɔnɔ fi ye mme usɔ, 12edinyuŋ adade enye ɔnɔ fi, ndien afo edidianare kpukpru se isirerede itie-eyen onim ke eke Jehovah, ye kpukpru akpa nditɔ eke efene eke afo enyenede, edimande: nyara edidi ŋkpɔ Jehovah. 13Afo edinyuŋ ada eyen ufene afak kpukpru akpa nditɔ ass; edi mufakke, buŋ mmɔ itɔŋ ndien: nyuŋ fak kpukpru akpan ke otu nditɔ-iren fo.

14Ndien ama ekem, adaŋemi eyen fo edibupde fi ke ini iso, ete, Emi edi nso? ndien, dɔhɔ enye, ete, Jehovah akada ɔkpɔsɔŋ ubɔk osioŋo nnyin ke Egypt, ke ufɔk ufin; 15ndien ekem ke Pharaoh mi-kenyimke ndiyak nnyin ika, Jehovah owot kpukpru akpan ke isɔŋ Egypt, ye akpan owo, ye akpan eyen ufene: mmɔdo ami ndade kpukpru nyara eke esirerede itie-eyen ŋwa nnɔ Jehovah; edi mfak kpukpru akpan nditɔ iren mi. 16Ndien enye eyedu fi ke ubɔk nte idiɔŋɔ, eyenyuŋ odu fi ke ufɔt enyin nte frontlet: koro Jehovah akadade ɔkpɔsɔŋ ubɔk osioŋo nnyin efep ke Egypt.

17Ekem adaŋemi Pharaoh akayakde mbio oro eka, Abasi idaha mmɔ usuŋ edem mme Philistine, okposuk edieke enye ekperede; koro Abasi ɔdɔhɔde, ete, Mbak mmɔ editua mkpɔfiɔk adaŋemi edikutde ekɔŋ, ndien efiak ke Egypt. 18Edi Abasi ada mbio oro akabare ke usuŋ wilderness Ididuot Inyaŋ. Ndien nditɔ Israel etim idem eto ke isɔŋ Egypt edɔk. 19Moses onyuŋ emen mme ɔkpɔ Joseph obiom: koro enye okowukde nditɔ Israel, ete, Abasi iditreke ndidi ndise mbufo; ndien mbufo emen mme ɔkpɔ mi ke ebiet emi edɔk.

20Ekem mmɔ edaŋa ke Succoth, ekenam nna ke Etham, ke mben wilderness. 21Jehovah onyuŋ ebem mmɔ iso, ke uwemeyo ke obubit enyɔŋ ebiet adaha, ndida mmɔ usuŋ; ke okoneyo ŋko, ke ikaŋ ebiet adaha, ndiyama nnɔ mmɔ; kpaŋ mmɔ ekpesaŋa ke uwemeyo ye ke okoneyo. 22Adaha oro ke ikpa-enyɔŋ idahake ke uwemeyo, adaha ikaŋ inyuŋ idahake ke okoneyo, ke iso mbio oro.

Currently Selected:

EXODUS 13: ENA

Highlight

Copy