EXODUS 15

Nditɔ Israel Ekwɔ Ikwɔ Itoro Enɔ Abasi

1NDIEN Moses ye nditɔ Israel ekwɔ ikwɔ emi enɔ Jehovah, enyuŋ edɔhɔ ete, Nyekwɔ nnɔ Jehovah, koro enye okoŋde; enye ekemen horse ye andidoro-horse, ɔduɔk ke inyaŋ. 2Jehovah edi odudu mi ye ikwɔ, omonyuŋ edi erinyaŋa mi: enye edi Abasi mi, ndien nyekpono enye; Abasi ete mi, ndien nyetoro enye.

3Jehovah edi owo ekɔŋ, Jehovah edi enyiŋ esie. 4Enye ekemen mme chariot Pharaoh ye mme udim esie ɔduɔk ke inyaŋ: akpan mbon-ekɔŋ esie enyuŋ edeŋ ke Ididuot Inyaŋ. 5Akamba mmɔŋ omofuk mmɔ; mmɔ emesuhɔre ke udem nte itiat. 6Ubɔk nnasia fo, O Jehovah omokpon ke odudu: ubɔk nnasia fo, O Jehovah, amanuak mme asua fo mbai-mbai. 7Afo omonyuŋ ada akwa ubom ubɔn fo abiat mmɔ emi eŋwanade ye afo: afo ɔdɔŋ iyaresit fo utom: enye atak mmɔ nte etak nnyanyaŋa. 8Ibifik ibuo fo ŋko ekesin mmɔŋ adahada; mme akpa mmɔŋ eneŋere eda nte ibombom, akamba mmɔŋ abari ke esit inyaŋ.

9Usua ɔdɔhɔ ete, Nyebine; nyesim; nyedeme mbume: mmɔ eyeyuhɔ itɔŋ mi; nyesio ofut mi; ubɔk mi eyesobo mmɔ. 10Afo okofri ibifik fo; inyaŋ ofuk mmɔ; mmɔ edeŋ nte ŋket ke mkpɔsɔŋ mmɔŋ.

11Anie, ke otu mme abasi ebiet fi O Jehovah? Anie ebiet fi, emi okponde ubɔŋ ke edisana ido, emi eteŋede ke itoro, anamde mme utibe ŋkpɔ? 12Afo ekemenere ubɔk nnasia fo, isɔŋ emen mmɔ.

13Ima fo esin fi ada ikɔt emi afo akafakde ɔwɔrɔ; ada odudu fo eteme mmɔ usuŋ edisana ebiet fo. 14Mme idut eyekop, enyuŋ enyek idem: mbɔribɔ eyemum mme andiduŋ Philistia. 15Ndien idem eyekpa mbon Edom; nnyekidem eyemum mkpɔsɔŋ owo Moab: mme andiduŋ Canaan eyeyemere kpukpru. 16Ndik ye mbɔribɔ eyefuk mmɔ: akwa ubɔk fo eyesin mmɔ edobo nte itiat, tutu ikɔt fo, O Jehovah, ebe; tutu ikɔt emi afo edepde ebe. 17Afo eyeda mmɔ oduk, onyuŋ ɔtɔ mmɔ ke obot emi afo enyenede, ebiet emi afo anamde ete edi iduŋ fo, O Jehovah, edisana ebiet emi ubɔk fo owukde, O Ɔbɔŋ.

18JEHOVAH EYEDA UBƆŊ KE NSINSI.

19Koro mme horse Pharaoh, ye mme chariot esie, ye mbon horse esie ekedukde ke inyaŋ, ndien Jehovah esin mmɔŋ inyaŋ afiak ofuk mmɔ; edi nditɔ Israel esaŋa ke edisat isɔŋ ke ufɔt inyaŋ ebe.

20Ndien Miriam prophet aŋwan, eyen-eka Aaron, emen ekɔmɔ ke ubɔk esie; kpukpru iban enyuŋ eda ekɔmɔ etiene enye ke edem ewɔŋɔ, ke enek unek. 21Ndien Miriam ɔbɔrɔ mmɔ, ete, Mbufo ekwɔ enɔ Jehovah, koro enye okoŋde; enye ekemen horse ye andidoro-horse ɔduɔk ke inyaŋ.

22Ekem Moses ada Israel adaha ke Ididuot Inyaŋ; ndien mmɔ ewɔŋɔ eduk ke wilderness Shur; ndien mmɔ esaŋa usen ita ke wilderness, edi ikwe mmɔŋ. 23Ndien adaŋemi mmɔ esimde Marah, mmɔ ikwe nte eŋwɔŋde mmɔŋ Marah, koro odorode: mmɔdo esiode enye Marah. 24Ndien mmɔ esuk Moses uyo, ete, 25Nnyin idiŋwɔŋ nso? Ndien enye eseme ɔnɔ Jehovah; ndien Jehovah owut enye eto kiet; ndien enye ada eto oro ɔduɔk ke mmɔŋ oro, ndien mmɔŋ oro akabare enem: do ke Enye ɔnɔ enye ewuhɔ ye item, onyuŋ odomo enye do; 26onyuŋ ɔdɔhɔ ete, edieke afo editimde okop uyo Jehovah Abasi fo, onyuŋ anamde se inende enye ke enyin, onyuŋ akpaŋde utɔŋ ɔnɔ mbet esie, onyuŋ onimde kpukpru ewuhɔ esie, ndidaha baba udɔŋɔ kiet emi ŋkanamde etiene Egypt, ntiene fi: koro edi ami Jehovah nnam udɔŋɔ okure fi.

27Edikem mmɔ esim Elim emi idim mmɔŋ duopeba ye eyop ata ye udop edude do: ndien enam nna mmɔ do ke mben mmɔŋ.

Currently Selected:

EXODUS 15: ENA

Highlight

Copy