EXODUS 17

Abasi Anam Mmɔŋ Ɔwɔrɔ ke Itiat

1EKEM ofuri udim nditɔ Israel edaŋa ke wilderness Sin, nte isaŋ mmɔ edide, ke uyo Jehovah, ekena ke Rephidim: ndien baba mmɔŋ eke mmɔ eŋwɔŋde iduhe. 2Ndien mmɔ etibi utɔk ye Moses, ete, Nɔ nnyin mmɔŋ iŋwɔŋ. Ndien Moses ɔdɔhɔ mmɔ ete, Nsinam mbufo etibide utɔk ye ami: Nsinam mbufo edomode Jehovah? 3Ndien itɔŋ mmɔŋ asat mmɔ do; ndien mmɔ esuk Moses uyo, ete, Nsinam afo osiode nnyin ntem ke Egypt ada ɔdɔk ete iwot nnyin, ye nditɔ nnyin, ye ufene nnyin ke nsat-itɔŋ?

4Ndien Moses eseme ɔnɔ Jehovah, ete, Ndinam nso ye mbon emi? 5Ayak esisit mmɔ etɔŋɔ mi ke itiat. Ndien Jehovah ɔdɔhɔ Moses ete, Be kpukpru owo iso ka, nyuŋ da ndusuk mbiowo Israel ŋko; nyuŋ da esaŋ fo emi afo akadade oyibi akpa, kama ke ubɔk, ndien saŋa. 6Sese ami mmɔŋ mbem fi iso nda do ke akamba itiat oro ke Horeb; ndien afo oyibi itiat oro, ndien mmɔŋ eyewɔrɔ ke esit, man kpukpru owo eŋwɔŋ. Ndien Moses anam ntre ke iso mbiowo Israel. 7Ndien enye osio ebiet oro enyiŋ Massah, ye Meribah, ke abaŋa utɔk nditɔ Israel, ye ke eridomo emi mmɔ edomode Jehovah ete, Mme Jehovah odu ke otu nnyin, mme iduhe?

8Ekem Amalek edi ediŋwana ekɔŋ ye Israel ke Rephidim. 9Ndien Moses ɔdɔhɔ Joshua ete, Mek owo nɔ nnyin, ndien wɔrɔ kaŋwana ekɔŋ ye Amalek; mkpɔŋ ami nyeda ke ibuot obot oro, ye esaŋ Abasi ke ubɔk mi. 10Ndien Joshua anam kpa nte Moses ɔkɔdɔhɔde enye, ete aŋwana ekɔŋ ye Amalek: ndien Moses, ye Aaron, ye Hur edɔk ke enyɔŋ obot oro. 11Edikem ndien adaŋemi Moses emenerede ubɔk esie ke enyɔŋ Israel ekan; edi ke ini enye ɔsuhɔrede ubɔk esie, Amalek ekan. 12Edi ubɔk odobi Moses; ndien mmɔ emen itiat esin enye ke idak; ndien enye etie ke esit: ndien Aaron ye Hur ekama ubɔk esie, kiet ke ŋkaŋ emi, kiet ke ŋkaŋ eken; ndien ubɔk esie esɔŋɔ eda tutu utin osop. 13Ndien Joshua asuan Amalek ye ikɔt esie ke iso ofut. 14Ndien Jehovah ɔdɔhɔ Moses ete, Wet emi ke ŋwed ke ŋkpɔ eriti, nyuŋ sin Joshua ke utɔŋ: koro mmenditreke ndisɔhi enyiŋ Amalek mfep ke idak enyɔŋ. 15Ndien Moses anam itie-uwa, onyuŋ osio enye enyiŋ Jehovah-nissi onyuŋ ɔdɔhɔ ete, 16Koro ubɔk odorode ke ebekpo Jehovah, Jehovah aŋwana ekɔŋ ye Amalek ke ofuri emana.

Currently Selected:

EXODUS 17: ENA

Highlight

Copy