EXODUS 34

Moses Ɔtɔŋɔ Ntak Anam Itiat Mbet Efen

1NDIEN Jehovah ɔdɔhɔ Moses ete, Sɔi itiat ŋwed iba ke idem fo, ebiet eke akpa: ndien nyeda ikɔ emi ekedude ke akpa itiat-ŋwed emi afo okobomde, ŋwet nsin ke itiat-ŋwed oro. 2Nyuŋ tim ŋkpɔ beŋe usenubɔk, ndien dɔk ke obot Sinai ke usenubɔk, da do ye ami ke enyɔŋ obot. 3Ndien kuyak baba owo kiet etiene fi ɔdɔk, ekunyuŋ eyak ekut owo ndomo kiet ke ofuri obot; ekunyuŋ eyak ŋkpri ufene ye enaŋ eta mbiet ke iso obot oro.

4Ndien enye ɔsɔi itiat-ŋwed iba, ebiet eke akpa; ndien Moses abak edemere ke usenubɔk, ɔkɔdɔk obot Sinai, nte emi Jehovah ɔkɔdɔhɔde enye, onyuŋ obiom itiat-ŋwed iba oro ke ubɔk. 5Ndien Jehovah etie ke obubit enyɔŋ ɔsuhɔre, edida ye enye do, onyun ataŋa enyiŋ Jehovah. 6Ndien Jehovah ɔbiɔŋɔ enye ke iso, ataŋa ete, Jehovah, Jehovah, Abasi mbɔm, ye mfɔn, ye anyan ime, 7awak ima ye akpanikɔ, onim ima ɔnɔ ediwak tɔsin, efen mme ukwaŋ-ŋkpɔ, ye ndudue, ye idiɔk ido, edi iyakke mbon-isop ebɔhɔ; ada usiene mme ukwaŋkpɔ mme ete, osio ye nditɔ, ye nditɔ nditɔ, tutu osim ɔyɔhɔ emana ita ye inaŋ. 8Ndien Moses awara onuhɔ ke isɔŋ, onyuŋ owuk ibuot. 9Enye onyuŋ ɔdɔhɔ ete, Mbɔk, edieke afo enende iso ye ami, O Ɔbɔŋ, mbɔk, yak Ɔbɔŋ mi asaŋa ke otu nnyin; koro mmɔ edide mbon nsɔŋibuot; nyuŋ fen ukwaŋ-ŋkpɔ nnyin, ye idiɔk ido nnyin, nyuŋ da nnyin nim ke udeme fo.

10Ndien Enye ɔdɔhɔ ete, Sese, ami mmɔŋ ndiomi ediomi: ke iso kpukpru oruk fo ke ndinam mme utibe ŋkpɔ, eke akanam minamke ke ofuri ererimbot, akanam minyuŋ inamke ke baba idut kiet: ndien kpukpru owo emi afo odude ke otu mmɔ, eyekut se Jehovah edinamde: koro se ndinamde ye afo edide ŋkpɔ ndik. 11Tim kpeme se ami mmɔŋ nteme fi mfin emi: sese, mmɔŋ mbin mme Amorite, ye mme Canaanite, ye mme Hittite, ye mme Perizzite, ye mme Hivite, ye mme Jebusite, ke iso fo mfep. 12Kpeme idem fo, mbak edidiomi ediomi ye mme andiduŋ edem emi afo akade do, mbak enye edikabare edi afia ke ufɔt fo. 13Edi mbufo ewuri mme itie uwa mmɔ, ebom mme adaha mmɔ, enyuŋ esiak mme eto-mkpe mmɔ: 14kunyuŋ utuak ibuot unɔ abasi efen baba kiet: koro Jehovah, emi enyiŋ esie ekerede Ufup, edi Abasi ufup: 15mbak afo edidiomi ediomi ye mme andiduŋ isɔŋ emi; ndien mmɔ etiene mme abasi mmɔ enam use, enyuŋ ewa uwa enɔ mme abasi mmɔ, ndien owo okot fi, afo onyuŋ aka adia ŋkpɔ uwa esie: 16onyuŋ ada nditɔ-iban mmɔ ɔnɔ nditɔ-iren fo, ndien nditɔ-iban mmɔ etiene mme abasi mmɔ enam use, enyuŋ eda mme nditɔ-iren fo etiene mme abasi mmɔ enam use. 17Kutara ŋkpɔ ubot abasi ke idem fo.

18Nim usɔrɔ uyo eke leaven miduhe. Ke usen itiaba ke afo edita uyo eke leaven miduhe, kpa nte ŋkowukde fi; ke ini ɔfiɔŋ Abib: koro ke ɔfiɔŋ Abib ke afo okoto ke Egypt ɔwɔrɔ. 19Kpukpru se isirerede itie-eyen edi okim; ye kpukpru akpa nyara nditɔ ufene fo, edide akpa eyen enaŋ, onyuŋ edide eke ŋkpri ufene. 20Edi da eyen erɔŋ fak akpa eyen ass: ndien mufakke, buŋ enye itɔŋ. Fak kpukpru nditɔ-iren fo. Ndien owo baba kiet okusaŋa ubɔk-ubɔk edi ke iso mi.

21Nam utom ke ofuri usen itiokiet: ndien dop ke ɔyɔhɔ usen itiaba: dop ke ini utɔ, ye ke ini ukpeŋe.

22Nyuŋ tim nim usɔrɔ mme urua, ke akpa obufa wheat eke ekpeŋede, ye usɔrɔ ubiom-ibokpot ke ukabare isua.

23Yak kpukpru irenowo fo edi ke iso Ɔbɔŋ Jehovah Abasi Israel, utim ikata ke isua. 24Koro nyebin mme idut ke iso fo mfep, nnyuŋ nnam mme adaŋa fo etara: ndien baba owo kiet idiyomke isɔŋ fo, ke ini afo edidɔkde ndiwut Jehovah Abasi fo idem, utim ikata ke isua. 25Kuduɔk iyip uwa mi ubuak ye leaven: kunyuŋ uyak uwa usɔrɔ passover adaŋ esiere usen. 26Da akpa obufa mbuŋwum isɔŋ fo sɔk ke ufɔk Jehovah Abasi fo. Kutem eyen ebot ke mmɔŋ eba eka esie.

27Ndien Jehovah ɔdɔhɔ Moses ete, Wet mme ikɔ emi ke idem fo: koro ndade uyo ikɔ emi ndiomi ediomi ye afo, ye Israel ŋko. 28Ndien enye odu do ye Jehovah ke uwemeyo aba ye okoneyo aba; itaha uyo, inyuŋ iŋwɔŋke mmɔŋ. Ndien Enye emen ikɔ ediomi emi, kpa mme ikɔ duop oro, ewet esin ke itiat-ŋwed oro.

29Edikem, ke adaŋemi Moses otode ke obot Sinai ɔsuhɔre, ye itiat-ŋwed ntiense mbiba ke ubɔk Moses, ke ini enye otode ke obot ɔsuhɔre, Moses ifiɔkke ite ke ikpa iso imɔ esem, ke enemede nneme ye enye. 30Ndien adaŋemi Aaron ye kpukpru nditɔ Israel ekutde Moses, sese, ikpa iso esie esem: ndien mmɔ edikhe ndisaŋa ŋkpere enye. 31Ndien Moses okot mmɔ edi; ndien Aaron ye kpukpru mbɔŋ esop efiak etiene enye: ndien Moses osioŋo nneme ye mmɔ. 32Ekem, usuk-usuk, kpukpru nditɔ Israel esaŋa ekpere: ndien enye eteme mmɔ kpukpru se Jehovah ɔkɔdɔhɔde enye ke obot Sinai. 33Ndien adaŋemi Moses etiŋde ɔnɔ mmɔ ama, enye ada ufuk-iso esiemɔ. 34Edi adaŋemi Moses odukde ke iso Jehovah ndidɔhɔ ye enye, enye ɔfuhɔre ufuk-iso efep, tutu enye ɔwɔrɔ. Ndien enye ɔwɔrɔ edimen se eketemede enye, etiŋ ɔnɔ nditɔ Israel. 35Ndien nditɔ Israel ekut iso Moses, nte ikpa iso Moses esemde: ndien Moses ɔtɔŋɔ ntak ada ufuk-iso ofuk iso esie, tutu edisim ini emi enye odukde ndidɔhɔ ye Enye.

Currently Selected:

EXODUS 34: ENA

Highlight

Copy