EXODUS 36

Edisana Efe

1NTEM ke Bezalel anam, ye Oholiab, ye kpukpru owo mbufiɔk, eke Jehovah esinde mmɔ mbufiɔk, ye asian ke idem, man efiɔk nte enamde kpukpru oruk ubɔk-usɔ ke edisana efe, kpa nte emi Jehovah eketemede kpukpru.

2Edikem Moses okot Bazalel ye Oholiab, ye kpukpru mbon eti ibuot, eke Jehovah ekesinde mmɔ eti ibuot ke idem, kpukpru owo eke esit mmɔ edemerede mmɔ ndisaŋa ŋkpere utom, nnyuŋ nsin ubɔk ke esit. 3Ndien mmɔ ebɔ Moses kpukpru enɔ emi nditɔ Israel ekedade esɔk ke utom edisana efe, man enam enye. Ndien mmɔ esuk ededa enɔ ima esɔk enye kpukpru usenubɔk. 4Ekem kpukpru mbon eti ibuot, emi enamde kpukpru utom edisana efe, kiet kiet ekpɔŋ utom mmɔ emi mmɔ enamde; 5eka ekedɔhɔ Moses, ete, Mbio emi eda ŋkpɔ ebe adaŋa nte ekemde, edinɔ ke erinam utom, emi Jehovah okowukde ete enam enye. 6Ndien Moses owuk ete etɔt ofuri nna ete, Yak iren ye iban ekunam aba utom eke enɔde edisana efe; ndien mmɔ etre ndida ŋkpɔ ndi. 7Ndien se mmɔ enamde ekem ndinam kpukpru utom oro, onyuŋ ɔsuhɔ.

8Ndien kpukpru owo mbufiɔk ke otu mmɔ emi enamde utom oro, enam ebiet-iduŋ oro ke ikpehe eti edifiak linen duop, ye awawa, ye purple, ye ididuot; cherubim ubɔk-usɔ ɔdɔk-ɔfɔŋ ke enam mmɔ 9Uniɔŋ ikpehe kiet edi ibio idomo-okuk inaŋ: kpukpru ikpehe esaŋa idomo kiet. 10Enye onyuŋ ɔkɔt ikpehe ition ke ɔtɔ kiet: onyuŋ ɔkɔt ikpehe ition efen ke ɔtɔ kiet. 11Onyuŋ ada awawa anam ekpɔ esin ke mben ikpehe kiet, ke ibuŋ, ke ɔtɔ emi ekɔtde mmɔ: ntre ke enye anam ke mben akpatre ikpehe ke udiana-akpa ikɔt. 12Enye anam ekpɔ aba ye duop, esin ke ikpehe kiet, onyuŋ anam ekpɔ aba ye duop, esin ke ibuŋ ikpehe emi odude ke udiana-akpa ikɔt: ekpɔ kiet ekem ye eken. 13Enye onyuŋ anam ŋkɔp o-gold aba ye udop, ada ŋkɔp oro adian ikpehe kiet ye kiet: ndien enye akabare edi iduŋ kiet.

14Enye onyuŋ anam ikpehe idet ebot ke eke tent eke odorode ke enyɔŋ ebiet-iduŋ: anam ikpehe duopekiet. 15Uniɔŋ ikpehe kiet edi ibio idomo-okuk edip ye duop, ufot ikpehe kiet onyuŋ edi ibio idomo-okuk inaŋ: ikpehe duopekiet esaŋa idomo kiet. 16Ndien enye ɔkɔt ikpehe ition ke ɔtɔ kiet, onyuŋ ɔkɔt ikpehe itiokiet ke ɔtɔ kiet. 17Enye onyuŋ anam ekpɔ aba ye duop, esin ke mben akpatre ikpehe ke ikɔt kiet, onyuŋ anam ekpɔ aba ye duop, esin ke mben ikpehe udiana-akpa ikɔt. 18Onyuŋ anam ŋkɔp okpoho aba ye duop man eda edian tent oro, enam edi kiet. 19Ndien enye ada ikpa okukim erɔŋ eke etemde oyibe, anam ufuhɔ-ŋkpɔ tent; onyuŋ ada ikpa badger anam ufuhɔ-ŋkpɔ ke odoro enyɔŋ.

20Ndien enye ada eto shittim anam obukpɔk ebiet-iduŋ, eneŋere eda. 21Uniɔŋ obukpɔk edi ibio idomo-okuk duop, ubara obukpɔk kiet onyuŋ edi ibio idomo-okuk kiet ye ubak. 22Obukpɔk kiet enyene edet iba, kiet ekem ye kiet: ntem ke enye anam ye kpukpru obukpɔk ebiet-iduŋ. 23Ndien enye anam mme obukpɔk ebiet-iduŋ; obukpɔk edip ke ŋkaŋ edem usuk: 24enye onyuŋ anam socket silver aba, esin ke idak obukpɔk edip oro; socket iba ke idak obukpɔk kiet, ɔnɔ edet esie mbiba, ye socket iba ke idak obukpɔk kiet, ɔnɔ edet esie mbiba. 25Enye onyuŋ anam obukpɔk edip ɔnɔ ŋkaŋ ebiet-iduŋ eken, ke edem edere: 26ye socket silver mmɔ aba; socket iba ke idak obukpɔk kiet, ye socket iba ke idak obukpɔk kiet. 27Ndien enye anam obukpɔk itiokiet ɔnɔ etak ebiet-iduŋ ke edem usop utin; 28onyuŋ anam obukpɔk iba ɔnɔ inuk ebiet-iduŋ ke etak edem mbiba. 29Ndien mmɔ edi ukem-ukem ke idak, ndien kpasuk ntre mmɔ edi ukem-ukem ke ibuot esie, ke ɔtɔ akpa mkpanuen: ntem ke enye anam mmɔ mbiba ɔnɔ inuk mbiba. 30Ndien mmɔ edi obukpɔk itiaita; socket mmɔ efurekiet enyuŋ edi socket silver, socket iba iba ke idak obukpɔk kiet.

31Ndien enye ada eto shittim anam mme bar: anam ition ɔnɔ obukpɔk ŋkaŋ ebiet-iduŋ kiet; 32onyuŋ anam bar ition ɔnɔ mme obukpɔk ŋkaŋ ebiet-iduŋ eken, ye bar ition ke eke obukpɔk ebiet-iduŋ ke etak edem usop-utin. 33Enye onyuŋ anam ufɔt-ufɔt bar atuak ke ibuot emi ye ke ibuot oko ke ufɔt mme obukpɔk. 34Onyuŋ ada gold ofuk obukpɔk: onyuŋ anam mkpanuen mmɔ ke gold, man edi itie mme bar; onyuŋ ofuk mme bar ke gold.

35Ndien enye ada awawa, ye purple, ye ididuot, ye eti edifiak linen, anam ukara: anam enye cherubim cherubim ke ubɔk-usɔ ɔdɔk-ɔfɔŋ. 36Ndien enye anam obukbɔk shittim inaŋ ɔnɔ enye, onyuŋ ofuk mmɔ ke gold; ntok mmɔ edi gold; onyuŋ atara silver anam socket inaŋ ɔnɔ mmɔ.

37Enye onyuŋ anam ikpehe enyin-usuŋ efe oro ke awawa, ye purple, ye ididuot, ye eti edifiak linen, ke ubɔk-usɔ abiabon; 38ye mme obubɔk esie ition, ye ntok mmɔ: ndien enye ada gold ofuk mbuot mmɔ, ye ibiɔŋ esaŋ mmɔ; edi socket mmɔ ition edi okpoho.

Currently Selected:

EXODUS 36: ENA

Highlight

Copy