EXODUS 38

Enam Itie Edifɔb Uwa

1NDIEN enye onyuŋ ada eto shittim anam itie-ufɔp uwa: uniɔŋ esie ibio idomo-okuk ition, ye ubon esie ibio idomo-okuk ition; mbuot esie edi ukem-ukem; ndien idaha esie edi ibio idomo-okuk ita. 2Enye onyuŋ anam nduk esie esin ke inuk esie mbinaŋ; nduk esie edi idem kiet ye enye; onyuŋ ada okpoho ofuk enye. 3Enye onyuŋ anam kpukpru ŋkpɔ-utom itie-uwa, mme eso, ye mme uwobi-ntɔŋ, ye mme bowl ye mme fork, ye mme uda-ikaŋ; enye ada okpoho anam kpukpru ŋkpɔ-utom esie. 4Onyuŋ anam grating itie-uwa nte edidɔk iyire okpoho, esin ke mben esie ke idak, osim enye ufɔt. 5Onyuŋ atara okpoho, anam mkpanuen inaŋ esin ke inuk grating okpoho mbinaŋ, ke itie esaŋ. 6Ndien enye anam esaŋ eto shittim, onyuŋ ada okpoho ofuk mmɔ. 7Ndien enye esin esaŋ ke mkpanuen ke ŋkaŋ itie-uwa man eda mmɔ ebiom enye; ada obukpɔk anam itie-uwa nte ekebe. 8Enye onyuŋ ada okuriso iban emi esaŋade utom ke enyin-usuŋ efe esop, anam akpaŋkpaŋ ye ukot esie, ke okpoho.

9Enye onyuŋ anam okure; ikpehe okure ŋkaŋ edem usuk edi eti edifiak linen, ibio idomo-okuk ikie. 10Mme obukpɔk mmɔ edi edip, ye socket okpoho mmɔ edip; ntok obubɔk ye esaŋ mmɔ edi silver. 11Ikpehe ibio idomo-okuk ikie enyuŋ edu ke ŋkaŋ edem edere, obubɔk mmɔ edip, ye socket okpoho mmɔ edip; ntok obubɔk ye esaŋ mmɔ edi silver. 12Ndien ikpehe ibio idomo-okuk aba ye duop edu ke ŋkaŋ edem usop-utin, obubɔk mmɔ duop ye sokcet mmɔ duop; ntok obubɔk ye esaŋ mmɔ edi silver. 13Ibio idomo-okuk aba ye duop enyuŋ edu ke ŋkaŋ edem usiaha utin. 14Ikpehe ke ŋkaŋ enyin-usuŋ kiet edi ibio idomo-okuk efut; obubɔk mmɔ ita, ye socket mmɔ ita. 15Ikpehe ibio idomo-okuk efut enyuŋ edu ke ŋkaŋ enyin-usuŋ okure, ke edem emi ye ke edem oko; obubɔk mmɔ ita ye socket mmɔ ita. 16Kpukpru mme ikpehe okure ekan ekuk edi eti edifiak linen. 17Mme socket obubɔk oro enyuŋ edi okpoho; ntok obubɔk ye esaŋ mmɔ enyuŋ edi silver; enyuŋ eda silver efuk mbuot mmɔ: kpukpru obubɔk okure enyuŋ esobo ke esaŋ silver. 18Ndien ikpehe enyin-usuŋ okure edi ubɔk-usɔ ɔdɔk-ɔfɔŋ, awawa, ye purlpe, ye ididuot, ye eti edifiak linen: uniɔŋ edi ibio idomo-okuk edip, ye idaha ke ubara ibio idomo-okuk ition ekem ke ikpehe okure. 19Ndien obubɔk mmɔ edi inaŋ, ye socket okpoho mmɔ inaŋ; ntok mmɔ edi silver, ndien eda silver efuk mbuot mmɔ esaŋ mmɔ enyuŋ edi silver. 20Ndien kpukpru mme ɔkpɔhɔ ebiet-iduŋ, ye eke okure ekan okuk, edi okpoho.

21Emi edi ŋkpɔ ebiet-iduŋ emi ebatde, kpa eke ebiet-iduŋ ŋkpɔ-ntiense, nte ebatde enye ke uyo Moses, utom mme Levite, ke ubɔk Ithamar, eyen Aaron oku. 22Ndien Bezalel eyen Uri, eyen Hur, emi otode ke esien Judah, anam kpukpru se Jehovah okowukde Moses. 23Ndien Oholiab, eyen Ahisamach, emi otode ke esien Dan, owo usɔ, ye enyene ibuot ɔdɔk-ɔfɔŋ, emi otimde ɔfiɔk ndidɔk awawa, ye purple, ye ididuot, ye eti linen, odu ye enye.

24Ndien ofuri gold emi edade enam utom emi, ke ofuri edisana utom, gold emi enɔde ke edifuŋ uwa, edi talent edip ye usukkiet, ye shekel ikie itiaba ye edip ye duop, nte edisana shekel edide. 25Ndien silver mme mmɔ emi ebatde ke otu mbon esop edi talent ikie, ye tɔsin shekel ye ikie itiaba ye ata ye efut, 26nte edisana shekel edide, eke kpukpru owo eke ebede eduk ke otu mme mmɔ emi ebatde, ɔtɔŋɔde ke owo isua edip, ye mmɔ eke ebede oro, eke tɔsin owo ikie itiokiet ye tɔsin ita, ye ikie ition ye aba ye duop. 27Ndien mmɔ etara talent silver ikie, enam mme socket edisana ebiet, ye mme socket ukara; socket ikie ye talent ikie, socket kiet, talent kiet. 28Enye onyuŋ ada tɔsin shekel ye ikie itiaba ye ata ye efut, anam ntok esin ke obukɔk, onyuŋ ofuk mbuot mmɔ, onyuŋ anam esaŋ mmɔ.

29Ndien okpoho oro ekenɔde ke edifuŋ uwa, edi talent ata ye duop, ye tɔsin shekel iba ye shekel ikie inaŋ 30Ndien enye ada oro anam mme socket enyin-usuŋ efe esop, ye itie-uwa okpoho, ye grating okpoho esie, ye kpukpru ŋkpɔ utom itie-uwa. 31Ye mme socket okure akan okuk, ye mme socket enyin-usuŋ okure, ye kpukpru ɔkpɔhɔ ebiet-iduŋ, ye kpukpru ɔkpɔhɔ okure akan okuk.

Currently Selected:

EXODUS 38: ENA

Highlight

Copy