GENESIS 15

Abasi Anam Ediomi ye Abram

1KE ŋkpɔ emi ema ekebe, ikɔ Jehovah osim Abram ke ŋkukut, ete, Kufehe ndik, Abram: Ami ndi otu ekɔŋ fo, utip fo awak eti-eti. 2Ndien Abram ɔdɔhɔ, ete, Jehovah Ɔbɔŋ, afo edinɔ mi nso ŋkpɔ, sia ami nsaŋa ntem nnyeneke eyen, ndien adia ufɔk mi edi Eliezer Damascus? 3Ndien Abram ɔdɔhɔ, ete, Sese, unɔŋɔ mi eyen: ndien sese, edi eyen ufɔk mi edidia akpa mi.

4Ndien, sese, ikɔ Jehovah osim enye, ete, Idige owo emi edidia akpa fo: edi owo emi afo edibonde edidia akpa fo. 5Ndien enye ada enye ɔwɔrɔ ke edem esa, ete, Nam se enyɔŋ ko, nyuŋ bat ntantafiɔŋ, edieke afo ekemede ndibat mmɔ: onyuŋ ɔdɔhɔ enye ete, Ntem ke ubon fo editie.

6Ndien enye ɔbuɔt idem ye Jehovah; ndien enye abat oro ɔnɔ enye ke edinen ido.

7Ndien enye ɔdɔhɔ enye, ete, Ami ndi Jehovah emi ŋkosiode fi ke Ur mme Chaldee, nte nnɔ fi isɔŋ emi ada enye enyene. 8Ndien enye ɔdɔhɔ, ete, Jehovah Ɔbɔŋ, nda nso mfiok nte nyenyene? 9Ndien Enye ete, Sio uman enaŋ isua ita, ye uman ebot isua ita, ye okukim erɔŋ isua ita, ye mbomoŋkuku kiet, ye eyen ibiom kiet nɔ mi.

10Ndien enye osio kpukpru mmɔ emi ɔnɔ Enye, onyuŋ asiak mmɔ ukem-ukem, onyuŋ onim ubak kiet ana ukem ye eken, edi isiakke mme inuen. 11Ndien mme utere esuhɔre etiene okpo oro, edi Abram ebin mmɔ efep.

12Ekem ke ini eyo oyomde ndikut, ɔkpɔsɔŋ idap edimun Abram; ndien, sese, akamba ekim ɔduɔ enye ke idem, ndik onyuŋ omum enye. 13Ndien enye ɔdɔhɔ Abram, ete, Tim fiɔk ete ke ubon fo eyedi isen ke isɔŋ kiet eke midige eke mmɔ; eyenyuŋ enam ŋkpɔ enɔ mmɔ; mmɔ eyenyuŋ efik mmɔ ke isua ikie inaŋ: 14ndien Ami nyekpe ikpe ye idut oro ŋko, emi mmɔ edinamde ŋkpɔ enɔ mmɔ; ndien ŋkpɔ oro ama ebe, mmɔ eyewɔŋɔ ye ediwak inyene. 15Edi afo eyetiene mme usɔ ke emem; eyebuhɔ ke ata usɔn. 16Ndien ke ɔyɔhɔ emana inaŋ mmɔ eyenyɔŋ ken: koro mme idiɔkŋkpɔ mme Amorite mika-iyɔhɔke kaŋa.

17Ekem eyo okut, onyuŋ okim eti eti ndien sese, usaŋ uyo eke ɔwɔrɔde nsuŋikaŋ ye edeme ikaŋ, eke asaŋade ke ufɔt okpo oro ebe. 18Ke usen oro Jehovah odiomi ediomi ye Abram, ete, Ndada isɔŋ emi nnɔ ubon fo, ɔtɔŋɔde ke akpa Egypt, tutu osim akamba akpa, akpa Euphrates: 19mme Kenites, ye mme Kenizzite, 20ye mme Kadmonite, ye mme Hitite, ye mme Perizzite, ye mme Rephaim, ye mme Amorite, 21ye mme Canaanite, ye mme Girgashite, ye mme Jebusite.

Currently Selected:

GENESIS 15: ENA

Highlight

Copy