GENESIS 41

Joseph Akabare Ndap Ɔnɔ Edidem Egypt

1EKEM ke utit isua iba Pharaoh adaba ndap: ndien, sese, enye ada ke mben akpa. 2Ndien, sese, enaŋ itiaba eke eyede ndise enyuŋ enyenede isek ke idem, eto ke akpa edɔk; ndien mmɔ edita nnyanyaŋa. 3Ndien, sese, enaŋ itiaba eŋwen eke ediɔide ndise, enyuŋ etiede ɔkpɔ-ɔkpɔ, eto ke akpa edɔk; ndien mmɔ edida ke ŋkaŋ enaŋ oro ke mben akpa. 4Ndien enaŋ oro ediɔide ndise, enyuŋ etiede ɔkpɔ-ɔkpɔ, edita enaŋ itiaba oro eyede ndise, enyuŋ enyenede isek ke idem. Ndien Pharaoh edemere.

5Ndien enye ɔtɔŋɔ ntak ede, onyuŋ adaba ndap: ndien, sese, mbuot ibokpot itiaba, eke edɔŋɔde, enyuŋ efɔnde, esiaha ke eto kiet, 6Ndien, sese, mbuot itiaba eke midɔŋɔke, eke ofim ikɔrabak okonyuŋ abiatde, etiene mmɔ edem etibe. 7Ndien mbuot itiaba oro midɔŋɔde, emen mbuot itiaba oro edɔŋɔde, enyuŋ eyɔhɔde. Ndien, ke Pharaoh edemerede, sese, edi ndap.

8Ekem ke usenubɔk esit etimere enye; ndien enye ɔdɔŋ ekekot kpukpru mbia-idiɔŋ Egypt, ye kpukpru mme ɔfiɔk-ŋkpɔ owo esie edi; ndien Pharaoh etiŋ ndap esie ɔnɔ mmɔ; edi baba owo kiet eke asiakde mmɔ ɔnɔ Pharaoh iduhe.

9Ndien etubom mme akama-wine ɔdɔhɔ Pharaoh, ete, Mfin emi nti nte nduede: 10Pharaoh akayat esit ye ifin esie, ndien enye ada mi ɔnɔ ete ekpeme ke ufɔk etubom mme andikpeme edidem, ami ye etubom mme anam-uyo: 11ndien nnyin idaba ndap ke okoneyo kiet, ami ye enye; nnyin kiet kiet idaba nte esiakde ndap nnyin. 12Ndien eyen Hebrew kiet, ofin etubom mbon ukpeme, odu do ye nnyin; nnyin inyuŋ itiŋ inɔ enye, ndien enye asiak ndap nnyin ɔnɔ nnyin; asiak ɔnɔ owo nte ndap owo asaŋade. 13Ndien ɔwɔrɔ nte emi enye asiakde ɔnɔ nnyin; afiak esin mi ke itie mi, onyuŋ eyiri enye.

14Ndien Pharaoh ɔdɔŋ ekekot Joseph edi, ndien mmɔ ewara esio enye ke obube, enye onyuŋ okporo ntaŋ-ebek, onyuŋ ɔkpuhɔ edisine-ŋkpɔ esie, ndien aka ke ebiet Pharaoh. 15Ndien Pharaoh ɔdɔhɔ Joseph, ete, Mmadaba ndap, owo eke asiakde enye inyuŋ iduhe; mmonyuŋ ŋkop mbaŋa fi, nte ke afo eyefiɔk ndap ndisiak enye. 16Ndien Joseph ɔbɔrɔ Pharaoh, ete, Idige ami: Abasi eyebɔrɔ Pharaoh ke emem.

17Ndien Pharaoh ɔdɔhɔ Joseph, ete, Ke ndap mi, sese, ami nda ke mben akpa: 18ndien, sese, enaŋ itiaba eke enyenede isek ke idem, enyuŋ eyede ndise, eto ke akpa edɔk; ndien mmɔ edita nnyanyaŋa: 19ndien, sese, enaŋ itiaba eŋwen eke eferede, enyuŋ ediɔide idem eti-eti, enyuŋ etiede ɔkpɔ-ɔkpɔ, etiene mmɔ edɔk, akanam ŋkwe eke ediɔide nte mmɔ oro ke ofuri isɔŋ Egypt. 20Ndien ɔkpɔ-ɔkpɔ ye idiɔk enaŋ eta edisehe enaŋ itiaba oro ekebemde iso. 21Edi ke adaŋemi edukde mmɔ ke idibi, owo ifiɔkke ite ke oduk mmɔ ke idibi; edi mmɔ etie mbukpo-mbukpo, kpasuk nte eketiede akpa. Ndien ndemere.

22Ndien ŋkut ke ndap mi, ndien, sese, mbuot ibokpot itiaba eke edɔŋɔde enyuŋ efɔnde, esiaha ke eto kiet. 23Ndien, sese, mbuot itiaba eke ekpaŋade, minyuŋ idɔŋɔke, eke ikɔrabak okonyuŋ abiatde, etiene mmɔ edem etibe: 24ndien mbuot oro midɔŋɔde emen edifɔn mbuot itiaba oro: ndien ntiŋ nnɔ mbia-idiɔŋ; edi owo eke asiakde ɔnɔ mi iduhe.

25Ndien Joseph ɔdɔhɔ Pharaoh ete, Ndap Pharaoh edi ubɔk kiet: se Abasi oyomde ndinam ke enye asiak ɔnɔ Pharaoh. 26Edifɔn enaŋ itiaba oro edi isua itiaba; edifɔn mbuot ibokpot itiaba enyuŋ edi isua itiaba: enye edi ndap kiet. 27Enaŋ itiaba oro eferede enyuŋ ediɔide idem, emi etienede mmɔ edɔk, edi isua itiaba; ndien mbuot itiaba oro midɔŋɔke, emi ikɔrabak akabiatde, eyedi isua akaŋ itiaba. 28Ikɔ emi ndɔhɔde Pharaoh edi oro: se Abasi oyomde ndinam ke enye owut Pharaoh. 29Sese, isua eduek itiaba ke edi ke ofuri isɔŋ Egypt: 30ndien isua akaŋ itiaba eyetiene mmɔ edem edi; ndien eyefre kpukpru eduek oro ke isɔŋ Egypt; ndien akaŋ oro eyebiat isɔŋ ama 31Ndien akaŋ emi editienede idiyakke efiɔk eduek oro ke isɔŋ: koro enye edidobide eti - eti. 32Ndien emi Pharaoh ɔtɔŋɔde ntak adaba ndap oro utim ikaba; edi koro Abasi ɔsɔŋɔde aduak ŋkpɔ emi, ndien Abasi idibigike ndinam enye. 33Mmɔdo yak Pharaoh oyom owo ikike ye ifiɔk, onyuŋ odori enye ete akara isɔŋ Egypt. 34Yak Pharaoh anam ntem, onyuŋ onim ndidaha ke isɔŋ, onyuŋ osio ubak kiet ke itie ition isɔŋ Egypt ke isua eduek itiaba. 35Ndien yak ebon kpukpru udia nti isua emi ededi, yak enyuŋ ebon ibokpot esin Pharaoh ke ubɔk, ete edi udia ke obio, ndien ekpeme enye. 36Ndien yak udia oro edi se edinimde enɔ isɔŋ ke isua itiaba emi ke isɔŋ Egypt: ndien isɔŋ iditakke ke akaŋ.

37Ndien ikɔ oro enem Pharaoh, onyuŋ enem kpukpru ikɔt esie. 38Ndien Pharaoh ɔdɔhɔ ikɔt esie ete, Nte nnyin iyekut owo eke spirit Abasi odude enye ke esit, nte enye emi? 39Ndien Pharaoh ete Joseph, Sia Abasi ama akanam fi ɔfiɔk emi kpukpru, owo ndomo kiet eke enyenede ikike ye ifiɔk nte afo iduhe. 40Afo eyekan ufɔk mi, kpukpru ikɔt mi eyenyuŋ enam ke uyo fo; ke ebekpo ikpɔŋ-ikpɔŋ ke ndikpon nkan fi.

41Ndien Pharaoh ɔdɔhɔ Joseph ete, Sese mmonim fi ke akakan ke ofuri isɔŋ Egypt. 42Pharaoh onyuŋ ɔfɔrɔde mkpanuen esie ke ubɔk esie efep, ada enye ɔfɔri ke ubɔk Joseph, onyuŋ ɔnɔ enye edisine-ŋkpɔ eti linen esine, onyuŋ ɔkɔŋɔ enye ŋkpɔkɔbi gold ke itɔŋ; 43onyuŋ anam enye odoro ke udiana-akpa chariot esie; mmɔ enyuŋ efiori enye ke iso, ete, Etɔŋɔ edɔŋ: onyuŋ onim enye edi akakan ke ofuri isɔŋ Egypt. 44Pharaoh onyuŋ ɔdɔhɔ Joseph, ete, Ami ndi Pharaoh, ndien mitoho fi baba owo kiet idimenke ubɔk esie mme ukot esie ke ofuri isɔŋ Egypt. 45Ndien Pharaoh osio Joseph enyiŋ Zaphenath-paneah; onyuŋ ɔnɔ enye Asenath eyen Poti-pherah oku On aŋwan ɔdɔ. Ndien Joseph ɔwɔrɔ asaŋa ebe ke ofuri isɔŋ Egypt.

46Ndien Joseph osim isua edip ye duop ke ini enye adade ke iso Pharaoh edidem Egypt. Ndien Joseph adaha ke iso Pharaoh, onyuŋ asaŋa ebe ke ofuri isɔŋ Egypt. 47Ndien isɔŋ oŋwum eti eti ke isua eduek itiaba. 48Ndien enye obon kpukpru udia isua itiaba oro ekedude ke isɔŋ Egypt, onyuŋ onim udia ke obio: enye ada udia iŋwaŋ obio emi akande enye okuk, onim ke esit obio. 49Ndien Joseph obon ibokpot nte ntan inyaŋ, ediwak eti-eti, tutu etre ndibat; koro akande ibat.

50Ekem nditɔ-iren iba emana enɔ Joseph ke ini akaŋ mika-idige kaŋa, emi Asenath eyen Poti-pherah, oku On, amande ɔnɔ enye. 51Joseph onyuŋ osio akpan esie enyiŋ Manasseh: Koro Abasi amanam mi mfre kpukpru utom mi, ye ofuri ufɔk ete mi. 52Enye onyuŋ osio udɔ enyiŋ Ephraim: Koro Abasi amanam mi ntɔt ke isɔŋ ukut mi.

53Ekem, isua eduek itiaba oro ekedude ke isɔŋ Egypt ekure. 54Ndien isua akaŋ itiaba etɔŋɔ ndidi, nte Joseph ɔkɔdɔhɔde: akaŋ oro onyuŋ odu ke kpukpru mme idut; edi udia odu ke ofuri isɔŋ Egypt. 55Ekem, ofuri isɔŋ Egypt akpa biɔŋ, ndien kpukpru owo eseme enɔ Pharaoh eyom udia: ndien Pharaoh ɔdɔhɔ kpukpru Egypt, ete, Mbufo etiene Joseph; enam se enye ɔdɔhɔde mbufo.

56Ndien akaŋ odudu ke iso ofuri edem oro: ndien Joseph eberede kpukpru ufɔk oro ibokpot odude ke esit, anyam ɔnɔ Egypt; ndien akaŋ ɔdɔdiɔŋ ɔsɔŋ ubɔk ke isɔŋ Egypt. 57Ndien kpukpru mme idut edi ke Egypt, etiene Joseph edidep ibokpot: koro akaŋ ɔsɔŋde ke kpukpru mme idut.

Currently Selected:

GENESIS 41: ENA

Highlight

Copy