GENESIS 43

Nditɔ Eka Joseph Emen Benjamin Eyen-eka Mmɔ Eka ke Egypt

1EKEM, akaŋ ɔsɔŋ ubɔk ke isɔŋ oro. 2Edikem ke adaŋoro ema ekedia ibokpot oro ekedade ke Egypt edi, ete mmɔ ɔdɔhɔ mmɔ ete, Mbufo efiak eka, ekedep ekpri udia enɔ nnyin. 3Ndien Judah ete enye, Owo oro ɔkɔŋwɔŋwɔŋɔ ɔnɔ nnyin, ete Mbufo idikwe iso mi, ke eyen-ete mbufo midige ye mbufo. 4Afo amayak eyen-ete nnyin aka ye nnyin, iyesuhɔre idep udia inɔ fi: 5edi afo muyakke, nnyin idisuhɔkede, koro owo oro ɔkɔdɔhɔde nnyin ete, Mbufo idikwe iso mi, ke eyen-ete mbufo midige ye mbufo. 6Ndien Israel ɔdɔhɔ mmɔ ete, Nsinam mbufo ekediɔkde ye ami, eke mbufo esiande enɔ owo oro ete, Ke mbufo emenyene eyen-ete eŋwen? 7Ndien mmɔ ete, Owo oro ototim obup abaŋa idem nnyin, ye oruk nnyin, ete, Nte ete mbufo mmɔŋ ododu uwem kaŋa? nte mbufo emenyene eyen-eka? ndien nnyin ibɔrɔ enye ke inua ikɔ oro: ikpanam didie ifiɔk ite ke enye eyedɔhɔ ete, Mbufo eda eyen-ete mbufo esuhɔre edi? 8Ndien Judah ɔdɔhɔ Israel, ete esie, ete, Yak eyen oro aka ye ami, ndien nnyin iyedaha ika; man idu uwem, ikukpaŋa, ye nnyin, ye afo, ye nditɔwɔŋ nnyiŋ. 9Ami nyetie ubiɔŋ esie; afo ediyom enye ke ubɔk mi: mendidaha enye nsɔk fi, nnyuŋ ntem enye ke iso fo, nyetie nte edue-isop ye afo ke nsinsi: 10koro nnyin mikpebigike, ke emi ke ikpetreke ndifiak mi utim ikaba. 11Ndien Israel ete mmɔ ɔdɔhɔ ye mmɔ, ete, Ama edi ntre, ndien, enam ntem; eda akakan mfri edem emi esin ke ŋkpɔ mbufo, esuhɔre enɔ owo oro ke enɔ, ekpri balm, ye ekpri aran ɔkwɔk, ye edifuɔŋ-ŋkpɔ, ye myrrh, ye mbansaŋ, ye almond: 12enyuŋ ekɔt silver iba ke ubɔk mbufo; enyuŋ eda silver oro ekesinde ke inua ekpat mbufo, ekama ke ubɔk edaha eka; mme mmɔ ekededue: 13Enyuŋ eda eyen-ete mbufo edaha, efiak etiene owo oro: 14Abasi Andikeme kpukpru akam onyuŋ esin owo oro atua mbufo mbɔm, onyuŋ ayak eyen-ete mbufo eken ɔnɔ mbufo, ye Benjamin. Ndien ami, edieke ebɔde mi nditɔ, yak ebɔ mi.

15Ndien mmɔ oro eda enɔ emi, enyuŋ ekɔt silver iba ke ubɔk mmɔ ye Benjamin; ndien edaha esuhɔre ke Egypt, ekeda ke iso Joseph. 16Ndien ke adaŋemi Joseph okutde Benjamin ye mmɔ, enye ɔdɔhɔ akama ŋkpɔ ufɔk esie ete, Da mme mmɔ emi ka ke ufɔk, ndien wot unam nyuŋ tem udia; koro mmɔ emi eyedia ŋkpɔ ye ami ke uwemeyo emi. 17Ndien owo oro anam nte emi Joseph ɔdɔhɔde; enye onyuŋ ada mmɔ aka ke ufɔk Joseph. 18Ndien ndik anam mmɔ, ke edade mmɔ edi ke ufɔk Joseph; mmɔ enyuŋ edɔhɔ ete, Ke eda nnyin edi ke ikɔ silver oro ekesinde ke ekpat nnyin akpa; man enye oyom nnyin ikɔ, onyuŋ akan nnyin ubɔk, onyuŋ ada nnyin onim ke ifin, ye mme ass nnyin.

19Ndien mmɔ etiene akama-ŋkpɔ ufɔk Joseph, enyuŋ edɔhɔ ye enye ke enyin-usuŋ ufɔk, 20ndien mmɔ ete, Mbɔk, ɔbɔŋ, nnyin ikesuhɔre akpa ini idi ndidep udia: 21edikem ke ini nnyin isimde ke ebiet eke nnyin idaŋde, nnyin itat ekpat nnyin, ndien sese silver owo kpukpru ke inua ekpat mmɔ, silver nnyin nte edomode enye: ndien nnyin imada enye ke ubɔk nnyin ifiak idi. 22Imonyuŋ ida silver eŋwen ke ubɔk nnyin isuhɔre idi udia ndidep; nnyin ifiɔkke owo eke akadade silver nnyin esin ke ekpat nnyin. 23Ndien enye ete, Osuk ɔfɔn ye mbufo, ekufehe ndik; Abasi mbufo, ye Abasi ete mbufo, ɔkɔnɔ mbufo inyene ke ekpat mbufo: silver mbufo okoduk mi ke ubɔk. 24Ndien enye osio Simeon ɔnɔ mmɔ. Ndien enye ada mmɔ oto oduk ke ufɔk Joseph, onyuŋ ɔnɔ mmɔŋ, ndien mmɔ eyet ukot mmɔ; onyuŋ ɔnɔ ass mmɔ se etade. 25Mmɔ enyuŋ etim enɔ oro enim tutu Joseph edi ke ufɔt uwemeyo, koro ekopde ete ke mmimɔ iyedia ŋkpɔ do.

26Ekem, Joseph edi ke ufɔk, ndien mmɔ emen enɔ oro odude mmɔ ke ubɔk esɔk enye ke ufɔk, enyuŋ enuhɔ ke isɔŋ enɔ enye. 27Enye onyuŋ obup mmɔ ete mme idem ɔsɔŋ mmɔ, onyuŋ ɔdɔhɔ ete, Nte idem ɔsɔŋ ete mbufo, akani owo oro mbufo ekedɔhɔde? nte enye osuk odu uwem kaŋa? 28Ndien mmɔ ete, Ke idem ɔsɔŋ owo fo ete nnyin, enye ke odu uwem kaŋa. 29Ndien mmɔ enuhɔ enyuŋ etuak ibuot enɔ enye. Ndien enye emenere enyin esie, okut Benjamin eyen-eka esiemɔ, onyuŋ ɔdɔhɔ ete, Nte emi edi ekpri eyen-ete mbufo oro mbufo ekedɔhɔde mi? Ndien enye ete, Abasi osuk ɔfɔn ido ye afo eyen mi. Ndien Joseph awara; 30koro itɔŋ eyen-eka esie ɔdɔŋde enye; ndien enye oyom ɔtɔ eke atuade; ndien enye oduk ubet, atua do. 31Ekem, enye eyet iso esie, ɔwɔrɔ, onyuŋ omum idem esie akama, ndien ɔdɔhɔ ete, Mbufo ebon udia. 32Ndien mmɔ ebon udia enɔ enye ke idem esie, ebon enɔ mmɔ oro ke idem mmɔ, ebon enɔ nditɔ Egypt emi ediade ŋkpɔ ye enye, ke idem mɔ: koro nditɔ Egypt mikemeke ndidia ŋkpɔ ye nditɔ Hebrew: koro nditɔ Egypt ebetde ntem. 33Ndien mmɔ etie enye ke iso, akpan ke itie akpan, ye udɔ ke itie udɔ: ndien mbon oro kiet ese kiet eyik. 34Ndien eda udeme udia emi odude enye ke iso esɔk mmɔ: edi udeme Benjamin okpon akan udeme kpukpru mmɔ oro utim ikotion. Mmɔ enyuŋ eŋwɔŋ ŋkpɔ, enyuŋ ebre ye enye.

Currently Selected:

GENESIS 43: ENA

Highlight

Copy