GENESIS 46

Jacob ye Ekpuk Ufɔk Esie

1NDIEN Israel ada kpukpru se enye enyenede, adaha aka ke Beer-sheba, akawa uwa ɔnɔ Abasi Isaac ete esie. 2Ndien Abasi ɔdɔhɔ Israel ke ŋkukut ke okoneyo, ete, Jacob, Jacob. 3Ndien enye ete, Se, ami mi. Ndien enye ete, Ami ndi Abasi, Abasi usɔ, kufehe ndisuhɔre ŋka ke Egypt; koro nyenam fi edi akamba obio do. 4Ami nyesaŋa ye afo nsuhɔre ŋka Egypt; ndien ami ŋko nditreke ndida fi ndɔk: Joseph eyenyuŋ okibi fi enyin.

5Ndien Jacob adaha ke Beer-sheba: nditɔ Israel enyuŋ ebiom Jacob ete mmɔ, ye ŋkpri nditɔ-ɔwɔŋ mmɔ, ye iban mmɔ ke ukpat-ŋkpɔ oro Pharaoh ɔkɔnɔde ete edibiom enye. 6Mmɔ enyuŋ eda ufene mmɔ, ye inyene mmɔ, emi mmɔ ekekɔde ke isɔŋ Canaan ndien edi ke Egypt, Jacob ye kpukpru ubon esie ŋko. 7Enye ada nditɔ esie, ye nditɔ nditɔ esie ŋko, ye nditɔ-iban esie, ye nditɔ-iban nditɔ esie, ye kpukpru ubon esie ŋko edi ke Egypt.

8Ndien mme mmɔ emi edi enyiŋ nditɔ Israel, emi edide ke Egypt, Jacob ye nditɔ-iren esie; Reuben akpan Jacob. 9Ye nditɔ Reuben; Hanoch, ye Pallu, ye Hezron, ye Carmi.

10Ye nditɔ Simeon; Jemuel, ye Jamin, ye Ohad, ye Jachin, ye Zohar, ye Shaul eyen eyen-aŋwan a-Canaan.

11Ye nditɔ Levi; Gershon, ye Kohath, ye Merari.

12Ye nditɔ Judah; Er, ye Onan, ye Shelah, ye Pherez, ye Zerah: edi Er ye Onan ekekpaŋa ke isɔŋ Canaan. Nditɔ Perez enyuŋ edi Hezron ye Hamul.

13Ye nditɔ Issachar; Tola, ye Puvah, ye Iob, ye Shimron.

14Ye nditɔ Zebulum; Sered, ye Elon, ye Jahleel. 15Mme mmɔ emi edi nditɔ emi Leah amande ɔnɔ Jacob ke Peddan-aram, ye Dinah adiaha esie: kpukpru ukpɔŋ nditɔ-iren esie ye nditɔ-iban esie edi edip ye duopeta.

16Ye nditɔ Gad; Ziphion, Haggi, ye Shuni, ye Ezbon, ye Eri, ye Arodi, ye Areli.

17Ye nditɔ Asher; Imnah, ye Ishvah, ye Ishvi, ye Beriah, ye Serah eyen-eka mmɔ aŋwan: ndien nditɔ Beriah: Heber, ye Malchiel. 18Mme mmɔ emi edi nditɔ Zilpah, emi Laban ɔkɔnɔde Leah adiaha esie: enye onyuŋ aman mme mmɔ emi ɔnɔ Jacob, ukpɔŋ efurekiet.

19Nditɔ Rachel ŋwan Jacob; Joseph, ye Benjamin.

20Ndien Manasseh ye Ephraim emana enɔ Joseph ke isɔŋ Egypt, mmɔ emi ke Asenath, eyen Poti-pherah oku On aman ɔnɔ enye.

21Ye nditɔ Benjamin; Bela ye Becher, ye Ashbel, ye Gera, ye Naaman, ye Ehi, ye Rosh, ye Muppim, ye Huppim, ye Ard. 22Mme mmɔ emi edi nditɔ Rachel, emi emanade enɔ Jacob, kpukpru ukpɔŋ edi duopenaŋ.

23Ye nditɔ Dan; Hushim. 24Ye nditɔ Naphtali; Jahzeel, ye Guni, ye Jezer, ye Shillem. 25Mme mmɔ emi edi nditɔ Bilhah, emi Laban ɔkɔnɔde Rachel eyen esie: ndien enye aman mmɔ ɔnɔ Jacob; kpukpru ukpɔŋ edi itiaba. 26Kpukpru ukpɔŋ emi etienede Jacob edi ke Egypt, emi enye obonde, isinke iban nditɔ Jacob, kpukpru ukpɔŋ edi ata ye itiokiet. 27Ndien nditɔ Joseph emi emanade enɔ enye ke Egypt, edi ukpɔŋ iba: kpukpru ukpɔŋ ufɔk Jacob, emi edide ke Egypt, edi ata ye duop.

28Ndien Jacob ɔdɔŋ Judah, ete, ebem imɔ iso etiene Joseph, ediwut imɔ Goshen; ndien mmɔ 29edi ke isɔŋ Goshen. Ndien Joseph otim chariot esie, onyuŋ ɔdɔk okosobo ye Israel ete esie ke Goshen, ndien owut enye idem; onyuŋ ɔkɔŋɔ enye ke itɔŋ, atua 30eyet ke itɔŋ esie anyan ini. Ndien Israel ɔdɔhɔ Joseph, ete, Yak ŋkpa ke emi, sia mma ŋkakam ŋkut iso fo, koro afo odude uwem kaŋa.

31Ndien Joseph ɔdɔhɔ nditɔ-ete esie, ye ufɔk ete eise, ete, Nyedɔk ŋketiŋ nnɔ Pharaoh, nyenyuŋ ndɔhɔ enye nte, Ke nditɔ-ete mi, ye ufɔk ete mi, emi ekedude ke isɔŋ Canaan, emedi etiene mi; 32ndien mmɔ edi mme ɔbɔk-ufene, koro edide mbon-ufene; mmɔ emenyuŋ eda ŋkpri ye ikpɔ ufene mmɔ, ye kpukpru se mmɔ enyenede edi. 33Ama ekem, ke adaŋaemi Pharaoh edikotde mbufo edi, edinyuŋ obupde ete, Nsidi utom mbufo? 34Ndien mbufo edidɔhɔ ete, Nnyin ikɔt fo idi mbon-ufene ɔtɔŋɔde ke ini uyen nnyin tutu osim emi, ye nnyin, ye mme ete nnyin, kpaŋ mbufo ekpetie ke isɔŋ Goshen; koro nditɔ Egypt esuade kpukpru mme ɔbɔk-ufene.

Currently Selected:

GENESIS 46: ENA

Highlight

Copy