LEVITICUS 11
11
Mme Unam Emi Esanade ye Mme Mmɔ Emi Misanake
1EKEM Jehovah ɔdɔhɔ Moses ye Aaron, ete mmɔ, Mbufo edɔhɔ nditɔ Israel, ete, 2Emi edi mme unam eke mbufo editade ke otu kpukpru mme unam emi edude ke isɔŋ. 3Kpukpru eke ebaharede ikpat, enyuŋ esiahade ikpat iba, enyuŋ ekpɔhide eta ke otu mme unam, oro ke mbufo edita. 4Edi mbufo ekuta mme mmɔ emi ke otu mmɔ eke ekpɔhide eta, enyuŋ esiahade ikpat: camel, koro enye ɔkpɔhide ata, ndien misiahake ikpat; mbufo ese enye ke edidehe. 5Ye coney ŋko: koro enye ɔkpɔhide ata, edi mibahakede ikpat; mbufo ese enye ke edidehe. 6Ye hare ŋko, koro enye ɔkpɔhide ata, edi mibahakede ikpat: mbufo ese enye ke edidehe. 7Ye edi, koro enye abaharede ikpat, onyuŋ asiahade ikpat iba, edi mikpɔhike ita; mbufo ese enye ke edidehe. 8Mbufo ekuta unam mmɔ baba, ekunyuŋ etuk okpo mmɔ, mbufo ese mmɔ ke edidehe.
9Mme mmɔ emi edi se mbufo editade ke kpukpru se idude ke mmɔŋ: kpukpru se inyenede mba ye ikpɔk ke mmɔŋ, ke inyaŋ, ye ke idim, mmɔ ke mbufo edita. 10Edi kpukpru se minyeneke mba ye ikpɔk ke inyaŋ, ye ke idim, ke otu kpukpru se isaŋade ke mmɔŋ, ye ke otu kpukpru mme odu uwem eke edude ke mmɔŋ, mbufo ese mmɔ ke edidehe: 11mbufo ese mmɔ ke ŋkpɔ ndek; ekuta unam mmɔ, edi ese okpo mmɔ ke ŋkpɔ ndek. 12Ama edi kpukpru se minyeneke mba ye ikpɔk ke mmɔŋ, mbufo ese mmɔ ke ŋkpɔ ndek.
13Ndien ŋko mbufo ese mme mmɔ emi edidehede ke otu mme inuen; ekuta mmɔ, mmɔ edi ŋkpɔ ndek; ntrukpom, ye gier eagle, 14ye ospray, ye falcon, ye mbukpo ke oruk esie; 15kpukpru raven nte oruk mmɔ edide; 16ye ostrich, ye ayara ostrich, ye ituen, ye utere, nte oruk mmɔ edide; 17ye ikurikut, ye ikpaŋ, 18ye akpantana, ye swan, ye pelican, ye gier, 19ye stork, ye heron, nte oruk mmɔ edide, ye lapwing, ye emiaŋ.
20Ama edi kpukpru mme andinyɔni eke enyenede mba, eke esaŋade ke ukot inaŋ, mbufo ese mmɔ ke ŋkpɔ ndek. 21Edi mbufo eta mme mmɔ emi ke otu kpukpru mme andiyɔni eke enyenede mba, eke esaŋade ke ukot inaŋ, eke enyenede nnuk ke enyɔŋ ukot mmɔ, eda efrɔ ke iso isɔŋ; 22mme mmɔ emi ke mbufo edita ke otu mmɔ; ŋkuku ŋkpɔyɔriyɔ nte oruk mmɔ edide, idiaŋ nte oruk mmɔ edide, ye ŋkuku utebe nte oruk mmɔ edide, ye ata ŋkuku nte oruk mmɔ edide. 23Edi ama edi kpukpru mme andinyɔni efen eke enyenede mba, ye eke enyenede ukot inaŋ, mbufo ese mmɔ ke edidehe. 24Ndien mme mmɔ emi eyenam mbufo edehe: kpukpru owo eke etukde okpo mmɔ edidehe tutu osim mbubreyo. 25Ndien kpukpru owo eke ebiomde okpo mmɔ enyene ndiyet edisine-ŋkpɔ mmɔ, enyuŋ edehe tutu osim mbubreyo.
26Ama edi kpukpru unam eke ebaharede ikpat, edi misiahake ikpat iba, minyuŋ ikpɔhike ita, mbufo ese mmɔ ke edidehe: kpukpru owo eke etukde mmɔ edidi edihede. 27Ndien ŋko ama edi kpukpru se isaŋade ke eka-ubɔk mmɔ, ke otu kpukpru oruk unam eke esaŋade ke ukot inaŋ, mbufo ese mmɔ ke edidehe: kpukpru owo eke etukde okpo mmɔ edidi edidehe tutu osim mbubreyo. 28Ndien owo eke obiomde okpo mmɔ, enyene ndiyet edisine-ŋkpɔ esie, onyuŋ edehe tutu osim mbubreyo: mbufo ese mmɔ ke edidehe.
29Ndien ŋko mbufo ese mme mmɔ emi ke edidehe ke otu mme andinyɔni eke enyɔnide ke isɔŋ; oyit, ye eku ye ikut ke oruk mmɔ, 30ye ukpɔŋ-eyen, ye ekpɔk, ye utai, ye ekwɔŋ, ye okube. 31Mbufo ese mme mmɔ emi ke edidehe ke otu mme andinyɔni: kpukpru owo eke etukde okpo mmɔ edidi edidehe tutu osim mbubreyo. 32Ndien ŋko kpukpru se okpo mme mmɔ emi kiet ediduɔde ke esit, edidi edidehe; edide ŋkpɔ eto ekededi, onyuŋ edide ɔfɔŋ idem, mme ikpa, mme ekpat, ŋkpɔ ekededi eke enamde utom ke esit, yak esin enye ke mmɔŋ, ndien enye edidi edidehe tutu osim mbubreyo; ndien eyesana. 33Ndien ama edi kpukpru ŋkpɔ mbat eso, eke mme mmɔ emi kiet ɔduɔde ke esit, kpukpru se idude enye ke esit edidi edidehe; ndien mbufo ebom enye. 34Oruk udia ekededi eke owo adiade, eke mmɔŋ odukde, edidi edidehe: ndien kpukpru ediŋwɔŋ-ŋkpɔ eke eŋwɔŋde ekabare edidehe ke kpukpru ŋkpɔ. 35Ndien ŋko kpukpru ŋkpɔ eke okpo mmɔ baba kiet ɔduɔde ke esit, edidi edidehe; ekpedi usaŋ-uyo, ekpedi eso, yak ebom mmɔ: mmɔ edehe; mbufo enyuŋ ese mmɔ ke edidehe. 36Edi idim mme obube eke mmɔŋ awakde ke esit, asana: edi se itukde okpo mmɔ edidi edidehe. 37Ndien adaŋemi okpo mmɔ ɔduɔde, ke uduot ŋkpɔ ekededi eke etɔde, enye edidi edisana. 38Edi adaŋemi esinde mmɔŋ ke uduot, okpo mmɔ ɔduɔ ke esit ndien, mbufo ese enye ke edidehe.
39Ndien ŋko adaŋemi unam ekededi eke mbufo ekam etade, akpade ikpɔŋ; owo eke otukde okpo esie edidi edidehe tutu osim mbubreyo. 40Ndien owo eke atade okpo esie enyene ndiyet edisine-ŋkpɔ esie, onyuŋ edi edidehe tutu osim mbubreyo: ndien ŋko yak owo eke obiomde okpo esie, eyet edisine-ŋkpɔ esie, onyuŋ edehe tutu osim mbubreyo.
41Ndien ama edi kpukpru andinyɔni eke enyɔnide ke isɔŋ, mmɔ edi ŋkpɔ ndek; owo okuta mmɔ. 42Mbufo ekuta baba ŋkpɔ kiet eke asaŋade ke idibi, ye eke asaŋade ke ukot inaŋ ye baba ŋkpɔ kiet eke enyenede ediwak ukot ke otu kpukpru mme andinyɔni eke enyɔnide ke isɔŋ: koro mmɔ edide ŋkpɔ ndek. 43Mbufo ekusabare idem mbufo ke baba andinyɔni kiet eke ɔnyɔnide, ekunyuŋ enam idem mbufo edehe ke esit, mbak mbufo edidehe ke esit. 44Koro ami ndide Jehovah Abasi mbufo; enam idem mbufo esana ndien, enyuŋ edi edisana: koro ami nsanade; ekunyuŋ esabare idem mbufo ke baba andinyɔni kiet eke ɔnyɔnide ke isɔŋ. 45Koro ami ndide Jehovah emi nsiode mbufo ke isɔŋ Egypt ndɔk ndi, man ndi Abasi mbufo: mbufo edi edisana ndien: koro ami nsanade.
46Emi edi ewuhɔ unam, ye eke inuen, ye eke kpukpru mme andidu uwem eke esaŋade ke mmɔŋ, ye eke kpukpru mme unam eke enyɔnide ke isɔŋ; 47man edianare se idehede ye se isanade, ye mme unam eke ekpatade, ye mme unam eke mikpetaha.
Currently Selected:
LEVITICUS 11: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.