LEVITICUS 17
17
Mme Ewuhɔ Emi Ebaŋade Nte Ekemede Ndiwot Nnyuŋ Nta Mme Unam
1EDIKEM Jehovah ɔdɔhɔ Moses, ete, Dɔhɔ Aaron, ye nditɔ esie, ye nditɔ Israel akpaimɔ, ete mmɔ, 2Ikɔ emi Jehovah owukde edi emi, ete, 3Eyen ufɔk Israel ekededi eke ediwotde enaŋ, mme erɔŋ, mme ebot, ke esit nna, mme eke ediwotde ke edem nna, 4ndien midaha enye idi ke enyin-usuŋ efe esop, man ada enɔ ɔnɔ Jehovah, ke iso ebiet-iduŋ Jehovah; iyip eyesɔp owo oro: enye ɔmɔduɔk iyip; yak enye esibe owo oro efep ke otu mbio-obio mmɔ: 5kpaŋ nditɔ Israel ekpeda uwa mmɔ, emi ewade ke iso iŋwaŋ edi, enyuŋ eda mmɔ esɔk Jehovah, ke enyin-usuŋ efe esop, esɔk oku, enyuŋ ewa mmɔ enɔ Jehovah ke uwa emem. 6Ndien oku osime iyip ke itie-uwa Jehovah, ke enyin-usuŋ efe esop, onyuŋ ɔfɔp ikpɔŋ ɔnɔ Jehovah ke edinem utebe. 7Mmɔ ekunyuŋ ewa aba uwa mmɔ enɔ demon, emi mmɔ etienede. Emi edi nsinsi ewuhɔ mmɔ ke ofuri emana mmɔ.
8Nyuŋ dɔhɔ mmɔ ete, Owo ekededi eke otode ufɔk Israel, mme onyuŋ otode isen eke eduŋde ke otu mbufo, eke ediwade edifɔp uwa mme uwa emem, 9ndien midaha enye idi ke enyin-usuŋ efe esop, iwa inɔ Jehovah; eyesibe owo oro efep ke mbio-obio mmɔ.
10Ndien ŋko ama onyuŋ edi owo ekededi eke otode ufɔk Israel, mme onyuŋ otode isen emi eduŋde ke otu mbufo, eke edidiade oruk iyip ekededi, nyewuk iso nse ukpɔŋ oro adiade iyip, nyenyuŋ nsibe enye ke mbio-obio mmɔ mfep. 11Koro uwem unam odude ke iyip: ami mmonyuŋ nda enye, ndori ke itie-uwa nnɔ mbufo, ndisio isop nnɔ ukpɔŋ mbufo: koro edide iyip osio isop ɔnɔ ukpɔŋ. 12Mmɔdo ndɔhɔde nditɔ Israel, nte Baba ofuri ukpɔŋ mbufo kiet okudia iyip, esen emi oduŋde ke otu mbufo okunyuŋ adia iyip.
13Ndien ŋko owo ekededi eke otode nditɔ Israel, eke onyuŋ otode isen emi eduŋde ke otu mbufo, eke ebinde ikɔt omum unam mme inuen eke etade eta; yak enye ɔduɔk iyip esie, ndien ada ntan ofuk enye. 14Koro ama edi uwem kpukpru mme unam, edi iyip mmɔ edi uwem mmɔ; ndɔhɔ ndien nditɔ Israel, nte, Mbufo ekudia iyip unam baba kiet, koro uwem kpukpru unam edide iyip mmɔ: yak esibe kpukpru owo eke ediade enye efep.
15Ndien kpukpru owo ke otu nditɔ isɔŋ, ye ke otu isen, eke editade se ikpade ikpɔŋ, mme se unam ikɔt awaide, enyene ndiyet edisine-ŋkpɔ mmɔ, nnyuŋ nyet idem mmɔ ke mmɔŋ, ndien edehe tutu osim mbubreyo: ndien mmɔ edidi edisana. 16Edi ke mmɔ miyetke edisine-ŋkpɔ mmɔ, minyuŋ iyetke idem mmɔ ke mmɔŋ; yak mmɔ ebiom ndien ukwaŋ-ŋkpɔ mmɔ.
Currently Selected:
LEVITICUS 17: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.