LEVITICUS 27
27
Mme ewuhɔ Emi Ebaŋade Owo Ndiyak Ofuri Ofuri Nnɔ Abasi
1NDIEN Jehovah ɔdɔhɔ Moses, ete, Dɔhɔ nditɔ Israel, nyuŋ tiŋ nɔ mmɔ, ete, 2Adaŋemi owo akaŋade ata akaŋa, mme ukpɔŋ eyenyene Jehovah ke ekɔm-urua fo. 3Ndien ama edi eren-owo, ɔtɔŋɔde ke isua edip tutu osim isua ata, yak ekɔm urua fo edi shekel silver aba ye duop, nte asaŋade ye edisana shekel. 4Ndien ama edi ŋwan, yak ekɔm-urua fo edi shekel edip ye duop. 5Ndien ɔtɔŋɔde ke eyen isua ition tutu osim isua edip, yak ekɔm-urua fo ke eke eren-owo edi shekel edip, ndien eke ŋwan shekel duop. 6Ndien onyuŋ ɔtɔŋɔde ke eyen ɔfiɔŋ kiet tutu osim isua ition, yak ekɔm-urua fo ke eke eren edi shekel silver ition, ndien yak ekɔm-urua fo ke eke aŋwan edi shekel silver ita. 7Ndien ŋko ama edi ke owo isua ata, ye mmɔ eke ebede oro; yak ekɔm-urua fo ke eke eren edi shekel efut, ye ke eke aŋwan, shekel duop. 8Edi edieke enye ebuenede akan ke ekɔm-urua fo, yak enim enye ke iso oku, ndien oku ɔkɔm urua ɔnɔ enye; yak oku ɔkɔm ɔnɔ andikaŋa nte ubɔk esie edikemde.
9Ndien ŋko ama edi ke oruk unam emi ekam ewade enɔ Jehovah, oruk emi kpukpru emi owo ɔnɔde Jehovah edidi edisana. 10Yak enye okukpuhɔre enye, okunyuŋ ada etiɔkpuhɔ idiɔk, okunyuŋ ada idiɔkɔkpuhɔ eti: ndien edieke owo adade unamɔkpuhɔ unam, idem unam oro ye se edade ekpuhɔ enye edidi edisana. 11Ndien ama edi edidehe unam ekededi, eke misidaha oruk oro iwa uwa inɔ Jehovah, yak enye ada unam oro onim ke iso oku: 12ndien yak oku asiak ekɔm-urua esie, edide eti, onyuŋ edide idiɔk; kpa nte afo oku ɔkɔmde urua esie, yak edi ntre. 13Edi edieke enye oyomde ndifak enye, yak enye ada ɔyɔhɔ ubak esie ition ɔkɔrɔ ke ekɔm-urua fo.
14Ndien ŋko adaŋemi owo adianarede ufɔk esie onim ɔnɔ Jehovah ke edisana, yak oku ɔkɔm urua esie, edide eti, onyuŋ edide idiɔk: nte emi oku edikɔmde ɔnɔ enye, yak edi ntre. 15Ndien edieke andidianare oyomde ndifak ufɔk esie, yak enye ada ɔyɔhɔ ubak ition okuk emi afo ɔkɔmde, ɔkɔnɔ ke esit, ndien edidi esie.
16Ndien edieke owo adianarede ubak isɔŋ esie ɔnɔ Jehovah, ndien kɔm urua ke adaŋa nte mfri esie edide: mkpasip homer barley kiet ke shekel silver aba ye udop. 17Edieke enye adianarede isɔŋ esie ke isua jubilee, yak enye ada nte afo ɔkɔmde. 18Edi edieke enye adianarede isɔŋ esie adaŋemi jubilee ebede, yak oku ɔkɔm okuk ɔnɔ enye, asaŋa ke ibat isua eke esuhɔde, tutu osim ke isua jubilee (efen) ndien yak esuhɔre ekɔm urua fo. 19Ndien edieke andidianare oyomde ndifak isɔŋ esie, yak enye ada ɔyɔhɔ ubak okuk ition ɔkɔrɔ ke ekɔm-urua fo, ndien eyeda ke esie. 20Edieke enye mifakke isɔŋ oro, mme onyuŋ edieke enye anyamde isɔŋ oro ɔnɔ owo efen, idifakke aba enye. 21Edi adaŋemi isɔŋ ɔwɔrɔde ke jubilee, enye eyedi edisana ŋkpɔ ɔnɔ Jehovah, nte isɔŋ emi edianarede (enɔ Jehovah); eyedi se oku adade enyene.
22Ndien edieke owo adianarede isɔŋ eke enye edepde, eke midige isɔŋ eke enye adiade ke akpa, onim ɔnɔ Jehovah; 23yak oku abat ndien ɔnɔ enye nte afo ɔkɔmde urua, tutu osim ke isua jubilee: yak enye onyuŋ ada ekɔm-urua fo ke usen oro, ɔnɔ Jehovah ke edisana ŋkpɔ. 24Ke isua jubilee iŋwaŋ oro eyefiak ke ubɔk owo oro ekedepde ye enye, kpa owo oro akadiade isɔŋ oro ke akpa. 25Ndien kpukpru ekɔm-urua fo eyesaŋa ye edisana shekel: gerah edip ekem ye shekel kiet.
26Edi ama edi akpa eyen ufene eke ekpedide akpa eyen ufene Jehovah, owo okudianare enye: edide enaŋ, onyuŋ edide eke ŋkpri ufene, enye enyene Jehovah. 27Ndien enye ama edi akpa eyen unam eke edide edidehe, yak andinyene afak enye ke ekɔm-urua fo, onyuŋ ada ɔyɔhɔ ubak ition ɔkɔrɔ ke esit: ndien ke mifakke, yak enyam enye ke ekɔm-urua fo.
28Edi ekunyam, ekunyuŋ efak baba ofuri edidianare ŋkpɔ kiet, eke owo edidianarede inɔ Jehovah, ke kpukpru se enye enyenede, edide owo, onyuŋ edide unam, onyuŋ edide isɔŋ akpa esie: kpukpru edidianare ŋkpɔ edi ata edisana ŋkpɔ Jehovah. 29Mbufo ekufak se edianarede enim enɔ Abasi, eke edidianarede ke otu owo; yak ekutre ndiwot.
30Ndien ŋko kpukpru ubak kiet ke itie duop ke ofuri isɔŋ, edide mkpasip iŋwaŋ, onyuŋ edide mfri eto, enyene Jehovah: enye edi edisana ŋkpɔ Jehovah. 31Ndien edieke owo oyomde ndifak ubak kiet ke itie duop oro, yak enye ada ɔyɔhɔ ubak ition ɔkɔrɔ ke esit. 32Ndien ama edi ɔyɔhɔ duop ke otu enaŋ, ye ke otu ŋkpɔ ŋkpri ufene, se isuk ididi eke asaŋade ke idak esaŋ ebe, ɔyɔhɔ duop edidi edisana ŋkpɔ Jehovah. 33Enye okuse mme edi eti mme edi idiɔk, okunyuŋ ɔkpuhɔ enye: ndien edieke ɔkpuhɔde enye, enye ye se edade ekpuhɔ enye edidi edisana, ekufak enye.
34Mme mmɔ emi edi mme ewuhɔ emi Jehovah okowukde Moses, ɔnɔ nditɔ Israel ke obot Sinai.
Currently Selected:
LEVITICUS 27: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.